去日本、去台灣，行便利店似乎已經成為指定行程，最新嘅雪糕、甜品、朱古力等通通都充滿驚喜，係咁易行個圈就收穫豐富。不過，大家又唔使羡慕人哋嘅，識得搵，其實喺香港嘅便利店一樣可以尋到好多寶！就等開飯仔微服出巡，時不時幫大家留意住最新、最吸引嘅新品啦。
***12月30日更新***
7-11 可口可樂 雲呢嗱味
各位可樂迷，試咗呢隻日本全新推出嘅雲呢拿味可樂未先？好香濃嘅雲呢嗱味，好甜身~
7-11 熱朱古力
一到冬天總係好飲返杯熱朱古力（雖然而家都未係好凍），去便利店搵啲即沖即飲嘅都好方便。Hershey’s嗰款香濃幼滑，Swiss Miss嗰杯仲有埋 棉花糖添，又暖又甜。
Circle K 少爺手工啤酒
Sanrio呢期好紅呢~ 本地啤酒廠少爺都同佢哋聯名合作，推出Hello Kitty雪糕蘋果批手工啤同埋烈子和風香辛手工啤，兩個罐裝都超可愛呢~ 有別於少爺一貫精簡嘅風格，值得收藏同入手呀。前者加入咗焦糖蘋果，甜甜地中又有啲肉桂香；後者係清爽嘅lager，但飲到最後又會有少少辣度由喉嚨滲返出嚟呢。
Circle K 酒心朱古力
呢兩款由德國直送嘅酒心朱古力，啱晒酒鬼啊。一款係氈酒、一款係vodka，甜甜嘅朱古力中間一咬開，就流出醉人嘅酒香~ 嗯~ 食粒朱古力啫，唔會醉嘅。
***12月11日更新***
7-11 Hello Kitty 3.7北海道牛乳包‧花生朱古力醬
Hello Kitty粉繼續要出動，呢個Kitty麵包用上北海道3.7牛乳同日本麵粉製作，口感鬆軟，中間仲有個大大個Kitty頭像喺度，so cute。另外有獨立包裝嘅花生醬同朱古力醬，要幾甜都可以自己話事。
7-11 焦糖脆脆雞蛋布丁波波
好多甜魔都好鍾意焦糖雞蛋布甸呢樣甜品，便利店有得買就方便得多啦~ 用牙籤拮穿個波波，再自行加焦糖脆脆灑面，又滑又甜。
7-11 朱古力忌廉夾心鯛魚燒
夾住比利時朱古力醬嘅鯛魚燒，雖然「膚色」就黑咗少少，但係味道濃甜，作為飯後甜品或下午茶小食都算稱職。
各大便利店 Spoona純‧凝酪
呢款乳酪唔單止換上《魔雪奇緣2》新包裝，仲一口氣推出兩款新味：士多啤梨同熱情果味！最啱就係畀小朋友當零食，因為口感滑溜夠易食，亦無添加色素、無防腐劑。加上係低脂配方，活性乳酸菌又可以促進腸道健康，都好適合辦公一族呀。
各大便利店 香蕉意式冰凍甜品、薑粒意式冰凍甜品
兩款Gelato口感都好軟滑，香蕉味Gelato用香蕉低脂牛奶飲品製造，香味同甜味都相當自然。而薑味Gelato更加入薑粒，入口冰涼但咬落就有辛辣後勁，好過癮！
各大便利店 Dreyers柚子雪糕杯
如果各位雪糕控有印象，應該會記得佢哋夏季嗰陣出過日式柚子扭紋甜筒，而家出埋杯仔啦~ 以日式柚子醬、牛乳製成，仲有啖啖柚子果肉，微甜清香。
7-11 珍寶珠百變玩樂珠
細個嗰陣好多人都鍾意嗒住支珍寶珠，而家想回味返童年嘅味道都冇問題，而且仲多多隻玩具添，係人見人愛嘅Line Friends呀，一套10款，睇下你哋抽中邊隻啦。
7-11 天仁茗茶爆米花（新口味）
呢間茶飲店耐唔耐都會出下新口味嘅零食，最近就出咗兩款爆谷，味道都好特別下，分別係朱古力鐵觀音味同酸忌廉洋蔥綠茶味，前者甜甜der，後者酸中又帶鹹，不過硬係覺得配落爆谷度就有少少違和感。
7-11 卡樂B薯片（新口味）
薯片控好忙，一次過要試幾款新味。香港地道美食系列嘅有蝦醬味同金蠔味，不過兩者嘅味都係聞落較食落突出；另外仲有美式水牛城雞翼味，呢隻就真係幾似，辣辣地幾好食；至於Premium版就用上Premium嘅材料——真‧黑松露！厚度加倍嘅松露帶子味，香口得嚟仲好有口感。
7-11 固力果百力滋（新口味）
固力果聯乘滿記，推出咗兩款以香港地道甜品為主題嘅百力滋，芒果白雪黑糯米有淡淡嘅芒果味，楊枝甘露呢則將呂宋芒同泰國甘柚嘅甜味混合，BTW想食到「甜品」味就要畀多啲想像力喇科科。
***11月29日更新***
各大便利店 OREO三文治
繼雪糕杯同脆皮雪糕批之後，今次OREO出三文治！外層係OREO軟曲奇，夾住OREO曲奇忌廉冰凍甜點，個餡食落冰凍柔滑，感覺好似雪糕！便利店有110mL嘅單件裝，超級市場就會有家庭裝，一盒有6件55mL嘅迷你版，細細件Bite Size更方便食。
***11月28日更新***
Circle K Lavelee 生朱古力雪糕批
喺韓國熱賣嘅生朱古力雪糕批嚟咗香港啦~ 外層係特濃牛奶朱古力雪糕，內層則係生朱古力，口感幼滑，仲好濃味添，可惜太細條啦。
Circle K Lavelee 士多啤梨鮮果乳酪雪糕杯
同樣都係由韓國直送嘅雪糕，折開包裝袋仲有多個包裝，杯內嘅雪糕，以真‧士多啤梨果肉粒、士多啤梨果醬、乳酪雪糕合成，啖啖都酸酸咪咪，少少甜啦。
7-11 Hello Kitty包點
7仔呢排除咗同Sanrio合作，儲印花可換一系列嘅陶瓷碗碟外，仲新出咗兩款Hello Kitty包點！Hello Kitty楓糖牛油味班戟上印有Kitty個頭像，pancake鬆軟，但味道略為甜咗少少；至於Hello Kitty朱古力包，則係成個Kitty頭像造型，採用日本製朱古力夾心，都係好甜啊。
***11月20日更新***
各大便利店 日清湖池屋X譚仔薯片
山小辣唔再淨係米線等級嘅專利喇，而家連薯片都有分級喇！日清潮池屋激辣魔薯最近聯乘譚仔同譚仔三哥，分別推出麻辣味（3小辣）同煳辣味（5小辣）薯片，兩款都係波浪紋薯片，食落有幾分似原本嘅米線湯底，辣喉㗎都，同埋愈食愈鹹。
7-11 明輝黃金蝦味蝦片
印尼期間限定口味，每塊蝦片都有好多鹹蛋黃粉，係有淡淡鹹香嘅，但鹹蛋味唔算好突出。
各大便利店 聖誕增量版薯片叔叔
薯片叔叔都要換聖誕裝啦，三款冬日限定包裝包括原味、酸忌廉洋蔥味同多重芝士，芝士控一定要試啊，啲芝士粉係mix埋咗日車打芝士、忌廉芝士、水牛芝士同巴馬臣芝士4款芝士製成㗎，好濃郁。而且每筒仲增量20%，可以食多幾塊咯。
***11月8日更新***
各大便利店 Kit Kat袋裝朱古力
秋天就係要食蕃薯同栗子嘅季節，朱古力威化都要加裝，兩款都係以白朱古力做外層！蕃薯餡嗰隻好香甜，好得人鍾意；至於栗子嗰款，就略嫌唔夠突出，畀白朱古力嘅甜搶走咗啲味。
7-11 麥提莎松露朱古力禮盒
為下個月嘅聖誕做準備，各大品牌嘅朱古力陸續推出禮盒裝。麥提莎仲有新口味添，內餡係松露朱古力軟心加朱古力脆粒，係幾有驚喜啊。
7-11 品客薯片
口痕時總會想搵薯片咬下，薯片叔叔最近出咗兩隻新味，一隻係將已有嘅酸忌廉洋蔥升lvl，變成2倍版，加入更多酸忌廉，酸得更過癮！另一隻則係美式辣醬牛排，辣喺條脷度嘅。
7-11 Tirol珍珠奶茶朱古力
大眾飛佛嘅珍奶，又化身變成零食啦，今次呢隻珍珠奶茶朱古力，係由奶茶味嘅朱古力，包住幾粒黑糖味嘅橡皮糖，不過口感就唔太似，黑糖味唔算太濃，但有一樣十足珍奶嘅，就係都係好甜。
***10月30日更新***
7-11 雲呢嗱千層蛋糕
便利店內藏唔少甜品㗎，新出嘅雲呢嗱千層蛋糕就係其中一款，層層蛋糕皮中間，夾滿北海道牛奶忌廉，食落奶味幾濃郁，係啲蛋糕皮略為厚咗少少。
7-11 天仁茗茶 爆谷
呢間茗茶店又出爆谷啦，今次係香芋珍珠奶茶味同黑糖鐵觀音薑茶味，前者用阿薩母紅茶結全奶醬同香芋製作，帶有淡淡芋香；後者則用鐵觀音加入黑糖薑茶，先甜後微辣，食下一甩食下一甩好快清袋。
7-11 卡樂B 宅卡B 芝士煙肉薯條
呢隻新口味芝士煙肉味薯條，鹹香脆口，好香煙肉味，可惜每包都太細包啦，一次過食幾包都唔夠喉。
各大便利店 Haagen Dazs
食雪糕無分季節，開party就更加要食啦。Haagen Dazs帶嚟節日版冰袋套裝，Toy Story 4同Frozen嘅粉絲記住要入手啦~ 每款冰袋內有11款雪糕，當中包括最新嘅煙韌麻糬系列同脆皮雪糕批等。另外有幾款口味更有節日特別版包裝，杯蓋上印有祝福呢。（不過Frozen版就要等到11月尾先開始賣啊）
各大便利店 即食穀物乳酪
好多人食早餐時都會倒啲穀物落yogurt度一齊食，以後唔使煩喇，有兩款新出嘅即食穀物乳酪，唔使撈，直接食就得。低脂紫米及穀物乳酪以紫米、燕麥同小麥製成，而低脂奇亞籽及穀物乳酪 則加入奇亞籽、大麥及小米，口感豐富。
7-11 飯糰
飯糰一向係速食求飽肚朋友嘅恩物，以後又多兩款新口味選擇。一款係肉鬆、一款係芥末八爪魚，各有粉絲啊。
***10月18日更新***
7-11 7-SIGNATURE日本直送甜品
日本甜薯特別得人歡心，香甜嘛，呢兩款日本直送嘅甜品滿滿薯香，甜薯忌廉泡芙中間啲忌廉都係用鳴門金時甜薯製成，成個puff鬆鬆軟軟又唔會好甜；甜薯忌廉瑞士卷亦好香口啊，感覺唔太膩。
7-11 7-SIGNATURE日式小食
叮一叮就有兩款日式小食食啦，好方便~ 照燒三文魚腩選用挪威三文魚，都幾肥美，厚燒玉子則用日本雞蛋製成，微甜。
7-11 韓國直送 ACHIM雞肉
有玩開健身嘅朋友，成日都要食雞，呢幾款喺便利店就買到，仲要係即開即食嘅雞肉就相當方便喇。大大塊原味、煙燻雞胸肉又有，打孖上嘅香辣味雞胸肉腸都有，而且冇白烚雞胸咁寡，想操肌都有多啲食物選擇啊。
***10月15日更新***
各大便利店 Haagen Dazs麻糬系列
最新推出嘅麻糬系列，有法式焦糖布丁麻糬雪糕同北海道紅豆麻糬雪糕，前者加入香濃焦糖醬，啖啖都係甜香，間唔時仲有一兩粒煙韌麻糬咬下咁；後者除咗粒粒麻糬外，仲有粒粒紅豆，口感滿分。
Circle K 調酒可樂
呢幾支調酒專用嘅可樂，早前喺倫敦推出後，最近終於嚟咗香港！幾款口味包括適合濃郁威士忌嘅煙燻味、適合搭配陳年Tequilas或者甜威嘅辛辣味、同煙燻威士忌、清淡Rum酒好夾嘅木質味。記住唔好就咁飲啊。
7-11 可口可樂蘋果味汽水
可樂迷又有新嘢試，唔使飛過鄉下喇，由日本直送過嚟嘅蘋果味可樂，係有淡淡果香嘅。
7-11 Tapioca珍珠奶茶味軟糖
好多人都係珍奶fans，咁呢隻新出珍奶軟糖點睇？一粒粒珍珠造型，食落又真係有奶茶味喎，煙煙韌韌咁幾有咬口。下次可摸以叫杯奶茶之後配呢隻糖嚟食（誤）？
7-11 品客薯片
薯片叔叔又有3款新味，薯片控真係好忙，幾款都係海鮮小炒嘅味道嚟，包括夏威夷風蒜香蝦味、極上黑胡椒螃蟹味同蝦球味，都幾濃味下。
***9月27日更新***
各大便利店 雀巢 日式柚子乳酪
乳酪本身都帶有微酸，今次新口味仲要係日式柚子味，淡淡酸甜，偶爾會有啖食到粒粒柚肉。一次過出晒杯裝同飲品裝呀。
各大便利店 百事可樂X高達
各位高達迷，今次唔係買figure係買可樂喇！話說百事可樂聯乘《機動戰士高達》推出別注紀念罐呀！總共有4款包括高達、渣古II、馬沙專用渣古II同哈囉。兼且可以喺指定地點加錢換購一系列嘅限量版精品添——金屬工具箱（7-11）、折疊傘（Circle K）、汽車太陽擋（各大油站）。
7-11 台灣阿薩姆茶葉蛋
以茶葉同新鮮雞蛋滷製而成嘅茶葉蛋，而家喺便利店都買到啦，即拆即食又得，口感爽滑，鍾意整返熱佢先食都得，茶味更香。
7-11 Hershey’s朱古力批
韓國直送嘅朱古力批，以朱古力蛋糕包住棉花糖，濃甜到不得了。醒你多個食法，唔怕煩嘅就放入微波爐輕輕加熱，令到朱古力同棉花糖都變得溶溶地，就更加甜。
7-11 五色波波腸、可樂雞髀
呢幾粒串串波波腸又幾得意，仲要唔同顏色唔同口味，分別係德國風味、墨魚味、香辣味、咖喱味同原味，加多隻大大隻甜甜地嘅可樂雞髀，咁又一餐。
7-11 扎幌一番牛角監修牛肋骨味炒麵
連鎖日本燒肉店推出嘅即食炒麵，醬汁以牛肉為精華，有時癮起，唔使特登落舖頭或者飛日本，都可以隨手就有個麵食。
7-11 卡樂B
千島蝦堡味蝦條，清新微酸；咖喱炒蟹味粟一燒則有淡淡咖喱香，兩者各有捧場客，留意返，期間限定口味嚟。
***9月17日更新***
各大便利店 雀巢 檸檬茶冰條
檸茶唔止飲得，仲食得！最新出嘅雀檸雪條，外層有輕輕嘅茶香，中間夾心由檸檬醬凝固而成，雙重冰感，酸中帶甜咁，係好熟悉嘅味道，同平時飲開嘅雀檸冇乜分別。
各大便利店 維記 烤黃豆粉薑母雪米糍
黃豆粉雪米糍本身就已經有蕨餅嘅影子，煙煙韌韌，加埋薑粉仲微微帶辣，無論味道定包裝，都開始帶有秋意。
Circle K 維他奶 沖繩紫薯豆奶
期間限定嘅新味啊，係沖繩紫薯味，不過比想像中嘅味道較淡，紫薯控試完可能會有少少失望。
***9月13日更新***
7-11 日本直送甜品
中秋都過咗（雖然天氣仲好熱），但係開始栗子嘅季節啦。栗子忌廉銅鑼燒嘅外皮鬆軟富奶香，不過栗蓉味道就略為輕咗少少喇。栗子朱古力班戟亦差唔多，有微微栗香嘅，但朱古力比較搶鏡囉。
7-11 十勝大福本舖甜薯夾心糯米糍
呢款糯米糍包裝細細包咁，小心走漏眼啊。一包三粒，口感軟腍，甜薯味超香濃啊，薯控實鍾意，三粒都太少喇。
各大便利店 NESCAFE 新包裝罐裝咖啡
每日都要飲咖啡嘅朋友仔，去到便利店突然搵唔返熟悉嘅包裝？認住新罐啦，換咗新裝啊。金色嘅係香滑咖啡，啡色係香濃，黑色係濃香焙煎，而米白色嘅係歐陸奶滑。
7-11 Hot Shot全新粒粒水果茶
7仔都有即叫即沖嘅粒粒水果茶喇，選用凍頂烏龍做茶底，茶香突出，再加入以天然水果製成嘅果蓉，放埋粒粒生果喺頂，可以邊飲邊食。四款口味包括菠蘿味、青蘋果味、熱情果味、紅西柚味，有甜有酸，各有巿場。
***9月10日更新***
優品360 松露朱古力
松露朱古力本身都好受大眾歡迎，今次推出兩款酒心口味，就更加吸引。鍾意甜身啲嘅就揀Baileys啦，想要有少少甘澀酒香嘅就揀Guinness嗰款啦~
***9月6日更新***
7-11 波子汽水味雨滴啫喱
呢個雨滴啫喱拆出嚟成個淺藍色汽球咁，靚得嚟仲充滿玩味。附包裝附有支牙籤，拮穿外層嘅包裝，再淋埋特製嘅糖漿就食得。滑捋捋，係甜甜地嘅波子汽水味。
各大便利店 Dreyer’s 日式蘋果吉士泡芙味雪糕批
又又又有新雪糕，今個星期嘅新味輪到日式蘋果吉士泡芙味雪糕批，外層係朱古力兼有粒粒脆粒，入面包住嘅雪糕有淡淡蘋果清香，蛋香同牛乳味則較濃。
7-11 日清合味道 極辛大杯麵
間唔中口痕總係會想淥下個杯麵食，除咗長期飛佛嘅海鮮同香辣海鮮，可以試下最新出嘅極辛海鮮同極辛豬骨味！叫得極辛，當然加倍辣度啦，沖完熱水之後，就見到紅噹噹嘅辣浮晒面lu，好刺激。
各大便利店 M&M’s 焦糖牛奶朱古力
細細個就開始食嘅M&M’s 朱古力，食到今時今日仲有新口味登場！藍色包裝盒嘅焦糖牛奶味，同其他M&M’s 一樣，外殼脆皮包住牛奶朱古力夾心，而核心嘅核心，係微甜得嚟仲可以做到微微拉絲嘅焦糖軟心！
7-11 7 Premium 新系列
7仔又引入咗9款日本直送嘅小食，包括有牛肉乾、洋蔥脆片、葡萄柚啫喱等。其中用鱈魚製成嘅芝士魚肉腸，仲加咗車打芝士、高達芝士、貢佐拉芝士同帕瑪森芝士4款芝士咁多，啖啖都有濃郁芝士味呢！另外牛奶、朱古力味嘅泡芙口感鬆軟，唔覺唔覺好快就清晒一包。
7-11 樂事+卡樂B 薯片
薯片控最鍾意就係見到有新薯片就要試，今期一次過有三款新嘢你哋試啊！鍾意紫菜嘅就要夏風海苔味薯片啦，另外兩款雞味，Lays嗰隻就係厚切大波浪嘅煎雞柳味，卡樂B則係口感較硬身嘅雞翼味，後者嘅醬汁味好濃，但相對略為鹹咗少少。
7-11 7 Signature日式麵包
唔少人早餐都鍾意買個包食，呢幾款新口味嘅日式麵包，用100%日本麵粉同埋日式烘焙方法製作，分別係富良野蜜瓜包、朱古力白玉包、日式咖喱牛肉包同北海道3.6牛乳包，口感鬆軟，朱古力白玉嗰個入面仲有麻糬添。
***8月20日更新***
7-11 迪士尼卡通連小食
卡通嘢幾時都咁有巿場，今次仲要係迪士尼添~ 呢4隻毛絨公仔pat pat好搞笑啊，入面仲有包棉花糖，鍾意富貴貓、史迪仔、Chip或者康老鴨嘅就啱晒。另外，小豬、伊唷、小熊維尼、跳跳虎嘅4個圓罐內，就有草莓味餡餅。
7-11 醜比頭白桃甜品
呢隻粉紅桃醜比頭雖然好醜，但又收埋收埋唔少fans喎。今期仲化身成為白桃甜品添。白桃啫喱忌廉泡芙同白桃忌廉瑞士卷都係日本直送，食得到啖啖果肉㗎。
各大便利店Häagen-Dazs Barista系列
哈根大師又有新口味喇，四款新味包括：朱古力蛋糕咖啡雪糕、朱古力蛋糕咖啡脆皮雪糕批、香濃咖啡脆皮雪糕三明治同牛奶日式焙茶雪糕。朱古力蛋糕咖啡雪糕用上巴西咖啡豆製作，再加埋濃郁咖啡醬同粒粒朱古力布朗尼蛋糕，堅果味突出之餘口感又豐富，咖啡控愛死了。至於焙茶嗰隻，幼滑甘香，仲有牛油曲奇粒同朱古力醬。
各大便利店 DREYER'S REAL DELIGHT乳酪條系列
成日心思思想食雪糕但又怕肥，呢個新出嘅乳酪系列，每條雪條只係得80幾kcal，或者可以減低少少罪惡感？暫時有士多啤梨乳酪味同藍莓乳酪味，都係以真‧果蓉製作，味帶微酸。
7-11 富蛋手工鹹蛋酥
又一台灣人氣手信抵港喇！手工鹹蛋酥細細塊，一啖一塊，但就好香鹹蛋味，口感酥脆，忍唔住食完一塊又一塊呢。雞蛋盒嘅包裝仲好鬼過癮添。
各大便利店 固力果紅酒朱古力百力滋
細細個食到大嘅百力滋，除咗進化出多款口味外，仲進化到中間變成夾心餡。今次呢3盒分別就係紅酒朱古力、抺茶慕絲同士多啤梨香草味。甜甜地，啪啪啪好快就食晒一盒。
7-11 珍珍 南乳豬手味薯片
薯片控又有幾款新口味薯片要試喇。地道港式口味嘅南乳豬手，配上特製南乳粉，隻味又幾似食緊道餸咁，南乳特有嘅鹹香令人留下深刻嘅印象。
7-11 品客薯片x小老板 紫菜/辣紫菜味
另一款新口味係聯乘泰國人氣紫菜品牌，兩個Brand大玩cross over，出咗紫菜味嘅薯片同薯片味嘅紫菜，頗有玩味。一塊塊脆口嘅薯片上，可以見到粒粒紫菜碎咁，不過食落嘅紫菜味就唔算話太突出。
7-11 Oreo日本系列脆餅朱古力/雲呢嗱慕絲味
成日話Oreo好甜，但又偏偏有好多人就係鍾意佢夠甜。今次出咗隻得3mm厚度嘅脆餅，薄咗又再脆口咗。另外，同時仲推出咗紅絲絨蛋糕味，顏色氹到女生之餘，感覺亦冇咁甜膩。
7-11 明太子沙律x玉子燒飯糰
有時貪方便或者求快，就會買個飯糰填肚。呢個新口味嘅飯糰應該hit中好多人嘅喜好，明太子沙律加玉子燒，用鰹魚湯煲過嘅飯去製成米粒，啖啖鰹魚香中又帶有微辣。
***7月30日更新***
Circle K Skippy花生朱古力雪糕批
韓國大熱嘅Skippy花生朱古力雪糕批嚟到香港！朱古力脆皮上面已經有粒粒花生碎，咬開裡面係柔滑雪糕同Skippy花生醬。花生醬香味唔算好突出，不過花生醬同朱古力呢個配搭真係無得輸嘅。
各大超市 家樂氏 X Hershey’s 香濃黑朱古力焦糖脆
韓國大熱早餐一樣嚟到香港，鬆脆焦糖脆皮加上香濃黑朱古力軟心，口感豐富。而官方推介兩種食法，一、就咁當零食食，二、加牛奶當早餐，各有風味。
7-11 Binggrae蜜桃荔枝牛奶
呢個牌子嘅香蕉奶可能大家都飲過，其實佢哋一直推出唔同特別新口味，好似呢個蜜桃荔枝牛奶唔單止聽落就覺得夠Sweet，包裝仲以Pantone 2019年代表色Living Coral為主！飲落荔枝香比較突出，無想象中咁甜。
7-11 賈以食日麻花麵、燒椒麵
品牌舊年由台灣藝人賈靜雯創立，麻花麵嚴選日曬手摺細麵，配香醇白芝麻醬同大紅袍花椒油，凍食熱食都得！而燒椒麵糅合郫縣豆瓣同台灣辣豆瓣，香、麻、辣三合一。
7-11 森永反斗奇兵夾心餅
反斗奇兵Fans必買，有朱古力同士多啤梨兩款大路口味，最重要係每塊餅上都印有人氣角色，療癒度十足。
7-11 維他奶薄荷朱古力味豆奶、維他青檸檸檬茶飲品
期間限定嘅薄荷朱古力味豆奶強勢回歸！朱古力味唔算好濃，反而真係有啲薄荷嘅清涼口感。而青檸檸檬茶就以紅茶為茶底，加入青檸同檸檬，味道更清爽。
***7月25日更新***
7-11 十勝大福本舖波子汽水味蕨餅糯米糍
蕨餅糯米糍本身就好受煙韌控歡迎，呢次出咗隻波子汽水味，都應該幾多好奇心重嘅朋友仔會想試下。淺藍色嘅糯米糍，食落都真係波子汽水嘅感覺，酸酸地，甜甜地，係青檸同檸檬嘅味道。
7-11 金鴨麻辣火鍋什錦脆片
呢個人氣品牌愈出愈多products，最新嘅有呢隻麻辣火鍋什錦脆片，入面有酥脆魚皮、脆香腐皮、香辣雜菇等等，入口先係有麻嘅感覺，再慢慢feel到啲香辣味滲出嚟，都咪話唔似食緊麻辣火鍋，啱晒辣椒仔女過口癮。
***7月10日更新***
7-11 微熱山丘D24榴槤蛋捲
早前台灣新出嘅微熱山丘D24榴槤蛋捲，引入咗嚟香港啦~ 榴槤控仲等咩？呢款蛋捲係微熱山丘馬來西亞品牌FORBIDDEN嘅product，蛋捲內啖啖榴槤果肉，陣陣飄香，想靜靜雞偷食應該有啲難度啊科科。
各大便利店 雀巢Pink Black 甜筒
雀巢甜筒換新裝，全新Pink Black 系列，由個cone到球雪糕都係同一色系，型格全黑嗰支係曲奇味，少女心粉紅色嗰隻係士多啤梨味~
7-11 海膽小食系列 – 日本直送
係好多人都鍾意嘅海膽啊！整埋做小 食~ 米餅又好，薯片又好，餅乾、鯛魚干同魷魚絲都好，全部都係海膽製！唔算好濃但都嗒到微甜嘅，作為海膽控都會想試下。
***7月3日更新***
7-11 反斗奇兵4精品+食品
無論大人定細路哥，都對就嚟上映嘅《反斗奇兵4》充滿期待，由細睇到大感情係深啲嘅。身為粉絲，呢排就要大出血啦，周圍都出咗勁多佢哋嘅products。最就手嘅當然係便利店啦~ 兼且又有得睇又有得食添~ 三眼仔牛仔袋，新角色賓尼帆布袋呀等等都好靚，全部都有餡der，有啲係小麥餅，有啲係朱古力或者糖果……好想全部帶晒佢哋返屋企呀嗚呀！
***6月28日更新***
各大便利店 雀巢 絲滑奶茶雪糕杯
各位奶茶控又多樣奶茶嘢食啦~ 呢款奶茶雪糕杯，口感順滑，茶味甘醇突出，亦帶有奶香，都幾似喺茶記飲到嘅奶茶啊。
各大便利店 Pringles「在地好滋味」系列
呢期啲薯片新口味，唔知點解好鍾意用菜式做變奏。最新嘅有薯片叔叔嘅糖醋牛小排同蒜頭蝦口味，前者酸酸甜甜，後者蒜香濃郁，有淡淡蝦鮮味，都幾有驚喜。送住酒食仲開心。
各大便利店 可口可樂能量飲品
巿面上都有唔少能量飲品，但要滿足到可樂迷嘅，應該只有呢隻！可口可樂推出嘅可口可樂能糧飲品，都真心有可樂味嘅，甜甜地，但當然都mix咗能量飲品嘅特性——微酸啦。仲有有糖同無糖兩種選擇，飲多幾罐都唔怕肥（好似係）。
***6月26日更新***
7-11防彈少年團熱釀咖啡
之前出過嘅冷萃咖啡，BTS粉絲儲晒樽未先？未都幫你唔到，又有新一輪嘅樽要儲啦。今次暗紅色嘅呢幾支，係熱釀咖啡嚟，同樣都係有晒佢嘅嘅靚仔樣喺度㗎嗚呀！
***6月14日更新***
各大便利店 Haagen Dazs 雪糕杏仁脆筒
天口熱，成日都想食雪糕降降溫。Haagen Dazs又出新款，仲要係雪糕杏仁脆筒！終於有cone喇！三款口味分別係雲呢嗱焦糖杏仁、抹茶同朱古力杏仁，唔止脆筒邊邊有層比利時朱古力醬，雪糕球上仲有粒粒杏仁朱古力碎粒，多重口感，係球雪糕球細咗啲囉……6月17號起有得食。
7-11 新加坡直送 F.EAST薯片
薯片口味愈嚟愈多，呢三款新加坡直送嘅薯片，就取材自幾款亞洲美食，分別係海南雞飯、喇沙、咖喱魚配雞蛋印度薄餅味。是咪想像唔到？勇士買嚟自己試啦科科。
7-11 Jolly Tasty shake shake 蝴蝶酥
薯條有shake shake、薯片有shake shake，而家連蝴蝶酥都有shake shake！本地手工製嘅蝴蝶酥幾酥脆，期間限定口味有雙重芝士黑椒味、黑松露味，落完粉 shake幾下，前者黑椒味幾重，蓋過咗淡淡嘅芝士；後者嘅松露味都算突出。
7-11 蜘蛛俠x 多樂脆粟米片、樂事薯片
蜘蛛俠齣戲就上映，最開心一定係一班粉絲，有好多產品聯乘呀！好似多樂脆粟米片波士頓香蒜蝦味、辛辣味粟米片嘅包裝都係spiderman，Lays嘅燒烤同海苔味薯片亦都變咗裝，係型嘅。
***6月6日更新***
7-11 北海道富良野蜜瓜忌廉瑞士卷+北海道富良野蜜瓜忌廉閃電泡芙
兩款甜品都用咗北海道富良野蜜瓜製作嘅忌廉，瑞士卷用鬆軟蛋糕包住，甜度適中有蜜瓜香。閃電泡芙嘅忌廉外賣就係朱古力脆皮泡芙，不過朱古力甜味略為搶走蜜瓜香咁囉。
***5月31日更新***
各大便利店 珍珍Shake Shake 鹹蛋味薯片
呢一兩年好興鹹蛋整嘅嘢食，由細食到大嘅珍珍都忍唔住要加入呢個潮流，新出咗包SHAKE SHAKE鹹蛋味薯片！包裝內有一包原味薯片，同一細包鹹蛋黃調味粉，然後shake幾shake就食得。不過溫提一句期望唔好太高，鹹蛋味唔算好濃咋……
7-11 日本直送焦糖布甸類飲料
聽到焦糖呢兩個字，甜魔雙眼已經發光。但唔好咁心急即刻開嚟飲住，先搖勻7下再開，焦糖布甸就變成啫喱啦，混埋北海道鮮奶忌廉，奶味勁濃。啖啖都啜到滑捋捋嘅啫喱添呀。
7-11 韓國直送 Tom’s Farm杏仁
做緊嘢時總係想搵啲嘢咬下咬下，呢幾包杏仁可以係個選擇，一嚟細細包，二嚟係韓國直送嘅新款口味，包括朱古力曲奇、Tiramisu同埋星際爆炸糖味，感覺幾新奇。爆炸糖嗰隻，口感都幾似爆炸糖。
***5月24日更新***
7-11 日本直送Häagen-Dazs雪糕
哈根大師呢兩款雪糕都係日本直送㗎，恭喜呢排未有機會返鄉下嘅朋友仔都食得到！一打開蓋就會「嘩」一聲，因為好多粒粒鋪喺面，感覺好豐富。抹茶芝士曲奇嗰隻就係抹茶芝士扭紋雪糕再加抹茶醬，甘濃細滑，陣陣芝香，係好清純嘅抹茶味；而杏仁焦糖曲奇則肯肯定係甜魔之選，焦糖奶油雪糕都未夠甜，仲要加埋焦糖醬，甜中帶甘，一食即上癮，面層有曲奇有杏仁，堅果鹹香味同口感好rich。
7-11 天仁茗茶香橙綠茶雪葩+鐵觀音雪糕
天仁茗茶又出雪糕喇，香橙綠茶雪葩口味好啱夏天，酸酸甜甜同埋感覺幾light，綠茶味就相對淡少少；至於鐵觀音味則使用頂級鐵觀音磨粉，再加入北海道濃厚牛乳，所以食落除咗有甘醇嘅茶香之外，口感仲好軟滑。
***5月22日更新***
各大便利店 卡樂B – 香港地道口味
由細食到大嘅卡樂B，愈出愈多味，嚟緊5月底仲準備出兩隻香港地道口味——深井燒鵝同細蓉味！到底平時食開嘅燒鵝同雲吞麵變成薯片，會係咩味？想像唔到呢？開飯仔試咗喇，前者好重炭燒同醬汁嘅味道，不過好努力咁想像都未必食得出係燒鵝啦；後者就有淡淡蝦肉味，鹹中又有微甜咁，都幾搞笑。
***5月17日更新***
Circle K Skippy花生醬雪條
個個見到呢條花生醬雪條都會即變心心眼，好想買返條嚟試。開飯仔都唔例外，只係一句「期望別要太高」。雪條偏軟身，外層奶味較高，中間有花生醬餡仲要係粗粒嘅，鹹鹹甜甜咁但未算有驚喜。
Circle K 榮屋 抹茶布甸條
抹茶控心軟系列，又一條抹茶雪條面世，雖然個名話就話布甸，但都唔覺有特別布甸質感，有帶微甘嘅茶味，唔會話太甜咁啦。
Circle K 森永 芝士雪糕棒
感覺唔太膩嘅芝士味雪糕，配埋脆脆地嘅餅底食，口感即刻又豐富咗，可以一試。
7-11真 水蜜桃鮮果雪條
每年夏天都係水蜜桃嘅季節，除咗食個多汁嘅生果，食返條堅用果肉製嘅雪條都有夠爽。呢條雪條，淡淡水蜜桃果香之外，仲有粒粒真‧果肉，係幾開心嘅。
7-11 DELI FRESH全新冷壓果汁
時下興冷壓果汁，呢個品牌亦推出咗兩款新口味，分別係酸酸甜甜嘅芒果加蘋果加熱情果，同埋雙色鮮奇異果汁，即係金奇異果加青奇異果，夠晒清甜解暑又感覺健康。
Watson’s 蘇打水
有時就咁飲水覺得好dry，會想飲下啲有味/有汽水，soda water可以係個選擇。有兩款新口味登場，分別係無糖零卡路里嘅鹽味蘇打水同低糖蜜桃味蘇打水。前者少少鹹多多爽，後者雖則甜低但仍有蜜桃本身嘅清甜味。
***5月15日更新***
各大便利店 固力果 芫荽味百力滋
嚟緊有好「荽」食喇！使用真‧芫荽製作嘅芫荽味百力滋，即將登場，一打開包裝已經聞到超重嘅芫荽味，怕嘅人彈開，鍾意嘅人就會起勢索！條條百力滋都青BB，沾滿住芫荽粉，食落口唔使問，重！口！味！夠晒濃啊！
***5月14日更新***
各大便利店 Pringles泰式冬蔭功味薯片
夏天又準備到，好係泰國嘢嘅天下，就連薯片叔叔都唔執輸，推出全新泰國特色口味——冬蔭功！每片薯片橙橙地係有啲色水，味道酸酸地，微辣，都幾開胃。
各大便利店 雀巢 Cold Brew即飲裝咖啡
每日都要飲杯咖啡嘅朋友，又有新選擇喇。潮流大興嘅冷萃咖啡都有即飲版！兩款口味分別係醇黑咖啡同雲石牛奶咖啡，前者無糖，盡量保留到咖啡原有香氣、味道香醇；後者奶味較濃，入口順滑。
7-11 BTS美式冷萃咖啡
有冇BTS粉絲喺度？有好消息呀，唔使飛韓國都買到喇今次！男團防彈少年團嘅靚仔樣，印咗上呢款美式冷萃咖啡樽上呀，一系列7個齊晒！要儲樽咯！
***4月29日更新***
7-11 百利甜酒雪糕批
各位Baileys迷可能仲對早前出過嘅家庭裝雪糕念念不忘，唔使心掛掛喇，嚟緊5月1號又有新嘢出，今次係Baileys雪糕批呀，酒精濃度不過係0.4%，唔使怕醉喎，濃厚朱古力外層包住100%新鮮澳洲牛奶製嘅Baileys雪糕，堅係吸，係細條咗少少囉。
Haagen Dazs 清新果味雪糕
準備投奔初夏，哈根大師出咗兩款清新口味嘅果香雪糕，分別係酸酸咪咪嘅柚子香橙雪糕同酸甜嘅奇異果芒果乳酪雪糕，後者仲加入咗真‧奇異果肉，食嗰陣連粒粒奇異果籽都咬到，好有口感，行過各大便利店同超巿就搵下啦。
雀巢黑牛朱古力
黑牛呢樣經典港式飲品，嚟到2019年，變奏成雪條口味！外層係可樂味，裡面係朱古力味雪糕，一啖兩種味，夠爽夠涼，各大便利店同超巿都有。
7-11 廣島蠔醬油飯糰
想食個又快又平嘅便利lunch，7仔飯糰都係口袋名單中嘅一員。最近新出咗廣島蠔醬油口味，每個飯糰都有原隻廣島蠔，叮一叮熱就食得，連啲飯都滲有蠔嘅香味，啖啖鮮甜啊。
***4月4日更新***
Dreyer's 日式柚子扭紋脆筒
雪糕以牛奶同濃郁柚子醬製成，柚子味道酸甜，超級清新。甜筒面頭有杏仁碎同朱古力，口感香脆豐富。
銷售點：各大超市及便利店
Circle-K 樂天荔枝雪芭雪條
混合荔枝、芒果同椰子味，配搭酸甜清新，入面仲有粒粒果肉，食落有咬口。
開售日期：4月11日
Circle-K 樂天藍莓芝士雪條
外層係白朱古力芝士脆皮配脆脆粒，口感香脆。而內層芝士雪糕夾雜藍莓醬，味道酸甜豐富。
開售日期：4月11日
Circle-K 樂天士多啤梨芝士蛋糕雪條
雪條分2層，上層係幼滑雲呢拿雪糕，下層係士多啤梨雪糕配粒粒芝士蛋糕，一條雪條食到2款口味，富層次感。
開售日期：4月11日
7-11 Binggrae Melona蜜瓜味唧唧冰
一向主打 Melona雪條嘅Binggrae，今次推岀Melona同系列嘅蜜瓜味唧唧冰。唧唧冰蜜瓜味香濃但偏甜，沙冰口感超級消暑。
Circle-K KAKAO FRIENDS快餐食品
KAKAO FRIENDS嘅熱潮吹埋嚟香港啦！今次便利店同韓國KAKAO FRIENDS合作，推出一系列嘅KAKAO快餐食品。包括APEACH夾心飛碟、RYAN三文治、拉麵同MUZI杯麵，仲有桃味同芒果味嘅啜啜啫喱，全部都可愛到唔捨得食啊！鍾意KAKAO嘅朋友快啲去搶購啦～
***4月3日更新***
7-SIGNATURE 抹茶忌廉泡芙
7-11同伊藤久右衛門聯乘推出嘅抹茶泡芙，採用咗宇治抹茶製成抹茶忌廉，茶味回甘，同充滿蛋香嘅泡芙好夾。
7-SIGNATURE 抹茶忌廉瑞士卷
同樣係聯乘系列嘅抹茶甜品，特製嘅抹茶忌廉甜而不膩，有淡淡奶香。而外層嘅抹茶蛋糕濕潤軟綿，入口香甜軟熟。
***3月27日更新***
7-11 期間限定點心車
話說仔推出咗14款全新點心，包括蒸餃、包點、牛肉球、鮮竹卷、燒賣等，全部一叮就食得。仲由即日起至4月3日期間，7仔茶車會遊走港九新界，兼送免費點心換領券。
***3月21日更新***
7-11 珍珍XO醬炒蘿蔔糕味薯片 
飲茶時你一定食過XO醬炒蘿蔔糕，而家珍珍將佢變成薯片，食落有微微XO醬辣味，但蘿蔔糕味唔明顯，畀鹹味蓋過。
7-11 天仁茗茶全新口味爆谷 
珍珠奶茶控召集！天仁茗茶爆谷系列推出全新口味，分別係黑糖珍珠奶茶味同鐵觀音焦糖味。黑糖珍珠奶茶爆谷混合奶茶同珍珠2款味道爆谷，奶白色嘅奶茶味爆谷滿滿香甜奶茶味，而啡色嘅珍珠味爆谷食落有黑糖甜香，兩款爆谷混埋一齊食，完全呈現到黑糖珍珠奶茶嘅精粹。而鐵觀音焦糖爆谷入口時先會品嚐到焦糖甜味，慢慢再有茶味滲透，味道有層次感。
7-11 辣子雞味粟一燒
鍾意麻辣嘅朋友有口福啦！卡樂B推出辣子雞味粟一燒，食落有陣麻辣香，雞味都非常濃郁，完全呈現到辣子雞嘅精粹啊。
759 日清湖池屋杯裝薯條
合味道又有新驚喜比大家，繼先之前出薯片之後，今次推出出前一丁麻油味同合味道香辣海鮮味杯裝薯條。薯條非常脆口，麻油味同香辣海鮮味好突出，配上薯香都幾夾，不過兩款杯裝薯條都偏鹹，比較適合重口味嘅朋友~
各大便利店 雀巢MEGA榛子朱古力味雪糕批
之前雀巢以期間限定形式推出過MEGA榛子朱古力雪糕批，結果大受歡迎，所以佢而家回歸啦！雪糕批外層係鋪滿粒粒餅乾碎嘅朱古力脆皮，入面係榛子朱古力味雪糕，濃郁朱古力味帶淡淡榛子香，食落超夾，朱古力控萬勿錯過啊！
***3月20日更新***
Circle K 午後之紅茶x固力果
今次係午後之紅茶x固力果合作嘅產品，午後紅茶同Pocky合拼埋一齊後係課室情景嚟，仲有好多唔同配搭，好青春啊，買嚟表白就啱晒！而Pocky就係咖啡朱古力味，咖啡味相對就突出啲，鍾意咖啡嘅人要試下～
***3月13日更新***
7-11 一風堂 盒裝生麵
好多人都鍾意食拉麵，而家仲可以喺便利店買返屋企自己泡製啦~ 有白丸同赤丸兩款招牌口味，兩款嘅豚骨湯底都香濃嘅，要辣定唔辣就自己決定啦。
7-11 PREMIUM 日式甜點
最近佢哋一次過引入咗6款日式輕食甜品，全部獨立包裝好方便，早餐、下午茶或者隨時肚餓口痕想食都得。栗子日式饅頭入面仲有原粒栗子添！另一款就係雞蛋口味，將蛋黃加入豆蓉內；長崎蛋糕鬆軟濕潤，富有蛋香同蜜糖甜味。
***3月4日更新***
7-11雀巢KitKat朱古力X迪士尼儲物筒
姑勿論呢4個罐裡面裝咗啲咩，迪士尼粉絲本身應該已經會好想要嚟收藏，而家仲要內藏2包KitKat朱古力就更加多個藉口畀自己啦。不過只得米奇、 米妮、唐老鴨同Daisy四款。
***3月1日更新***
7-11森永岩鹽牛油焦糖雪糕
又有新雪糕，呢隻岩鹽牛油焦糖雪糕，岩鹽味好突出，入口一陣鹹味過後就輪到濃郁嘅焦糖爆發，每啖都覺得好甜好甜，甜魔應該幾鍾意，但食食下會有啲膩。
開售日期：3月6 日
Circle K Pino琥珀焦糖雪糕
同樣都係焦糖雪糕，相比下，呢隻感覺冇咁甜。Pino系列繼續用朱古力包雪糕，焦糖味香，而且帶有淡淡奶油香，一啖一粒好似冇咁evil（誤）。
開售日期：3月14日
***2月27日更新***
7-11 金奇異果味新地
7-Eleven推出新口味金奇異果味新地，原材料由日本直送，用上佐賀縣當季金奇異果，使用非加熱方法提取果蓉，雪糕質感有啲似雪葩，而且味道都幾清甜。2月 27日起於海港城分店優先發售，海港城分店即日至3月19日仲可以享有優惠價$10杯，3月6日起於指定香港7-Eleven有售，售價$15。
7-11發售分店:
***2月22日更新***
優品360 吉百利Oreo朱古力粉
Oreo控要留意啦！呢間零食店就推出咗吉百利Oreo朱古力粉，先加入4匙朱古力粉，再倒入200ml熱水或牛奶，oreo味都幾突出，不過用奶沖的話味道就更香濃～
***2月15日更新***
KiKi椒香麻醬拌麵
KiKi拌麵喺香港推出新口味椒香麻醬拌麵！獨家純素芝麻醬配上椒麻粉，芝麻醬香濃之餘帶有微微辣。麵條係手工日曬波浪式扁麵條，經過日曬風乾，麵條有天然防腐效果。KiKi香港網店同埋部分7-11優先發售！
7-11優先發售分店:
Circle K KITKAT紅寶石朱古力
KitKat又有新口味啦~ 趁住情人節檔期而出嘅紅寶石朱古力，由包裝到條朱古力都係粉紅色，散發住特有嘅少女心，莓香濃郁。你哋聽唔聽到honey嘅呼喚呀？識做啦？
7-11 雀巢 港式土炮奶茶甜筒
減肥大計又要暫且擱置啦~ 事關雀巢呢條新出嘅奶茶味雪糕好吸引。有花生碎同朱古力醬做襯托，主腳當然係奶茶雪糕啦，味道都幾突出啊。
7-11 HERSHEY’S 朱古力爆谷
呢個朱古力品牌，一向深受朱古力控愛戴，佢哋時不時都出下周邊product，最近連爆谷都出埋喇！香濃微苦嘅朱古力包住又脆又甜嘅爆谷，係甜上加甜嘅感覺。唔使驚佢大大包開咗就要一次過食晒，入面係獨立包裝嚟呀。
***1月30日更新***
7-11 日本直送 日清湖池屋鹽味金箔薯片
日本早前出嘅金箔薯片，而家嚟咗香港喇，仲係情人節限定版，粉紅色包裝背後仲可以寫嘢。每片薯片都沾滿金箔，係名副其實嘅放閃呀。
7-11 日本直送甜品 朱古力忌廉瑞士卷、朱古力忌廉泡芙
日本便利店成日都有好多甜品，其中朱古力忌廉瑞士卷、朱古力忌廉泡芙呢兩款，今日起香港都有售喇。前者忌廉幼滑，後者泡芙軟熟，共通點係佢哋嘅朱古力味都好香濃！
Circle K 雀巢Smarties聰明豆雪條
細細個好鍾意食聰明豆，有冇聰明到就唔知喇，但大個咗，估唔到聰明豆都跟住大個，變咗做一條條聰明豆雪糕！雲呢嗱味嚟，頂頭仲真係有一粒粒聰明豆，入面又有粒粒豆碎喎，童心返晒嚟。
***1月17日更新***
7-11 Oreo雪糕杯、Oreo脆皮雪糕批
面頭有大大粒Oreo碎，加埋忌廉味雪糕，成件事好Oreo！即係點？好甜囉。仲有脆皮雪糕批，出面嗰層脆皮由Oreo碎製成，同樣都係好甜身。
7-11新東陽珍珠奶茶酥/拿鐵酥
珍珠奶茶舖開到成行成巿，終於進化到珍珠奶茶酥喇！呢兩盒都係台灣人氣零食嚟，而家嚟咗香港啦。雖然咬開冇一粒粒珍珠嘅口感可能會有少少失望，但係奶茶/咖啡味香濃搭夠。
Circle K 日本樂天北海道練乳雪條
牛乳雪條可能食得多，咁煉奶呢？呢條以北海道煉奶製嘅煉奶雪條，由外到內都係白雪雪，中間仲要有流心嘅煉奶，甜甜der ~ OMG，唔減肥住喇。
7-11 日式醬油溏心蛋
流心蛋一向都得到好多人嘅歡心，依家終於等到香港嘅便利店都有啦~ 用味醂同鰻魚汁浸過嘅流心蛋，真‧流心得嚟仲好香，重要係一開就食得，好方便。不過就太受歡迎，可能要行多幾間先搵到包。
7-11 甜薯忌廉紅豆銅鑼燒
日本製造直送過嚟㗎，銅鑼燒軟熟，包住九州甜薯再包住北海道十勝紅豆餡，口感豐富，味道香甜。
文：Kar、Yanica
相：Kar、Yanica、便利店網站