kennykan123's Profile

夜晚10點幾附近得返呢間餐廳有開，本身都無特別期望，諗住都係普通茶記野，食個快飯咁樣。嗌左一個椒鹽豬扒飯，可能因為無咩人，廚房即整，熱辣辣之餘味道亦都好平衡，唔會太咸之餘豬扒亦唔會太乾太un, 鼓油汁亦有調過味唔會太搶，將一碟普通嘅椒鹽豬扒飯入面所有細節都做到啱啱好真係唔易，值得一試！！Btw 凍奶茶就真係太普通，無咩事可以飲返熱檸水🙏🙏…Read More

今晚同朋友兩個去食飯，一共嗌左三個餸。第一個餸等左十分鐘就到，以為另外兩個餸都好快到，於是就叫埋白飯同啤酒。但係等多三個字後覺得唔對路，叫左侍應跟一跟。然後再過左三個字後叫人跟又係無反應。到最後又等多三個字，姐係距離落單差唔多一個鐘後然後無動靜，索性叫埋單算，而到最尾亦都無人同我講過究竟淨低果兩個餸係漏單定點。成間野好旺場睇落都好多人幫襯，但係有咁大甩漏而完全無交代既話，根本就係不知所謂，禮禮貌貌問足三次都係hea 應客人，完全係當人無到果隻…Read More

嚟到諾士佛臺呢間餐廳，初頭以為係食純印度野，朋友介紹下先知原來仲有好多其他野食都值得一試。首先嗌既就係一份buffalo wings, 同外面其他餐廳做法唔同，呢到係另外提供個醬汁，所以就非常岩我另外一個唔太鐘意食酸野既朋友，點醬唔點醬，各取所需！其中一份主菜就係白酒蜆意粉，如圖中所見，蜆既數量係非常之多！而且隻隻都好新鮮無一隻埋口。而意粉彈牙之餘亦都有好濃既酒香，真材實料！埋尾就要左份pizza 同兩杯啤酒，一手渣住件pizza 一手渣住杯啤酒一齊傾下計，最緊要就係餐廳地方寬落，當晚既客人亦唔算太多，可以靜靜地享受一晚！…Read More

朋友早前推介過一間社企餐廳，於是就決定同屋企人一齊試下支持下！成間餐廳地方好寬落，完全無果種食完就覺得要俾人趕既壓迫感。侍應態度亦都好好，好有禮貌同好主動，一坐低就斟定杯暖水，好窩心！我地嗌左一個set 同一個散嗌既天使麵。首先上既就係頭盤田園大啡菇沙律，大啡菇配合酸酸地既黑醋有意想不到既效果！減輕左濃烈既菇味但就令到成個沙律清新好多，有趣既配搭！到主菜喇！我地嗌左個蕃茄大蝦意大利飯，同出面普通既意大利飯唔同，呢個飯感覺light 好多，食落亦唔會有果種好膩既感覺！另一個主菜就係忌廉汁大蝦天使麵。大蝦烤既火候岩岩好，唔會淋曬亦唔會太乾，抵讚！至於天使麵方面由於嗌左忌廉汁，所以會俾岩岩個飯膩少少，但係亦都唔算係食兩啖就膩到食唔落果隻，有忌廉香之餘亦都算平衡到！…Read More

好耐無出旺角，琴日先第一次去新開果間商場，發現原來都幾多野食，最尾見呢間餐廳專食大阪燒就決定試試。呢間餐廳都幾受歡迎，7點零鐘就滿曬座。晏畫已經食左少少野，大家都唔太肚餓下就要左個豚肉燒同大阪燒，店員落單既時候有問到我地係想要師傅燒定係自己DIY，當然我地呢D輪輪盡盡既人都係要返師傅幫手燒啦！等埋一陣就先上左豚肉燒，份量唔算太多但係燒得好靚好好味，表面唔會煎到燶曬，送到嚟時仲會用每張枱既鐵盤烘住，慢慢食都仲係熱辣辣！食完一陣主角大阪燒亦都好快送到，但係咁岩見到隔離枱係到自己DIY煎都煎得幾過癮，有少少後悔無試下自己整，但既然師傅都整好就算啦。海鮮大阪燒材料好豐富，成個餅都塞到滿曬，如果自己一個嚟食都好易飽！雖然師傅已經幫我地淋好曬汁，但係重口味既我地都仲係吱左大量沙律醬，雖然好邪惡但係咁樣先夠過癮！雖然大阪燒始終都係煎既野，感覺上有少少熱氣，但係由於入面有大量既椰菜，平衡返本身煎野既油膩感，食落都唔會太油膩。但如果下次再嚟試既話就真係會想試自己動手DIY再瘋狂落醬HAHA !…Read More

今晚臨收工同成班同事即興約去太子食飯，其中一位同事推介呢間餐廳然後就用兩秒決定左係到進餐！係門外睇其實成間鋪頭都似係酒吧多D，本來對食物無太大期望，但係點知好多野都做得比出面其他餐廳好！首先試左個西班牙小食拼盤，腸仔切片口感紮實唔油膩，三文魚波同薯波同樣炸得乾身唔油膩，而入邊既餡料亦令到食落口既時候唔會太乾難哽，好食！　而同事亦都推介左煎蟹餅，一上嘅時候大家都俾佢嘅Size嚇左嚇，出面食開都係細細個，但係呢到就係一大個咁樣，蟹餅食落都係好紮實，餡料好豐富，送啤酒一流！而最後上嘅就係兩個主菜，一個係啤酒炸雞，另一個係海鮮炒飯。講左啤酒炸雞先，雖然佢唔係雞PATPAT插落啤酒果隻食法，但係仍然聞到超香嘅啤酒味，雖然望落落好似好熱氣咁，但係入面係非常多汁同入味，頭幾啖仲唔小心辣親左個嘴，大家要試嘅時候就要小心喇～　海鮮炒飯就唔係Risotto果隻，雖然望落少少似，但係咁豐富嘅配料同口感就真係要炒飯先俾到，調味適，味道唔會過咸，值得一試！野食就唔係嗌左好多，但係嗌多兩杯啤酒再吹吹水就已經食左差唔多兩個鐘，飲飽食醉就各自回家，下次去開呢頭一定會再幫襯！…Read More

上星期中午去左大角咀搵野食，呢區一向都係臥虎藏龍之地，今次行過咁岩見到新開左間馬拉野就入左去試試，中午人流唔算好多，好易就搭到台。今次嗌左個仁噹牛肉椰漿飯，等左一陣好快就到左，碟飯同普通港式碟頭飯比配料多好多，有花生青瓜薯仔等等，未食都已經知一定會飽肚。至於主菜牛肉就整得非常出色，雖然有少少辣，但係煮得唔會太淋，保持返一定既口感，而且仲好入味，拎嚟送飯一流！至於椰漿飯亦同牛肉一樣咁好味，椰漿味好濃同果個辣辣地既汁配埋一齊真係可以叫多幾碗飯，不過可惜既係可能因為廚師上牛肉既時候放得太多汁，令到碟底有少少油，不過成碟飯都咁香口，邪惡少少就無咩所謂啦！食完飯仲想試埋其他小食，所以就要多左一份沙嗲串燒。沙嗲汁味道唔算太濃幾易入口，雞肉牛肉都算入味，但最特別既係豬肉，豬肉入口唔韌之餘仲爽爽地，好味！總結來說係區內幾高質既一間食店，價錢唔夠之餘味道亦都處理得好出色，已經約左朋友之後再嚟試多D唔同菜式，期待！…Read More

呢排天氣又涼返少少, 就決定同朋友入元朗打返個邊爐先!揀左呢個酒樓，地方好闊落，經理好好態度，一嚟就俾左張紙同介紹有咩好推介。落完單後就去左自己調醬料，醬料款式選擇都幾多，基本上大路既都有，仲有炸蒜，生蒜果D可以跟自己口味加落去，而蔬菜亦都係雪櫃任拎，想食就可以隨時落，唔洗下下等到湯底吸曬油先食，清新好多！邊爐料方面同其他大路任飲任食既酒樓差唔多，都係有肥牛同埋丸類果D，值得一讚既係牛丸係手打既，同其他出面普通既牛丸唔同，無咁彈牙但係食落亦都無咁膠，真係食得出有牛肉既味道，同兩個朋友一共嗌左五碟，好食！而成餐飯食落環境比起其他酒樓係相對舒服好多，無咁嘈離都幾舒服，岩曬同幾個朋友一齊嚟飲酒吹水。最後埋單果陣仲試埋佢地既桂花榚同椰汁榚，相當有驚喜，味道拍得住出面中高檔嘅中菜館，飯後絕對要一試！…Read More

就咁睇門面以為餐廳格局會比較逼夾，但一入到先知原來係非常寬敞！坐低就同朋友一人嗌左一個lunch set，除左飯、意粉外仲有其他特色選擇，但係由於大家都比較肚餓，所以就叫左兩個意粉share食！成個lunch set 包左一份前菜同飲品，前菜係一份細細地既薯仔沙律，味道唔錯同埋可以輕輕填一填肚。而飲品我地兩個都揀左檸檬姜茶，味道清清地唔會太強姜味，易入口！意粉方面就係一份茄汁大蝦意粉同蒜油辣豬肉意粉。意粉最怕就係煮太淋，而今次個意粉就煮得岩岩好，少少煙軔有咬口，茄汁唔會太濃太酸，味道適中好開胃，而大蝦亦都十分爽彈，同意粉非常夾！另一碟意粉蒜香味好重，蒜片亦都見到係金金黃黃無燶到，勁惹味！而豬肉唔會「鞋」口，少少辣好開胃，話咁快就掃曬成碟！…Read More

之前上午係九龍城一帶做野，做完後就同女朋友係區內搵野食，經過呢間餐廳時見到內裡裝潢好特別，於是就決定lunch食呢間由於太肚餓既關係，我地一人叫左一個lunch set 再加左d小食。首先嚟既係一份凍豆腐，上面鋪滿左櫻花蝦，加強左口感之餘亦增添左一份鮮味。飯方面我地就試左鰻魚飯同漢堡扒飯，份量唔算大，大概係平時屋企一碗飯既份量，但係鰻魚同漢堡扒既汁都非常惹味，拎嚟撈飯好快就扒曬一碗飯！食完飯後就上左份光帶子，帶子少少燶邊再加上特配醬汁，絕對值得一試！成個lunch以食日本野嚟講算係價錢合理，行過呢區既都算值得一試！…Read More

係The one行街行到攰，見到呢間野越南野都幾滿座就決定晚餐食呢間。一坐底坐位比較逼少少，但商場食肆大多數都係咁就無咩所謂啦。嗌野食之前上左嚟睇食評，見大家都推薦牛腩煲，我就決定會一會佢，同時再嗌多幾樣小菜填肚。首先上既係扎肉蒸粉包，每個粉包都鋪上好多配料同有一塊蝦片墊底，成舊食落去除左有粉包既軟糯外仲mix埋爽脆既口感，感覺好新奇，好食！牛腩包果然一如傳聞般好味，牛腩軟淋入味，咖哩味好香，但個人麻麻地食法包所以就無蘸埋嚟食，不過成個汁拎嚟送飯真係一流！菠蘿焗飯當然會有好香既菠蘿味啦，但係再加埋紅蘿蔔同青豆就令到味道更加fresh 更加豐富，而肉鬆除左好味外亦提升左口感，簡簡單單已經好足夠蒜蓉西蘭花雖然份量比較少，但味道唔錯，唔會煮得過淋，屬正常水平～…Read More

今晚早左收工，同女朋友約左係北角食飯，咁岩想食返d小菜，於是就決定嚟呢間「表哥小廚」！經侍應（老闆？）大力推介下，要左一份蜜椒薯仔牛柳粒同腐乳通菜。而佢亦都無介紹錯，牛柳粒非常入味，肉質軟淋唔會太韌。但更大既驚喜係啲薯仔！薯仔應該係先經油炸封口再用蜜椒汁去煮，所以外面保持脆口絕無變淋，而同時亦到索曬蜜椒汁既味，可以話呢套菜其實係有雙主角，兩樣食材都處理得非常出色！而腐乳通菜就屬正常水平，通菜唔會因爲腐乳汁而浸得過淋，煮既時間亦唔會過曬龍，夠曬爽！…Read More

今次同一位朋友嚟左大角咀呢間餐廳食晚飯，雖然位置唔近地鐵站，但係一入到去見到有live music show setting 就覺得抵返曬！食物方面我地嗌左四樣野，首先到既係白雪莉酒煮蜆同香腸拼盤。每一隻蜆都大大隻無沙，淡淡既酒味亦唔會掩蓋曬原來應有既鮮味，值得一讚！香腸就有雞肉同豬肉腸，唔會太咸，點埋醬汁嚟食就幾開胃！食到一半途中咁岩就有表演嘉賓上台表演，而侍應們亦都暫時停止上餐，呢段時間非常舒服，可以聽下音樂，唔洗下下咁急食曬d野。而當表演完一段之後，跟住好快就上埋兩個主菜，鮮奶油波菜長通粉同USDA prime牛腹肉配墨西哥餅。長通粉口感creamy，清清地，我朋友好怕濃味野所以就岩曬佢。而我自己就好欣賞個牛腹肉，用墨西哥餅夾住再蘸一蘸青醬，成個味道好fresh好滿足！一邊享受美食再一邊欣賞live show真係呢間餐廳既最大特色，岩曬約齊情人或三五知己一齊嚟！…Read More

上網見到有間新開主打牛同番茄既小店，即刻就約左朋友去食，可惜太夜去到賣剩牛面頰.....無辦法下就唯有叫左個牛面頰上海麵，滑牛炒蛋麵同麻速瑞士雞翼。牛面頰味道唔差，夠曬軟淋亦都不失牛味。但可惜既係份量太少，就算將賣曬既牛坑腩同崩沙腩轉做牛面頰，加埋成碗麵都係得5塊... 而上海麵亦都浸到淋曬，番茄味唔突出之餘亦都失去口感。滑牛炒蛋麵就比較出色，牛肉有口感有牛味，食得出唔係普通傾色，但朋友亦都覺得上海麵始終都係浸得太淋，扣左唔小分。麻辣瑞士雞翼可算係失敗之作，就算雞翼肥美，但係只係得個甜字，完美食唔出麻辣既味道，本來有點期待甜+麻辣會擦出新火花，但係事實上並不如意。…Read More

夜晚去朗豪坊睇眼鏡，發現原來呢到有一間眼鏡crossover既餐廳，行到攰攰地就決定直接係到食埋晚餐。今晚叫左牛油果雞肉藜麥沙律，肉眼扒同埋燒三文魚意大利飯。首先上既係餐湯同埋沙律。餐湯方面細細碗酸酸地幾開胃，配塊麵包亦都增添口感。沙律就比想像中出色，雞肉有調味之餘燻完唔會太乾身，藜麥份量唔小，配埋沙律菜好好味！跟住就到主角肉眼扒同意大利飯喇，肉眼扒要左5成熟，雖然表面煎得唔算太靚仔，但係口感同味道都唔差，食得出唔係平時茶記食開既「牛扒」。而意大利飯creamy得嚟唔會太膩，配上蟹子亦加重左口感。三文魚就非常juicy，同沙律塊雞扒一樣唔會太乾。總結今餐既食物質素加上舒服既環境算係值得推介既一間餐廳。…Read More