牧羊少年咖啡館 (白楊街)

就咁睇門面以為餐廳格局會比較逼夾，但一入到先知原來係非常寬敞！坐低就同朋友一人嗌左一個lunch set，除左飯、意粉外仲有其他特色選擇，但係由於大家都比較肚餓，所以就叫左兩個意粉share食！

成個lunch set 包左一份前菜同飲品，前菜係一份細細地既薯仔沙律，味道唔錯同埋可以輕輕填一填肚。而飲品我地兩個都揀左檸檬姜茶，味道清清地唔會太強姜味，易入口！

意粉方面就係一份茄汁大蝦意粉同蒜油辣豬肉意粉。意粉最怕就係煮太淋，而今次個意粉就煮得岩岩好，少少煙軔有咬口，茄汁唔會太濃太酸，味道適中好開胃，而大蝦亦都十分爽彈，同意粉非常夾！

另一碟意粉蒜香味好重，蒜片亦都見到係金金黃黃無燶到，勁惹味！而豬肉唔會「鞋」口，少少辣好開胃，話咁快就掃曬成碟！