michelleying1013的個人專頁

本身唔知道沙田呢度開咗food court, 見到上面有foodie 賣廣告，而呢間嘢本身見到佢係日本過江龍，又見到廣告寫住呢個松露玉子燒好出名，話確保完美複製築地本店的原汁原味，以秘製高湯製作出層次分明、口感滑嫩的招牌手工玉子燒，仲要大大隻字寫喺個廣告牌上面，我心諗呢個做飯後小食實冇死啦！於是我喺附近食咗少少嘢，特登過嚟試吓呢個松露玉子燒，點知咬落去難食到驚為天人！完全冇想像過松露玉子燒，原來係冇松露味，得個名，秘製高湯就食唔出啦，少少甜味，冇松露味都算啦，所謂嘅口感滑嫩原來係勁鞋口，咁樣就收我$49?? 睇相都睇得出好嚡口，何來口感滑嫩！好難食！無下次！…查看更多

平時飲開鹿x巷，但喺石門返工，就喺度叫左個入魔黑糖混珠鮮奶，即係黑糖珍珠鮮奶啦。女店員好nice，仲會問下我要不要幫手，幫我插埋飲管，呢樣要讚！到味道啦，第一啖一飲，嘩乜咁甜，呢個甜唔係砂糖既甜，係煉奶既甜⋯仲話用鮮奶去整，一啲奶味都冇⋯至於珍珠，可能用黑糖煮得唔夠，或者用現成買返黎一袋黎煮？所以真係飲唔出黑糖味同埋都係死甜⋯珍珠算有咬口，係唯一一樣過得去既地方飲左三分一，我真係頂唔順佢，成杯就好似飲緊一杯冇咁傑既煉奶咁，太甜！同埋甜得好怪！我唔想浪費但最後都係要扔落垃圾桶！真心甜到核爆⋯不推薦大家黎呢間飲…查看更多

呢間店既拉麵好開心地係即搓麵粉，即殺豬整叉燒，即煲湯底，因為由8點07分落單，8點43分先上菜。中途8點29分問過店員，佢話煎緊餃子，我嗰時諗，呢間店真係好新鮮，因為佢一定係即搓粉皮，即殺豬做餡！等左36分鐘先到既即製拉麵，我朋友嗰碗上錯左，要我朋友開聲話上錯左先即時換返⋯好明顯地真係用心煮過，連隻半熟蛋都係熟到流唔到心！仲好關心我健康，驚我想走蔥唔夠纖維，自動幫我加蔥終於講到啲麵，食落似公仔麵，湯底零蝦味，得好淡又唔香濃既豬骨湯味（本人一向唔重口味食得清淡），麵完全唔掛湯，唯一一讚係佢冇其他拉麵店例如x幻拉麵咁有鹼水味⋯叉燒又乾又鞋口，味道係煲過湯咁，好難食！等到9點03分，萬眾期待既餃子終於出場因為新鮮煎好，幾脆口，但咬落好油，好似成啖油咬落去咁，失敗！但佢係成餐中算最好食⋯總括來說，港式拉麵店，走前聽到隔離又係上錯菜式，漏左串燒⋯難食到伏伏伏伏伏伏，又成日漏單錯單⋯真係去隔離食雲吞麵好食過佢十倍…查看更多

見佢新開就黎試下，叫左兩個麵，一個蟹肉薯餅第一個蟹肉薯餅賣相好燶唔靚又細件，食落成舊粉咁，冇薯味冇蟹味，就係食到洋蔥味，可能我食緊洋蔥餅啦第二個味噌蝦濃湯拉麵個湯飲落好香濃，但蝦味被味噌蓋過左，麵唔夠彈牙有口感仲好大陣鹼水味第三個鹽味蝦濃湯拉麵呢個湯果然比頭先味噌嗰個濃蝦味好多，第一啖飲落幾好味，可惜加埋啲麵食⋯啲麵超重既鹼水味就發揮佢地無窮既破壞力啦，將成個麵變到一碗粗麵版既港式雲吞麵咁，什麼蝦味乜味都食唔到，就係食到鹼水味…查看更多

去骨海南雞飯。皮唔夠薄，唔夠爽口，冷河過得唔夠，冇咩雞味其實都預左，但啲肉又要唔滑。到個飯，睇相都知油啦，正常嘅，海南雞梗係配油飯，我知道個飯會有薑，但係個飯就只得薑味，同埋食到一口油…仲要一啲淋一啲硬…到個雜菜海鮮煲啦，海鮮係急凍就一早預左，點知原來成煲野得一個味，就係芹菜味！大佬，我食緊雜菜海鮮煲，唔係芹菜煲囉…食到一半，真係頂唔住，一來佢好咸，二來陣芹菜味真係太勁，入面啲所謂海鮮完全唔好食！…查看更多

4月28號來港開業，隔兩日30號即刻黎試！😁😁呢一日黎到仲可以喺 facebook tag3個朋友就可享買一送一優惠！🙈🙈好開心！只係可能期望太大，感覺都唔係傳說中咁好飲…仲要排曬隊…相信熱潮過左就唔會再有香港人肯黎排隊飲😣😣 試左兩款招牌飲品: 大甲芋圓鮮奶$32，珍珠紅茶拿鐵$32😚😚 大甲芋圓鮮奶: 奶味一般香濃，芋頭味唔太突出😔，有點失望😕，鮮奶同入面既芋圓味道雖然夾，但飲落感覺平平無奇，只係好普通好普通既一杯芋圓鮮奶飲品。☹☹☹ 珍珠紅茶拿鐵: 珍珠有咬牙，算幾煙韌，迷客夏出名既蜂蜜白珍珠，咬落有淡淡淡淡淡淡蜂蜜香味（真係好淡），至於賣點“濃厚的佛手柑香氣”，真心講我完全飲唔出……紅茶有少少甘香，同鮮奶味道夾得幾好。總結來說，呢間店兩杯招牌都只屬一般，如果以$3x一杯飲品黎講，出面可以有更好選擇。…查看更多

乜宜家Italian tomato質素差成咁？以前都覺得正正常常，我半年冇黎過食咋，呢個所謂黑松露雜菌意粉真係變到好差！其實一上菜見佢咁乾，已經睇得出中曬伏，原本都算啦，求其食，都唔打算影上黎，但佢難食到一個點，食到一半就影低佢！一上菜，望落係勁乾，算啦唔緊要，連聞落都可以冇咩黑松露香味，都算……食落有少少菇菌味我已經收貨，可惜對唔住，係冇，食落就係好乾好乾，冇其他味，只得意粉陣味，意粉又煮得太硬，冇左佢杯餐飲同餐湯我直情係需要乾啃！而上面黑色一點點嗰啲“黑松露”只係裝飾品黎。天呀，點解可以差成點，我半年前喺上水分店食都冇咁差架！至少會整個sauce去煮個意粉…嗰時真係仲有啲菇味架！…查看更多

一黎到見到佢lunch set個menu，頭3定頭4樣都係沙律……冇得揀之下揀左牛扒同埋雞扒burger，唔可以話難食，但呢個價錢食呢個質素真係唔值！跟餐既南瓜湯其實我食完都分唔出佢到底係南瓜湯定粟米湯，我係食完曬問侍應先知道原來佢叫“南瓜湯”。因為飲落好香粟米味（我好鍾意食粟米架一飲就飲得出）冇咩南瓜味，但有南瓜既色，又深色過粟米湯……如果佢係一個粟米湯，我真係會覺得好好味！但以一個南瓜湯黎講……南瓜蓉少到幾乎唔覺，俾粟米搶曬風頭，好失敗！牛扒，七成熟我手機相機影得差，真實係比圖片更加深色更加燶！先講配菜，薯條整得唔錯，好脆，有薯味，唔會一入口就成口油。沙律菜正正常常冇咩特別。到主角牛扒，煎到好燶不在話下，燶得黎食落又唔脆口唔知想點，舊肉完全冇肉汁，超乾又鞋口，完全唔嫩滑，用作調味既黑椒又落得太多，完全搶曬牛扒本身味道！個汁個味道我唔識形容，總之係好怪，同件扒唔夾既怪味！個汁試完味就冇再掂過！相中既肉，真實中係比相中更紅，說好的七成熟呢？外面咁燶，入面咁生，好想問下入面個廚師係咪趕成咁，連將牛扒解凍既時間都冇，直接將未解好凍既扒放上去煎？雞扒burger麵包雖然可以再厚身啲，但勝在有煎過，脆脆地幾好食，亦有搽牛油，單食麵包皮夾埋芝士味道唔錯之後就出事啦，問題就出喺佢件雞扒度，雞扒同頭先牛扒一樣落左過多黑椒，搶曬味不特止，件雞煎到過曬火，好鞋口，唔juicy又冇雞味，仲衰過個牛扒，都唔知自己食緊啲咩……最後食左238蚊兩個人，用呢個價錢去換咁既食物質素，真係好唔抵食除食物質素以外，呢間店服務唔錯，一入黎個姐姐好耐心等我地睇menu先落單。…查看更多

身成一個熱愛飲雞湯既人，一直未有機會黎試呢度最出名既雞湯米線，但試完後真係好失望！椰子雞湯米線（圖下）一黎到，即刻飲一啖湯，吓……只飲到椰汁味……又話椰子雞？點解一啲雞味都冇？？米線，係好普通既米線，冇煮得過淋，只係配埋啲椰汁湯食，啲味真係覺得有啲怪……啲雞都不過不失，唔會太鞋口懷舊雞湯米線（圖上）湯:只飲到少少藥材味，同椰子雞一樣毫冇雞味！但飲落比較易入口，清清地，如果非必要時一定要揀，雖然兩個湯都冇雞味，但揀懷舊雞會好啲……小食好油，油到一個點……仲要落埋啲冇味芝士去半煎炸，油到食完成個碟底食完都係油！呢間店標榜雞湯，冇味精呢個係真，又唔咸，但真係個湯冇雞味真係好趕客 ，完全唔值呢個價，唔會再黎！…查看更多

一直質素唔錯，可惜今次黎，質素已經不及以前……黑松露闊條麵上面既冬菇唔會太乾身，都幾香，個汁黑松露味唔突出，但冇落太多cream去煮，食落冇咁膩，而個闊條麵略為硬身，加埋一齊食味道都算過得去龍蝦海鮮意大利飯我知道意大利飯係冇浸米既過程，係直接落鍋再分次加湯去煮…不過呢個飯可能煮得太趕，只加2，3次湯煮就算，搞到啲米硬到一個點係生曬骨，明唔明點樣生骨？直頭係未熟，中間個芯明顯地生米同一樣，煮都冇煮過咁硬！個汁……咸到……得個咸字冇鮮味，唔好諗住佢有龍蝦味啦黑松露薯條薯條幾香脆嘅，略為咸左少少，都幾好食，可惜個醬就……令我忍唔住影埋上黎……睇圖都知佢啲黑松露有幾少…個醬好酸，沙律醬太多，就咁食個醬都仲依稀食到黑松露香味，加埋薯條就被薯條既咸味蓋曬，結果得返醬既酸味同薯條既咸味……天呀！我到底食左啲咩……點解會退步成咁……一路行過黎時見到佢喺太子裝修緊新店……希望質素可以回復返，唔好掛住開店整到質素差曬啦。另外服務方面要讚下，同以前一樣好好服務，一坐低，店員主動埋黎簡單講下餐牌，態度友善有笑容，好親切呢樣要加分！…查看更多

本身成日黎食，初開業時覺得佢既價錢平平地，都做到“動L”既感覺，空氣感好足！點知宜家愈做愈差！同初初開業時既空氣感冇得比，一個月前黎食過已經覺得差左，已經覺得好粉，但仲叫做平平地食得過。宜家一個月後黎，個梳乎厘size竟然細左成一倍？食落完全覺得食緊好粉既pancake，雖然未至於好濕，黏到一patpat，但係零蛋香，皮煎得燶而不香脆，已經唔係繁忙時間過黎食，點解仲可以做得咁差？如果初初佢俾啲咁垃圾既質素人，我諗佢一定紅唔起，唔會有報紙介紹佢！喺佢fb page同openrice已經睇到佢好多伏評，如果佢再唔改善下，質素繼續咁樣以幾何速度下降，執粒指日可待！…查看更多

有團購可以用38蚊買50既現金劵，點知中曬伏！最多人好評既係經典牛魔堡，所以即刻嗌左黎試，仲另外加錢加左煙肉！賣相Ok，食落，嘩，原來係貴版麥記既豬柳漢堡？真係唔係講笑，味道完完全全同豬柳漢堡，牛肉好乾冇肉汁仲有好多筋，生菜唔夠新鮮唔脆口，蕃茄亦唔夠新鮮食唔到蕃茄個味，芝士都算香濃。同出面食既牛肉burger真心差勁遠，菜同蕃茄既清新味道同爽脆口感，原本係用黎中和成個burger既膩同埋濃烈味道，但呢間店就整到錯曬，生菜同蕃茄完全發揮唔到個作用！如果係2，30蚊麥記價錢，我接受到，但你賣到咁貴，俾呢啲質素就真係好唔掂！薯格因為見到好多人讚，就叫左呢個。點知一樣好唔掂，咬落太硬，冇乜薯味仲好咸，薯格啲薯仔又少又幼，難食牛魔堡（呢個圖原本放上去，但㩒唔返佢上去😂😂）海鮮意粉海鮮？與其話你海鮮，不如話係辣味意粉，成個意粉得個辣字，除左辣，就係辣！上面啲海鮮又冇味……啲手造意粉為左營造佢有口感硬硬地既感覺，呢間店竟然將佢煮到半生熟，意粉都未煮熟，D意粉仲痴埋緊一舊舊就上菜俾人食……難食到食完都唔知自己食左D咩黑松露湯成餐最難食之中最好飲既湯，飲落唔錯，飲得出有落到大啡菇去煲，所以菇味都幾濃郁，只係黑松露味嚴重唔夠。…查看更多

上openrice見到話佢係米芝蓮，我呢個雲吞麵狂迷就黎試下，點知中曬伏，完全唔明白佢個所謂米芝蓮點樣拎返黎？？！Order左3分鐘都冇，碗麵就黎左，仲快過快餐已經知道伏伏地。首先，黎到見到咁多蔥喺面，韮黃都慳返唔落就知道唔可以期望太高。再者，一間主打雲吞麵既店竟然連細蓉應該放雲吞喺麵底都唔知？咁樣都拎到米芝蓮真係話佢叻！講完賣相，講味道，雲吞麵最主要係個湯，麵一黎到第一啖一定係試啖湯先，嘩，飲落完全只有蔥味同埋鹼水味，說好的大地魚湯呢？好難飲！唔緊要，再試埋個麵。口感ok爽口，但唔夠彈牙，冇全用鴨蛋去整定係因為煮得過淋？加上成個麵一入口只得鹼水味，食到最尾成口鹼水味，要狂飲水中和！難食到咁樣，真係想像唔到點攞米芝蓮，絕對冇下次！…查看更多

出面沾麵通常得個咸字，麵亦好少，但彩就唔係，就算唔加錢，佢麵既份量都可以食得飽人！睇紅葉前梗要食飽啲啦😍😍😍蝦沾麵（小麥麵）因為太餓，所以食左幾啖先記得影相😂😂沾麵湯濃郁，呢種濃郁唔係味精唔係靠倒一大堆鹽造成，食得出真係用左好多蝦去煲出黎既靚湯，鮮甜濃郁，唔會太咸，食落唔膩！小麥麵，唔似出面啲店咁係集中向拉麵公司買返黎，食落有淡淡好香既小麥香，沾左湯唔會太淋，仍然可以keep到口感，食落淡淡小麥香同埋鮮甜蝦味充斥住成個口腔，味道濃淡得宜，唔會好似其他沾麵店咁只食到死咸味！如果對外面既沾麵失去信心，覺得沾麵只有死咸，你可以黎元朗總店試下！包你對沾麵即刻有正面睇法，從此愛上沾麵！（因為聽講西環嗰間同元朗冇得比，所以我每次都只幫襯元朗總店）…查看更多

去完AIA，諗住近近地去金鐘食我最愛既小籠包……點知，原來呢間分店係全線最難食，服務最差既分店！一直支持翡翠既我都忍唔住要俾劣評佢！肴肉入口有即溶感覺，但同其他分店唔同既係，呢間分店異常地咸，冇曬肉味，得個咸字！咸到一個點，你食完應該要狂灌1L水！小籠包皮薄，唔易穿，汁多，肉唔鬆散，但都係同一個致命傷：咸到爆炸！食落冇曬肉味，得個咸字，真係好難食！同其他分店冇得比！茶香燻乳鴿正正因為呢個乳鴿，我忍唔住要喺呢度打劣評，因為真係好難食！聞落唔香，食落直頭似食緊肉乾，仲有燶味！好明顯overcook左，咁都可以serve俾客人食？佢唔咸，但亦冇乳鴿味，質感勁乾，零肉汁，好鞋口！原本打算食完3樣再嗌其他食，但食完宜家寧願埋單走，出去再食過！服務好差，order野時都係5點幾，明明全店冇乜人，但可以冇人理我，倒左4次茶，但每次啲茶都係凍！係咪因為頭先一直冇客，所以啲茶放凍左，要盡快倒曬啲凍茶俾客人再裝熱茶落個水壺度，所以無視左我地都需要熱茶？同佢講想要熱茶先至俾熱茶，但佢望一望你就走左去，應一句好都懶。如果我第一間食既翡翠係呢個質素，我唔會再幫襯任何一間分店！…查看更多