siuredb的个人专页

知道元朗都有好幾間高質日本菜，今次唔食壽司，揀左食鐵板！叫左個$880/2人Set，因為見有伊勢海老好吸引！先黎一個沙律，上面透明好似麵既係白海藻，好爽口，配埋新鮮沙律菜，粟米粒同疑似沙葛，清爽開胃。清酒煮北海道白貝，兩粒白貝肉飽滿，清酒湯汁充滿鮮味！和菊煙薰北海道帶子，小銅鍋內是菊花乾及黃糖，先把珍寶size的帶子煎到金黃，再將帶子放入銅鍋內煙薰，配上菊花味啫哩及食用菊花，一道色香味俱全的帶子，創意及味道滿分！口腔充滿菊花清香及帶子鮮味！再來是活伊勢海老，師傅純熟處理，再配上即煮海膽忌廉汁，加上魚子及三文魚子，龍蝦肉新鮮，肉質彈牙，加上海膽忌廉汁是錦上添花，還有魚子的咸鮮味，令味道更有層次，最好多配一塊多士，索乾碟上的汁來吃，因為個汁實在太好味了！薄牛肉卷著蔥蒜再伴九州來的蔬菜，我最喜歡的是鹽漬昆布，伴著牛肉吃，想不到咁夾，別有一番風味。最後來一碗熱騰騰的龍蝦頭麵豉湯，還有炒得金黃又不會過火的炒飯！再來一杯紅豆抺茶雪糕！完滿！…查看更多

冷盤及餐湯， 半熟吞拿魚有驚喜，有油花，微微魚油香，海帶豆腐餐湯，海帶味濃，感覺健康！慢煮黑毛豬柳，雖說慢煮，但肉質較鞋，味淡，蘑菇汁亦不夠味，薯蓉奶味略重，多吃會覺得漏，幾條烚瓜無調味，喜歡重口味人仕會覺得太寡！餐飲選了白酒！不用加錢！甜品有焙茶布甸，不太甜，芝麻脆片有點痴牙！ 抺茶cheese cake，太大甜，抺茶味未見突出。…查看更多

難得來到深水埗，一試出名既文記車仔麵，未食已發現枱上超過十種調味料，隨意調味！ 叫左瑞士汁湯底+豬紅+手打魚肉+菠菜，豬紅軟硬適中，但味道略淡，手打魚肉份量多，入口夠滑，不太彈牙，魚味咀略淡，菠菜份量多，夠翠綠，健康之選！瑞士湯汁，味道微甜，其他車仔麵店少有！另外一碗腩汁湯底+豬大腸+魷魚+瑞士雞翼！瑞士雞翼入味豬大腸乾淨大件，油脂味香，出色，魷魚叫了不辣，正常合格！飲品叫了鮮榨蔗汁，不太甜，微微蔗香，整體食物不錯，但未見太出色，不用排隊，可以一試！…查看更多

早已聞說這裡的芋圓很出名，今日終於一試！叫左特式仙草百配，好多配料，有仙草，芋圓，紅豆，薏米，細珍珠，小丸子，超豐富！芋圓，小丸子，同珍珠都好煙韌，連仙草都好有口感，QQ地！整體唔會太甜，叫凍既，只係比常溫凍少少，岩曬怕生冷既女仕！腐竹蓮子蛋糖水，鐘意佢無將腐竹煮爛曬，如果蛋花再多d口感會更豐富，入面都有蓮子同芋圓ga!!! 整體係價錢平，全部甜品不過$30，材料豐富，下次黎深水埗，一定再幫襯！…查看更多

本身book左對面間日本餐廳，但因佢地搞錯左book左下星期，又因當時晚飯時間7:00幾，間間餐廳都full曬，同父母一齊唔想四圍搵，見到呢間無人係出面排隊，又有位，於是就試下啦！就係咁，將我地一家推向劣食之門！我可以講呢間係我近年來食過最唔好食既餐廳！跟餐冷豆腐，個汁好似豉油溝水，汁同豆腐都淡而無味！收$98既黑松露芝士玉子燒，我去港島區既居酒屋食，未必要呢個價錢。如果整得正宗，好食你收我過百蚊我都ok!但咩叫玉子燒，唔該佢地上youtube睇下點整！呢舊野只能叫煎蛋卷！ 無玉子燒既湯湯汁同甜味，芝士同蛋卷唔夾，黑松露醬求其了兩滴係蛋卷上！佢話跟餐既昆布湯烏冬，但個湯好似上面冷豆腐個汁差唔多，只係煮熱左。烏冬又淋又無彈性，唔似係巑岐烏冬！So call M5和牛筋肉，份量細碗到就係平時日本餐廳飲麵豉湯果隻碗。係咪和牛我食唔出，但d肉細塊到肉碎咁，好似人地賣到最後一碗牛腩麵得返d碎肉咁！豚肉炒麵，麵似係烚到淋曬，再加大阪燒果隻汁係獲兜兩兜，唔多似有炒過。再係面落一堆木魚碎，係呀，又係木魚碎，豚肉少到唔知有冇三塊！真心既，我食個杯麵都好過食呢碟野！$48炒什菜，我想問佢係咪有客食剩比我既？$48得幾塊椰菜同一堆芽菜！疊起埋都唔夠手掌厚～少到離譜!仲有呢間野主打串燒，但食完以上既野，我真係失望到唔想再影相！d串燒唔係日本串燒級數但收日本餐廳價錢，似係任食港式重慶燒果D質素。同埋好多野食都好咸，咸到個嘴唇都乾埋！我父母同屋企人一致都覺得好難食，同部份食物份量過少，真係無下次!!…查看更多

新年食完一輪團年飯同日日都食年糕，蘿蔔糕之後，真係唔想再食中式野呀，所以假期去開海港城行街記得呢度開左曼谷間BLUE ELEPHANT，即刻去試一試啦。環境舒適，有海景。 叫左兩個午餐餐前小食冬陰功材料豐富，有原隻大蝦，酸辣比例唔錯。椰子雞湯，椰汁味好香濃，有豐富椰子肉同雞肉。牛扒有牛味又幾JUICY，配埋個泰色風味醬汁食味道好夾，有別於一般燒汁或黑椒汁，幾有新鮮感。 咖哩鱈魚飯，咖哩好香，食到出好豐富香料，有層次，又岩香港人口味唔算好辣，鱈魚炸過外脆內滑，啖啖肉，讚! …查看更多

和民食物質素大不如前，menu少左野食，仲要野食質素極差，枱又細又迫，叫左和民沙律，呢個算正常，沙律唔洗煮都難食既話死得，炸海老壽司卷，海老？定甜蝦黎，細隻到睇唔到咁滯，以前都唔係咁！北海道十勝豚肉飯，d肉無汁，無味，兼非常韌！我係咪食緊野豬？雞肉火鍋，得四舊雞，有粒仲要係皮包骨，無肉食，超差！茶又唔熱，枱又細，一早上左個爐，同佢講無位擺野食，佢話夠，但最後都唔夠擺，要將沙律擺係爐上！永久bad list！ 執左佢啦，唔好做壞人地和民係日本個名！…查看更多

知韓國既Kiss the tiramisu 黎左香港開分店，第一時間搵埋老公去試下，我本身唔係好好甜品，因為食得多會覺得好甜好漏，但唯獨Tiramisu我就多多都食得落，因為加入咖啡既甜品，咖啡會平衡左太甜既味道，而且又充滿咖啡香味。 咁今次仲要入將Tiramisu味加入牛奶軟雪糕，凍冰冰咁，一入到就即刻order返杯，杯雪糕用高身香檳杯裝住，好Elegan，而且仲好大杯，一對情侶share就岩岩好，講返杯雪糕，係睇住店員即做，底層有cream cheese同餅碎，之後係上面吱滿牛奶軟雪糕，再淋上espresso同加上朱古力粉。完成！ 牛奶軟雪糕好幼滑，加埋朱古力同espresso，好甘香同香濃，味道真係好似食緊Tiramisu蛋糕一樣，食左一半再將底下既cream cheese同餅碎撈勻，好creamy又有餅碎既口感，唔會覺得漏，好味到我要將最後一滴倒入口！好正！一定會再食，另外仲有士多啤梨味同香蕉味，下次可以再試！推介比鐘意食Tiramisu既朋友!…查看更多

有朋至遠方來，一盡地主之誼帶佢地四圍去之後，丁晚餐時間，佢地話想試下香港既避風塘炒蟹，咁我一搵之下，發現喜記係尖沙咀I-square開左分店，咁岩朋友又係住尖沙咀既酒店，咁實在太方便啦，唔洗專登過海。老實講，薑蔥炒蟹我就食得多，避風塘炒蟹其實係第一次食，所以我自己都幾期待。哈哈！餐廳環境一貫中菜格局，地方不算太大，但坐得唔侷促。火焰蜆(例) $118先來一個火焰蜆，蜆用錫紙包裝住，再擺係舖滿石仔既煲仔上面，侍應就會點火，再加上花雕酒，酒一加，火焰升起又有酒香，真係色香味俱全，煮到蜆全開口就食得。蜆唔係大粒，但粒粒都有蜆肉，無沙，有酒香又鮮甜，唔錯。桂花酒釀蟹 $360 朋友係餐牌見到呢個菜話好特別，想試下，呢個煮法又真係未見過，大家一致讚成。平時桂花酒釀都係用黎煮糖水，用黎煮蟹會係點呢? 蟹本身好新鮮，蟹肉好鮮甜，再加埋酒釀既微甜同桂花既清香，估唔到係咁夾，幾有驚喜！個蟹鉗啖啖肉真係好正~避風塘辣蟹(小辣) $480 之後主角就上場，一擺低就蒜香撲鼻! 蟹上面舖滿厚厚既炸蒜粒，畢少少試下，又香又帶小小辣味， 而隻蟹都係好好肉地，蟹身同蟹鉗都好多肉，蟹走過油再同蒜粒一齊炒，蒜香味入哂蟹肉，非常惹味。朋友都大讚呢種食法真係好好味！濃湯野菌浸時蔬 $78食完濃味既避風塘辣蟹，就食返個清爽既蔬菜，濃湯都幾甜，有蕃茄，木耳，菜心，健康!蟹油炒麵 $72最後食個呢度每枱都叫既蟹油炒麵作結，炒麵炒得好乾身，唔會痴埋一堆，加埋蟹油既香辣，比普通既炒麵多一份惹味。最後仲有蕃薯糖水送，正呀!食蟹一定係落手落腳食最方便，餐廳都好細心整左個洗手盤比大家走之前洗洗手，加分! 朋友好滿意呢餐，話一定會推介比黎香港旅行既朋友食。…查看更多

某星期日又同Mr.No 係屋企Hea hea咁渡過，唔想煮飯，得知最近大埔開左間以天丼做主打既小店，一於渣車過去試下先。小店位置係明星酒樓隔離，相當易搵，舖位細細，除吧台位只有幾張2人枱。由於我地6點幾就去到，所以都有好多位置選擇，揀左吧枱角落位置，可以一路食一路望入半開放廚房，睇住佢地炸天婦羅既過程。不過有樣想講，由於open kitchen，油煙味都有d重，希望抽氣系統可以有所改善。望望Menu，簡單！只有3款天丼，海老，海膽及野菜，我同Mr.No分別叫左海老同海膽，套餐包沙律同麵豉湯。係呢度食野係唔收加一，所以水同餐具自己搞掂，其實我覺得咁樣仲好，方便食客同waiter，有時去d餐廳，想話要杯水係會問到你燥，明明我要比服務費但完全得不到服務，咁倒不如自助仲開心！海膽天丼 $78一望個樣就相當豐富，即叫即炸，熱辣辣，海膽有2件，用紫菜包住炸，海膽份量都唔少，配菜有炸茄子，炸南瓜，炸蓮藕同埋好特別既炸菜心苗，而且仲有炸溏心蛋一隻。海膽似係加拿大海膽，炸完暖暖地更加軟糯，味道鮮甜。海老天丼 $55張生叫既海老天丼，除了將海膽變成兩隻炸蝦，其他配菜基本上係一樣，海老雖然唔算好大隻，但肉質都幾爽彈，少少鮮甜味， $55黎講有咁大堆頭既天婦羅丼，其實都已經物超所值。海老天婦羅 $8/隻因為蝦既size唔算大，食兩隻唔夠喉，所以額外再追加兩隻。食到最後，將炸溏心蛋篤穿，蛋黃撈勻珍珠米，再加上少少甜醬油同飯素，真係超好味，為呢餐畫上完美既句號!…查看更多

作為一個北區人，講真上水粉嶺真係無咩好食，因上水已經淪為水貨城，藥房仲多過便利店，係無野好食之中，好彩都仲有一間開左頗耐既日本餐廳仍然屹立不倒。 平時多數黎食佢地既下午茶，今晚約埋細妹試下佢地既晚餐先。巨峰梳打 同 柚子蜜梳打，入面有爆球增加口感，天氣熱飲返杯梳打真係爽~係是日推介度叫左金目鯛刺身同日本室津生蠔，金目鯛既賣相好靚，一睇就知新鮮，魚肉微甜又有彈性，點埋佢旁邊酸酸地既醬汁又好開胃。 平時食澳洲，法國蠔就多，日本室津生蠔真係未試過，一於叫兩隻試下，質地都幾Creamy，不過海水味同蠔味就較淡，岩一d初嚐征蠔既朋友食。凍蕃茄沙律，蕃茄多汁飽滿，加埋黑醋汁調味，好清新refresh!!!我同細妹都好鐘意食軟殼蟹，所以一見到呢度有軟殼蟹天婦羅就話一定要叫。 原隻軟殼蟹炸到金黃色真係好吸引，炸得幾乾身，一d都唔油淋淋，好酥脆，軟殼蟹味好香濃，正！備長炭燒海鮮併盤，有帶子，鮑魚仔，大蜆同蠔，即燒即食，四樣海鮮都好鮮甜，唔洗加任何調味料都好好味，可以一邊燒，一邊食，一邊傾下計，唔錯唔錯~最後食埋甜品，溫室蜜瓜紅豆芭菲，一上枱真係嘩！一聲。係成半個日本蜜瓜，好夠份量，呃like一流，先食蜜瓜，好甜，再將紅豆同雪糕mix埋黎食，紅豆好大粒，食完真係大滿足。…查看更多

 星期5收工到沙田搵食，之前上網知道FAUCHON係香港開左第一間 FAUCHON Paris LE CAFE，除左提供 Eclair，朱古力，蛋糕等多款法式甜品，仲推出鹹食，可以坐定定享受法式風情，今晚一於去試下。一黎到見到有個紙牌話星期一至五 Set dinner 第二份有半價既優惠，真係黎得合時呀，唔知呢個優惠做到幾時呢？ Set dinner一D都唔貴wor，$168/份已經包括頭盤，主菜，飲品同朱古力。 我同老公選了頭盤各一， Mushroom soup同雅枝竹蝦肉沙律，蘑菇湯好香濃，沙律既雅枝竹同沙律菜都夠新鮮，而且蝦肉好爽口，配埋芒果肉同埋芒果汁做沙律汁，酸酸甜甜，好開胃。主菜要左慢煮牛面肉配薯蓉，同埋忌廉虎蝦蕃茄意粉，慢煮牛面肉好淋，個汁牛肉味好濃，薯蓉又夠幼滑。意粉有四大隻虎蝦肉，好彈牙鮮甜，忌廉汁入面有鮮蕃茄蓉，唔會漏，仲有好多蘑菇粒tim，真係好好味，好足料。最後叫埋餐飲，熱咖啡，檸水唔洗另外加錢，仲送上兩粒招牌朱古力(單買要$22粒)，5號朱古力係士多啤梨jam味，酸酸甜甜，幾好食，9號係脆脆朱古力，都好岩我口味，侍應問我地要唔要加$35換指定甜品(原價$55)，見指定甜品有我最鐘意食既Raspberry，一於試下，紅莓白朱古力撻，上面有紅莓同雲尼拿cream，下面有一塊薄薄既白朱古力同撻皮，建議MIX埋一齊食，有紅莓酸甜同香味，加上尼拿cream，同撻皮牛油味，唔會太甜，好好味。整體非常滿意，坐得舒服，服務又好，一定會再黎幫襯~…查看更多

作為北區街坊既我，偶爾會黎廣成開餐，大大話話都食左成十年，水準都依然KEEP到，每逢假日必定大排長龍，坐無虛席，茶餐由之前廿幾蚊賣到現在要$35，但比起茶餐廳一個早餐都$30，呢度既全日茶餐仍算物有所值。全日茶餐，可選菠蘿油/蛋治/奶油醬多+牛肉/火腿通+冷熱飲。 我既鐵膽係，蛋治+牛肉通，蛋治既雞蛋超厚身，蛋味濃，加上軟熟既方包，可以加少少鹽調味，正~ 牛肉通既湯頭夠清，有少許薑絲，牛肉唔靭，亦無鬆肉粉拿過，加上少少胡椒粉，更能帶出牛肉味。區外人多數會來飲冰柱紅豆冰，無得跟餐，只可散叫，$24，造型夠呃Like，但味道與一般紅豆冰無大分別，未試過一試無妨。…查看更多

人大了，舊朋友愈來愈難約，成家立室既要陪老婆，陪小朋友，拍拖既要陪男神女神，工作狂既星期六、日照常返工，好唔容易約到半數人已經要Thanks God！馬上黎個快閃gathering，因為下一秒，你唔知邊個又要甩底。有d餐廳只係岩一班人食，因為兩個人食力有限，試既款式唔夠多，一直係我gathering餐廳名單中既 焱丸水產，因為之前係東京旅行試過類似以水產為主打既居酒屋，水準高，氣氛好，之前知尖沙咀開了一間，已經好想試，今日終於可以一試。名為焱丸水產，當然就係主打水產，即海鮮，見到餐廳魚缸內新鮮既海鮮，未食都已經信心大增。餐廳裝修隔局與東京那間有九成相似，天花掛有魚網，紙燈籠，牆身壁畫，日式海報，仿佛坐隨意門去了日本。一行六人未到齊，天氣熱辣辣，快手叫杯凍飲降下溫。巨峰梳打，乳酸梳打都酸酸甜甜夠開胃。朋友中當然有酒鬼，點了一杯Cassie Vodka，其實即係Vodka coke的朋友。人齊了，一番討論後，點了一堆食物，人多就係好辦事，叫了好多不同款式，相信今日都係捧腹而回，咁耐無見，飲飽食醉先盡慶ga ma！麻醬番茄豆腐沙律 $58蕃茄新鮮，香甜多汁，豆腐嫩滑，沙律菜爽口，加埋麻醬既香，好食。海鮮沙律 $78海鮮沙律面頭有一隻蝦肉，下面係刺身粒粒，都好豐富，有三文魚，帆立貝，吞拿，油甘，除帆立貝爭d之外，其他都好新鮮，加埋沙律汁撈均黎食，酸咪咪，好開胃。左口魚刺身 $120有朋友話未試過，一於試下，左口屬白身魚，魚味係偏淡，食既係爽口彈牙口感，刺身5點盛 $250再黎個人人喜愛既刺身5點，以呢個價錢，有齊海膽、三文魚、帆立貝、吞拿魚、油甘魚，而且每款都厚切，好足料，實在抵食，全部都非常新鮮，特別係海膽同帆立貝真係好鮮甜呀！食完幾款冷盤，食返d炸物平衡一下。雲丹海苔芋天婦羅 $80雲丹即係海膽，海膽天婦羅一直都想試下，呢度係用紫菜包住少少飯同海膽一齊炸，粉漿夠薄身，但白飯將海膽既鮮味溝淡了，口感軟綿，未試過，一試無妨，但我覺得海膽都係刺身最好食吧！炸牡蠣吉列 $80另一道炸物，炸廣島蠔就不陌生，蠔屬中size，幾飽滿，外脆內軟，熱辣辣，蠔味鮮濃，一個人食四隻都唔夠呀！焱丸味噌甲羅燒 $68/件之後食既就係一早已上枱既招牌菜，浜燒水產系列既焱丸味噌甲羅燒，蟹蓋入面載有蟹膏，蟹籽，蟹肉同鵪鶉蛋，未食都知呢個combination無得輸，而且呢度每枱都有一個細燒爐，有專人會幫我地燒，就唔怕燒燶或者唔熟啦。製成品登場！蟹膏咸鮮味超濃，蟹籽卜卜脆増加口感，加埋絲絲蟹肉既甜味，真係好正，雖然鵪鶉蛋已經失去蹤影，但相信係發揮了令整體質感更濃厚既作用。焱丸活貝大盛 $368再來一盤甲殼類，帆立貝，生蠔，鮑魚，大蜆，非常新鮮，鮑魚仲郁郁下ga！先食帆立貝同大蜆，兩樣都鮮甜到不得了，蜆燒完不會嚴重縮水，帆立貝啖啖肉，裙邊位都唔會靭。未燒前郁郁下既鮑魚，已經証明好新鮮，食海鮮就係食個鮮字，只要新鮮，唔洗多餘既調味，原汁原味就係最好，鮑魚微微海水味，口感軟糯帶點彈牙，真係非常高質。生蠔燒後依然飽滿，蠔味，海水味濃，一點腥味都無，讚！朋友鐘意食帆立貝，再來兩個，今次試下有調味既。松葉蟹膏 同 和風木魚味 $75/件本來就咁燒，食原味已經好好味，但有調味係錦上添花，每款都好似一道創作料理，味道配搭得宜，木魚香增加日式風味，蟹膏增加濃甜味道，兩款都各有千秋，好好味。花魚一夜干 $160食完浜燒水產系列，已經八成飽，飲酒既朋友叫了一條一夜干，都幾大條，有一隻半手掌咁長，侍應細心幫我地切開一件件，方便Share，外面燒得香脆，魚肉保持鮮嫩，又不會過咸，水準之作。特上壽司盛合 $338最後來一客壽司盛合，食返d飯，以澱粉質作結，吃了拖羅，三文魚子，牡丹蝦，拖羅魚油重，三文魚子鮮甜，牡丹蝦肉質爽，味甜，三樣都好新鮮，大滿足。地址: 尖沙咀棉登徑23號華楓大廈地下5&6號舖電話: 2654 8200 / 2651 9400 / 6962 1398營業時間: 星期一至日: 12:00-15:00, 18:00-02:00…查看更多

夏天為大地帶來雨水，香港既夏天，雨水充足，我對夏日既雨天又愛又恨，因為當陽光燦爛既日子但氣溫是35度，你係街行一陣，又曬又熱，仿佛變成BBQ炭火上果條腸仔，一陣就燶。忽然下一場大雨雖然會為大地降溫，紫外線都變得溫和，但那陣潮濕，痴笠笠的感覺又相當討厭。剛剛聽電台主持話佢老婆問佢一條問題，我重要定冷氣重要？這條問題，原來難答過我同你呀媽跌落海，你會救邊個！(至少對於我呢種超怕熱既人黎講，夏天無冷氣，我可能真係會死) 所以無論好天定落雨，夏天留係有冷氣既地方就最舒服了。某星期六既下雨天，約了朋友係中環間Espuma食Tea，由IFC那邊既巴士站行到威靈頓街，我真係罵自己一百次點解唔搭地鐵或者穿地鐵站行過去？因為果15分鐘既路程，又焗又濕，一到餐廳，如進入天堂，馬上降溫。星期六既下午，餐廳不算多人，環境舒服。 Window seat的風景好開揚啊，心情頓時變好。本來只打算各至叫份Tea食，但侍應介紹佢地岩岩出左個Afternoon tea set，見個樣都幾靚仔，朋友又有興趣，咁一於試下啦。平時好少食High Tea，一來我唔算太好甜品，二來覺得好多酒店High tea既食物都係整定哂，有d擺得耐，雪到又硬又乾，但收你四，五百蚊，咁我覺得有其他更好選擇囉。但呢度既High tea set只係$228 for two，仲包兩杯野飲，中環黎講，除開每人只係一百鬆d，飲杯咖啡食件Cake都差唔多啦，所以真係非常之抵食！傾左陣計，Tea set就黎啦，用上餐廳既Initial "e"字做透明層架又幾特別，總共有三層，份量都唔會太少，食物同餐牌上既相一致，至於味道又如何呢？ 馬上試試。先試Scone，配上果醬同忌廉，Scone暖暖地，都幾鬆化同有牛油香，Size的骰，唔會食完太飽滯，合格！之後再由第一層開始食，忌廉紅莓朱古力脆餅 - 我本身好鐘意食Raspberry，再配埋忌廉同朱古力脆餅，酸酸甜甜，又有朱古力香，好味。 隔離既就係紫薯puff - 忌廉puff就食得多，呢個以紫薯蓉做餡，好特別，紫薯蓉好幼滑加埋有杏仁片既puff，味道唔會好甜，唔錯！第二層係咸點，野菌酥盒 - 酥皮盒好鬆化，野菌加芝士好香濃。鮮果蛋沙律 - 我本身以為就咁得d雜果粒，原來下面係蛋沙律，蛋沙律又係我最愛，加埋雜果粒中和下無咁漏，更加好味。話咁快就到最底一層，由後面開始食。煙三文魚脆多士 - 三文魚插住一塊細檸檬，令魚肉有陣陣檸檬香，無腥味，幾油潤，底有脆多士片，方便用手拎住食。雞尾酒蝦沙律 - 蝦肉都幾爽口，配上酸酸甜甜既cocktail sauce，好開胃。歌劇院蛋糕 - 朱古力香濃，唔會死甜。綠茶布丁 - 淡淡綠茶味同奶香，布丁好軟滑，幾好。 果仁金寶咖啡蛋糕 - 咖啡味蛋糕加上果仁碎，味道好夾，而且果仁粒，增加香味同口感。最後係顏色好少女既仙人掌忌廉撻 - 粉紅色好可愛加上mini棉花糖粒，配埋曲奇餅皮，唔會好甜，同幾香牛油味。最後order埋兩杯野飲，個杯墊幾靚。朋友叫既Cappuccino，有靚靚拉花，佢話咖啡好香，好順滑。而我就叫左杯西柚冰茶，估唔到有咁大舊西柚係入面，好香西柚味，好refresh。Tea Set整體既野食都好味，咸甜點比例平均，每樣各有兩件，唔洗爭，而且做到bite size，食哂都唔會太飽太Heavy。咁舒服既環境加埋美景同呢個顏色七彩既Tea set，真係雨中既彩虹，其實落雨又有咩好怕wor！？哈哈地址:中環威靈頓街2-8號威靈頓廣場M88 17樓電話: 2973 6088營業時間: 星期一至日: 11:30-23:00…查看更多