sweetcat_b的个人专页

呢間食店唔係search openrice 我都唔知，因為佢喺商場入面一個唔太起眼嘅位。本來我係想食牛肋肉蛋包飯，但係已經賣晒唯有叫牛肉蛋包飯。呢間舖頭原來仲有炸雞，另外再叫多一個炸雞。蛋包飯一嚟到，侍應就問我要唔要影張相先，我又唔慣俾人睇住影相，所以佢切咗我之後先影。個蛋嘅生熟程度岩岩好，牛肉味道都唔會好鹹，另加少少菜中和番都唔錯！差唔蛋食完個飯個炸雞先嚟😅其實我食完個飯都飽咗一大半。上面7樓都有間炸雞，如果想食多d雞我覺得上面嗰間會多d, 呢間炸雞就有埋年糕同埋薯條，感覺多元化d!上面嘅年糕無咩味，我麻麻地，炸雞都算嫰滑嘅！兩款比較之下我都係鍾意食蛋包飯多d!…查看更多

星期六未到12點去到餐廳已經見到有好多人，果然新開張吸引左好多人試新野。唔洗點等位就已經有位，一入去侍應已經放低左一張紙，上面有個QR code可以scan 入去落單，我地當然又試下啦，反正佢間餐廳都唔係好多人做野。落左單之後差不多半個小時都仲未見到有野食上枱，追問之下餐廳先發現自己個落單系統有問題，佢話會盡快跟，我忍唔住同佢講你個系統唔得就唔好叫人用佢落單。咁我再等多十幾分鐘都仲未見有野食，忍唔住真係要搵經理追追。當時我已經極度肚餓，等左成9個字終於有野食放喺枱面。本身窩夫用佢個落單系統係寫左後上，最後跟單位經理問我地要唔要上埋。等左咁耐就梗係叫佢上埋先再算，結果鹹甜食物一齊食。一個係牛肉粒薯粒鑊仔，都算係多芝士，我，薯仔係一粒粒嘅，牛肉粒都算係有牛肉味嘅，略嫌佢芝士味唔夠濃可以再濃d。至於窩夫依然好食，今次叫左鮮芒果士多啤梨窩夫配雪糕。雪糕可以自己揀味。窩夫外脆內軟，唔錯。埋單$26x，以lunch 計唔平，而且Yoho都有好多餐廳，呢個價錢我未必會再食多次，除非我好想食窩夫。題外話，餐廳自己承認佢個自助落單系統有問題但仍然叫我隔離嗰枱客自助落單到底係咩玩法？…查看更多

每一次經過C3都已經係食飽左，次次經過見到都覺得佢好抵但係次次都已經食唔落。今日特登行過嚟食，終於試到佢地嘅意粉。最平嘅意粉餐唔洗50蚊已經有一個，又有餐湯又有蒜蓉包仲有餐飲，晚餐嚟計感覺上已經好抵食。今日嘅餐湯係南瓜湯，甜甜地唔太稀，味道都唔錯嘅。蒜蓉包都幾脆，仲有d暖唔會話淋晒嘅，餐飲正正常常無咩特別啦。叫左個蒜味素食意粉，有粟米粒又有青椒仲有d菇。蒜香意粉又好濃嘅蒜味，略嫌濃左少少重口味左d d，如果鍾意食重口味應該會覺得幾惹味嘅，我自己就鍾意淡番少少。另一個係黑椒牛柳絲意粉，呢個就真係好有茶餐廳feel。味道好濃好有黑椒味，又夠晒辣，好開胃。可惜我有d 喉嚨痛食唔到太辣，所以試左一啖就無再試。意粉size唔細而且無話將貨就價，呢個價錢真係好抵食，希望佢做得住啦。…查看更多

今日一心諗住去商場樓上嘅Ikea添置屋企嘅家品，於是就去左商場樓下嘅食肆食。我地得兩個人又唔係特別肚餓，於是去左食意粉。叫左一個餐，餐有沙律、餐湯仲有飲。沙律無咩特別，但係個餐湯感覺上就太稀了。咁岩有2個意粉做緊特價，於是叫左其中蕃茄蟹棒忌廉意粉。我相信個蟹蓋同個蟹棒意粉係無咩關係嘅，個蟹蓋異常地乾淨，而且個蓋入面咩都無嘅。意粉嘅質地唔會太淋，有d咬口。最初我以為佢手作=人手造，睇完佢個menu發現佢又唔係完全係。不過唔緊要，意粉嘅口感係唔錯嘅，醬汁嘅味道亦都岩岩好，好有和洋式餐廳嘅感覺。至於本菇明太子意粉，賣相無蕃茄蟹棒意粉咁吸睛，不過味道都唔錯。本菇都算係幾多，成個意粉嘅味道主要係來自明太子，少少辣幾惹味。呢個都唔錯。 另外見兩個意粉都無咩菜加左個配料西蘭花，上枱得一個碗仔咁細...下一次都係唔好再加。…查看更多

星期日唔想屋企煮又懶，所以行左去屋企附近搵野食。小鍋米線都算係清清地，反正又有少少喉嚨痛，都係叫d清清地嘅野嚟食。我都唔係成日嚟呢間食，原來佢d飯都幾抵食，一個自選雙拼飯都只係$38，仲要包飲品。蕃茄濃湯米線就要$42，依家嘅物價計都差唔多啦。要左一個蕃茄濃湯米線配豬軟骨，蕃茄濃湯米線酸酸地幾開胃，湯料仲配左酸菜，酸菜酸度適中，幾開胃。豬軟骨都炆得好淋，味道唔錯。至於$38嘅兩餸飯，賣相就差左少少，可能因為淋得太多汁。兩餸呢次揀左雞扒、蛋同埋腸仔。賣相雖然麻麻地，但係佢又真係好鬼足料，超抵食，又飽肚又平，糧尾之選啊。…查看更多

之前見到好多報道介紹呢一間紐約嘅漢堡店，過開中環做檢查就梗係去試下啦。未入到去已經見到條長長嘅人龍喺度排緊隊，當時係平日下午6點左右。一場嚟到，雖然見到要排隊都無理由唔試下嘅。呢度係先排隊買野食再搵位嘅，咁我照樣排隊，排到差唔多其中一位員工見到我係孕婦，佢竟然走埋嚟同我講可以幫我落左order 先，即刻覺得受寵若驚。快快手手落左order, 然後就去左搵位坐。兩個人都叫左唔少野食，又包又薯條又飲品。落左order 佢會俾部機你，有得拎就會話你知。叫左Double shack burger, chicken burger, cheese fries, milk tea milk shake 同埋蘋果汁。Chicken burger 係炸嘅，諗住雞一定係全熟所以就叫左個雞包。雖然係炸雞，又唔會覺得好乾，味道都唔錯。Double cheese burger 望落就豐富好多喇，話晒都係double。不過牛漢堡始終唔會整到全熟，我只可以食比較熟嘅位置。相比較之下當然係牛漢堡出色d，不過為左要食全熟，食雞漢堡都不失為一個選擇。至於cheese fries即刻食熱辣辣真係唔錯。好濃芝士味又脆卜卜。不得薯條一定要襯熱食，凍左個口感就真係差少少。至於Milk tea milk shake係香港獨有，本身好有期待，可惜飲落個味真係麻麻地。味道好甜，淨係飲到奶味又無咩茶味。呢杯真係認真麻麻。食物質素唔錯，雖然要排隊但係佢都有足夠人數做人潮管制，整個流程都好順暢。下次卸左貨要認認真真地試有牛嘅漢堡先得。…查看更多

今日心血來潮想去飲個＂晚茶＂，所以去左教育路。呢度本身都有幾間飲茶，最終都係決定去東哥度食。雖然呢度嘅座位係有少少迫，唔似酒樓咁闊落，不過夜晚都可以有茶飲仲想點?之前都曾經去過東哥飲晚茶，印象中係唔錯嘅。今日再一次encore 見到佢有個籠仔飯餐連埋燉湯都只係$58 感覺都幾抵。兩個人叫左一個飯餐加兩個點心，應該咩都夠啦！飯餐叫左鱆魚肉餅x仔飯+蟲草花燉土雞湯，點心叫左鮮蝦菜苗餃同埋鮮蝦腐皮卷。個鱆魚肉餅籠仔飯一上枱真係嚇一嚇，個飯成個籠大，好驚食唔晒d 野。鱆魚肉餅都算好大塊，唔會話得好少餸唔夠配飯。豉油係自己落，所以唔驚個飯太鹹。蟲草花燉土雞湯真係燉盅咁上枱，個湯好熱又好足料，美中不足係湯嘅面都有唔少嘅油浮左喺面，可以走咁少少油就會更好。湯入面有幾件雞仲有蟲草花，都算好多料，都好夠味，飲完成個人都好暖。鮮蝦菜苗餃一籠有3 粒，大大隻都幾多蝦肉，皮又唔算太厚好滿足。至於鮮蝦腐皮卷就油左少少喇，香口野點都係多D油。不過上枱夠晒熱又足料，肥少少都值得食下嘅！…查看更多

估唔到元朗都會開老夫子餐廳，見佢成日都好多人，今日終於早左番去無人排隊，即刻去試一試先。除左餐牌有老夫子之外，佢嘅枱面都印左老夫子嘅4格漫畫，都幾特別。呢次試個焗豬扒飯同埋芭提雅燒倉魚配飯。倉魚飯係套餐，包飲品同埋湯。羅宋湯味道好濃，不過湯料就比較少，另外加左$12配上湯娃娃菜。羅宋湯就真係太少湯料，好似得一片菜喺入面。至於加$12嘅上湯娃娃感覺真係有d扼錢，$12得2 條菜，一人一條都已經食晒 （得2條咁大把 =.=）。至於焗豬扒飯用鐵碟上幾特別，而且份量都唔細，食完個豬扒飯已經飽左一大半。豬扒夠深，茄汁唔會太酸或者太鹹，味道唔錯。芭提雅燒倉魚係炸嘅，上枱脆卜卜，魚肉都幾滑，配埋佢個酸酸辣辣嘅泰式醬汁好惹味。食物味道都可以，都可以再去試下其他野。不過唔特別要飲野的話可以唔洗叫套餐，個湯真係無咩特別。…查看更多

好耐無過對面海，難得過到嚟梗係要搵d好野食下。一早已經知道自己要過嚟，上網見到咖啡弄可以電話訂枱，即刻打過去book定位先。雖然訂左位，但係去到都要等一陣先有位。今日叫左我想食好耐嘅鬆餅，另外由於佢最低消費係每人一杯飲品，所以都一人叫左一杯飲品。飲品都算有特色，不過飲品一向都係餐廳食水最深嘅野，加上我唔太好甜野，一人一杯有時又覺得有d強人所難嘅，用銀碼做最低消費感覺會合理d。叫左一杯果茶另外要多杯薑茶，薑茶唔記得左影低，入面真係有幾片薑，薑味亦都好濃，好岩胃口，薑蜜仲要配芝麻餅，都算有誠意！至於果茶味道酸酸甜甜，好開胃，不過飲多左就覺得有d甜。另外叫左煉乳花生鬆餅，鬆餅鬆鬆軟軟好似蛋糕咁，花生醬加煉乳又係無得輸，好好味。唔食得雪糕嘅情況下仲可以食到呢個鬆餅真係覺得好感恩！！兩杯野飲加一個鬆餅兩個人share食作為下午茶已經好飽，個鬆餅嘅份量真係唔可以睇小，下次食得雪糕真係要再去食多之鬆餅先得啊。…查看更多

咁岩今日要去西環要放半晝假，咁就梗係唔會留喺office 附近食，決定捱一陣肚餓出到西環先食番餐飽！西環都算係好多小店式食肆，行左個圈之後決定試下呢間以韓式炸雞為主打嘅食店。午餐係有套餐嘅，而且都有佢地嘅招牌炸雞，於是叫左一個炸雞combo 同埋石鍋牛肉飯試下。跟餐嘅湯無咩特別，正常白蘿蔔湯味道。炸雞combo 上枱時真係嚇死人，份量都幾多下，炸雞皮脆肉嫰，中間嘅酸蘿蔔好開胃。另外仲有幾個飯糰波波，份量無因為午餐套餐而細左，反而仲好足料。可能因為炸雞combo實在太出色，石鍋飯牛肉飯就失色左少少，牛肉嘅份量比較少，食到尾好似唔係好夠肉送飯咁。下次再食都係要食炸雞先得！…查看更多

平日嘅晚上經過Yoho Mall嘅Mango Tree Cafe, 未到7點店入面好似已經有d滿，見佢有個一周年特價主菜，望落都好似幾吸引，於是就入左去食好西喇！星期一至四嘅晚飯時間佢每日都有一款特價小菜，入到嚟唔試下又好似好唔抵咁。今晚輪到森巴牛仔骨煲 （半價左 $74），我都唔執輸叫番個先。由於肚餓嘅關係，所以另外叫左個芝士黃咖哩大頭蝦伊麵，個伊麵價錢唔平，但幅相好吸引到我！先嚟左個森巴牛仔骨煲先，雖然佢做緊半價，但份量一d都唔細！牛仔骨有好多件，不過就唔算係好多肉，好惹味同開胃，兩個人食完個牛仔骨煲都已經飽左一半喇！另一個重頭戲係芝士黃咖哩大頭蝦焗伊麵，一上枱已經覺得顏色好靚，食慾大開！！黃咖哩好香，唔辣，而且同佢幅圖個樣都差得唔遠。味道唔會好濃，但係都好夠味，隻大頭蝦都好大隻！唔錯唔錯！雖然呢餐唔平，不過食物係有水準嘅，下次可以再去試下其他食物！…查看更多

呢間大肚腩點心腸粉其實都已經開左好耐，不過好多時經過已經食飽飽。今日終於的起心肝去試一試。叫左幾款點心、腸粉同埋叫左個飯嚟試下。今次叫左帶子菜苗餃、芝士春卷、排骨飯同埋叉燒腸粉。帶子餃個樣都算幾靚，味道亦都唔錯，而且佢一籠係兩件，岩晒兩個人去食。芝士春卷感覺有少少油，加左芝士喺入面，夠熱但係油左少少，試下都無妨嘅！個排骨飯又幾好食wor, 好香，而且係熱辣辣岩岩好整起嘅，加埋點心兩個人食岩岩好。至於我最期待嘅叉燒腸粉反而覺覺得無咩特別，唔算特別出色。成餐飯我最欣賞嘅竟然係飯，菜苗餃都唔錯，佢仲有d特價點心套餐好似好抵食，下次可以再去試下其他野。…查看更多

經過巴士總站附近見到呢間新開嘅食店，主打嘅係花膠，價錢又唔貴，咁吸引，梗係要去試下啦。$38有花膠湯麵你食，咁滋補嘅食物又真係好難唔心動嘅。一上枱，賣相都幾驚喜，花膠都幾多下。冬菇好厚肉，炆得好淋好入味，而且仲有幾條菜，感覺都算健康。另一款係花膠蠔汁撈麵，今次揀左粗麵，感覺一樣咁足料，都係有菜有花膠冬菇。蠔汁撈麵比湯麵濃味，兩種食法各有特色。睇下你個人口味係濃味定係清淡，我就覺得湯麵清清定岩我多d。另外再外加一碟郊外油菜，份量都唔細，而且蠔油係分開上唔係倒喺菜上面，都算幾細心。佢仲有甜品同埋碗仔翅，不過食完個麵已經好飽，下次經過要試埋其他野先得。…查看更多

前日嘔到九彩，食咩嘔咩。咁岩今日要去青衣城，只好搵下商場有咩係岩病人食。原來要喺商場搵病人岩食嘅野真係有d困難，最後終於搵到一間有粥食嘅鋪頭。雖然佢嘅雞粥都要成$48，不過都無辦法，我只係食得落粥。另一半咩事都無就梗係要食飯啦，所以佢叫左個叉燒炒飯，雖然個炒飯有d圖片與事實不符，但係味道係唔錯嘅，都炒得幾乾身，病緊嘅我都忍唔住食左啖。至於個雞粥其實我只係要d味，雞肉嘅話朋友都話幾滑嘅 （我嘔到餸都唔敢多食），個粥亦都有雞味，岩晒我呢d口淡淡嘅病人。至於個炸油條，朋友話係翻炸，配埋粥食就還可以，唔配粥就真係唔係好食得落。如果想清清地食番餐，又真係需要食粥嘅話，都可以試下嘅。…查看更多

今次又嚟過橋麵檔食飯，雖然佢叫“麵檔”，不過我未試過有一次喺呢度食麵。呢度嘅霸王雞就一定要食，次次都會嗌，係我嚟呢度食飯嘅例牌。霸王雞配菜飯，感覺都幾健康。食左幾次每一次都keep到個水準，隻雞有少少辣都幾惹味，而我最鍾意就係多蔥，岩晒我呢d蔥怪。另外今次就再嚟個新嘗試，唔叫雞叫左個小菜。叫左蝦仁炒蛋嚟試下，小菜都係配菜飯。之前幾次食飯都見過好多枱有叫小菜，心諗應該都唔會差。蝦仁炒蛋上枱賣相都唔錯，都幾大碟，而且佢嘅蛋都炒得幾滑，蝦都算係爽口。不過依家無左任飲飲品，要加錢先有，感覺就無以前無咁抵。小菜試左一味都叫做唔錯，下次要再試下其他小菜先得。…查看更多