C3 (已結業)

每一次經過C3都已經係食飽左，次次經過見到都覺得佢好抵但係次次都已經食唔落。今日特登行過嚟食，終於試到佢地嘅意粉。最平嘅意粉餐唔洗50蚊已經有一個，又有餐湯又有蒜蓉包仲有餐飲，晚餐嚟計感覺上已經好抵食。今日嘅餐湯係南瓜湯，甜甜地唔太稀，味道都唔錯嘅。蒜蓉包都幾脆，仲有d暖唔會話淋晒嘅，餐飲正正常常無咩特別啦。叫左個蒜味素食意粉，有粟米粒又有青椒仲有d菇。蒜香意粉又好濃嘅蒜味，略嫌濃左少少重口味左d d，如果鍾意食重口味應該會覺得幾惹味嘅，我自己就鍾意淡番少少。另一個係黑椒牛柳絲意粉，呢個就真係好有茶餐廳feel。味道好濃好有黑椒味，又夠晒辣，好開胃。可惜我有d 喉嚨痛食唔到太辣，所以試左一啖就無再試。意粉size唔細而且無話將貨就價，呢個價錢真係好抵食，希望佢做得住啦。