阿四車仔麵 (已結業)

唔講唔知...以為粉嶺人好鍾意食車仔麵，淨係一個聯和墟都有五間車仔麵店。見唔係好多人揀咗依間呀四試下，地方闊落，坐得好舒服。餐單裏面有好多特色嘅嘢食全部都打晒星星，選擇困難嘅我梗係揀啲廚師推介啦！好鍾意食麻辣同埋佢嘅自家製菜甫，蘿蔔煮得好清甜好淋而且一啲渣都冇，豬腸同埋咖喱魷魚不過不失，糖心蛋真係好糖心。小食滷水雞翼亦都醃得好入味，$20/5隻 喺出邊點食得到啊？配個樽仔奶茶，呢個下午茶100分呀！

喺聯和墟一個滿佈車房五金舖嘅路口，開咗一間裝修簡潔嘅港式車仔麵。我食車仔麵最鍾意就係食個辣湯㗎啦，湯底就係車仔麵嘅靈魂，所以我叫左沙嗲湯底，一嚟到見到個食水就知道，出色👍🏻沙嗲香濃得黎唔算太聯和墟辣，襯托油麵簡直係一流！而係餸方面，我揀左最經典既咖喱豬皮同咖喱魚蛋，兩款都非常彈牙入味，唔會散收收。而我個人認為，最令我驚訝嘅係個糖心蛋，一咬開啲糖心蛋將爆出嚟，值得一試👍🏻如果可以有多啲特色嘅飲品俾我選擇嘅話，我相信我會多啲嚟食😋

答案係叫多幾樣餸今次叫咗溏心蛋，甜酸齋，魚皮餃，滷水雞翼，辣魷魚，米粉，加沙嗲汁。另外叫埋個花膠碗仔素翅米粉係我最愛嘅超幼銀絲米粉，湯底唔會太咸，啱哂加啲辣椒油，值得一讚係佢有辣椒油同麻辣油，兩種都各有特色，味道出色，所以我倒落匙羹度輪流點嚟食~啲雞翼都入味，魷魚爽口，其他就正正常常，係溏心蛋個心有啲太凍，差啲啲...碗仔翅雖然20蚊一碗，但都夠大大碗，都足料，佢都有浙醋，胡椒粉俾你自己落，但我食開加啲麻油，如果有得加就好了(貪心lol)最後最後，任添菜甫要試下，正

今日行開聯和墟, 見到阿四車仔麵, 店內裝修簡潔, 望落去比一般車仔麵檔鋪干淨, 餐單上的食物和價錢非常超值，走入去試試.叫左份招牌車仔麵, 大大碗油麵, 份量十足, 豬大腸清洗干淨, 十份肥美, 蘿蔔必食, 夠入味, 很甜沒有渣, 瑞士雞翼彈口, 油麵很滑彈牙, 魷魚又爽口！ 餸料份量較一般車仔麵檔豐富，價錢適中，抵.. 下次再來時, 會選4餸麵, 試試其它餸菜味道如何. 唯一不足係餐單上餸菜選擇不是太多.如果行開聯和墟, 又想搵一間平民化的食店, 阿四值得一試

我地最鍾意車仔麵，可以食唔同嘅餸。聯和墟新開呢間車仔麵，裝修簡約，唔似傳統懷舊車仔麵。今次食下午茶，唔係好餓，所以，淨係叫個四餸冇麵嘅餸。冬菇好入味，黑黑的，又夠淋。雞腎，超級正，唔會好硬，都葉得好夠。豬紅，選料不錯，好滑。其實我最鍾意係任食嘅辣菜寶😜

餐廳環境：新開一個月，環境乾淨企理，如果啲枱底加返啲勾俾大家掛袋就會更加貼心；提提大家記得帶濕紙巾或者紙巾，因為啲醬汁罐都油淋淋。食物質素：兩碗麵試左六味餸，蘿蔔好甜，一啲渣都無，頂瓜瓜！大腸就得三粒，有兩粒仲要係末端，肥得濟，又唔太夠味；其餘個啲就係墨魚丸有墨魚丸味咁，無咩特別；湯底還可以，個人覺得好味過大埔個間。員工態度：啲姐姐態度好好，會密密承受啲柯打錯到飛起既壓力，俾個like佢地！補充一點，我唔知收銀位男士係老闆定店長喇，人地都係打份工啫，俾返啲尊重啲姐姐之餘，同時都會尊重到自己架！食品價格：超值！兩個人一百蚊有找，仲想點？ 總結：係粉嶺食過兩間車仔麵，呢間算係咁，當然無得同人地拎米之蓮個啲比喇，但係都物有所值！

已經食過幾次啦～😖新開張乾淨清潔，點餐方便，寫自己枱號再慢慢唸食乜，唔似其他店吹你問你要乜。食物有盤上埋，有骨都唔怕整污糟張枱，所以枱面清潔，非常好。食物方面，白蘿蔔3大舊又夠淋又夠甜，每次必叫；腩肉3厚片，都係好好食好淋，似日本拉麵d燒腩肉片，試過12點幾已經話腩肉賣哂；魚皮餃果d就正常野，雞翼似瑞士雞翼，其實幾好食甜甜地。我每次會叫米粉，一碗米粉其實好多下。糖心蛋都係必叫😛另外枱面有不同辣醬，菜圃任食，d菜圃幾好食夠爽口。腩汁都唔錯。基本3餸1麵38蚊，係聯和墟黎講係少少貴，每加1餸加9蚊，野飲紙盒裝都4蚊。4餸1麵1飲品已經51蚊。不過概括所有野，我覺得值得食下。

其實知道這間新開的車仔麵店有一段時間，不過就冇來試過。今晚經過，就試下新野。餐廳裝修環境算時尚，清潔乾淨。坐位與坐位之間就窄左少少，不過可以接受。$38包一麵，三餸，而跟餐要飲品就可以減$2。我就揀左油麵，辣魚蛋，豬血和蘿蔔加沙爹汁。另加淨咖哩魷魚和腐乳通菜。麵既份量對我黎講係多，湯底加沙爹汁好惹味。最有驚喜係個蘿蔔，夠入味，又冇渣，一入囗即溶。豬血都夠入味和滑滑感覺。咖哩魷魚都夠入味，但嫌份量好似少左啲。腐乳通菜就一般啦！總括黎講，可以繼續支持。

新開了幾個月，一早食左而家先記得未寫。聯和墟近排其實都已經開始多咗唔同嘅有裝修嘅餐廳，譬如係意樂，good time , 依間車仔麵都算係有少少裝修。$38 3餸一麵，揀了腩肉，芝士腸，魚皮餃，腩汁湯底，加了4蚊要了個豆漿（以為係一支支，原來係維他豆漿😂） ，米線底。我見佢廚房有慢煮機，咁我都對佢食物有啲期待，豬腩肉係入味嘅算係OK但肯定冇用慢煮，浪費了。魚皮餃芝士腸就好難會好特別嘅，所以都係正正常常， 湯底係冇乜特別。米線都係正正常常，不過啲麵嘅份量真係少少少。我見到有人話佢個向窗門位同面壁位好奇怪，其實我覺得佢用盡個空間係完全正常，有得向窗其實好多人鍾意。呢個價錢來講就正正常常。

我很喜歡吃車仔麵，但甚少帶小孩去，始終覺得車仔麵店通常比較坐得不舒服，直至...阿四車仔麵的出現！改變了我對車仔麵店的觀感!門面裝修現代簡潔，有別於一般傳統車仔麵店的門面，枱面的調味料樽很乾淨亦有驚喜: 菜脯很爽脆，辣椒油能帶出麻辣感，小兔子牙籤筒更點綴了擺放調味料的空間。等待食物期間，留意到廚房清潔衞生，這讓我對這間阿四車仔麵加分不少!門面裝修、調味料擺設、清潔衞生方面已使我對這裡有不錯的印象，食物質素也令我和孩子們吃得很滿意！小朋友大讚龍蝦丸大大粒，烏冬好味！而我也想一讚車仔麵的主角及靈魂 - 麵和湯底，幼麵軟硬適宜、湯頭味道濃淡恰到好處，放在端來時的小盤子上，會感受到車仔麵店少有的精緻心思。此外，不得不提「鮑汁雞腳」，賣相欠奉，瘦瘦的雞腳瘀瘀紅紅的，卻出奇地好吃！煮得夠腍的雞腳相當入味，鮑汁調教得不會過於濃稠，屬水準之作！餐後一樽香滑凍奶茶，滿足！

新開車仔麵環境望落ok 入去坐低試吓睇來睇去本身食量都多 有個招牌面 就呢個啦招牌面$58有九個餸 聽落幾多呀呵 黎到碗麵睇到真係目定口呆 唔係啊嘛碗野似$30貨色咋喎 唔足料比漏餸 補返雞翼俾我 得嗰一隻 份量少 係我食過嘅車仔麵最難食 我叫腩汁 嚟到碗野係辣㗎啦已經係 個湯都係辣 佢好多經典餸都係辣㗎 無原味㗎囉 完全唔入味 所以有陣時真係唔係話行過路過唔好錯過 依家係變成行過路過都唔會再嚟食👎🏼👎🏼👎🏼又貴又唔好食又唔足料 伏中伏 係咁嘅意思

嗱，唔係誇張，呢世人食過最難食既車仔麵非佢莫屬，我叫左咖哩魷魚，完全同係街市買個d水魷煮熟比你食一樣味，個糖心蛋又係冇味，都算啦，食食下有幾張紙嘔返出黎！大佬依家食幸運曲奇咩，玩我咩師父。。。再黎個雞翼尖，甜過你男/女朋友同你講句i love u, 個汁就完全古怪，我個fd叫牛腩汁我試完話都正路，佢仲質疑我，我叫佢試下我個沙爹汁條友飲完係度笑中肯講句服務同裝修都唔差，我地都係咁比佢棟左入黎，大家如果想食餐飯開開心心我就誠意推介，難食到你笑

係聯和墟車仔麵食店選擇少，見佢新開又無人入去試試…點左油麵、腸仔、牛腩、雞翼、菜碗麵一到真係經典，湯係暖唔熱，麵同餸都係凍，同伙記講完就換左第二碗，但同第一碗無分別，最後都係選擇食落肚入正題，油麵有油麵，雞翼完全唔入味，牛腩乾爭爭好似湯渣咁，最好味條腸仔，菜我真係唔知佢想點，食一啖成口泥環境方面一流，檯面配料辣油都多選擇，但煮食服務衛生真係九流，唔會再有下次，我平時好少寫食評，但我真心希望改善下服務同煮碗滾熱左的麵俾客人食，食壞人就唔好。

行過粉嶺想食車仔麵，見到呢間野新裝修好似靚靚仔仔咁，咪即管入去試下。小喇叭，點知俾佢個外表坤左。都已經挑選打星嘅餸(豬腸，蘿蔔，牛腩，冬菇) 點知都係中伏。豬腸完全冇味，蘿蔔太淋冇口感，牛腩又瘦又韌，冬菇細粒過我粒雞眼，仲要一陣怪味) 一碗車仔麵睇落好簡單，但係要整得好食真係唔易。

屋企附近開咗間新嘅車仔麵，大無畏精神走入去挑戰一下，點知中曬伏。由於係一個舊區，相對景觀都比較不堪入目，而且仲有啲古古怪怪嘅人經過橫街小巷， 而店舖嘅設計竟然係有一啲面壁位，亦有一啲係面玻璃位（對街）， 食食下嘢畀啲怪人望呢望去，真係非常倒胃口！都係以傳統嘅剔剔紙去落單， 款式都算唔少， 如飲品價錢都尚算合理， 要叫一個面加三個餸或者四個餸起標， 有啲女仔細食啲，都有機會食唔曬。我叫咗魚片頭、酸齋同雞翼， 另外有沙嗲汁。酸齋唔夠淋，個味怪怪的 。沙嗲汁唔算惹味 。魚片頭來貨嘢ok。雞翼入口即溶，彷彿已經煮咗或者浸咗好耐。要讚嘅，係佢用托盤上，感覺比較衛生。