興記麵食家 (已結業)

今早起身又想去興記添食，呢次食水餃幼麵，蠔油芥蘭。由於水餃要煮，需時比昨天多咗幾分鐘，攞上來的水餃咬開係燙嘴的，非常正👍🏼👍🏼！如果可以揀，一定揀現煮，包括所有雲吞、水餃，可惜香港大部份廚師嘅陋習就係一次煮一筲箕滿嘅雲吞水餃，有客點餐再翻熱一下，D雲吞皮咁樣翻熱好易煮爛晒，仲試過有D雲吞個心都已經放涼咗，翻熱時間又唔夠，咬開個心係涼嘅，都唔知係唔係未煮熟！就算星級名店都一樣係咁差，香港真係唔好隨便叫自己係美食天堂，改好D陋習先吧！講番興記，一碗三隻水餃，咬開熱辣辣，好正，裏面豬肉、蝦、筍、木耳清楚見到，味道好正。碟蠔油芥蘭都好正，唔會淥到過熟，鍾意有爽脆嘅口感，如果有韭菜花就更正了😋😋

缸瓦指標：3分，碗碟羹都係用陶瓷👍🏼👍🏼早餐店要平又好食仲要係用陶瓷器皿，除非去咗外國，喺香港差不多係天方夜譚！今早八點去到太子，老遠望見有雲吞麵舖，行近D仲要見到廚房一排排嘅瓦碗瓦碟，心裏暗叫發達喇！😍😍店內只有一位阿叔正在包雲吞，可能係老闆。叫咗一碗雲吞粗麵，瓦碗瓦羹裝，都唔知幾耐冇見過，仲要只係港幣25大洋，真係感動到想喊😭試下啖湯，正！好香大地魚味。雲吞大小適中仲要係散尾雲吞皮，並唔係乒乓波咁大睇見就驚嘅嘢，咬開雲吞見到蝦、豬肉，真係好難搵到仲有豬肉嘅香港雲吞，市面上好多所謂正忠雲吞麵舖全部都係淨蝦雲吞，不如改叫蝦餃麵仲冇咁易混淆！D麵嘅顏色係淡淡的黃色，望落自然，唔似係色素，估計真係蛋麵，冇乜鹼水味，咬落口感似蝦子麵嗰種，下次會試下幼麵是否彈牙。以25元食到碗咁正忠嘅雲吞麵真係超值，最難得係D餐具仲係好珍貴嘅陶瓷器皿，而且都係完好無缺，冇撞崩撞裂，好難搵到了！間舖門口好窄，唔夠十個位，中午時間估計應該要等位。極力推薦，下次會試下晚餐時間去，試下水餃幼麵😋

早幾日經過太子買生果！見到呢間麵檔都幾多人幫襯！雖然舖頭細細，店內坐滿，連係街加嗰幾張檯都坐滿人！見到有人起身就即刻坐低！望下牆上個餐牌，穩陣d試下個雲吞麵！阿姐姐問要唔要加碟菜，um...就食得健康d，芥蘭唔該！見個伯伯廚房邊淥麵，邊加幾粒雲吞，眨眼間好熟練咁雲吞先落碗再到麵！睇樣幾像樣！飲啖湯…個湯唔錯，不過提下個湯可能多左羅漢果，偏甜小小！雲吞有小蝦，爽口！細細粒,size啱標準！唯一冇金魚尾！芥蘭…軟硬啱啱好！加蠔油同豬油(估下)..好香！其實食菜應該係咁！全走真係哂料！小店買少見少！見伯伯年事已高！亦相信都唔會有人接手！所以食要快手！

向來喜歡廣東麵食，但香港具傳統風味的麵店其實不多。若非老饕過料，我真的會錯過太子這間其貌不揚的「興記麵食家」。這裏的雲吞麵好細碗，但雲吞的金魚尾很美，麵爽彈牙，湯頭亦夠大地魚味，這才是細蓉應有的模樣！牛腩麵是傳統廣東式的柱侯製法，好香又易咬！最欣賞是在此店吃完東西後，嘴唇會有油潤感，現時太多廣東麵店不太敢下油（正宗應用豬油）焯麵，但這卻是吃廣東麵食的靈魂。總括而言，此麵店已打入我的香港廣東麵食Top five了！

老店老伯麵店造出香港真滋味青爽口味小蝦肉雲吞麵，精制老味汁牛根牛腩麵有香港以前的味道，有時光倒流及最好味的雲吞麵食，熱辣辣的湯甜大地魚味，加些蔥花配合各種鮮制滑溜可口，充滿舌頭及喉嚨的雲吞，水餃及牛根腩非常濃郁彈牙麵條脆嫩！有幼時的口感而懷舊味香無味精的感覺！有一種香港舊時的味道！只是鋪面窄小及位小，地方局促而有些殘舊！但都值得回味古早味的麵舖！加入清甜味美的大地魚湯底及五粒細雲吞有一份兒時的味道，可口新鮮湯底，幼嫩麵條質感軟棉食出蝦肉甜鮮味，回復時光倒流的味道！精制實味的牛根及濃郁原味彈牙的清鮮牛腩，真是味料非常滿足的麵食！十分香濃，一定要品嚐！價錢經濟實惠，幼嫩麵條，鮮蝦雲吞，鮮蝦水餃，原汁牛根腩，原汁豬手麵，爽滑魚蛋及爽脆牛丸及京都炸醬麵:$25.0 ！值得一試，各式其式的麵食，令人滿滿賞心舊味！

經過好多次， 這晚終於去食第一次，有點後悔咁遲先嚟食第一次。 香港實在太多好嘢食， 之前無入去因為嫌佢又細又迫， 但有次見到坐門口嗰個人碗麵好似好好食， 令我念念不忘（我真喺好為食），於是今晚7：30左右去試 。 位好少要另外開摺枱坐門口。選擇唔多， 兩個人叫咗三碗：牛筋腩麵👍又腍又入味 麵亦都爽彈，炸醬撈麵👌記得飲咗碗湯仲有一碗浄雲吞👌粒粒脹卜卜。 呢度用嘅碗好似是較平時見到的細一D但麵嘅份量是無少到。我以後會常去的。  臨走嗰時聽到有人話呢度嘅水餃好好食， 下次就嚟食水餃。

兴记麵食店，半个百年老字号，水準永保在水平之上 。 每次重遊仍不会失望，店虽小，天气焗热，仍讚叹其面條依旧爽口煙轫，绝无梘水味，咬下第一口虽感略硬，唯浸透後则是回味无穷的弹牙 。云吞仍是传统的一口一粒的尺寸，但是料足肉汁多，虾味浓 。其大地鱼，罗汉果汤更一绝，其味极浓却带着啖啖鲜香。一碗细蓉落肚，仍意猶未尽，再来一碗腩筋粗，同样出色，浓汁不蓋鲜味，筋冧腩爽，麵有嚼头，並且料足 。

小弟係上海人，由細到大最憎食嘅野就係廣東雲吞麵，個浸梘水味會令到我頂唔順，至此之後我會避開唔食......話說小弟男友食開一間麵店，話li間鋪嘅雲吞麵好食又抵食，死都要捉我去食，我唯有免為其難去啦，點知一食就愛上左仲成日都心思思想去食tim~其實間麵鋪好細間，只係放到3張摺檯，門外亦都有幾張摺檯主角雲吞面，細細碗入面有5粒雲吞。雲吞放底，麵放係雲吞上面，等啲麵唔會淋。個麵係完全冇梘水味架！！！雖然冇梘水味，但一樣都係咁爽口彈牙，雲吞蝦肉同豬肉比例好好～碟腐乳通菜嘅腐乳量夠多，通菜亦淥得岩岩好，非常爽脆另一主角係大家估都估唔到嘅胡椒粉。Li間麵鋪用嘅胡椒粉並唔係係其他餐廳食到個種（姐係落極都冇味）佢地嘅胡椒粉，落少少已經好香而且夠辣，一路食一路好過癮，食完個胃即刻暖晒tim啊Li間麵鋪雖然內部環境好一般，但係佢做出黎嘅麵食相當傳統，而且十分抵食，今晚我同男友食左兩碗麵加一碟油菜都只不過係$63。小弟亦因為係li間麵鋪食過之後對雲吞麵完全改觀！

興記系太子基隆街一間店子細細，但唔起眼的老牌街坊麵店只賣簡簡單單的幾種麵食，喜歡佢地的大地魚羅漢果湯底，d牛根同豬手，炆得好林，帶有花椒八角陳皮的老味道，河粉又滑，可惜每碗份量唔多，所以好多客人都起孖，農曆年後由廿三加到廿五蚊，但風味傳統，系藉得支持的小店！！

老公睇咗同學facebook, po咗雲吞面，話興記乃系其至愛雲吞，即時行動，瞓醒就來食早餐路上search openrice,標示開11:00，當時9:00喳，老公失望到呢……對食吾會輕易放棄的我，試下打電話，竟然有人聽，仲話開咗啦，叫我可以去，開心到呢叫咗雲吞面，淨猪手：猪手炆得好入味，但個人較愛佐敦麥文記的南乳猪手。而雲吞麵則相反，興記好味好多：麵爽而不重梘水味，雲吞口感一流，爽滑香俱备，湯底清甜濃郁！絕對系城中雲吞麵最上品！看店的伯伯俱親切和譪，年紀好大了，這樣一間小店，收費不高，食物如此水準，相信盈利並非太可觀，佢地繼續經營，或許多少是因為對自己手藝的執着吧。

原本今日打算去試下大記攦粉，點知九點去到已經收檔，原來而家已經改左營業時間，咁只好係附近睇下有咩食，兜左個圈係街尾見到有間麵店店面比較舊式，環境有d簡陋，店裡面唔大座位唔多，但係店外面擺左好幾張枱都坐滿食客，咁就不如試下黎間啦。入座後我就點左炸醬撈麵和腐乳通菜。餐牌大致上$23一碗湯粉麵，$33一碟撈麵，價錢合理炸醬撈麵$33首先試下跟撈麵碗湯先，鮮味十足，應該很足料，但亦好重胡椒味同埋都幾鹹下。而炸醬撈麵，炸醬見到有瘦肉碎粒同肥豬肉粒，味道比較酸而且濃味，醬足夠撈哂成碟麵，麵好爽口彈牙但有d難咬斷。腐乳通菜$12，個腐乳醬加既份量都幾足，所以令碟菜都幾鹹。*我自己食野味道喜好都偏濃味，都覺得食完成餐都幾鹹下，如果無咁鹹我都會覺得幾好食，因為食物好足料咁，價錢又合理。我都會想下次再去試下佢地嘅雲吞河~

近年來多了在荔枝角一帶四處逛，除了找尋舊書之外，在這個舊區中，往往能夠尋回兒時的味道。有時候很懷念小時候的粉麵店，一條街上，可能有好幾檔同類麵檔，但可以味道各有不同，反觀現在，連鎖店千篇一律的味道，絲毫沒半點人情味。有次走過附近，發覺有好幾間粉麵店，的確勾起不少回憶。興記舖位不大，店內只得幾個位，就連門前都放了幾張摺檯，很有當年的風味。望望牆上水牌，款式有限，隨意點了牛筋腩米。份量其實真是有限，當作是下午茶還可以，如果要作為正餐，也許在下要食三碗。牛筋及牛腩都炆得好稔，非常入味，而且有少許嚼口，腩汁也夠重手，米粉特意留到最後，好等蘸滿了湯，加點辣椒油更香口，吃來一口一分回憶。舊區，真的可愛。

其實這店不是首次光顧，都吃了不知數次，但估不到都可保水準，所以就寫下食評吧！雲吞麵是一定食，因為我只鍾情之，麵條彈牙，因師傅不會煮得太谂，吃吧都是爽口的，而雲吞不是大大粒的而是size適中，而油菜不可小，我最愛是芥蘭，煮得超爽脆，吃那麼多次，味道都没有變 後話，味道沒變係好，但店員服務都沒變，真太差

這間我稱之為隱世麵食家,是因為鋪仔細細,位於一條唔起眼既街,如非街方,好多人行過都唔會食.本來間鋪位於柏樹街,十年八年前先搬到現址,即係說明我已幫襯十年以上環境方面,不能有任何期望,因為鋪仔超細,連埋擺街只有10~12個位,亦沒有什麼服務可言食物方面先係主力所在,先講湯底:一搬老廣州式面家既大地魚湯底,鮮甜味美,不過有時會好咸,亦飲得出應該有味精佢既面底,我認為係我食過甘多面以黎最好既,無鹼水味,又爽口,所以我從來只叫面或粗面(比什麼劉X記既竹星面還要好),估計佢既面底供應商係斜對面既X發面廠,其他什麼米粉,河粉個D可以唔使試豬手--個人亦對佢情有獨中,非常入味有淋,食落口一D都唔油膩,必試牛腩/牛根--好淋,好香好入味,又係廣州式既柱候牛腩,建議食牛/根腩撈面,因為D腩汁加埋D面,--無得輸水餃/云呑--自家制,云呑Size剛好,金魚尾,一啖一只,魚蛋--可以不試,一般凍肉鋪交貨水準炸醬--比較少食,因為個人不太喜歡,食過一,兩次,印象中偏咸此面家唯一美中不足,就是份量少,一碗云呑面可以7啖食曬(5啖云呑+2啖面),連我老婆都話食兩碗先夠飽....衣家份量少左,又貴左(以前食撈面有兩

見蘋果日報介紹過呢間興記，我其實想試佢哋嘅麵好耐。8月17日，返完通宵更出始創樓上買嘢。抽住一大袋果乾、零食喺街上行走。本來想去粿然好味試佢哋嘅菜茶，但係佢哋原來開12點，所以揾到都試唔到。行到汗水斑斑咁，無理由唔補充吓體力㗎？記得基隆街有呢間麵店，即時開Openrice睇吓確實嘅地址喺邊先……喺我所在地十分鐘距離，就行咗去買啦。其實佢真係一間好細嘅麵店，店內只有兩枱，加埋得幾個位。我又大包小包喺身上就唔好堂食佔人哋啲位啦。因為從小就好牛筋豬手呢啲濃味嘢，就外賣咗牛筋腩撈同豬手撈。等五分鐘就有得攞啦，好快！只係索價六十八蚊，唔貴。抽住大包小包行咗十五分鐘，返到家。打開兩個撈麵，撈好咗分好啲餸就孝敬咗啲俾阿嫲，俾咗盒阿哥大家齊齊食。豬手淋滑柔軟，牛筋唔硬就連阿嫲都可以食到；豬手同牛筋汁分量剛好，啱啱可以撈到成盒麵都有味；汁嘅濃度剛好掛到上麵，很好；麵冇奇怪嘅間水味，佢嘅彈性恰到好處；食完成個麵並冇食味精帶來嘅不適感，呢一點就令呢個麵物超所值，因為如今好多食店落味精落得非常慷慨，令人嚐唔到食物本身嘅「真味」，咁係一種浪費。美中不足係撈麵不附湯不帶菜, 就只有麵、蔥同埋豬手或牛筋，分量唔大。