泰昌餅家

营业中

休息中

好好彩，最近兩次都撞正出爐。同意，泰昌蛋撻唔係arm arm 出爐，就一般左d -- 不過又未至於樓下有人話冇蛋味。個蛋味都幾濃，唔算好乾，係個皮"林"左d. 好在個皮做得比一般牛油曲奇皮蛋撻厚少少，都算above average既質素新鮮出爐呢？正！我都係偏好曲奇皮蛋撻，泰昌果種鬆化真係無得比！加埋新鮮出爐既蛋香，好豐富既口感！個沙翁個人就唔多推介。因為較滯，食既人始終少d. 除非你11點去arm arm 出果時走去買。油炸既野，放耐左始終易變得唔好味的。如果你想食新鮮蛋撻，除左朝早，你星期六下午去，好多人會走去排隊買，但放心，佢一盤都幾多，唔使等好耐。為左好味既蛋撻等上一陣，都抵既。家下時興酥皮蛋撻，好難搵到做得好食既曲奇皮蛋撻lu. 如果各位有好介紹，記得講我知，等我唔使下下走咁遠噢~~

泰昌個名聽得多，但從來都未食過。人人都話佢嘅蛋撻同沙翁出名，所以就買嚟試吓。牛油皮蛋撻唔錯，實淨有蛋味幾香口，不過未至於要去專登返去買。朋友話沙翁口感鬆化，幾好食。我留到第二日先食，糖已經溶晒，食落仲有陣隔夜油炸鬼嘅味，最後唯有益個垃圾筒。

沙翁+旦撻...食唔出同普通街坊麵包店賣既有乜分別, 抱歉抱歉.

今日同個fd去完參觀域多利監獄~~順便去食一食~~明明已經好飽~~但黎到冇理由唔試埋o者~~~一去到見到明門口見到冇乜客人~~都已經覺得奇怪........入到去~~見到個肥肥矮矮o既阿姐~~個樣已經唔係好好~~黑口黑面~~跟住我同佢講買一個沙翁&一個蛋撻~~佢個樣即刻"喵"(高音)左我一下囉.......咩事呀而家~~買得少就要俾你喵呀??買兩件野唔係客人呀??再食落口........凍o既!!!!!!!!!!!!!!1加左價加到$3.8~~你竟然俾d咁o既垃圾我???完全唔鬆化~~冇蛋味~~同普通麵包店冇分別..........以前熱辣辣好好味o既沙翁去左邊???睇黎泰昌呢間野已經俾佢o既成功沖昏左頭腦........唔怪得冇乜人買啦...........樓下d人仲話好食??我諗佢地可能未食過泰昌未搬前o既沙翁同蛋撻......再睇番樓下~~原來唔止我一個人食到凍o既沙翁.......即係唔係我咁o岩唔好彩啦.......另外~~樓下d人話蛋撻仲熱~~係因為佢用個電爐一路熱住~~但一路熱住o既唔好處就係d蛋撻皮會變"林".......同埋個蛋撻會好乾~~通常係冇人買o既舖頭先會咁做

泰昌之所以成日要排隊，因為佢地每之製作數量不多，但去貨極快。其實咁都好，一來蛋撻一定係熱食，唔洗等就有都唔慌好食啦。之前見佢開分店，又賣咖啡，好驚佢水準不保，但係原來唔洗擔心之餘，又有更多人可試倒好野，千祈唔好令我失望呀！

有次同朋友行開中環，見泰昌蛋撻剛剛出爐就立即碌入去買~(最重要係唔駛排隊) 俾錢時見到沙翁個樣都ok wor，咁就梗係又一人一個啦~ 同朋友一路行一路食蛋撻，大家覺得味道ok，但未至於好似大家講得咁\"好好食\"~ 可能因為我地對佢\好大期望啦~至於個沙翁......我諗可能係少d 人買，放得耐左~砂糖溶哂...唔多掂

正店從未食過..旺角新世紀開左分店..一食己覺得驚為天人..瘋狂愛上..食完再食..睇食評卻話同正店差得多..既然分店都咁好味..當然要來總店試下門口舊式..無裝修可言..但人龍居然排到出街..買完一睇..好似比分店的淺色..味道:嘩..真係好味過分店好多..皮又脆D..蛋又香D..可能鋪頭舊D..FEEL又好D..旺角分店:好好味中環正店:勁勁好味

昨日o係皇后像廣場影完相, 特登行上擺\花街, 就係為左食佢o既蛋撻蛋撻夠曖, 皮脆, 蛋味香濃仲叫左老婆餅同皮蛋酥, 不過一般

因為位於我學校隔離, 所以成日食到蛋撻d蛋超軟滑!!!好似會sir落你侯龍度咁!!!食極都唔厭

是日做東。為迎合各方需要，買了中環人氣最「旺」的蛋撻兩款。自問是較喜歡吃曲奇皮餅底的蛋撻的- 尤其是那呈深褐色，厚度適中均勻，未聞先香，入口鬆脆的餅底（簡單點說，即是比butter fingers 外形薄三至四倍，又比它深色三至四度，但又不失牛油手指風味的那種）。泰昌的蛋撻，色澤做到了，口感也大概做到了，可是不同時候出爐的蛋撻，又或者不同時候買的蛋撻，味道可以大不同- 始終論「撻」，另一不可分割的就是個餡料子：泰昌的，要脹的時候很脹，要坍的時候很坍。總體而言，0830 的蛋撻最好食，又無人爭食（排隊）。始終，吃到心儀的蛋撻，也得講個緣份的。

一直都好鍾意食蛋撻,所以有介紹話邊度好食既話都會走去試吓,之前要去到中環都試過,但本人乃係九龍人,當然唔會話成日特登走去飯啦,雖則真係好食.但依家係旺角開咗分店之後就方便多囉,仲買埋外賣返屋企俾佢哋食,因為都係星期六或日先至會出去,人流都好多,所以好多時都係新鮮出爐,正呀,保持到水準.

本人只食過這間的蛋塔和沙翁。蛋塔就算唔係熱辣辣都係微暖的，一路行一路食，一個熱辣辣蛋塔可以食到15分鐘，真係算抵食。蛋味香濃，曲奇皮夠脆。唔怪得肥彭都咁鐘意食啦。沙翁方面，唔算太抵，$3.5，細細個，味道亦無特別，相信坊間都可以找到這樣水準。

好多人山長水遠去泰昌買蛋撻，但我路經此地，仲入埋去幫襯，就係冇買佢既蛋撻。是次我的戰利品是拿破崙酥和云葛。雖然拿破崙唔係佢既招牌貨，但質素都唔差喎！唔會太甜，咬落好有層次，好有口感。食完飯做飯後甜品也是不錯的選擇。而云葛，我則覺得幾甜，我係甜怪當然可以接受，但對一般人而言，可能有點點過火。

山長水遠走去買,出名嘛,於是買咗2個蛋撻,2個沙翁,蛋撻就幾好味,但係d沙翁就唔好食,好似有陣燶味,所以下次都係買蛋揵算喇!!!

曾經行入呢間鋪一次，望下的餅，嘩，全部都好油咁，望落感覺都麻麻地。於是走人，以後經過都冇再入去。呢次唔知點解，發口痕，入去睇下，咦？曲奇皮蛋撻wow。買個蛋撻試下，再加多個沙翁。蛋撻真係好食，雖然唔係熱辣辣剛出爐個的，但好香既蛋漿，又夠份量，真係值得一試，下次行過都要再去幫襯下！沙翁就真係麻麻，同埋我唔係鍾意食太甜野。