星座冰室 (已搬遷) 新店位置

見大家講得咁正, 今次有幸一嘗, 幾經辛苦, 真係好似深入虎穴一樣, 係呢個大華夜總會的入口見到佢個招牌啦~~~坐底叫左個茄牛麵涷檸茶, 好快就到啦, 呢個茄汁都幾酸下, 但係酸得來都好天然番茄味, 汁多味濃, 牛肉唔un之餘重係爽口的, 但係口感有點假, 麵係一般茶餐廳cheap cheap公仔麵, 唔好食, 又腍又無咬口, 但overall來說呢個茄汁配公仔麵都係麻麻啫, 唔係你地講到咁絕配, 對我來說, 無咩吸引力.....地方偏僻又不太衛生, 食物水準不太好, 無理由要再去...

近排天氣真熱得交關。決定今日下畫去呢間冰室試吓佢哋嘅番茄湯通粉...查實已經想試呢間嘢好耐，今日終於得償所願...去到時間尚早，只得小弟一個人幫襯，老闆重同伙計食緊飯，唔理咁多，即刻叫咗一個茄牛雞翼通粉，另加凍檸茶。中環勝香園嘅番茄湯底可謂全港一絕。睇吓呢度嘅又點先...首先，份量係比勝香園少(勝香園係有時多到食唔晒嘅)，成碗嘢紅噹噹，睇落蕃茄份量都相當夠，不過比較碎，睇唔到成舊番茄，呢方面勝香園就略勝一籌la..一口吃下，蕃茄味都夠濃，但食食吓就越嚟越淡(可能我撈得唔平均la)，味道係遜於勝香園...D牛肉係新鮮貨，但係碌得過熟，有D靱，好明顯無加梳打粉醃，值得一讚。雞翼就普普通通，跟勝香園就差得遠(佢哋D雞翼係即煎嘅)埋單33蚊，唔太貴，如果响九龍區想食蕃茄通粉，呢度可以一試。

18/5(四) 12nn意猶未盡,順便帶男友試試此處的蕃蛋,上次試了撈蛋沒啥特別,今次點了蕃煎蛋意$20,味道亦是平平,煎蛋似波蛋,蛋面不夠香脆.再次重申中環"勝香園"才是"蕃蛋皇"!

真係估唔到原來間鋪隨o左中間有張長檯之外..例邊都係得3 張4 人檯加一張6 人檯...真係唔敢想像lunch hour d 人係點等住o黎食...6 點半過d 去到..仲有中長張長檯可以坐...order 後的確都要等一段時間才有得食..好在都有個電視睇o下新聞..叫了茄牛炒蛋通同茄腸豬扒意...腸仔切成一粒粒...真係唔知有冇一條...牛肉比較老..豬扒無乜特別...抵讚o既係切成一條條..容易食..不過個炒蛋真係好得...好香好滑..個茄湯真係幾濃味...味道唔錯...通粉就較硬身...可能驚煮得耐太淋..意粉ok..除o左比較難搵少少...都值得去試試...

係個地庫貨倉隔離得呢一個餐\廳, 都幾搞笑~!!好彩有朋友識黎, 唔係我諗真係搵唔到呢間野係邊喇Lunch時間都幾多人, 所以都等左幾耐先有得食食左個茄牛餐\肉意, 味道唔錯, 湯底都夠濃, 不過我個碗冇樓下個位仁兄咁多蕃茄同咁紅,如果有多d就好喇~下次都會再黎

唔知點解咁多人讚, 人多要等無所謂, 但地方唔乾淨, 個伙計又無品(成日叫人唔好吹, 好多野講, 好煩), d 茄牛通, 無乜味同好淋. 價錢貴無所謂, 不過真係唔掂, 上環九記對面個間好味好多.

當年Part time在老尖金巴利道,經常光顧隱身在時鐘酒店,老爺相機店的香檳大廈地庫"星座".千篇一律,例牌茄牛通,加支可樂.直到今日,久唔久落去hea下.到今日,都係例牌,口味無變.同勝香園有別在,星座用的通粉,係有坑紋,更加索味.質感更佳.一個通粉,一支可樂,一部隨身聽,一本雜誌,一個懶洋洋的下午,就咁浪費左.

茄撈蛋既效果，未必個個接受：如圖示，一pat 野。可惜，星座就係賣呢pat 野。呢個叫蕃茄撈蛋麵，由早到晚供應；除o左繁忙時間外，必定即叫、即煮、即食。佢標榜自己用既係出前一丁麵，但睇佢四周圍放得滿一滿既麵餅，同你食落口既直覺...信不信由你啦 不過，鍾意佢o個pat 野下面，係麻油撈公，夠有heart。

四個男人去食飯，唔想話食得太貴，諗住幾十蚊落樓就算。諗諗吓就去呢度。四條友都食埋同一樣野，就係呢度最出名既茄牛麵，不過其中有兩個就加蛋，飲品就奶茶咖啡鴛鴦檸茶各一。落完單就大大聲傾計，飲品就好快到，但係麵就傾好耐都未到。唔緊要啦，反正唔係太趕，再等一陣ｄ麵就到。同上次食一樣，都係好足料，啖啖都食到蕃茄，牛肉都唔少。牛肉幾淋幾好食，同埋個湯酸酸地咁很開胃。凍奶茶俾我既感覺好多奶，卻都可以接受。間中去呢ｄ地方食吓野都唔錯，可高談濶論，暢所欲言。

15/3(三) 6:45pm返學前專誠黎呢間位置隔涉既茶餐廳食野.(一個月前嘗試黎呢間餐廳食lunch但搵吾到)環境好似地下密室咁,陰暗,環境殘舊.為左一嘗佢出名既茄旦面,再污糟都頂得住!要左碗蕃茄撈旦意粉$20,價錢偏貴.等左10分鐘先有得食,份量吾算多,蕃茄湯底食到魚既鮮味,但d旦就完全溶入埋d湯到.意粉則一般啦!個人認為"勝香園"既茄旦面更為出色.服務亦不是周到果隻.就當作了左件心事罷了!

J話帶我去一間好特別而幾乎只食番茄湯底的冰室。間野地點好偏僻，入到去都好多人，環境差又迫。個餐牌真係幾乎係得番茄為主，因為佢主力係番茄牛肉麵，個個幾乎都係叫番茄牛肉麵加蛋。好像我一樣不喜歡吃牛肉的，都有其他選擇，今次我就真的倒楣了，我叫了魚片番茄通粉，以為真係鮮魚片，怎料是炸魚蛋片，好多油，好難食，可能係個人口味，我係不喜歡吃魚蛋片的，來到時真的很不高興，但只好將所有魚片給了J吃。但他卻吃得津津有味，因為他非常喜歡吃番茄牛肉，而我卻覺得湯底只有酸味，不太出色！原本要了檸檬菜蜜，但卻來了西洋菜蜜，但都算了！我估下次佢話要來，都係唔好預我了！由於佢like呢度，咁就唔俾個喊面佢啦！仲有呀，我地都等左頗久才有得食！

如果好肚”我”, 千祈唔好諗住好快有得食. 這裡煮得慢, 上菜慢. 如果多人的話, 有排等食. 叫左蕃茄豬扒米粉+ 蛋. 男友叫左蕃茄牛麵加午餐肉. 碗麵真係好多蕃茄係面, 味道酸酸地, 都唔錯呀.d 豬扒都ok, 幾好食, 牛肉都唔錯. 碗麵同米粉好大碗, 質地唔錯. 食到好飽!至於飲品, 不提也吧, 因為都係一般茶餐廳的質素. 我同男友都覺得勝香園的蕃茄湯底正好多.

大家如果在金巴利道某夜總會附近入去，就要落樓梯，然後好迂迴咁先轉到去。加拿芬道斜路有間電器舖，由電器舖穿入去落樓梯，一直行就去到，易搵好多。呢度d蕃茄麵真係冇得頂，小弟最愛茄牛丁撈蛋，加左蛋滑好多。不過實在太旺，特別係lunch time，要有心理準備等好耐。

浚說搵食艱難, 在尋找“星座冰室”的途中來來回回, 沿著與某夜總會並列的細小招牌, 九曲十三彎地往下走後, 終於找到了她.走進“星座冰室”前, 已有回到舊日調景嶺的感覺, 在等食物的同時, 仔細看清楚店內的水吧,牆壁及桌子等, 有如時光倒流了三十年, 這裡會是一個很好的電影場景. 如果杜琪峰導演拍PTU II 的話, 任達華應該會在這裡與林雪見面. 又或者請王家衛導演拍一套『香檳森林』, 配上很多年前已演活了浩南, 但至今亦沒有甚麼改變的伊麵吧.沉醉在白日夢時, 鮮茄牛通的番茄香味把浚帶回現實中, 煮好的鮮番茄醬, 濃濃地蓋著沒有加鬆肉粉的鮮牛肉, 可口. 鮮茄豬扒麵也不俗, 豬扒有加上調味”葉”好. 熱奶茶則教浚失望了, 以為這麼有歷史的冰室, 奶茶必定有水準, 但這裡的, 茶不夠香, 亦不夠濃. 凍奶茶更差, 只是一杯略帶奶味的凍水. 是的, 水準不一定是與日俱增的, 今天的伊麵, 還是像七年前的浩南. 歷史則會重演的, 七年前的歷史, 今天重覆著.伊麵亦可能說搵食艱難, 在娛樂圈的演藝路上浮浮沉沉, 伴著雙琪的是非, 跌跌落落的走到“隨時候命”的今天, 找到了甚麼呢?

喜歡這裡的慢, 呀伯寫單慢, 呀叔煮得慢, 上菜慢, 連埋單都慢, 那種「悠閒」不是每個食客抵受得住, 每次來到, 總聽到有食客破口大罵~ 但我偏偏喜歡他們慢得與世無爭, 喜歡的, 還有這裡不受外來電話干擾, 自成一國, 是個可以跟朋友傾談的好地方~差不多每次來都會點蕃茄炒蛋通~ 蕃茄味濃郁, 炒蛋又厚又香, 伴通粉食一流~溫馨提示︰如點了檸樂或檸雪碧(呀伯堅稱沒七喜), 記緊上完支汽水就提醒呀伯上埋個檸底~