无辣不欢!5大麻辣爱好者必试川菜推介(有片)
2019-03-27

除咗谭仔同海底捞,锺意麻辣嘢仲可以食啲咩?四川菜绝对系一个好选择!川菜喺香港越嚟越流行,无论正宗定新派川菜都开始进驻香港,无辣不欢嘅你一齐睇下香港有咩必试川菜啦。


破格新派 川流

一间走型格路线嘅新派川菜餐厅。餐厅装潢破格,外墙全黑,室内布局似一间非常有格调嘅bar,将创新意念注入传统四川菜入面。佢哋嘅醋椒胡辣羹以被称「胡椒之王」嘅柬埔寨贡布胡椒调味,味道浓郁带花香;52度慢煮樟茶鸭胸就结合咗西式慢煮手法同传统章茶鸭做法,以52度慢煮鸭肉3小时,再焗脆外皮制成。其他特色菜式包括33香辣鸡锅、灯影牛肉、当红沸腾龙趸鳍、蒜泥白肉凉拌手工凉面等,另外仲有独创辣味cocktail同麻椒香子兰意式雪糕。




辣味指数:🌶🌶

辣味多变,重点在於辣味嘅香。佢哋菜单入面都有好多唔辣嘅特色菜,适合想浅嚐四川香辣嘅朋友。


辣得满足 麻辣派对

麻辣派对提供嘅菜式分4大类,分别系水煮、酸菜、香辣锅同酸辣锅。主打嘅香辣锅,以炒香嘅辣椒乾、香辣酱、大蒜、姜、葱焖煮,配以花椒、八角、桂皮等其余13种配料,味道浓郁,辣味十足。香辣锅可选麻辣鸡锅、香辣猪手锅、麻辣肥肠锅等,仲提供20几款配料畀大家任意配搭。


图: Yuenchan214chloehahahaha


图: bigbean16, kennislalahaha

辣味指数:🌶🌶🌶🌶🌶

麻辣派对嘅香辣锅用料十足,辣椒铺满成个锅,辣味好出。可以选择辣度,但小辣已经十分强劲,嗜辣者可以挑战中辣、大辣。



独调辣油 井巷子

超正宗成都风味川菜,当中嘅招牌菜成都青汤水煮鱼用上四种唔同青辣椒、青城花椒同大红袍花椒等,连同猪肉同猪骨熬煮成汤底,辣味带强烈麻香。餐厅又会以青花椒粉自家炮制辣油,用嚟炒香鸡杂制作鸡杂担担面。其他特色菜式仲包括以日本米酒浸泡过嘅云南皱皮椒酸菜辣肉酱扒鸭血、豆酥椒盐有机舞茸同手抓羊肉配双太阳卵饭,每道菜所用嘅香料都经师傅精心调配㗎。



辣味指数:🌶🌶🌶

成都风味注重麻、辣、鲜、香之间嘅平衡,辣味突出而有层次,特制青花椒粉辣油辣味十足,食完条脷会麻麻地。



惹味酸菜鱼 十二味

呢间川菜店喺香港有八间分店,西环呢间系旗舰店,室内设计走现代中国风,主打酸菜鱼同麻辣香锅。呢度嘅酸菜鱼用上二十个月云南老埕酸菜、四川酸菜同广东咸酸菜炮制,酸甜爽口,而鲈鱼肉质嫩滑、无骨,可选辣同唔辣。麻辣香锅就有25款配料选择,配上秘制香油同12种由成都直接运嚟嘅香料乾炒而成。

图: noknokyuenm92342005

辣味指数:🌶🌶🌶

酸菜鱼同部份小菜可选择辣同唔辣,麻辣锅有一定辣度,但辣得嚟唔灼喉。


特色冒菜 乌蝇馆

主打冒菜,系四川成都嘅特色菜,同麻辣烫相近,但油份较少。汤底以黄油、芥花籽油同三种辣椒熬煮而成,入口辣而不麻,仲有40款配料任拣。晚市就主打三峡烤鱼,以长江三峡地区传统烤鱼方法制作,采用秘制香料炒制同腌制,味道香得嚟唔会净系死辣,不过份量唔算好多,多人一齐食可以加多啲配料。

图:Owl24

图: mandymanlovefoodie, PU神

辣味指数:🌶🌶
冒菜比较辣,小辣嘅辣味已经好出。而烤鱼可选辣度,唔食得辣可以拣蒜香烤鱼,一样惹味。



文、相:Kenna

关键字
四川
川菜
麻辣
花椒
辣椒
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】便利店寻宝 每周新品速报
5天前
尖沙咀新商场开幕 过江龙餐厅一览
2019-10-11
【特约分享】食鱼生转运 三种好意头日本海产介绍
2019-10-14
亚洲首间 Tiffany Blue Box Café 打卡必到!三层架下午茶 + 棉花糖鸡尾酒
2019-10-08
日本人气茶室登陆尖沙咀 招牌Tea Set、甜品推介(有片)
2019-09-25