捱过无公众假期嘅3月,嚟到4月唔单止有清明节假,仲有复活节4日连假!不过对於各位爸爸妈妈嚟讲,可能就有少少头痛......唔紧要!开饭仔帮大家搵咗6间酒店嘅复活节主题自助餐,最紧要嘅系佢地同时都会有唔同嘅工作坊或者游戏俾小朋友玩,咁就大朋友同小朋友都保证可以开心咁过佳节啦。
雅苑座 自助午餐+马卡龙制作班
尖沙咀呢间酒店餐厅嘅自助餐一向都有保证,而今次佢地会喺4月14至17号供应「复活节自助午餐」,大人可以叹海鲜冷盘,包括长脚蟹、翡翠螺同蚬,另外仲有烧羊肉同烧肉眼等美食。亦有小朋友最爱嘅炸鱼薯条、迷你汉堡包同即制棉花糖。
而4月15至16号呢两日仲有马卡龙制作班,可以跟酒店行政糕饼总厨学整甜美马卡龙!仲有同宾尼兔合照,同跟小丑学扭汽球嘅活动。
花月庭 日式炉端烧+朱古力工作坊
旺角呢间餐厅以大热嘅日式炉端烧主题自助餐嘅「要[瀛].就要[串]得起自助晚餐」为基本,再加推复活节主题美食同活动。日式炉端烧包括包括网烧珍宝蚝、七味烧三文鱼鳍、日本产黑豚串等。
而加推嘅复活节食物就包括一系列鸡蛋同鸡嘅美食,亦有甘笋芝士蛋糕、兔形棉花糖等得意甜品。4月14号到17号期间,惠顾自助晚餐嘅小朋友仲可以参加朱古力小鸡工作坊喔!
城景阁 海鲜自助晚餐+独一无二拿破仑
油麻地呢间餐厅最近就搞紧「虾螺滋味‧海鲜自助晚餐」,以有机鲜虾同法国田螺做主打,必食推介包括牛油果螺肉有机虎虾沙律配越南米纸卷同酥炸法式田螺有机虎虾云吞。另外当然亦唔少得港人最爱之一生蚝!
4月14号到17号去食自助餐,仲可以免费参加「最爱是你」拿破仑饼制作,只要喺食自助餐前3日将指定相片电邮畀酒店,当日就可以自己制作独一无二嘅拿破仑饼啦!另外仲有「最爱扭扭兔」工作坊同一系列节庆活节。
热门文章: |
2+2 Café 鲜味自助午/晚餐+奇趣复活蛋活动
而沙田呢间酒店餐厅嘅自助午餐同晚餐都会供应一系列复活节主题美食,包括鸡仔形烚蛋、兔子形酥皮三文鱼同甘笋芝士蛋糕等。分别系「鲜味.手作自助午餐」以炮制手握手卷同刺身等日式美食为主,「寻味龙趸海鲜自助晚餐」就有本地渔场养殖嘅优质龙趸菜式。
4月14号到17号去食自助午餐同晚餐都可以参加佢地举办嘅活动,包括复活蛋寻宝大作战同主题拍照区,而且每位小朋友都会获赠一份朱古力奇趣复活蛋,敲开里面仲有神秘小礼物!
Promenade 西餐厅 自助午餐+冬甩/薄饼制作班
呢间位於红磡嘅酒店餐厅就有「国际美食自助午餐」,不过对於唔少小朋友或者女士嚟讲,重点应该系一系列嘅复活节甜品!复活节鸡蛋布丁特别用彩蛋装住,记得相机食先;西班牙街头小食Churros吉拿棒香脆甜美,而且仲可以自由点上多款朱古力酱。
酒店亦特别安排咗薄饼制作班同冬甩制作班,分别畀4月14至15号同16至17号食自助午餐或自助下午茶餐嘅小朋友参加。想免费嘅话就要系头20个预订或者喺酒店eShop订购啦。
MoMo Café 自助午餐+任玩吹气城堡
最後沙田呢间餐厅喺4月14至17号期间亦有「精彩复活节自助餐」,可以任食海南鸡饭、陈醋牛肋肉、蟹肉金菇扒素千层等特色美食,另外亦有各款中西甜品,例如蜜瓜芦荟珍珠露、草莓慕丝酥条,同抹茶芝士蛋糕。
复活节当然唔少得一系列主题甜品,包括复活节十字面包、姜味胡萝卜蛋糕、色彩缤纷嘅复活蛋同造型趣致嘅曲奇饼等。而且去食自助午餐嘅小朋友仲可以免费去大堂嘅吹气城堡大玩特玩,小心小朋友玩到乐而忘返啊!
文:Cathy