【2020中秋】台式流心奶皇、电车限量版月饼 早鸟优惠及限量预购精选集合
4天前

一年(唔)容易又中秋,今年中秋系10月1号,而家先7月尾,但已经开始有唔少月饼进攻巿场。正所谓「早买早享受,迟买多几嚿」,想食嘅,就梗系趁早鸟优惠买啦!另外,亦有部分接受预购嘅人气月饼,数量有限啊!

早鸟优惠

心事如尘茶食亭 月饼连尘茶

人气插画Dusty Kid今年唔止开多咗好多分店,仲推出月饼套装。一盒四件包括黑麦朱古力莲蓉月、高知抹茶红豆月,另外仲有两款由台湾引入嘅尘茶王、尘茶后茶包。月饼系100%香港制作、香港烘焙,而且不含防腐。食啖饼再饮啖茶,更可中和腻感。

早鸟优惠(按此):即日起至8月17日,送尘不织布袋一个

Valérie 清新伯爵茶月饼

忠粉最锺意佢哋嘅流心奶黄月同流心宇治抹茶月饼,今年当然继续都有啦,而且仲有新成员添!三款全新口味包括伯爵茶、蛋黄黑芝麻同陈皮红豆蛋黄月饼,齐齐放晒入湖畔小兔珍藏版礼盒。伯爵茶味啖啖沉实茶香,难得有月饼入口感觉清新!蛋黄黑芝麻相当足料,以上品黑芝麻砌粒磨粉,味道够晒浓郁。而陈皮红豆蛋黄则口感丰富,仲可以先後感受到甘、香、甜、醇等多重滋味。

早鸟优惠(按此):即日起至9月6日,约9折

望月 香港电车限量版

以酥皮奶黄月饼闻名嘅望月,今年新推出「流心杂锦月饼」同「香港电车限量版」。前者一盒有齐流心奶黄月同流心抹茶月,後者则有8个流心奶皇月,流心蛋黄系自家研制嘅,甘香浓郁,个盒仲要系香港电车铁罐,月饼上亦印有电车图样,电车迷实锺意。另外,值得赞赏嘅系佢哋转用更易被大自然分解嘅100%甘蔗纤维制造嘅月饼杯,比以往嘅透明胶杯更环保!

早鸟优惠(按此):即日起至8月31日,低至8折

逸东轩 竹制蒸笼包装

两款星级迷你月饼:迷你奶黄月同迷你蛋黄白莲蓉月,既有蛋香,口感又幼滑,而且细细个食完冇咁腻。最特别系今年嘅包装,好似平时酒楼嘅点心笼咁,采用中式嘅竹制蒸笼。过咗中秋,都可以循环再用嚟变成餐盘或装饰。

早鸟优惠(按此):即日起至7月31日,65折;8月1-31日,75折

香宫   迷你抹茶红豆柚子白玉月饼

由米芝莲星级中菜厅中菜行政总厨出马创作嘅月饼,无论系传统定新潮嘅口味,都带有惊喜。传统方面,师傅加入云南玫瑰糖制作,仲特别订制月饼木模,做出玫瑰型嘅迷你玫瑰糖白莲蓉蛋黄月饼,味道清甜,而且每个礼盒仲配一个LED中秋灯笼添,限量供应100盒咋;另一款新口味,则系迷你抹茶红豆柚子白玉月饼,外层香脆,抹茶味浓香,内馅酸甜有致又有咬口,稍稍加热先食仲会有流心效果添。

早鸟优惠(按此):即日起至8月19日,8折(不包括玫瑰糖白莲蓉蛋黄月)

狸小路「皇上不上朝」  台式流心奶皇月饼

虽然而家仲未飞得过台湾住,但好彩都有机会食到台湾知名烘焙饼店嘅出品!由阿里巿集引入嘅呢款台式流心奶皇月饼,以台湾原材料制造,同香港平时我哋食开嘅都有明显嘅分别,例如饼皮冇咁松化,反而系轻薄香软,带有淡淡奶香,奶黄馅仲加咗椰浆添。而流沙有咸蛋黄碎又有吉士粉,口感香滑。唔使叮都有流心效果,够晒方便。

早鸟优惠(按此):即日起至8月28 日,约75折

绍香园 X Biggerfit  燕窝柚子月饼

老字号绍香园联乘网上购物平台BiggerFit推出矜贵嘅燕窝柚子月饼,粒粒韩国柚子酸酸甜甜,淡淡清香有助中和月饼嘅油腻感,再加埋养颜嘅燕窝,同埋采用低卡路里嘅稀少糖、益生元制作,呢款月饼,减紧肥嘅朋友仔都啱食。用蓝金色嘅夜景月饼礼盒都好靓,盒面系夜光设计,打开盒後就见到立体剪影嘅夜景,仲有埋小电灯配置,够晒华丽。

早鸟优惠(按此):即日起至7月31日,7折

明阁 栗子豆沙月饼

旺角呢间酒店嘅月饼,由米芝莲星级粤菜嘅师傅制作,一盒迷你锦锈月饼内,除咗有金桔奶黄月饼、传统蛋黄白莲蓉月饼外,仲有今年新口味,栗子豆沙月饼。

早鸟优惠(按此):即日起至7月31日,约65折

唐人馆  迷你匠心奶黄月饼

主打传统精致中菜嘅唐人馆,推出嘅月饼都特别精致。一个系鹅黄与琥珀橙盒子,一个系嫣红色与湖水蓝设计,同样印上鸟语图案,满满复古嘅味道。内里分别装有4个经典双黄白莲蓉月饼同8个迷你匠心奶黄月饼,两者同样香甜软滑。

早鸟优惠(按此) :即日起至8月31 日,约7折

预购

四喜面包西饼 花生酱奶黄月

呢间主打港式面包嘅小店,每年嘅月饼包装都以传统为主题,又整到靓一靓咁。今年都唔例外,几款全新包装封面包括有《四喜兵团》、《坚有读书》等嘅迷你奶黄月饼、《食花生未》迷你花生酱奶黄月饼之类,玩味精警。想要传统铁盒装都有,《铁面包拯》装住嘅系双黄红豆沙月饼,佢哋嘅月饼一向都饼皮松化,甜度适中,水准保持得唔错。

预购网址(按此

膳心小馆  传统月饼

食月饼仲可以做善事?呢间良心社企,一直默默为区内嘅长者服务,佢哋今年推出三款传统口味嘅月饼,分别系双黄白莲蓉月、双黄黄莲蓉月同埋五仁月饼,佢哋鼓励大家预购咗之後,除咗可以用嚟自用或者送礼,仲可以考虑透过长者机构,捐畀清贫嘅长者,令佢哋喺中秋时节都可以感受到大家嘅暖意。

预购网址(按此):8月8日截单,数量有限,售完即止

微热山丘  凤梨奶黄月饼

大家系唔系好挂住台湾嘅味道呢!7仔今年为大家带嚟台湾品牌——微热山丘嘅「凤梨奶黄月饼」!月饼馅除咗有奶黄之外,仲加入咗酸酸甜甜嘅土产凤梨,咸香中夹杂着甜味,有层次。买月饼仲送限量版布袋添~

预购网址(按此):即日至8月11日


更多【2020中秋合集】:
1. 齐撑本土小店ssss 自家制蕃薯香芋金沙月饼、马拉直送榴槤冰皮
2. 健康抗炎 素食/低糖月饼之选


文:Kar


关键字
中秋节
月饼
小店
抹茶
流心
奶皇
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】最後倒数!即将结业的老字号及人气小店
2020-07-21
【随时更新】零食速报 每周新款零食、酒品点评
2020-07-31
全城抗炎!屋企都叹到三层架下午茶 Tea Set外送/外卖自取推介
5天前
全城抗炎!北角酒店最新应变 自助餐都有得外卖?
2020-07-17
全城抗炎!送上门懒人煮食包及套餐大合集2.0 花胶炖汤/火锅/铁板烧
2020-07-30