【随时更新】最後倒数!即将结业的老字号及人气小店
2020-05-19

最近天气开始回暖,但饮食界嘅寒冬就唔知几时先结束了。近日频现结业潮,不论系屹立咗成30年嘅老字号,定只系新开咗一两年嘅街坊小店;系西班牙、欧陆风餐厅,定系传统蛇羹、新兴甜品,都难逃一命。以下呢几间餐厅,都已经宣布咗会喺3、4 月内结业喇……几唔舍得都好,都系要讲句再见。

老字号

蛇羹老店  蛇王二
结业日期:4月底

 图:judzBaby__Nic

屹立咗喺铜锣湾近40年嘅老字号蛇羹店,曾经获得多年米芝莲车胎人美食推介。佢哋嘅腊味饭同烧味饭,亦相当受熟客欢迎。但主角当然系蛇羹,蛇肉占咗大半碗好足料,汤底以蛇骨熬成,系唔少人冬天保暖嘅回忆,食完好暖身,可惜,佢哋就唔能够为自己保暖了……

92年古典西餐厅  Jimmy's Kitchen
结业日期:4月13日


图:lailaiwonq

中环呢间1928年开业嘅英国餐厅相当架势,李小龙、威廉荷顿、甘乃迪夫人、球王比利都曾经系座上客,食家蔡澜盛赞系「香港人最喜爱、最熟悉、最亲近的西餐厅」。可惜呢位老友即将要同大家告别,结业前将会供应经典菜单,团队亦表示物色紧新店希望可以重开。
 

何文田怀旧快餐 天马快餐
结业日期:4月15日


图﹕HesperWuSabrinaLau5428

喺何文田长大嘅,一定有食过呢间港式快餐店啦(冇食过都一定听过啦),经典米高汉堡包,手打汉堡扒又厚又juicy,加埋粗身嘅波浪薯条。食嘅唔系味道,而系一份回忆!香港又少一间怀旧港式快餐店,大家以後要好好珍惜啦~

全港首间西班牙餐厅   El Cid
结业日期:3月30日

 图:bobochan111503cowing

作为全港第一间西班牙餐厅,El Cid喺香港开业咗28年,一直致力引入西班牙地道传统菜式,再改良以近合香港人口味嘅烹调方法煮制,招牌菜包括华伦西亚炖饭、墨汁酿墨鱼同炸酿蘑菇等。华伦西亚炖饭餸料甚多,包括鸡髀肉、羽衣甘蓝等,圆米饭粒索埋以蕃茄煮过嘅酱汁,香口又粒粒分明。可惜餐厅今个月尾就要结业,不过佢哋都表示如遇有合适条件,都会考虑选址重开嘅,大家继续期待啦。

荃湾米线   雄记粉面
结业日期:3月30日

 图:Kan Lee能能漆

荃湾地铁站附近有条食街,左右两旁嘅食店都换过唔少,呢间米线店都算长寿了,做足30年,可惜最後都系敌不过要结业嘅命运。呢度最出名嘅就系打孖上,卖相好似牛脷酥咁嘅鱼肉春卷,食落啖啖鱼肉又够饱满结实,再加自家制辣椒酱真系无得输!另一推介系墨鱼丸,弹牙得嚟真系有墨鱼味唔会成口粉。



人气小店
除咗一批老字号外,亦有唔少口碑唔错,但只系做咗几年嘅小店,都要结业。


马来西亚酒吧餐厅 Jalan
结业日期: 5月30日


呢间位於中环嘅马来西亚菜系附近上班族嘅聚脚点,餐厅取名为JALAN,喺马来西亚语中系「街头」嘅意思。餐厅希望可以将大马风味呈现畀香港人,有啲菜式仲融合咗中式元素添~招牌有巴东牛肉咖喱角、惹味喇沙炸鸡、椰子烤大虾咖喱及斑兰吉士酱冬甩等。


Soho手工Pizza Al Forno Pizzeria   
结业日期:4月30日


图:bellywongs

呢段时间大家都多咗买外卖返屋企食?中环呢间手工Pizza店就系一个好选择,采用100%意大利面粉人手搓,加上订造嘅砖炉温度够高,好快就焗好Pizza,令批底松软香脆得嚟,配料仲Keep到Juicy!但日前老板表示租约倾唔掂,小店要同大家告别,不过佢哋有意搵新舖重开,希望早日听到好消息啦。

湾仔Hidden Gem Three Blind Mice
结业日期:4月30日

 图:EdmundRolston

呢间欧洲风小店可以话系湾仔嘅hidden gem,楼高两层,每星期有几日都系主题夜,一日burger一日steak咁,汉堡有牛肉、炸鸡同素食选择,而牛扒亦有肉眼、牛柳、西冷拣,每次主题夜都可以任食埋薯条呢。
 

欧洲现代餐厅 Beet
结业日期:4月25日


图:clarasyDanSum

呢间位於中环嘅餐厅主要供应多国菜,系唔少锺意食欧洲菜嘅朋友嘅私人聚脚点,无论装潢定食物都好有欧洲风味。餐厅於官方Facebook宣布正式於25/4结业,真系有啲可惜~不过佢哋话有计划於下年重开,想食嘅朋友仲有机会!

大角咀养生糖水  无糖不欢
结业日期:4月19日

 图:Adam121

大角咀呢间糖水店主打养生,根据中医食疗配搭出超过六十款养生糖水,喺传统糖水嘅基础上再搞下新意,例如手搓糖不甩加入新式抹茶和铁观音口味。而且佢哋仲坚持唔用砂糖,只会用天然黑糖、片糖同冰糖去制作甜品,健康啲,甜度亦适中。另外,虽然佢哋顶唔住要结业,但系到呢刻为止,仍然坚持每日将10%嘅生意额捐出,帮助有需要嘅人。

手工石磨黑米、红米肠粉  凤鸣石磨肠粉(铜锣湾店)
结业日期:4月14日


图:foodiediary_852K2YUS5

石磨肠粉近年喺香港大热,但多以白米为主,呢间就有少见嘅黑米、红米肠粉!米浆、肠粉、配料、豆浆等都系手工制作,而且每份肠粉都系即叫即蒸,米香突出而且都相当滑溜。铜锣湾店即将结业,不过好消息系观塘新蒲岗两间分店继续营业,等疫情好转可以过海去食嘅。
 

咖啡控召唤  手日土咖啡室
结业日期:4月14日

 图:adixy06200297mandychoi23

观塘工厦有唔少特色餐厅,呢间陶瓷工作坊加咖啡室,用嘅杯全部都好特别。主打精品咖啡,提供唔少特色单品豆,仲有手冲鸳鸯,即系单品咖啡豆加高山乌龙茶调泡!其他Milk Coffee都有水准,系唔少咖啡控嘅心水。

葵广人气芋圆   甜圆
结业日期:4月15日

 图:JAcKLmFwinkie_kwann

前几年,葵广人潮旺盛,个个都会去扫街,呢间芋圆店亦系其中一间人气店。大部分配料都系自家制,包括芋圆、地瓜圆同紫薯圆等都系每日手工制作,有咬口,甜味又够自然,仲有啲健康配搭,好似燕麦配生熟薏仁咁。不过佢哋约满後决定唔续约喇,但暂时又未搵到合适舖位去扩充,惟有暂时同大家讲声拜拜先啦。
 

中环健康素食店 MANA! Fast Slow Food
结业日期:3月27日


图﹕priscilla_727BonViveur

呢间素食店嘅门面十分有feel,一向都有唔少人锺意喺呢度打卡,主打沙律同flat bread,配料选择相当丰富,超过30款,好似酸瓜、甘蓝、水波蛋等,令中环嘅打工仔多一个健康嘅选择。

旺角新派特色菜    街坊CAFÉ
结业日期:3月31日

 图:SAlytWildchildcarol

开咗3年嘅呢间餐厅,将香港特色融入各款菜式中,例如经典街头小食鸡蛋仔咁,就用嚟拌雪糕。最後呢几日,晚巿仲有75分钟嘅日式石烧自助放题,可以食到石烧牛之余,仲有得任饮任食汤、沙律、串烧意粉、甜品等。不过业主要加租喇,佢哋决定唔再续约噜。

万花筒主题餐厅 漫花灯火
结业日期:3月31日

图:emmisrh_

呢间开咗短短唔够一年,以万花筒为主题嘅餐厅都宣布结业啦!餐厅设计以各种颜色、不同花朵、切角镜面为主题,令顾客仿如置身於万花筒的缤纷世界内。唔单止装潢,连食物同餐具都好值得打卡,吸引唔少人慕名而去。咁有心思嘅餐厅,要结业真系好可惜。
 

弹牙棍打牛丸  潮丸
结业日期:4月4日


图:phonebus

尖沙咀呢间小店装修简洁似Cafe,其实系主打自设工场整嘅棍打牛丸嘅潮式粉面店,牛丸粒粒弹牙爽口又有牛味。另一食家推介系牛三鲜,即系牛爽腩、牛筋同牛肚。识食一定点埋自家制红、黄灯笼椒酱!虽然因为租约完结而结业,但餐厅表示会喺未来搵新铺希望可以以更好嘅面貌同大家见面,Fans记得留意啦。
 

京都过江龙班戟  雪ノ下
结业日期:4月4日


图:emmi

嚟自日本京都嘅甜品店,主打厚烧班戟同刨冰,前者足4cm厚,用广岛鸡蛋同雾岛牛奶制作即叫就即制,口感湿润扎实。後者用日本低钙同低镁离子含量嘅天然软水加原材料制作,冰粒细细碎碎入口即溶。
 



文:Kar、Cathy、Yanica


关键字
全城抗炎
结业
小店
老店
湾仔
荃湾
大角咀
铜锣湾
旺角
尖沙咀
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】最後倒数!即将结业的老字号及人气小店
2020-05-19
【随时更新】零食速报 每周新款零食、酒品点评
4天前
全城抗炎!人气酒店自助餐重开 每位送鲍鱼、带子
2020-05-11
全城抗炎!喺屋企做大厨 懒人煮食包/套餐集合文
2020-05-13
4月份好评餐厅十强
2020-05-07