【召集芫荽控】一路向荽!严选全港10间荽餐料理
2021-02-18

芫荽呢家嘢,好极端,锺意嘅就好锺意,唔锺意嘅就即刻西晒面。但因应住芫荽党嘅壮大,愈嚟愈多餐厅都推出各式各样嘅芫荽料理,由主菜到甜品都有,招呼一众荽客。不论你入咗芫荽党未,自问系荽客嘅你,以下呢十间荽舖,你哋试过晒未先?

芫荽雪糕    Sogno Gelato 

图:sbszetoeat.play

绿色唔一定系抹茶雪糕嘅,仲可以系芫荽雪糕!!!呢间本工意式雪糕店一向创意多多,有多款唔同创新口味嘅Gelato,呢期仲有最hit嘅芫荽味添~ 啖啖清香,可惜佢哋2月底就结业喇,芫荽党想试记得趁早~

荽指数:🌿

芫荽士多啤梨瑞士卷 1987Kitchen

图:餐厅Facebook

估你唔到连甜品都可以加芫荽?!呢间喺元朗嘅西餐厅研制咗芫荽士多啤梨瑞士卷,卷蛋荽味唔太重,同忌廉嘅比例啱啱好,几平衡。除咗甜品,佢哋仲有独门秘制嘅芫荽酱,无论放落意粉定用嚟点牛扒都一样夹。

荽指数:🌿🌿

芫荽酱油   悦和酱园 

图:酱园Facebook

芫荽嘅风潮真系势不可挡,就连喺1945年成立嘅传统酱园──悦和酱园都推出咗芫荽酱油,买支返屋企咩餸都点下,就样样都有荽味咯~ 不过有试过嘅荽友表示荽味略为淡咗少少。btw,想买嘅要去门市啊,听闻每次批货量唔多~

荽指数:🌿🌿

芫荽烧卖+够茜豉油 叁拾士多

图:店铺Facebook

呢间新潮嘅士多主售急冻食品,佢哋嘅芫荽鱼肉烧卖日日都好多人买。芫荽鱼肉烧卖用门鳝鱼肉打成,加埋芫荽叶,蒸完後鱼肉香中渗透住阵阵荽香~另外,佢哋仲有芫荽豉油,用嚟点芫荽烧卖绝对可以荽上加荽!平时用嚟点肠粉、捞面、捞乌冬、蒸鱼、打边炉等等同样够荽! 

荽指数:🌿🌿

芫荽烧卖 老虎岩

图:foodie1020

呢间茶餐厅都有芫荽烧卖,佢哋对芫荽同肉嘅比例好讲够,而且烧卖系新鲜手打,口感丰富,同一般用机做嘅好唔同。除咗堂食即场拮几串,仲有急冻嘅芫荽烧卖,拎返屋企随时慢慢叹都得~

荽指数:🌿🌿🌿

芫荽炒蛋三文治  大吃大喝 

图:喂食猪姐姐

呢间喺油麻地地铁站附近嘅小食店,都搵到芫荽嘅踪影。对芫荽党嚟讲,一份好食嘅三文治,配料唔使多,最紧要芫荽够多!呢度完全做到,厚切芫荽炒蛋三文治,方包软熟,芫荽炒蛋份量十足。廿几蚊仲包埋饮品,买嚟做早餐,一个good morning就由荽开始。

荽指数:🌿🌿🌿

芫荽车仔面+芫荽三文治  游园.茶记 

呢间怀旧港式茶室除咗提供港式食物同中菜,仲将芫荽元素加入车仔面同三文治,车仔面嘅汤底加入浓郁自制嘅芫荽酱都未够,仲要成碗都铺上芫荽,完全系荽,全部都系荽!够晒重口味。

荽指数:🌿🌿🌿🌿

炸茜汉堡  TAP The Ale Project   

图:KL1402

人气精酿啤酒店TAP The Ale Project喺荃湾同旺角都有分店,芫荽党友去到记得叫芫荽汉堡!用本地屠宰免治牛、牛胸尖肉、车打芝士同沙茶蛋黄酱制作,重点当然系劲爆多嘅芫荽叠到高一高,够晒juicy。

荽指数:🌿🌿🌿🌿

芫荽意粉、汉堡、意大利饭 素年

呢间几有名气嘅素食店都有推出芫荽主食,3间分店都各有一款特色芫荽料理。荃湾分店有芫荽意大利饭,深水埗汝州街分店系芫荽汉堡,而深水埗福华街分店就有芫荽意粉,仲有芫荽柠檬梳打添。如果想试匀晒佢哋嘅特色芫荽食物,真系要逐间逐间集邮喇!

荽指数:🌿🌿🌿🌿

芫荽火锅    令和锅物酒场 

压轴登场嘅系成兜都青bb嘅芫荽火锅!呢个芫荽汤底足足用咗1斤芫荽同鲜鸡汤打成,熬足7个钟,浓厚清香,最紧要系芫荽味香得嚟,就算渌牛渌鸡都唔会盖过咗食物嘅原味呀。餐厅仲有唔同嘅芫荽小食,例如芫荽炸虾饼同芫荽牛肉卷,不过小食嘅芫荽味较淡,平时对芫荽冇乜好感嘅人都可以一试~

荽指数:🌿🌿🌿🌿🌿


文:Hailey
编:Kar

关键字
芫荽
烧卖
雪糕
三文治
车仔面
汉堡
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
情人节爱意满泻 甜蜜蜜堂食/外卖下午茶推介
2021-02-01
【随时更新】零食速报 每周新款零食、酒品点评
1天前
日本吉列牛排店京都胜牛进驻铜锣湾 黄金六十秒炸法 推介京都胜牛三味套餐
2021-02-18
楚捻记新line!荃湾新开饺子店 必试黑松露什菌饺+香煎潮汕韭菜粿
2021-02-10
1月份好评餐厅十强
2021-02-09