安南 (利園) (已搬遷) 新店位置

今日同一班朋友黎左銅鑼灣安南食lunch，店內以湖水綠為主調，裝修帶有越南懷舊風情，地方亦都十分寬敞。安南嘢食分量都大，好適合大家一齊開心share。我地一行6個人，嗌左5個菜(春卷、炭燒豬肉、墨魚餅、咖喱牛腩、)同3個甜品(椰青啫喱、咖啡奶凍、焗黑糯米西米布甸)，個個都食到好飽。春卷香脆可口，點sauce酸酸甜甜，包埋生菜就清爽啲。墨魚餅出嚟嗰陣仲幾熱，香口得來又咬到墨魚粒。炭燒豬肉個人最中意呢道菜，有豬肉丸同豬肉片。味道甜甜地，炭燒幾香，加埋少少油脂香，jeng。咖喱牛腩咖喱香料味香，有少少辣。牛腩入味又夠淋，牛筋都啱啱好，仲有法包可以蘸咖哩汁食。椰青啫喱三個甜品入面最中意呢個，可惜唔記得影呢個。佢哋話個椰奶雪糕係自家制嘅，有椰肉絲，味道比較甜，但係加埋個清清地嘅椰青啫喱就啱啱好互補左個甜味，罪惡感即時減低左。咖啡奶凍呢個就普通嘅咖啡奶凍味，都okay嘅，但唔係突出。焗黑糯米西米布甸呢個都好食嘅，上面個層係西米布甸，底個層係黑糯米，比較有飽足感嘅一個甜品。