四季良晨 (新都城中心) (已結業) 查看

台式嘅文青餐廳受歡迎，呢間同將軍澳廣場嗰間好似。我哋每人叫咗一份主食，兩個餐嘅加配小食同一個散叫小食，由門口到用膳完畢，我覺得呢間服務嘅態度比嗰邊好好多，又唔會太多人，食物質素又唔錯。煎手工餡餅，豬肉餡，肉汁都幾豐富，可以試吓。三盛牛肉米線配養生湯，腱心牛肉，牛腩，牛丸每樣兩件，肉類唔係好鬆軟嗰種，有咬口，唔韌唔鞋都唔錯，但感覺有啲少，湯底清淡適中。鹽酥雞扒雞肉飯，第一次食台式蔥油飯，炸香嘅乾蔥淋上面，加少少豉油，雞絲同蔥粒，都幾香，如果油多啲會更好，鹽酥雞新鮮炸好，又脆又嫩，呢份午餐幾好，好味又飽肚。加配小食：涼拌黑醋茄子，微酸微辣，心凉醒胃。滷水豆腐：有少少Q嘅口感，幾得意。凍香濃奶茶芝士奶蓋玫瑰茶，同我想像中有少少唔同，我以為會係有啲粉紅色嘅玫瑰花粒喺茶裏面好靚，原來係茶包，不過都幾好味，淡香嘅玫瑰花茶中和到奶蓋，感覺清新。