和牛燒肉‧純 (已搬遷) 新店位置

同朋友放假一日，行吓街，食吓嘢。去完日本之後，依然好掛住日本嘅美食，朋友就帶我去食和牛午餐喇！依度午餐都有好多選擇，可以燒肉，又可以食涮涮鍋，我哋咁為食就梗係兩樣都叫，可以試晒兩款食法。三色和牛定食有三款和牛，包括上牛排肉，肩眼肉同和排肉。三款油脂比例不同，侍應就建議由比較少油脂嘅牛排肉開始食。雖然油脂相對較少，但係都幾香，又有牛味。我自己就最鐘意食中間嘅一款，油脂多少少，油香撲鼻，牛嘅香氣又濃少少，再點少少酸汁，又可以解膩，配埋珍珠米飯，好味呀！和牛涮涮鍋又係另一個風味。和牛切薄片，放入清湯煮一煮，好快就食得喇！可以選擇點蔴醬或者酸汁，兩樣同和牛都好配合。鍋入面嘅蔬菜都好豐富，有菌類，蘿蔔，青菜，豆腐，粉絲，樣樣都好食。食飽飽又繼續行街！