Le Viet

睇戲之前係商場搵野食，見到呢間裝修好開放式既法越餐廳，價錢都算抵食，就兩個人二話不說黎醫醫肚。<越式拼盤> （$98）有豬頸肉、越式春卷、扎肉蒸粉包、炸春卷。特別想講下粉包，有啲似勁多料既腸粉。入面餡料包括黑木耳同免治牛肉，加埋胡椒同洋蔥炒起然後用腸粉皮包起。點啲魚露真係口感同味道都超豐富。<越式咖哩牛腩配法包>（$105）有個火爐仔係下面保溫，咖哩汁有濃濃既椰香味，牛腩幾腍身，軟硬度剛好，配上硬身既法包，第一次咁食，好好味。<超載椰青焗飯> （$103）重頭戲係呢個原個椰青載住一大碗焗飯。真係滿到靠椰漿痴住咋，快快打完卡開始食，一畢已經跌緊啲飯落黎。面頭幾足料啊，有魷魚仔、青口、蝦等等。個飯係炒底，同提子乾同肉碎一齊炒，食既時候我地仲畢埋椰青啲野肉出黎一齊食，口感極度豐富，大滿足。不過呢個椰青散熱能力好快，所以大家要趁熱食。