鏞記酒家

營業中

休息中

五柳炸蝦球好大隻，肉質緊實到咬落去都有微微阻力，但又有彈牙嘅感覺，五柳汁唔係單純嘅酸味，甜度同濃稠度都調校得啱啱好，有警喜！大蝦雖先油炸過，但火候控制OK，一D都唔油膩，比另一間港島名店好食得多！清湯牛爽腩算係鏞記名物，果然湯清得嚟味道鮮甜。牛腩選精挑咗最靚嘅腩角，連筋帶膜，口感正。一碗牛爽腩價錢真係唔平，但選材叫對得住個價，而且唔係成日有，值得一試。環境：裝潢行新中式風，宴會或家庭聚餐都係唔錯選擇；服務：不過不失，可以接受 。食物質素：價錢略高，但一分錢一分貨

銀川玉蘭炒臘味，即系芥蘭炒臘味。芥蘭正係當造，新鮮爽口，內芯清甜。臘味有臘肉、臘腸，以前超級討厭食臘腸，後來人老咯......口味都改變曬，由討厭變成鍾意。講翻鏞記嘅臘味，肥瘦適中，臘肉的肥肉晶瑩剔透，入口不覺肥膩。粵式鹵汁鵝掌翼，鵝掌肥大肉厚，師傅烹飪時間拿捏得很好，唔會太硬或者太軟，恰到好處。鹵水味滲透到每一隻腳趾，食落骨膠原爆棚 

鏞記的滿足（五小碟）皮蛋酸薑清湯爽腩 ： 雖然肉質不及大埔群記、湯頭始終九記，水記粉絲絕對有偏見，但亦不遜色薑蔥豬心蒂： 取自豬心血管頂上的一小部份，類似黃喉，好簡單的調味，但真正難忘的菜式蝦子紥蹄香酥鵝碎窩： 其中一道隱藏菜式，唔知以為可能是一道湯，其實佢係燒 鵝頸片皮去油，一隻🦢一隻頸，要儲出嚟，配上茅台佐酒，人生如此多<FUN>炭燒家鄉鵝姑： 只用上大概100天才出鵝攔的處女鵝，肉質不會過肥也不會過瘦，7:3 比例， 再用上鏞記炭燒「皺皮鵝」做法，皮酥肉嫩，再加上金針貓耳，唔需要額外沾梅醬已經係「太監騎馬 」崧子煙燻雲霧肉： 據碧雲講解，用上陳年普洱清洗豬肉，之後用上普洱菊花等煙燻出來，入口馬上溶化，不會油膩，食完即刻同膽固醇講拜拜禮雲子蛋清： 另一道傳統主角，禮雲子即過去大灣區和珠三角鹹淡水交界濕地盛產的蟛蜞仔之春，那麼細小，該用上多少隻？人手用上多長時間才能得到充分蟹膏來做菜？呢道菜令全晚的菜色推上另一個高潮點，絕對係畫龍點睛之選，細心地配上一口飯讓你拌飯食用，簡直高潮疊起一品鵝煲： 之前已經介紹過，不能不叫，最後用上生麵伴鵝汁真係齒頰留香

大裝修後第一次嚟鏞記，一樓比以前靚咗，完全無舊式酒樓果種頹味。六個人點咗半隻燒鵝，叉燒，乳豬同松子雲霧燻香肉，基本係上枱一陣盤盤清，每一道菜嘅味道恰到好處，松子雲霧燻香肉色澤好靚，浸肥肉可以話入口即溶，腩肉有好香燻木味，濃厚而唔鹹。不過我最鍾意邪惡嘅燒乳豬，表皮層暗紅色好誘人，放入口極脆又香，成枱人都讚不絕口。服務OK，環境佳，價錢略貴，但以質素計值得一試。

去得鏞記當然要叫燒鵝，燒鵝例牌上枱時屋企個食肉獸即刻眼前一亮，因為本身色澤好誘人，未食已經充滿期待！一啖咬落去，燒鵝皮只有微脆但好香油脂味，最重要唔多肥膏，稱得上係肥而不膩，其實我都幾鍾意肥膏，夠香口，但始終唔太健康，呢次啱啱好，鵝肉都香嫩唔鞋口！桂花蟹肉素翅，芽菜肥又飽滿，食起來有甜味而且脆，桂花其實即係碎炒嘅蛋花，加埋蟹肉、粉絲，大廚火候掌握得恰到好處！!這道菜十分推薦！仲有道蝦籽茭白炒花膠都唔錯，骨膠原豐富兼惹味，女士一定要試

鏞記裝修後第一次嚟，講真又幾鍾意個新裝修，保留咗啲舊元素但整體執靚咗好多，有新中式嘅味道。入得鏞記當然要點招牌燒鵝，呢間製法同坊間略有不同，燒鵝唔係脆皮，但話晒係炭爐燒，仍然好香炭火味，肉質好嫩，配上特製醬汁，唇齒留香。鹵汁鵝掌翼鹵得非常入味，咸香十足；南乳溫公十全齋雖然係素，但材料多又吸晒味，味道厚重好味過食肉；佛山汾酒鹵燻蹄同淮揚菜系嘅水晶肴蹄有異曲同工之妙，鏞記嘅汾酒鹵燻蹄做得唔錯，微微酒香又唔會掩蓋肉嘅味道。

太座對鏞記清湯腩情有獨鍾，每年生日都要陪佢到鏞記一行。份清湯爽腩選用繃紗腩，即係有筋膜夾住一層瘦肉嘅腩邊，好似每隻牛只有一小塊，筋膜口感爽滑，瘦肉都唔柴，最緊要個湯頭用足料，望落清淡但實質上味道濃厚鮮香。要講缺點，相比價錢份量有點少，不過太座滿意最重要。

阿媽話想食粵菜，取後決定去鏞記。點咗一份例牌燒鵝，本身賣相唔錯，食落外焦裡嫩，搭配醬汁恰到好處，洗去咗啲油膩感，食完仲有空間試其他菜式。我最鍾意份蜜針金錢雞，用鵝膶、肥豬肉、馬蹄片疊埋一齊，好似燒叉燒咁加蜜糖燒到肉邊輕微焦黑，肥豬肉明亮通透，一啖咬落去香味四濺,可惜膽固醇過高唔敢多食。阿妹出奇地最欣賞份手剁吊片蒸肉餅，外表平平無奇嘅家常菜，勝在食材好又夠惹味。媽媽鍾意蝦籽紮蹄，話已經無咩餐廳仲會整呢啲手工菜，而且鏞記應該有精心選料，腐皮有豆香，蝦籽亦有鮮味十足，整體相當不錯。

六年多前寫過「鏞記」的 openrice 食評。當年「鏞記」正值爭產、爭招牌風波，之後引致部份甘家兄弟自立門戶。至於贏了官司的其他甘家後人就繼續擁有「鏞記」金漆招牌。上次來已經是三年多前，今晚再臨，就是要試試燒鵝味道是否依舊。作為擁有悠久歷史的名牌中式酒家，去年斥巨資翻新裝修；不過仍然維持中式傳統風格，令人聯想起上世紀六七十年代的港式廣東大酒家氣派，處處滲透中式亭台樓閣風情。翻新後，枱櫈及裝飾品絲毫不見殘舊破損、亦沒有土裏土氣之感，反而有一種真正懷舊風情。對比那些仿古懷舊裝修風格的新派茶居，「鏞記」就顯得難能可貴。整棟鏞記有四層，地下一層依然有親民的粥跟細蓉。一樓類似輕膳，新設計以香港五、六十年代的生活場景作靈感，重現昔日在茶樓嘆茶食點心的氛圍，並以牡丹花粉紅及綠葉的兩大主色調，取代過往傳統中式酒家的紅色。這兩層在午市時段最多白領光顧。二樓繼續保留原有的龍鳳大禮堂，主要做午市商務飯聚及晚市生意；大廳盡頭的「龍鳳呈祥顯壽圖」立體浮雕在今天的香港已沒有幾間中式大酒樓仍然有保留，一定要打卡。最高一層就是VIP房。「鏞記」大裝修後，是否仍然可以保留炭爐牌照呢？但餐牌就仍然標明正宗炭燒黑鬃鵝(半

約了朋友喺鏞記飲茶，因為近中午時間中環始終多人，要等咗一陣先有位。難得一次無點到佢招牌燒鵝同叉燒，簡簡單單幾傻點心，反而食到傳統粵菜館嘅另一種味道，筍尖鮮蝦餃、燒賣、山竹牛肉球、燒鵝絲春卷同棉花雞，除咗燒鵝絲春卷較為少見，其他都算係基本款，但幾道基本點心完全睇到餐廳嘅用心同師傅嘅功力，啲點心真係好味，蝦餃嘅筍尖好提味，燒賣夠彈牙，有機會去鏞記，大家可以試吓啲點心同小菜，相當唔錯。

比平庸更平庸好多年無來鏞記，一來疫情，二來價錢比較貴，今日下午兩點幾做完事，就從來一次啦。去到大廳都重有6,7成客，算厲害啦！坐低吾使考慮，叫了兩個燒鵝瀨，但都要等左8,9分鐘至有。燒鵝放系碟度，好多汁，吾通佢想做一個鴨游水中的意景？-第一口系有碳香，-但皮就全部吾脆，吾知道系燒左好耐，定系因為”鴨游水中”，點會脆啊！- 鴨背都幾肥，但吾香- 鴨肉吾香，好淡，靱。鐵觀音茶就真系幾香，但30蚊一位啊！值吾值得哩？

雖然國慶同重陽無連假，但星期一仍然係holiday mood，中午同同事去鏞嘆吓，點咗燒鵝、蜜汁叉燒、禮雲子琵琶蝦，仲有酸薑皮蛋做前菜。燒鵝入口皮香肉嫩，好濃郁嘅油脂香味，可能因為啲汁好濃味，多吃幾塊會開始覺得少少油膩，不過燒鵝真係有佢吸引力，隔一排無食又會掛住。蜜汁叉燒偏甜但好啱我口味，禮雲子琵琶蝦啲蝦好大隻，禮雲子香鮮香，蝦肉質勁彈牙，喺一缺點係價錢略貴咗少少~~

食鏞記當然要點炭爐燒鵝，佢用炭爐燒制，直至表皮棗紅均勻，咬上去真係皮香肉嫩，再配上酸梅醬，味道一流，不過可能原本期望值已經好高，反而不如下面兩道菜有驚喜。一道白灼薑葱豬心蒂，材料係豬心上嘅血管，切開成片，每一片係一個蒂，不但要費時處理，仲好考刀功，簡單放落湯度白灼，時間掌握得，入口保持鮮味兼入口爽脆，全無內臟異味。另一道蝦子釀紮蹄，現時製作此食品嘅食肆買少見少，將浸軟嘅腐竹捲成條狀，釀入蝦子捲好後用繩紮實，蒸熟再切片，咬落有口感又有蝦子嘅鹹香，值得一讚。

好耐無嚟過鏞記，發現很多菜式仍保留到記憶中嘅舊味道，開胃菜酸姜皮蛋保持水準線上，醃制40-45天嘅鴨蛋，溏心做到凝而不固，聚而不流，搭配酸薑，係我一直記掛嘅美味。古早味蝦子紮蹄：這道菜係咪令人諗到豬蹄呢?其實係用塗咗醬汁嘅腐竹，卷著層層帶鹹香嘅蝦子，紮緊蒸制而成。一品鵝煲：包含鵝嘅所有部位同內臟，一層層疊著，最底下是豆腐pok，湯汁濃郁鮮美。鵝肉嫩，鵝紅滑，鵝胗爽，醬汁不重口，飲埋酒仲正！

中秋節當然要一家人齊齊整整食飯先有節日氣氛，鏞記係屋企長老們嘅心頭好。燒鵝名不虛傳，油而不膩，肉質夠嫩滑。佢哋嘅芝麻化皮脆乳豬都超正，外皮酥脆又夠曬香口，啲肉軟嫩，加上特製醬汁注入靈魂！其他菜式都係水準之上，成晚係道酸薑皮蛋因為本人一向唔鍾意皮蛋味道所以麻麻哋之外，整體都好滿意。鏞記前兩年啱啱裝修，但保留住懷舊香港特色，適合一家人聚會，中秋、團年都真心推薦！