鏞記酒家

營業中

休息中

今晚同屋企人出嚟食飯，長輩話想食中菜，就揀咗鏞記，貪佢地方夠大，菜式選擇又多，可以滿足唔同口味。嚟到鏞記，梗係要試下佢個招牌「正宗炭燒黑鬃鵝」啦，鵝燒得皮香肉嫩，炭燒味好突出，屋企個個都讚好。除咗燒鵝，我哋仲叫咗幾款餸食。個魚露津絲蝦球煲幾夠鑊氣，蝦球幾大隻，咬落爽口，津絲索晒魚露嘅鮮味，用嚟送飯一流。另外叫咗隻芝麻化皮脆乳豬俾大家試下，乳豬皮燒得夠鬆化，芝麻亦都好香，小朋友見到已經好開心。椒鹽百花釀玉帶都幾受歡迎，玉帶鮮甜，釀咗蝦膠再炸到金黃，椒鹽調味啱啱好。食中菜梗要有碟菜，個椒絲腐乳唐生菜炒得幾好，夠爽脆，腐乳味亦都足。一家人都食得幾滿意，菜式味道大路，老人家同小朋友都啱食。雖然唔係話有咩石破天驚嘅菜式，但勝在穩穩陣陣，係家庭聚餐嘅一個好選擇。

好耐無嚟鏞記，今次同屋企人嚟食飯，諗住都係食開嗰啲燒鵝叉燒啦，點知俾我哋發現到幾味新菜式（定係我太耐無嚟唔知啫？），膽粗粗試下，又幾有驚喜喎！首先嚟個洛神花山渣骨腩，個名已經夠晒特別啦！啲骨腩炆到好腍，酸酸甜甜好開胃，洛神花同山渣個味好夾，女仔實鍾意。跟住個上湯腿絲浸時蔬 ，菜夠嫩，湯夠清甜，食完啲濃味嘢清清個口腔都唔錯。  個豉蒜涼瓜牛冧肉鑊氣十足，涼瓜甘甘哋，牛肉夠嫩滑，豉蒜味勁香，送飯一流！最後個銀棯醬蒸鮮斑腩，初頭都驚個銀棯醬會唔會好怪，點知蒸出個醬帶少少鹹香果香，同斑腩嘅鮮味勁夾，魚肉又滑嘟嘟，好快就清咗成碟！總括嚟講，今餐都幾有驚喜，下次可以再嚟試下其他！

放假約咗舊同學去中環鏞記吹水飲茶，兩個人食唔到幾多嘢，所以都係叫咗啲幾籠點心同埋炒咗兩碟菜。雖然我哋係求其點菜，不過出品就真係一啲都唔求其，每一道菜都食得出用料上乘絕不馬虎，令我意想不到嘅係呢度嘅點心都可以整得咁出色，尤其係咖喱荔芋金錢肚，下次嚟一定要食多次！

幾個老友好耐冇聚，相約鏞記食返餐好嘅，閒話家常！陳皮蒜子蒸斑腩，肉質厚實，夾雜住淡淡嘅陳皮清香，相對平衡返斑腩嘅油脂，口感一流。當紅脆皮炸子雞 ，外皮酥脆，肉質細嫩，齒頰留香。雞樅菌炒豚爽肉，估用嘅應該係豬頸肉，好爽好脆，一啲都唔覺得有肥豬肉果種感覺。滑蛋炒蝦仁係家常菜之中嘅送飯神菜，基本好快清碟~~蔬菜就選擇咗胡椒春菜鹹骨煲，有肉有菜，當季嘅春菜真係好鮮嫩，連啖湯都好味道！

終於有個週末係唔洗開OT，難得有時間梗係陪下屋企人啦！老豆一早就book定咗去鏞記飲茶，原來鏞記除咗燒鵝之外，點心都係好好味，作為燒賣愛好者嘅我基本每次飲茶必點燒賣，呢度嘅燒賣大大隻，啖啖肉，配埋瑤柱真係好豐富嘅口感，好滿足！仔仔想食甜品，點咗份酥皮蛋撻，真係一分錢一分貨，同出邊啲蛋撻真係天淵之別！蝦餃晶瑩剔透，皮薄餡靚，每隻都鮮味十足！

鏞記對我嚟講係一個充滿情懷嘅老字號，無論係同朋友飯局定家庭聚會，呢度永遠係個穩陣之選。一定要試嘅當然係佢哋嘅招牌炭燒燒鵝，燒鵝肉質嫩滑多汁，肥瘦適中，沾啲酸梅醬，味道層次豐富，絕對係全餐焦點！仲試咗蒜片芥末大蝦球，蝦球彈牙鮮甜，芥末嘅微辣同蒜片嘅香氣好夾，食落開胃又過癮，係一道好有驚喜嘅菜！金蛋蒸手刴肉餅都係亮點，手刴肉餅質感鬆軟，蛋液蒸得滑溜，鹹香適中，入口有種家常嘅溫暖感；銀棯帶子蒸豆腐更加出色，豆腐嫩滑如絲，帶子鮮甜，銀棯嘅清香為整道菜加分，食完真是一個字—正！蟹肉鮮菰西蘭花嘅西蘭花爽脆，鮮菰嫩滑，蟹肉鮮甜，     平衡晒其他濃味菜。已經同朋友講好，下個月再嚟過。

中午約埋幾個同事去鏞記酒家試菜，作為一間老字號粵菜館，環境真是一個字 — 靚！裝修有現代感，帶點傳統中菜館嘅典雅氣派，坐得舒服，氣氛輕鬆又唔失格調，無論係同朋友定同事聚餐都好啱。今次點咗幾道菜，款款都好有驚喜！首先係竹笙羅漢上素卷 ($200)，素菜做到咁精緻真是一個亮點，竹笙軟嫩入味，吸晒湯汁嘅精華，卷入面嘅菇類同蔬菜配搭得宜，清香又豐富，食得出師傅功力。跟住試咗珊瑚白玉千萬柳 ($280)，賣相一流，冬瓜絲燉得軟腍透味，配上鮮甜嘅蟹肉同蟹皇，入口滿滿海鮮香，層次好豐富，絕對係今餐嘅焦點！豉汁燒釀酒滑豆腐 ($250) 都好出色，豆腐滑到入口即化，釀料鮮香入味，豉汁帶點酒香同微辣，惹味得來唔會蓋過豆腐嘅原味，食完真是一個滿足。沙爹津絲牛冧肉 ($260) 係另一道驚喜，牛冧肉嫩滑多汁，沙爹醬濃而不膩，配上津絲（魚肚）嘅獨特口感，食到停唔下來，份量同質素都好有誠意。最後嘅上湯腿絲浸時蔬 ($170) 好清新，湯底鮮甜濃郁，腿絲軟腍，時蔬爽口，作為一道清淡菜式完美平衡咗整餐嘅味道。服務方面，店員點餐同上菜效率都算高。中環地段加上呢個水準，雖然價錢稍為高少少，但質素完全對得住。下次會再試其

藏身中環威靈頓街的鏞記酒家，数十載煙火氣中煉就港式燒味巔峰。推門便是木質樓梯與吊扇的復古風情，爐火香氣直竄鼻腔，仿佛踏入老香港的舌尖江湖。必點飛天燒鵝，皮脆如琥珀，脂香盈口，肉質細嫩不柴，蘸上特色醬汁更美味；豉油雞滑嫩入味，醬汁醇厚，盡顯火候功力。雖名聲在外，服務仍細緻周到，老饕與慕名客在暖黃燈光下共用傳統滋味，煙火升騰間，品的是一份曆久彌新的港味情懷。

走進鏞記酒家，恍若踏入香港燒味博物館。金紅油亮的脆皮下透出粉嫩鵝肉，蘸上特調醬汁，油脂化作滿口清香。秘制豉油雞的膠質在唇齒間纏綿，鮑魚炒飯粒粒分明泛著鑊氣，連青菜都透著老火靚湯的鮮甜。二樓露臺能望見中環車水馬龍，百年磚牆與銅鍋明檔相映成趣，老師傅現場斬燒鵝的刀光裏藏著三代人的匠心。離店時捧盒陳皮紅豆沙，甜而不膩的收尾，恰似這場味覺盛宴的溫柔注腳。

酸姜皮蛋開頭我以為就係普通嘅皮蛋加舊姜，點知食落可以咁特別，兩者之間居然可以咁配搭，真係令人驚喜！燒鵝同叉燒都好好食，鵝潤腸好特別，特別推薦，豆苗出乎意料炒得好

招牌飛天燒鵝真係冇得頂，係我食過最好食嘅燒鵝，皮脆肉嫩，肥而不膩。其他菜式就中規中矩，不過鑊氣都幾夠，本來想試埋個叉燒，聽講都係招牌菜之一，不過覺得燒鵝同叉燒好似有啲重複，所以叉燒都係留返下次先嚟食

呢間餐廳係我十幾年前，返工返中環嘅時候，老闆最喜歡買畀我哋食嘅燒鵝，其實最主要係個燒鵝汁好好味。而我就係因為個燒鵝，去咗嗰度食飯，又愛上咗佢嘅揚州炒飯。因為佢係粒粒分明，每粒飯都係有蛋液包住，好夠鑊氣，好足料，超like。之後冇返工返中環呢，就好少去食，不過每次有外國嘅親戚嚟香港玩，我都會帶佢嚟呢度，因為佢好多香港嘅特色菜，環境又舒適，又有香港酒家情懷。尤其是有一個禮雲子蒸蛋白，我喺香港真係只有喺呢度能夠食到，我覺得好特色好特別。另外佢仲有啲手工菜，要預早過數預訂，我都好歡喜，反正係有老香港特色嘅酒家，我都比較推薦呢一間，請人食飯唔失禮，自己又食得開心

杭州嚟嘅客戶話想體驗下香港嘅美食，考慮到出品同埋檔次，第一嘅選擇當然係鏞記啦！時隔上次嚟鏞記都差唔多有四五年啦，出品依然係咁正，味道同之前嚟都係一樣咁正咁穩定，燒鵝依然係用炭嚟燒，非常香口

鏞記酒家不愧是香港美食的代表之一，無論是環境、服務還是菜品，都讓人印象深刻。走進酒家，古色古香的裝潢與現代元素巧妙結合，營造出優雅舒適的用餐氛圍。服務員熱情周到，從點餐到上菜都細緻入微，讓人倍感貼心。菜品更是無可挑剔，招牌燒鵝皮脆肉嫩，入口即化，香氣四溢，不愧是鏞記的鎮店之寶。其他菜肴如蜜汁叉燒、清蒸海鮮等也各具特色，食材新鮮，調味恰到好處，每一口都能感受到廚師的匠心獨運。尤其是鏞記的點心，種類豐富，口感細膩，令人回味無窮。總的來說，鏞記酒家不僅傳承了傳統粵菜的精髓，還不斷創新，帶給食客極致的味覺享受。無論是家庭聚餐還是商務宴請，這裏都是絕佳的選擇。強烈推薦給每一位熱愛美食的朋友！

帶上海嘅客人嚟食飯，都係揀呢度最穩陣。大家都係食肉獸，叫咗個黑椒香草牛柳粒夠惹味，懷舊中式煎牛柳都唔錯，牛肉軟腍嫩滑，口味酸甜開胃。仲試埋個荔茸香酥玉帶子，外層香酥，蓉滑而唔漏，帶子新鮮，個客最鍾意係呢道，話未試過咁嘅做法。食埋個黃金奶皇煎堆仔，成餐好滿足。啲侍應見生面口都會主動介紹，講解都好詳細。今次揀咗二樓樓梯附近有十八定十二羅漢個位，環境舒服啲，啱傾生意。最後啲客仲要求買佢哋個XO醬番上海。