詠藜園四川菜館 (已搬遷) 新店位置

星期日去完黃大洗就行去試下, 入到去, 坐下當然係叫碗出名既擔擔面啦.... 再來一客小籠包, 涼畔醉雞翼... 啤酒一支...面上台, 賣想幾好, 但我覺得花生味唔算太重, 但麵質幾好... 小籠包唔掂, 皮厚, 有幾隻已穿底, 涼畔醉雞翼幾好, 很有酒香味, 啤酒都唔錯, 因為係用冰杯, 感覺很好...由於呢間店係家爺仔x 一家人生意, 我坐的位就係入口第2張台, 望正個整涼畔廚房, 竟然見到一幕.... 嘔心的事.... 有個婦人哩在涼畔廚房內在拆蟹肉, 她起初先用廚剪剪蟹, 再用竹籤挑出, 但後來再望有見她口郁郁, 她竟然咬隻蟹...~~~)____(~~~ ..... 之後又再繼續挑...... 真係分辨唔出佢係米貪快, 用口來拆蟹肉... 好嘔心...>_______< .... 真係唔敢再在外面叫蟹肉扒時蔬.....驚驚驚驚<----- 4個驚字..

今日嚟食晏，天氣好濕悶，只係食咗少少嘢擔擔麵，夠大碗，幾多麵，但嫌個湯杰咗啲，味道唔錯雲吞，都幾好，唔會太硬或太淋豆漿，麻麻，加得太多糖水食得過

讀中學時學校响黃大仙,加上有朋友住附近,都黎過好多次. 擔擔麵係好重花生醬嗰隻口味,麵身較淋,係好大碗不過好漏,我唔係咁鍾意. 小籠包一叫起碼要十隻,唔係咁好,水準亦一般,皮比較厚. 其他小菜都偏向重味同油膩,唔係咁岩我口味,但價錢好似係幾平的, 下午茶十幾蚊有麵有小食,服務就冇乜,印象中啲叔叔嬸嬸都幾粗聲粗氣, 都係做街坊生意多.

出地鐵左手邊方向應該係朝住「新光」，未到新光，途經會有一炸小巴站，同偏舊o既鐵皮屋村仔，小巴站向上行會見到條隧道，過左去對面，一出就應該係喇！其實佢係黃大仙消防局對面，even你出地鐵問人都會知（最好去到小巴站，實大把人幫到你）。至於泊車，我估最近就係黃大仙下村個舊址，之前用作乜差「龍騰」位咯，黃大仙廟隔離，再唔係雙鳳街停車場都較近。希望你搵到啦～我住哩頭確實少幫襯，但成日都見唔少人黎食．．

MTR黃大仙A出口，新光酒樓向鳳德道方向，消防局對面就係。<br />渣車o既話，通常泊雙鳳街街市停車場，$13/hr。

請問MTR係黃大仙定鑽石山站, 泊車邊到最近? 謝謝!

好似好味過蔡瀾美食坊分店。我和朋友點了擔擔麵兩碗、淨白片肉、過橋水餃(小)和兩杯荳漿。擔擔麵係目前吃過最好味的，又可以唔辣，湯杰我諗係正宗啦，又大碗；白片肉都好掂，甜味的辣汁灑在半肥廋極薄的肉片上，食多幾塊都仲得！而過橋水餃伴着那些蒜粒和醬汁又係好好味！荳漿唔太甜而有荳味喎！隨了必定要搭檯之外，伙計有效率和Casual　－　很喜歡這種待客方式!埋單$118兩個人!

有同事請食lunch, 唔錯~ 擔擔麵好香, 但都幾漏, 仲咁大碗, 一個女仔未必食得晒~ 雞絲粉皮個sauce好正~ 炸鳳尾魚都好香口, 唔太油膩~ 雲吞雞煲好大portion, 但一般o者~ 小籠包皮唔夠翡翠薄, 味道都ok~ 因為有人請, 我唔知道幾多錢呀~ 坐就一定無翡翠咁舒服, 但依度風味地道d, 又多好多特別d o既o野食~ 所以唔可以比較o既~

之前鑽石山果間冇試過，所以專登黎哩間。擔擔麵好味，不過比較細碗，而且要有肉碎0既改良擔擔麵要成$24有d貴。雞絲粉皮好味，其他0既薰魚、碎雞、酸辣湯等等都幾好，蔡蘭美食坊果間真係完全唔得，冇得比

今日下午茶時間經過黃大仙詠黎園﹐走左入去醫肚。食左一個擔擔麵同一碟燻魚。擔擔麵依然好味﹐但同黃埔的詠黎園味道唔同﹐黃埔店的擔擔麵賣相較佳﹐但油比較多﹐黃大仙的擔擔麵花生口味較重﹐賣相較為普通﹐但味道都算唔錯。燻魚$20大大碟﹐但口感略濕同味道有少少過甜﹐整體味道還算過得去。老實講﹐如果以目前的水準黎講﹐真係黃大仙呢間可能仲比較正宗。黃埔的分店味道同最初鑽石山食到的﹐味道有少少出入﹐但各自各精彩﹐都算係食客的福氣。臨走時見到隔離檯有位仁兄食緊一碗好深色的麵食﹐一問之下原來係酸辣麵﹐同我平時見慣的酸辣麵完全唔同﹗據講都幾辣幾酸。下次一定要試下呢個酸辣麵先得。

今日又去呢度開飯. 同男朋友2個都唔係好餓, 叫左個過橋水餃, 好好食. 熱辣辣, d皮唔會太厚. 個辣汁好好味. 酸辣湯鍋巴, 個湯有好多料, 酸辣適中. d鍋巴好熱, 好大塊. 放入d湯度會吱吱聲, 都幾熱氣下. 不過確係正~~ 椒鹽九肚魚, 都知道唔應該0係度叫黎食, 但係想食嘛. 唔係太得. 個脆漿好厚. 而且一d都唔似係椒鹽. 下次都係唔叫呢d啦. 仲有, 呢度都有蟹粉小籠包, $98有8個. 但係冇試. 有機會都會試下. 但係今日太飽啦.

THe food here is hot and delicious!the spicy food here is nice,and the noodle is definitely my favourite!

呢度其實真係冇乜service可言；街坊老舖，裝修又「up dup」。不過D野幾好食，價錢又平，當係食大排檔咁都總算食得過o丫！尋日又去幫襯；例牌會叫o既擔擔麵同白切肉依然好味，尤其係白切肉隻辣汁，好正。另加20隻過橋餃子，清清地又一餐。連汽水豆漿都不過$130，依然抵食。跟平日一樣，食完詠藜園之後去隔離整盅$23好味道龜苓膏，清下熱，仲正！

食過一次, 都OK, 幾特別, 想介紹比屋企人, 帶?地去食, 點知...... 排隊, 勁長龍, "羅飛仔", 都唔緊要啦, 如果好食自然多人......等左好耐. 問題就係咁啦, 熟客自然又多...... 打尖. 火都黎. 如果想做熟客, 出聲羅, 叫我唔好等. 唔係一個又打尖兩個又打尖, "羅飛"都無意義啦, 總之以後無交易, 我都會叫人唔好去.

成日聽人講詠藜d野好好食，所以專程去試下。星期六中午唔多人，仲唔駛等位tim。小籠包，d皮好厚，唔係好得。擔擔麵不錯，不過好膩。窩貼一般。豆沙窩餅都幾唔得，太油，想做到外脆內軟，軟就ok，但唔脆nei，最慘你一大片餅切開八小片，d豆沙得果少少，全餅約兩份一有多唔豆沙。攪到好似食炸餅咁。都幾失望。反而最好係小吃，魚皮花生，又炸好香口。