泉章居 (已結業)

我無記錯喎... (幾個月前喺 旺角食過)之前個2人餐, $148有例牌雞+2個餸+湯之前個4人餐, $248有半隻雞+3個餸+湯點解E家減咗一個餸既????係咪旺角同銅鑼灣既價錢係唔同架?搬咗,地方靚咗,所以加價?

銅鑼灣己搬去新址,昨晚去用膳幾靚,兩層,又增設卡座,都追上港人品味.霸王雞keep到超正的水準,個廚師冇換到個friend淨係扣肉都食左1大碗飯,炸大腸又夠味!!但係始終鐘意舊個款荼果多d....真係好正!!!!

唔洗多講，我亞爸話吃少一個禮拜都身痕，信不信由你。霸王雞招牌菜，好入味，淨係食蔥都送到成碗飯。

霸王雞同鹽焗雞係喱間舖都幾好食！(因為佢地係招牌菜) 仲有我最鐘意係飲佢既原隻冬瓜盅，足料架！如果係想一班人想坐來d，傾下計，佢係一個幾好既選擇。記住避免係d大節日去喎！我試過係父親節去(係旺角個間)，個d野食唔好食，又冇set喎，都幾貴。但係平日去的話會好味d。係呀！如果係星期五或六，多人去食的話最好預早book定，因為都幾多人食。

唔駛講! d雞真係好得手! 唔記得點整, 總之真係好味!士多啤梨骨又係幾good! 唔記得食左幾多野, 感覺就係"抵食"。

母親生日,出街食餐晚飯,適逢銅鑼灣灣仔一帶有世貿遊行,D人都歸家避靜,所以喱度都冇咩人.叫左四人餐加幾個"食送",詳情如下:1.霸王雞--即係白切雞上面加D芫茜蔥o係度,雖然得半隻,但係非常大隻,所以D肉較鞋口及雞皮較厚,但都ok,沙薑汁好香.2.蒜子火腩炒星班腩--星班腩係用真o既星班腩,有魚鮮味,一流,而且數量相當多,估唔到用料咁正.火腩較硬,味道一般.3.海參花膠煲--另一落本之作,花膠夠彈牙,有咬口.海參夠晒腍,吸晒個勁鮮味o既汁,勁正.另外仲有東菇同津白,都係吸汁o既野,一流味道,必叫之選.4.菜心炒牛肉--菜心較大棵及較老,o趙蔗咁,唔掂.牛肉嫩滑,又唔會太腍,好.5.生炒骨--水準平穩,皮脆肉嫩,排骨D肉有一半為肥肉,相當易入口,但最好有多D菠蘿.6.金華火腿雞燉翅--$58一位,翅唔係咁多,得兩抽細細抽,另有雞肉及火腿小量,湯極鮮甜,但整體尼講料小左D.總結尼講質素唔錯,仲送紅豆沙甜品,價格合理,母親好滿意.

尋晚同朋友去食, 真係非常失望!早幾個月去都無問題, 但今次......無碟餸覺得滿意, d服務仲惡劣到不堪.我地叫咗兩個米粉,但只送咗一碗過黎,追咗n次,由飯前等到飯後都未黎,d餸都食哂,最後我地取消單,仲要比阿姐寸.之後,我朋友見隔離枱食緊壽包,佢又想食,問阿姐要等幾耐,阿姐好寸咁話"要等半個鐘架,你地米粉都唔等得,唔好叫壽包嗱"....嘩....真係唔知呢d係乜野服務態度?!

泉章居已光顧過N次,再著墨去介紹就有點費事.一年點都會去幾次,隻雞無以前咁好食係必然.梅菜扣肉才是反高潮,每次去,一定掃清光,滴汁不漏用黎撈飯.上次請客,幾個人可以叫埋冬瓜盅,加埋例牌夜香花,我唔食冬瓜,一樣照吞三大碗.最重要一樣,就係價錢平,六個人做埋老細大約五舊水,唔會感覺肉赤.相比一流價錢三流水準的粵菜館,泉章居可愛得多.

星期六晚上三個人幫襯，雖然唔係我等位，但係都好似等咗好耐下。叫了４人餐：瑤柱豆腐海鮮羹普通啦，唔要求得太多，不過都有唔少瑤柱，淡淡地清下腸胃幾好。分倒６碗滿。霸王雞半隻招牌，唔洗多講，好味，淨係食蔥都送倒飯。蟹肉扒豆苗阿媽教落，出街食飯叫菜要叫啲貴嘅。好大碟，唔係好夠咸，不過清清地，蟹肉多，幾好。係久唔久食倒有蟹殼囉。沙律炸蝦球係廚師推介，散叫要＄８８，跟餐就唔洗加錢。８粒乒乓波咁大，好好彈牙，熱辣辣，加少少沙律醬，真係好好味，食到停唔倒口。依家呢，個湯可以轉蛇羹，２－４位加＄５０，８位加＄８０，亦可轉羊腩同另一樣，唔係好記得，都係要加錢，但係就唔記得加幾多，不過一定多過蛇羹。見人哋啲都好大煲下，下次一定要試。

其實真係無乜特別好食的食物．．．但係唔係講笑，o個隻白切雞真係滑同埋好食．．．My favorite...

泉章居食o左好多年, 一向係大件夾抵食o既客家菜, 仲幾好味添. 同高級中菜比當然算粗, 但勝在粗中有細. 加上經濟實惠, 一班朋友據桌大吃, 一定吃得開心.聽說明年會搬到銅鑼灣廣場, 今天便和幾位老友到此充實一下日後o既回憶. 霸王雞保持一貫水準, 三鮮骨髓、梅菜扣肉亦然. 美中不足蛇羹略嫌失色, 又加入連肥的火鴨絲, 有點失望. 幸好太太最喜歡的乾炸釀豆腐仍然一流, 豆腐炸到外脆內軟, 點點肉香, 加上略帶酸甜的醬汁, 幾種味道、口感混和一起, 真是其味無窮.希望搬到新店後泉章居繼續是今日的泉章居.

很久沒有來這裡晚飯, 之前的印象是便宜, 大碟抵食, 味道不錯. 早前和同事一行十人來這裡晚飯. 當晚食物的水準一般, 有好有不好. 鹽焗雞幾好. 但炸大腸較差, 我想只是一時失手. 侍應都幾有禮貌, 會說笑.

同友人又跟住openrice餐廳排行榜搵野食...今次去左cwb既泉章居. 2個人叫左個二人套餐...叫左梅菜扣肉...hee仲有一個就唔記得..不過整體上食品都ok, 服務都幾好.p.s:好彩個晚我地早去唔使等位...

放左工後，9/11(星期三)0既晚上同屋企人食晚飯。好耐無睇過啦，四個人坐卡位，好耐無黎過，我諗都起碼有四、五年啦，對上一次又係同屋企人四個人黎，又係黎銅鑼灣，0個時都未有旺角。所以我未試過旺角0個間。叫左一個四人餐，有鹽焗雞半隻、羊腩煲、翡翠斑球、梅菜扣肉。後加左一客炸鮮奶(我0既至愛)，不過呢樣整得麻麻，個賣相靚，不過無咩味，很淡，要靠糖先有味，變左食好多糖落肚，鳳城0既炒鮮奶好食好多，但自己本身其實鐘意食炸多過炒，而且炸鮮奶好少地方食到。鹽焗雞有d鞋，好失望呀~~~~因為對佢0既期望好高。其他0個幾樣"食送"都幾好，如果再熱d會更好。琴晚送0既係木瓜雪耳糖水，幾好，唔會好甜(雖然我好鐘意食甜野，不過都怕肥，同埋太糖都唔健康0既)。琴晚一家人影左d相，好開心呀。祝爹0地媽咪生日快樂!琴晚d侍應都幾有禮貌，唔錯！不過人手有d唔係好夠。餐飯有d貴，食左四百幾五百蚊，但一家人食飯食得開心都值得0既!豪一次啦~~~~仲有其他野想食，例如：芋頭鴨、炸大腸......等等。其實泉章居旺角定銅鑼灣好食d？銅鑼灣分店出年搬啦喎~~~~各位知唔知邊度有好味0既炸鮮奶食呢？好想知呀!麻煩哂~~~~

３個人去叫左個湯（普通），雞又好咸，條魚又老，士多啤利肉排算好ｄ，都唔明仲咁多人去食！