8間令你流連於榴槤製品之間的餐廳
2016-05-03

5月5號就係立夏,咁代表咩?代表又係榴槤嘅季節囉~~ 嗚呀!一班榴槤控又可以出動食榴槤喇。除咗成個榴槤買返屋企慢慢享受之外,仲可以去唔同嘅餐廳品嚐埋各式嘅榴槤製品!正呀喂!但對於一班好怕榴槤陣味嘅朋友仔,就sorry喇,不過,如果你哋鼓起這勇氣,跨出這距離,試咗你哋人生第一啖榴槤嘅話,好可能,你哋就會從此愛上㗎喇。

榴槤飄香椰子      甜入心


Photos by Sophia ku & 紫光夢幻

椰皇燉乜乜乜係一款都頗受歡迎嘅甜品,感覺好滋潤又好食,今次轉一轉個partner,一樣都係椰皇燉蛋白,但就配埋榴槤落去,又係另一種感覺。

原個椰子裡面,傳嚟好香嘅榴槤味。梗係啦,一嚿嚿榴槤果肉喎,再加埋西柚粒、西米同爆爆珠之類嘅粒狀體系嘅嘢食,口感幾豐富。蛋白滑、榴槤軟,椰汁鮮甜,呢幾種味溝埋一齊又唔會話有邊個特別搶,nice時。

榴槤水晶珠    聰嫂星級甜品


Photos by chloehahahaha & Foxthereal

鍾意食甜品嘅朋友冇可能冇聽過聰嫂嘅大名,呢度都有唔少榴槤甜品食。其中要數嘅一定係榴槤水晶珠,個底係榴槤冰雪,有理由相信係用咗好多榴槤肉打造而成嘅,如果唔係冇奶油每一啖都食到有榴槤肉!上面就係一層堅‧榴槤肉,仲有好多脆卜卜幾彈牙嘅水晶珠。即使食完,仲係好感受到嗰種餘韻。

而榴槤班戟雖然細細件,但中間包住嘅榴槤肉餡就一啲都唔細,可能因為嚿肉有返咁上下份量啦,班戟塊皮有些少厚,不過都依然好香好軟,連埋啲cream一齊食,濕濕地咁都唔會話好dry。

榴槤千層班戟     沛公甜品


Photos by hunger hunter & stellashea

沛公甜品一向以榴槤作招徠,有選擇困難症嘅榴槤控入到去真係大都頭晒。首先呢度啲甜品已經多到喊,有啲款仲要分埋榴槤同貓山皇(當然貓山皇嘅價錢就貴啲啦),有時真係要點止兵兵先得喇。

貓山皇法式燉蛋,表面睇落同一般焦糖燉蛋無異,但一吉落中間,就發現到個分別,中間位置係收藏咗大量嘅貓山皇果肉㗎!燉蛋本身已經夠滑同creamy,再加埋呢啲軟身貓山皇,幼滑得嚟又有少少黏身。榴槤糯米糍個餡同樣係收藏咗一大嚿榴槤果肉,連埋煙煙韌韌嘅皮一齊食,幾有咬口。

不過呢度嘅招牌甜品一定係榴槤千層班戟,薄薄嘅班戟皮夾住一層層嘅榴槤cream,大約有10幾層咁多。班戟鬆軟,一啖食晒10幾層落口係霸氣嘅,等啲榴槤cream慢慢喺口入面融化同埋留低獨有嘅香味,之後可以慢慢回味。

榴槤烤包     Rotiboy Bakeshoppe


Photos by eatmugfoods & shashasophie

眾所周知,馬來西亞係其中一個榴槤產地。呢間麵包舖就係源自馬來西亞嘅,所以佢哋嘅麵包同平時嘅口味有啲唔同,係榴槤烤包呀!而且啲餡料仲係由馬來西亞直送到香港㗎。

呢個榴槤包每15分鐘就會出爐,新鮮同熱度嚟講算係保持得幾好。個樣望落有啲似鮮奶球,面頭嗰層甜甜地脆脆地,仲好有牛油同蛋香。咬開亦都食到滑滑der榴槤蓉,不過就唔好太大期望,講明先,榴槤蓉同個包一樣,唔算係好多好大個,但味就幾濃郁嘅。

榴槤豆腐花  甜姨姨私房甜品


Photos by 大皇 & eatingneverstops

夏天唔淨止想食榴槤,見到雪花冰都會好想食,呢度嘅榴槤雪花冰就啱晒嘞,由上至下數落嚟,先有層榴槤乾,再有層榴槤果肉正糕、榴槤肉同榴槤雪花冰。總之就成杯都係榴槤啦,份量大到兩個人些牙食都夠飽!

呢度嘅榴槤豆腐花一樣咁出名,滑捋捋嘅豆腐花面,舖滿晒一嚿嚿榴槤肉,放入口滑得嚟又有些少黏糯,咬下咬下,榴槤味雖然重,但又夾雜住絲絲嘅豆香,每一啖都令人有回甘嘅感覺。

榴槤心太軟    貓山皇


Photos by hkfoodtalk & Clarayan

打正旗號就係食貓山皇甜品,有貓山皇雪糕、貓山皇薄餅、貓山皇咖啡、貓山皇班戟等等,望住個餐牌又係會樣樣都想叫晒嚟試。特別係榴槤心太軟,平時食開嘅心太軟,一叉開係流啲朱古力溶漿出嚟,呢個流出嚟嘅,係堅‧榴槤蓉呀!心太軟外層係黑朱古力,食落甘甘地唔會話太甜,而貓山皇蓉帶有酒味,既香且甜,撈埋啲朱古力一齊食,好滿足,然後就會覺得個心太軟實在係太細個喇,唔多夠喉。

而講咗咁多樣榴槤製品都係凍食嘅,呢度終於有款係熱食㗎!就係榴槤燉蛋白喇!其實都唔係熱嘅,微溫啦,暖暖地,蛋白同榴槤唔止隻色相近,連味道亦都出奇地夾,食落口軟綿綿,一匙一匙咁好快食晒。

榴槤炒冰    甜心鮮果園


Photos by 詩。訪。菜 & Yan~*

呢間喺元朗嘅小店,冇上面嗰啲舖頭咁多款揀,但佢嘅榴槤製品一啲都唔輸蝕!係平時好少見到嘅榴槤炒冰!

炒冰係用鑊炒出嚟嘅冰,冰得嚟又會唔太硬,軟軟滑滑咁食落有啲似雪芭,入口即溶。本身已經好特別嘅榴槤炒冰,上碟時更加特別,伴碟嘅仲有生果同埋4塊薯片,係薯片。榴槤味係香嘅,係突出嘅,沙冰軟腍腍,夾埋脆卜卜嘅薯片一齊食,都幾~ 特別吖。不過鍾意嘅其實分開食都得。

榴槤糯米飯    泰園


Photos by 吾是食嘜 & Cowrei

最後要介紹呢間餐廳,係一間泰國餐廳嚟嘅。鍾意榴槤嘅朋友應該都會幾鍾意佢,因為你哋有機會可以喺度食到一餐全榴槤宴!由正餐到甜品同飲品都係榴槤!

先講下碟榴槤炒飯,唔似得其他榴製品咁,嚟遠就會聞到嗰陣獨有嘅香味,呢碟飯就算擺到上枱都仍然唔係好聞得到,但當鬆開啲飯之後,就會慢慢滲出嚟。細心啲睇同食,就會搵到都幾多一粒粒嘅榴槤果肉扮晒肉咁樣,混咗喺啲飯嘅中間,而碟飯另外仲有蝦呀蛋呀嗰啲材料,其實榴槤味唔算話好突出,但層次感嚟講係幾好。建議唔食榴槤嘅朋友都可以撈埋一齊試下。

而芒果糯米飯就食得多,榴槤糯米飯真係第一次!一整條榴槤切開一塊塊上碟,伴喺淋滿椰奶嘅糯米飯側邊,好吸引!估唔到原來榴槤同啲椰汁糯米都幾夾,好軟滑,椰汁雖然香,但又唔會蓋過咗榴槤嘅味,超興奮的說!

你話重口味都係咁話㗎喇,組咗你個榴槤班底未呀?



文:Kar

隨時接收最新資訊
讚好OpenRice專頁!
關鍵字
榴槤
心太軟
豆腐花
沙冰
元朗
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
【醫食無憂】點樣分我係寒底定熱底?
2017-03-21
【愛心熱店專訪】Friends聾健共融 聽覺有困難一樣可以落單打奶泡
2017-03-07
【愛心熱店專訪】派飯背後 深水埗明哥:我唔認為自己有愛心,我只係用心 (有片)
2017-03-07
【開飯餐廳專訪】日本人在香港 開餐廳最重要健康行先,味道其次(有片)
2017-02-08
【愛心熱店專訪】基隆茶餐廳老闆娘義助長者 「做得幾多得幾多」(有片)
2017-04-05
【愛心熱店專訪】荃灣80後暖男 特製飯盒送長者(有片)
2017-04-24
餐廳資料
更多
收起
本月熱門
【隨時更新】零食速報 每周新款零食、酒品點評
1天前
食豪啲啲 城中5間海鮮+肉扒父親節自助餐
2020-06-10
至甜初夏 6月下午茶推介
2020-06-15
灣仔新扒房只賣$298黑安格斯牛扒套餐 任食薯條+超鬆軟肉桂牛油餐包
2020-06-11
甜蜜蜜暑假 7月下午茶推介
7天前