335 0
蟹控有福啦~~中秋節過後,陸續係上等蟹黃油蟹、大閘蟹當造嘅時候,諗起可以一嚐膏香肉甘腴嘅滋味都流哂口水!不過,呢兩種蟹閒閒哋都幾百蚊一隻,如果唔識揀蟹,到時上桌先發覺「蟹不對辦」就真係喊都無謂,所以係時間要學番幾招揀隻靚蟹,以免到時「蟹財盡失」啦!

黃油蟹

話說雌性膏蟹同人一樣,都好鍾意晒太陽,經過一個炎熱嘅盛夏,佢哋身上嘅蟹膏被分解成黃油滲透到全身,令蟹肉盡帶黃油甘香,成為咗我哋成日聽到嘅「黃油蟹」。因為呢個緣故,端午後至八月都係品嚐黃油蟹嘅最佳季節。



Photos by Tinlong


第一招 確保完整無缺

一隻黃油蟹靚唔靚,視乎其油量嘅多少。如果蟹身任何一處地方折斷,黃油都會溢出,令蟹肉嘅甘香大打折扣。

第二招 揭肚望爪

你可以打開蟹肚嘅蓋掩,或觀察蟹爪關節,如果呢兩個部位都係飽滿脹起,而且呈金黃色嘅,就證明蟹身充滿黃油,你可以快啲買番屋企大朵快頤。

第三招 睇動作

油質佈滿全身嘅黃油蟹通常反應都比較遲鈍。反之就會生猛啲,所以千其唔好俾佢哋嘅動作呃咗。

大閘蟹

初秋,就係大閘蟹當造時節。中秋過後,大閘蟹就會游番湖底休息,儲存到更多嘅蟹膏。如果要買大閘蟹,江蘇區係首選,當中又以陽澄湖區生長嘅大閘蟹最受歡迎。



Photos by tht_dawn

第一招 掂眼

你可以輕輕掂一掂蟹殼近眼位置,如果隻蟹係生猛嘅,就會縮一縮隻眼,反之就會冇反應。

第二招 墜手

拎起大閘蟹覺得墜手嘅話,就代表蟹黃蟹膏豐富,夠哂足料。

第三招 分公乸

成日聽人講「九月臍圓十月尖」,其實意思就係農曆九月吃母蟹好啲,農曆十月就食公蟹好啲。咁點分男女呢?就好似句俗語咁,母蟹肚身較圓,公蟹肚身就有個尖臍。



隨時接收最新資訊
讚好OpenRice專頁!