黃埔5萬呎水產巿場即將開幕 鮮活蝦蟹即叫即劏即食(有片)
2017-06-12

自從黃埔都有港鐵站之後,就愈嚟愈多美食進駐,嚟緊呢一間,相信又會掀起一陣嘅排隊潮喇!係香港人最愛嘅水產系餐廳呀,仲要佔地成五萬呎,好鬼大,用一站式水產概念場嚟形容應該會更加貼切。

呢個水產概念場總共會有大約10間嘅食肆,由今個星期五,6月16號起會分階段開張。首先同大家見面嘅就有4間餐廳。

冬甩壽司  頤之味

一入去見到嘅第一間餐廳,分咗自助食堂同吧枱兩部分,主力提供壽司、刺身等食,仲有魚缸展示時令鮮活蝦蟹同貝殼類日本海產,可以即點即劏即食。其中,喺美國同日本紅咗一段時間嘅冬甩壽司,更加係香港首賣。即係扮冬甩嘅壽司,每款冬甩壽司都會有三種材料同醬汁,例如吞拿魚加牛油果加蟹子,砌到好似冬甩形咁,呃LIKE最啱,不過只係喺自助食堂區先有得食。

西村壽司亦係另一推介之選,全部都係珍貴食材,一層疊一層,包括有九州免治拖羅蓉、北海道甜蝦、北海道馬糞海膽同三文魚籽,記得要一啖食晒呀,咁先感受到種種嘅鮮味喺個口度一次過爆發嘅過癮。

西村的味道  饒之味居酒屋

呢間餐廳以重現「西村的味道」作招徠,主理師傅跟咗西村先生20年,當中最推介嘅菜式一定係汁煮牛脷。美國牛脷用薑、大蔥、昆布等材料煮個半鐘,鬆軟入味,肉汁豐富。而佐料嘅醬汁,就更加係西村自家秘製嘅原味鮑魚汁,係用大、細鮑魚一齊煲,加入多種調味配料每日煲一次而成,所以係有超香嘅鮑魚味。

另一啲平時較少機會食到嘅菜式係汁煮吞拿魚頭、魚眼,魚頭加入清酒、味醂、醬油等等調味,魚皮夠厚,好有口感。而魚眼嘅膠質感更加係愛好者嘅飛佛。有心想食呢兩道菜嘅朋友,記得要預早訂定。

話明居酒屋當然有唔少清酒同燒酎坐鎮,其中有款燒酎仲係用糯米釀造嘅,好香醇。

蒸北海道毛蟹  蟹筵

睇個名就知呢間主打食蟹,暫時冇得單點,全部都要一個個餐咁叫。全蟹宴套餐共有10道菜,都係以即叫即劏嘅鱈場蟹、毛蟹、松葉蟹入饌。鱈場蟹刺身夠晒新鮮,啖啖肉亦充滿海水嘅鹹香味。蒸北海道毛蟹亦保留到佢最原始嘅味道,另外配蟹膏上枱,毛蟹肉點埋蟹膏咁食,又係另一種香甜嘅味道。

仲有款蒸蛋,係用甲羅蟹殼盛住嚟蒸,滑得嚟亦滲有蟹香。

江戶前壽司  寿司翔太

呢間就主打江戶前壽司,採用獨特傳統魚生熟成櫃,令魚肉更加濃郁,而喺度仲可以食到大廚發辦添,幾款餐單各有不同,包括時令壽司、海膽蒸蛋、照燒日本和牛、燒大蜆等等。

海鮮大街、食材專賣店

除咗呢四間餐廳外,同時仲有海鮮大街同食材專賣店都會喺星期五開業,大家可以買到各式嘅新鮮海鮮,例如龍蝦、象拔蚌、龍躉等返屋企,亦有住家食材,以慢煮、快煮等區分,方便鍾意煮食嘅朋友可以挑選,四大名蟹:花咲蟹、鱈場蟹、毛蟹、松葉蟹都有得買呀。而場內其他食店,會喺嚟緊嘅3個月陸陸續續開張,聽講其中有間會係海鮮酒家,到時就可以好似西貢、流浮山嗰啲海鮮聖地咁,喺海鮮大街揀完海鮮,就拎去餐廳度請師傅即場煮埋喇,記住繼續留意開飯仔嘅報道啦。

文、相:Kar
片:Cathy


關鍵字
黃埔
紅磡
水產
日本菜
壽司
生蠔
居酒屋
新店直擊
走在最前線,為大家搜羅及報道有關新開餐廳的資訊。
相關文章
【編輯推介】治愈系日本丼:漁兵衛
2016-06-14
試勻時令魚鮮 春旬廚師發辦推介
2017-04-27
熊本食材餐廳 水都係熊本直送!
2017-04-11
【開飯熱店入圍名單巡禮】觀塘有寶!一區食勻多國菜式
2017-03-07
必試燒棉花糖意大利雪糕 Taste of Hong Kong今日開鑼(有片)
2017-03-16
4月新主題自助餐推介
2017-04-10
餐廳資料
更多
收起
本月熱門
情人節去K11 MUSEA 一文睇晒浪漫餐廳
2020-02-06
【隨時更新】零食速報 每周新款零食、酒品點評
4天前
全城抗炎 與醫護同行!提供醫護餐飲免費優惠餐廳一覽
2020-01-31
美國人氣肉桂卷抵港!煙韌原味/朱古力/焦糖胡桃卷(有片)
2020-02-06
全城抗炎!60間餐廳推$0-$25酒精搓手液換購計劃
2020-02-12