今日氣溫突然由18度跳樓式急跌10度，想凍死人咩？呢個時候，除咗打邊爐之外，食返個暖笠笠雞煲暖吓身就最好不過！今次開飯仔推介4間雞煲俾大家，各有唔同特色，有麻辣、清甜椰子雞、暖胃胡椒豬肚雞等等，想食咩口味自己決定喇！
新鮮雞炮製 雞皇
呢間新開冇耐嘅餐廳位於九龍城，睇名就知夠專啦。用新鮮雞炮製，雞肉好嫩滑，麻辣干鍋雞煲香辣味濃郁，非常惹味，追加豬皮蘿蔔索晒汁仲正！加埋雞湯就可以打邊爐。另有藥膳花雕雞煲、椰子雞同胡椒鮮豬肚雞等選擇。
圖：識食索女
街坊捧場 鋒記小炒王
東區嘅街坊可能先識呢間小菜館，招牌胡椒豬肚雞煲係每枱必點，湯底呈奶白色，充滿胡椒香但又唔嗆喉，有齊新鮮雞件、豬肚，腍身嫩滑，份量超大，飲完相當暖身架。飲完湯可以淥配料，首推足料韭菜餃，呢度嘅小炒同羊腩煲都相當唔錯，記得留肚食！
圖：海南椰子雞 水鴨朱椰子雞
又想打邊爐又想食清啲？椰子雞應該啱晒！呢間主打椰子雞煲，用新鮮椰青水同椰皇炮製，加埋唔肥嘅文昌雞，湯底清甜帶鮮，雞肉爽嫩，仲有索晒湯嘅竹笙、椰子肉同馬蹄，食完都飽！配料建議可以柯打薯粉、蔬菜等較清淡食物，就可以吸收晒椰子雞湯原汁原味喇。
圖：工業區食堂 玫瑰餐廳陳儀興
舖頭係隔涉啲，格局似茶餐廳，但勝在抵食，仲有唔少明星嚟幫襯！雞煲選擇都幾多，有椰子雞、重廈雞、奇味雞等，花雕醉雞鍋都多人叫，酒味啱啱好，仲可以優惠價柯打埋安格斯肥牛，滋補濃湯花膠雞就濃味啲。配料選擇多又唔貴，仲可以預先訂定海鮮或特別牛肉部位。
圖：更多開飯專題： |
文：Perrins