旺角阿木台灣麵係區內超人氣台灣菜，日日都大排長龍，最近餐廳於同區開咗新分店！新店比起舊店更闊落，而且仲多個台灣雜貨區，主要售賣香港好少見到嘅台灣特色食品及飲品等。而且最近老闆娘Polly仲推出自家品牌乾拌麵及太陽餅，自家配方於台灣製作再直送香港，令疫情期間香港人都食到台灣口味！
新店首次設立台灣雜貨區，售賣一系列台灣特食醬料、麵食及飲品等，而且於香港都好少見到。
自家品牌辣椒醬(左)，用蝦、蔥、蒜及油蔥製成，香而不太辣，加入麵食中有畫龍點睛效果。
阿木拌麵(四款口味)
四款拌麵選用台南關廟麵，係老闆娘經過多次嘗試先揀到出嚟，呢隻麵加入小麥，經天然日曬，爽口有彈性，煮好耐都唔會過腍，啱晒鍾意食有咬口麵質嘅朋友。
所有拌麵套裝都包兩個麵底及醬汁，基本調味包用烏醋及醬油製成。油蔥口味同坊間嘅油蔥醬唔同，加入真正油蔥酥，有口感之餘又更惹味。
胡麻醬口味就同餐廳嘅麻醬拌麵一樣，用新鮮嘅芝麻同花生磨出嚟，味道又香又濃，花生香氣突出。
更多【新店直擊】： |
椒麻口味加入花椒油及麻辣，偏麻香辣味較溫和。
而嚐辣人士必試惡魔口味，選用台灣魔鬼辣椒，辣度來自辣醬包，自己衡量落幾多呀！
另外仲有自家品牌阿木太陽餅，坊間嘅台灣太陽餅一向都偏甜，而呢度嘅太陽餅選用自家配方，外皮酥脆之餘，餡料仲特別重奶香，唔會過甜，啱晒香港人口味。
地址: 旺角豉油街60-102號鴻都大廈地下3-4號舖
文、相、片: Yanica