年中未有長假但又心思思想去旅行嘅話，去新加坡嚟個美食之旅都係個唔錯嘅選擇。自己食完美食當然都要買返幾款好味手信比親朋好友，第一次去新加坡唔知有咩手信好買？開飯仔幫你揀埋！雖然以下介紹係就係老土咗少少，但咁多人買完又買就知道真係好味啦！

林志源 肉乾

圖：Smile Life

去新加坡要食肉乾是常識吧，新加坡三大肉乾連鎖店分別係林志源、美珍香同胡振隆，美珍香肉乾香港都有得買，而林志源嘅出品比起胡振隆嘅略勝一籌，所以開飯仔推介買林志源嘅肉乾，如果覺得肉乾太油膩嘅話亦可以買肉鬆，一樣惹味香口。

Bengawan solo 娘惹糕 & 班蘭雪芳蛋糕

如果話林志源肉乾可以俘虜各大食肉獸嘅話，咁呢間餅店嘅娘惹糕同班蘭蛋糕就係獲取甜魔歡心嘅首選！娘惹糕有各種唔同種類，而且加入班蘭葉、蝶豆花、洛神花或拉米葉等植物汁液上色所以特別色彩繽紛，睇到心情都特別好。

而班蘭雪芳蛋糕更加係長期位於必買手信榜首，口感特別扎實綿密，而且食到班蘭葉嘅獨特香氣，記得雪凍更滋味。如果一個班蘭雪芳蛋糕唔夠嘅話，仲可以買埋新加坡人至愛嘅千層糕，入口鬆軟而富肉桂香。

益多 四色益力多

圖：彭史迪

香港嘅益力多嚟到新加坡改名叫益多，而且仲出多咗三款口味：紫色嘅提子味、橙色嘅橙味同綠色嘅青蘋果味。老實講水果味唔算好突出，而且色素就一定有，不過買一排五支（提子味、橙味同青蘋果味各一支加原味兩支）送比小朋友做手信就啱哂。

Seah's Spices / ILC 肉骨茶湯包

去新加坡旅行必食嘅肉骨茶當然唔可以成煲帶返嚟香港，但買幾包肉骨茶湯包比鐘意下廚嘅朋友就啱啦。超級市場當中有唔少選擇，如果鐘意胡椒味重啲嘅話建議買Seah's Spices，亦係新加坡大品牌之一。而如果特別喜歡蒜頭味嘅話就可以買ILC嘅出品，蒜頭香辣味突出。兩款湯包都比較清，而且中藥味道比馬來西亞嘅輕得多。

百勝廚 叻沙醬

就咁講呢個牌子名大家未必有印象，但如果講起佢地嘅皇牌產品叻沙麵大家可能就會記得，無錯就係美國即食麵達人Hans Lienesch喺2013年評為全球最好食嘅即食麵！不過即食麵食得多始終無益，咁不如買盒叻沙醬做手信，自己鐘意配咩食材都得嘛！而且佢地嘅叻沙醬標明唔添加味精、防腐劑同人造色素。

Super 黑胡椒蟹杯麵

圖：(右) Gelorific!

另外都要照顧一下唔識煮飯嘅朋友仔或者同事嘅，呢隻杯麵勝在有新加坡特色，而且仲有包蟹柳條，咬落口感當然同新加坡出名嘅黑胡椒蟹無得比，但黑胡椒嘅香同辣都喺哂度！不過開飯仔溫馨提示一句，呢個杯麵記得、記得、記得要乾撈！如果唔係就浪費咗由新加坡坐飛機嚟嘅心意啦。

Durian Mpire 榴槤卷蛋 & 千層蛋糕

圖：travelfoodiary

利申，如果唔鐘意榴槤嘅朋友可以唔洗睇落去啦，不過如果你同你身邊嘅人都鐘意榴槤嘅話，就可以留意一下呢間榴槤甜品店！因為佢係一間叫717 Trading嘅榴槤經銷商開設，選用附近馬來西亞靚榴槤。而且勝在喺機場都有分店，真空包裝確保無味衛生，亦符合手提行李要求。卷蛋Creamy又香濃，而千層蛋糕就有新加坡特色，兩款都係送比榴槤Fans嘅佳選。