心滿意粥 全港5個食粥好地方
2017-05-25

粥粉麵飯入面,你食邊樣最多?邊樣最少?通常好多人都係細細個就成日食粥,反而大咗之後就比較少。咁又係嘅,有幾可你會約個飯局話一齊去食粥㗎?除非食粥底火鍋啦。不過有時都會想清清地,食返一兩餐粥嘅,今日就同大家推介5間粥舖啦。

生滾及第粥    生記粥品專家

圖:PeterChoyeatson0502

呢間喺上環嘅粥舖,出晒名食生滾粥。每碗都係熱辣辣煲好拎出嚟,豆腐嘴嘅朋友成日都要攤一攤先食到。呢度嘅粥煲得好綿,仲可以落埋秘製豉油同薑絲等,再吊一吊味,令碗粥再甜啲。及第粥超足料,肉丸、豬潤、豬心、粉腸都有,包你食粥都會飽。

馳名魚粥    新興棧食家

圖:chingchinglui卡牛井

鍾意食魚嘅朋友,就要嚟呢間食喇。呢度最出名就係食魚粥,魚嘅咩部位都有得食,包括魚頭、魚尾、魚咀、魚腩、魚雲、魚骨等等,而且係料多過粥咁樣。魚腩大大件,仲啖啖肉,成碗粥亦因為好多魚嘅關係,相當鮮甜,不過有時就略嫌稀咗少少。

潮州海鮮砂鍋粥    心夜來潮

圖:Wildchildcarolzoe_fooddiary

潮州粥又啱唔啱?呢間潮州菜餐廳嘅砂鍋粥都好受歡迎㗎,食客可以自由選擇自己鍾意嘅食材,蟹呀、蜆呀、花甲呀、蠔仔呀,甚至象拔蚌、鮑魚之類都有得揀,啲海鮮令到碗粥好鮮甜。而粥本身亦煲得好綿好杰,一啖粥一啖海鮮, 係豐富嘅。不過,當然,一分錢一分貨,呢碗粥,唔平呀。

蠔仔肉碎粥     陵發潮州白粥

圖:Ching SWS4偷吃了魚的一隻貓

太子呢間粥舖,個個去都實會嗌蠔仔肉碎粥。啲蠔仔雖然叫蠔仔,但都好大隻下,最緊要係冇沙吖嘛。又鮮又滑,一餐粥入面都有好多隻啊,唔使驚話去到最尾得返粥水冇晒蠔仔而就住就住食。而落咗咁多蠔仔落去煲嘅足,唔使問,當然係好甜啦。

清甜南瓜粥  滿粥

圖:KwokManYuetlarissachan

一般去粥舖,都會見到及弟粥、魚片粥、皮蛋粥之類,呢間嘅粥就比較特別,連苦瓜粥、南瓜粥、窩蛋鮮牛粥都有。全部都煲得好綿,碗南瓜粥仲有好多南瓜蓉添。佢哋平時仲會定期派粥畀啲長者㗎,好有愛。


文:Kar

關鍵字
太子
佐敦
上環
荃灣
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
尖沙咀新商場開幕 過江龍餐廳一覽
4天前
日本人氣茶室登陸尖沙咀 招牌Tea Set、甜品推介(有片)
2019-09-25
【特約分享】茶記實測 西多、菠蘿油控必睇
2019-09-19
幾時都要打邊爐!火鍋控必試特色店!
2019-09-24
觀塘新開6000呎西餐廳 $480食八道菜西式omakase
2019-09-25