西式Fine Dining就食得多，但其實香港地都有唔少主打亞洲菜式嘅Fine Dining餐廳㗎～今次就先介紹4間主打東南亞國家菜式嘅畀大家，想喺節日或紀念日畀個驚喜伴侶就快啲記低啦！

目錄

現代摩登泰菜 Plaa

圖: SoFood.hk

由台灣MUME主廚Richie Lin及泰國名廚Ian Kittichai主理嘅泰式Fine Dining餐廳，主打現代泰式海岸料理，以海鮮為主，配上泰式調味料再加入西式烹調元素。暫時餐廳只做set menu，南薑椰汁生蠔配上冬蔭功香油同椰汁湯，出奇地好味；一口鰹魚小食以椰糖、魚露、青檸汁調味，酸甜中帶有陣陣椰子香氣。Truffle Kanom Krok係椰子pancake配搭黑松露，濃郁嘅椰子忌廉於口中溶化，食到尾先會食到少少黑松露香氣。每一道菜式嘅擺盤都令人感到大廚嘅誠意，唔少人都已經睇好呢間餐廳好快會摘星呢～

唯一米芝蓮一星泰國菜 Aaharn

圖: RheaChim

位於大館，全港唯一一間米芝蓮一星泰國菜，由國際著名大廚David Thompson開設，雖然佢係澳洲人但多年來都努力鑽研泰國菜，成功製作出獨一無二嘅泰式料理。前菜類如烤椰子糖配菠蘿份外清甜，帆立貝米粉沙律加入沙嗲醬又幾夾。三角斧蛤、黄豆及羅望子酸辣湯都令人印象深刻，辣味十足同時酸酸地非常開胃，令人一啖接一啖。主菜就有醃油甘魚沙津配香茅及薄荷菜、豬肉，鮮蝦腐乳蔬醬配梅子葉及泰國時蔬及綠咖哩老虎蝦配泰國茄及羅勒等。佢哋午市嘅Tasting Menu只係$488，相對晚市會抵食啲。

香港少有越南菜Fine Dining SEP

圖: Jamel果占苗

由曾於越南旅居七年嘅大廚主理，融合咗法式烹調風格同越南炭火煮食文化，店內設有開放式柴火烤爐，以唔同嘅柴木煙燻唔同嘅食材，務求每款食物都能配上適合嘅煙燻香氣。越式法包餡料係以荔枝木燒烤嘅豬頸肉，加入chili jam、鵝肝醬、醃漬蘿蔔片及札肉，層次豐富。招牌法式鱸魚以蕉葉包住燒，燒至焦燶但裡面嫩滑，簡單配檸檬刁草香檳牛油白汁，鮮味滿滿。會安脆皮雞選用乾式熟成三黃雞，雞皮如薯片般香脆；順化牛肉粉選用黑安格斯肉眼，牛肉軟腍牛味重，清湯以牛骨及香茅等熬成，有一股獨特香氣。

精緻印度料理 CHAAT

 圖：kakaeats、lastbitematters

位於酒店內嘅印度式Fine Dining！呢間餐廳將印度傳統嘅街頭小食文化帶到香港，招牌小食包括Raj Kachori、Baked Samosa等，前者係將炸得酥脆嘅外殼，盛滿薯仔、豆類同酸辣醬嘅，淋上乳酪後多咗一份清新感；後者即係咖喱角，廚師將咖喱角製成雪糕筒形狀，入面填滿用香料烹製過嘅大樹菠蘿肉，口感好似食緊手撕豬肉咁。餐廳更配備三部印度正宗Tandoor烤爐，所以多款烤肉菜式亦值得一試。

文: Yanica