【開飯熱店入圍名單巡禮】澳門首度入圍餐廳 老字號新店之爭
2018-02-28

當前,相機食先。作為foodie,先影為敬再放上IG直情係反射動作!優秀開飯熱店2018以「美食大晒 盡情Show Quali」主題,無論你係食家定係大廚,有好嘢自然要晒一晒!即刻睇睇各區同各類型必試熱店如何大晒功架!



去澳門除咗賭兩手,當然仲要食返夠本!澳門獨有唔少地道食店,係要過大海先食到嘅風味!老店繼續多人力捧,亦有大量新勢力加入,連國際品牌及創作小店都有有,即刻睇睇今次首次入圍名單,支持心水實力餐廳啦!


老牌厚多士  青洲灶記咖啡

圖:spotthefoodCHERRYlittle

本來位於青洲嘅五十幾年歷史老店,於兩年前喺氹仔開設分店。雖然冇咗昔日矮櫈,但食物仍然保持水準,必吃蜜糖粒粒厚多士、趣脆咖哩辣魚包同牛尾湯通粉,炒麵炒河亦好有鑊氣,大碟足料,遊客同本地人都力捧。Tiffany Blue嘅小屋牆身,更係打卡勝地。


著名美國連鎖café  Dean & Deluca

圖:riceeatYan~*

源自紐約的café及食品雜貨店,於全球有六十多間分店,澳門店為中港澳地區首間分店,裝修更加融入澳葡元素。招牌作有彩虹千層蛋糕,層層唔同顏色,非常之IG-able,紅絲絨蛋糕亦係招牌作。澳門獨有菜式包括非洲雞炸肉丸、港式奶茶柏林果醬包等,亦有果醬、朱古力等乾貨售賣。



馳名咖喱麵  咖喱全

圖:玉桂兔kiwi.

呢間主打咖喱嘅食店,咖喱味道獨特,有啲似印度再加埋港式咖喱,香口微辣,招牌菜咖喱牛腩麵,牛腩炆得鬆化入味。而鍾意重口味要點咖喱飯,因為飯底都充滿咖喱味!另外豬扒包亦係必點,即焗夠香脆,點咖喱汁食一流。茶餐廳格局,但仍然不乏嚟朝聖嘅遊客。


人氣葡菜老店  山度士葡式餐廳

圖:mandakiki95糖糖飯局

由葡國人主理嘅老牌食店,1989年開業至今,仍然保持地道葡萄牙南部風味。裝修同食物實而不華,甚有家庭feel,葡式燒乳豬皮脆肉嫩,焗鴨飯、炒蜆、葡國雞及馬介休球都係受歡迎嘅菜式,連汽水都係葡國進口。店子小小,但每晚都座無虛席,想食一定要先訂位。



甘香蟹黃撈麵  澳門新龍記

圖:愛美皇大欣子

澳門有多種特色地道粉麵,呢一間主打蟹黃撈麵,蟹黃係人手鮮拆,味道鮮味甘香,而且蟹油豐腴,麵條爽彈冇鹼水味,撈麵味道啱啱好,想再濃味可以加碼,更加滿足。配料就一定要揀墨魚餅,每日新鮮打成,彈牙又鮮甜。另外花雕雞、咖喱都係在地人推介食品。


獨有緬甸魚湯粉  雅馨緬甸餐廳

圖:spotthefoodMamaling268

澳門曾有唔少緬甸華僑居住,尤其是三盞燈區域,特別多緬甸食店。呢一間唔少旅遊書都會推介嘅名店,以一道緬甸魚湯粉打響名堂,淺黃色魚湯用上手拆魚肉、醬料、芭蕉樹芯、咖喱等多種材料熬成,魚香濃郁而且食到魚肉碎,椰汁雞、緬甸撈麵、馬拉盞撈麵都係必吃之選。


年輪蛋糕專門店  不是葡撻

圖:vivacchillyyat16

遊客去到澳門指定動作係食葡撻,不過呢間新開食店主打嘅係年輪蛋糕!分似曲奇嘅硬身及蛋糕口感嘅軟身,賣相如蛋撻,有芝士及葡式兩種,葡式蛋糕餡同樣係蛋漿,但其實以千層蛋糕代替酥皮,口感有別於一般葡撻。芝士就用法國芝士,食落有少少檸檬香,不覺油膩。


酒店新貴  巴黎人法式餐廳

圖:YauG吃掉世界的女孩

萬眾矚目嘅巴黎人酒店除咗鐵塔吸睛,呢間法式小酒館都被受吹捧。氣氛輕鬆,供應經典家常菜式,招牌菜有生牛肉他他、香煎法國鴨肝、法式焗蝸牛等,難得價錢唔算貴。下午茶套餐更以鐵塔三層架上枱,非常IG-able。


其他首次入圍嘅餐廳仲有好多架,包括世記咖啡度小月安德魯餅店樂點咖啡皇雀印度餐廳南洋粿條麵食店金馬輪咖啡餅店檸檬車露利安咖啡屋,睇完有冇立即想過大海食返餐嘅衝動呢?去唔到一樣可以投票支持,即去優秀開飯熱店大賞2018網站啦!

立即投票:https://www.openrice.com/info/awards2018/index.html


文:Perrins

關鍵字
優秀熱店大賞
澳門
咖喱
緬甸
葡菜
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
人氣餐廳進駐長沙灣新Foodcourt 老Come煎餅、十二味酸菜魚(有片)
2018-12-28
一鍋兩食!上層干鍋底層火鍋 荃灣必食龍蝦海鮮山(有片)
2018-12-28
觀塘新開酒店半自助餐 任食即開生蠔、長腳蟹
2019-01-09
荃灣新地標南豐紗廠 4間特色Cafe全介紹(有片)
2018-12-24
M級和牛火鍋放題,90分鐘回本攻略
2019-01-03