【豬年開飯】新年糕GOGO 多款特色年糕盡覽
2019-01-08
仲有幾個星期就到農曆新年啦,大家準備好辦年貨未?新年開舖嘅食店又唔多,親朋好友上到嚟屋企梗喺煎翻底年糕一齊食啦。年糕年高,生活水準一年比一年高吖嘛,仲唔快啲睇下有咩特色年糕賀新年?  
   
小丸子陪你過年 奇華餅家

櫻桃小丸子成家都熱熱鬧鬧咁,係咪想好似佢哋咁過年呢?今年奇華就再次同小丸子聯乘,推出限定賀年禮盒,有小丸子迷你亞麻糖年糕同花輪迷你椰汁糖年糕。年糕同包裝上面都有可愛嘅小丸子同花輪同學(唔通已經認可咗佢哋係一對?),真係睇得食得又儲得!

台風星級年糕 茶米
KiKi茶、KiKi麵你就食得多,唔知KiKi糕又點呢? 為咗迎接農曆新年,茶米就同咗米芝蓮三星大廚區國強師傅合作,創作星級年糕——台灣櫻花蝦年糕,用咗日本蘿蔔、台灣天然日曬櫻花蝦乾同本地臘腸炮製,仲可以配埋KiKi出嘅麻辣醬做佐料,非常惹味。

韓流暖身香辣之選 鴻福堂

鴻福堂呢幾年不斷革新求變,連後生仔都會去舖頭買下涼茶!趁住新年,品牌抓緊大家最愛嘅韓流,將皇牌蘿蔔糕加入惹味泡菜醬汁,最啱鍾意韓風嘅你,食完個身咁暖,咩寒風都唔驚啦。

矜貴之選 帝京酒店

作為五星酒店嘅帝京,過往出品嘅年糕都係質素嘅保證。除咗保持質素,佢哋今年亦力求創新,推出全新口味——松茸蠔豉蓮藕糕。香濃菇菌、甘香蠔豉, 仲加入藜麥、蓮藕等健康食材增加口感,味道豐富!

少見甜糕口味 樂雅軒

城景國際嘅樂雅軒中菜廳,過往推出嘅年糕口味創新得嚟又好食,就好似招牌十勝紅豆糕咁。 不過新嘅一年梗係搞搞新意思, 所以今年特別推出金菠蘿十勝紅豆糕。特別選用清新嘅泰國金菠蘿,配搭香甜日本紅豆, 而且顏色又好睇!

傳統與潮流揉合 海景軒

高級粵菜館海景軒今年以傳統年糕口味作基礎,再加上心思創意配搭配合潮流。就好似紫薯臘味芋頭,將傳統升級,加入大熱人氣嘅紫薯!得意啲嘅仲有奶皇珍珠年糕,都係近年嘅潮流口味。另外比較少見嘅有杭胎菊榛子年糕,啱晒鍾意養生之選嘅人。

手工精緻首創口味 麥籽   

相信《美女廚房》嘅觀眾一定對阿Kit(麥潔兒)有印象,而佢嘅心血品牌——麥籽今次帶嚟咗唔少創新口味嘅年糕,而且仲係全人手製作嘅心機之選。 特別推介鵝肝腸金沙芋頭糕。香滑芋頭配上甘香鵝肝腸,再加上金沙鹹蛋黃,咁多材料,食完一定大滿足!大家可以去麥籽嘅網站訂購,大部分嘅一田超市同D2 place嘅Kool Kitchen都可以攞貨!

星級粵菜出品 營致會館
新晉米芝蓮星級粵菜餐廳「營致會館」亦推出賀年糕點,無論係禮盒包裝定係味道配搭都係走精緻高貴路線!而今次嘅椰香錫蘭年糕更加係坊間少見嘅味道。傳統椰汁年糕加上香醇嘅錫蘭紅茶,呢啲細緻嘅口味配搭,夠晒特別!

刁鑽材料合意頭 明閣
買年糕都係講意頭最重要,而明閣總廚推出嘅富貴金桔馬蹄糕,特別加入金桔。無論係個名——寓意大吉大利,抑或個樣金金黃黃都係意頭之選。仲有黑糖遠年普洱年糕 ,加入矜貴嘅雲南陳年普洱茶同黑糖,兩者同樣香醇,非常夾。

中國藝術小清新 Chromahk

唔想下下淨係食年糕咁悶?本地創意藝術蛋糕Chroma就有多個選擇畀你。店舖同國畫家heismilelism合作,將充滿賀年意景嘅國畫融入蛋糕入面,好似「如魚.有餘」蛋糕,有酒釀桂花白朱古力mousse、杞子桂花啫喱同桂花杏仁蛋糕,有創意得嚟又不失傳統。

清新奶黃味 
城市酒店花園中菜廳嘅「粵」今年亦都將新元素嘅口味注入係傳統嘅年糕入面。呢個柚子奶黃年糕,個色澤望落去已經好金黃,同隔離啲金幣一樣金光閃閃。而且加咗清新嘅柚子入去,令到奶黃嘅甜唔會太過膩!
 
文:Yanny



關鍵字
年糕
新年
卡通
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
情人節去K11 MUSEA 一文睇晒浪漫餐廳
2020-02-06
【隨時更新】零食速報 每周新款零食、酒品點評
4天前
全城抗炎 與醫護同行!提供醫護餐飲免費優惠餐廳一覽
2020-01-31
美國人氣肉桂卷抵港!煙韌原味/朱古力/焦糖胡桃卷(有片)
2020-02-06
全城抗炎!60間餐廳推$0-$25酒精搓手液換購計劃
2020-02-12