嚟到盛夏天氣炎熱，唔通得返留喺屋企同去大商場行街兩個選擇？No Way！開飯仔今次幫大家介紹7間寫意悠閒嘅Cafe，無論係情侶拍拖定兩三個女仔去傾計都咁啱。係就係要行多兩步，但好過次次ABC餐咁悶吖係咪？
紅磡咖啡小店嘆蛋餅 One Little Room
小店唔近地鐵站，不過亦因為咁人流唔算太多，舖仔細細亦可以放心坐多陣。傳統西班牙蛋餅用小鐵鍋裝住香噴噴上枱，不過相機食先嘅朋友記得快手啲，如果唔係蛋餅有機會因為繼續加熱而變老。蛋餅裡面有薯仔、彩椒、煙肉、芝士等材料，唔係間間Cafe都有得食。同樣特別嘅有Crispy Sweet Cappuccino，焦糖面令成杯飲落有咖啡版Crème brûlée嘅感覺。
銅鑼灣治愈系兔仔Cafe Rabbitland Cafe
兩個人覺得有少少悶？不如一齊去銅鑼灣呢間樓上Cafe探下得意嘅兔仔！不過要留意嘅係需要除鞋席地而坐，而且要著襪同消毒雙手先可以同兔仔玩。Menu同其他樓上Cafe相約，有主食、小食同特飲等選擇。想坐耐啲嘅話建議嗌個Combo Set，按自己需要揀返嗌幾大份，最重要嘅係可以唔限時坐，仲包埋餵兔仔嘅小食， 感覺都抵啲。
尖沙咀打卡甜品Cafe White Button Cafe & Dessert
圖：Keilwk
同樣係樓上Cafe，呢間嘅裝修就以白色簡約為主，空間感充足。有漢堡、意粉同意大利飯等，櫻花蝦明太子天使麵惹味得嚟意粉亦彈牙掛汁。不過開飯仔就覺得呢度嘅飲品同甜品更吸引，例如有圓球體上枱嘅水晶球特飲，大大支梳打倒插嘅鐵塔飲品，同成個用棉花糖扮雪人嘅甜品，棉花糖下面仲有榛子咖啡慕絲同朱古力脆脆，甜而不膩。
中環有卡通陪你食蛋糕 Sogno Cafe+
香港其實都有唔少得意主題Cafe，中環呢間就有Fluffy House嘅卡通人物陪住你。必食嘅包括入味又有玫瑰香嘅玫瑰雞翼同佢地嘅自家製蛋糕，例如伯爵茶雪芳蛋糕配黑糖忌廉，甜度適中帶淡淡伯爵茶香味。另外餐廳仲會不定期推出季節限定，之前春季就出過櫻花系列，最近亦有夏季下午茶。不過要留意餐廳大部分食物都係即叫即整，等候需時。
更多【二人前指南】： |
銅鑼灣芝心Fish & Chip GoodDay Cafe
呢間Cafe位於銅鑼灣轉角位，特別有旺中帶靜嘅感覺，提供創意漢堡、意粉、小食、甜品等。唔怕熱氣嘅一定要嗌返份特製流心芝士炸魚薯條，炸魚嘅脆皮做到薄、脆而唔油膩，最緊要嘅係裡面有車打芝士，趁熱食仲有流心效果！想再食得豐富啲不妨點份全日早餐，綠色嘅菠菜多士唔單止搶眼仲感覺Light啲。小店嘅Homemade飲品亦啱哂注重養生嘅朋友仔。
觀塘工廈畫室x餐廳 Chroma Cafe + Kitchen
鐘意畫畫嘅話嚟到呢度要小心睇住銀包，因為呢度除咗係一間餐廳，仲係一個畫室！有唔少畫具同顏料可以買走，就算唔買任何畫具，舖頭一角亦有地方可以畀大家即席畫返幾筆。而餐廳由Menu、餐巾到食物都相當Colorful，好似燒春雞配迷迭香汁特別加一抹紫色嘅紫薯蓉。甜品嘅Presentation同咖啡嘅拉花圖案亦相當啱相機食先，不過價錢比起一般工廈餐廳稍高。
尖沙咀室內草地扮野餐 草民
香港嘅夏天唔係太曬就係落雨點野餐？尖沙咀呢間樓上Cafe裝修舖哂草地咁，畀大家喺室內涼住冷氣扮野餐。招牌甜品爆脆草地滾球係朱古力球，敲開裡面仲有朱古力脆米、甜酒啫喱同雪糕，下面仲有埋綠茶金寶繼續扮草地。鹹食方面就以小食、意粉同意大利飯為主，不過要注意嘅係食物分量偏細。另外週末會比較多人，想安靜Hea返下嘅話建議平日下午茶時間去喇。
文：Cathy