酤悅的个人专页

天氣咁好同屋企人入去大美督行吓，諗住泊車入去錶位，再過對面村搵吓有咩食，入車場前離遠見到呢間泰太廚房個招牌，就不如過去試吓！餐廳環境輕鬆 chill，坐低就想點幾味試試。今次試左四款招牌菜，味道好有驚喜！泰太竹炭麵包咖喱焗軟殼蟹(金枕頭) 絕對係必試！竹炭麵包烤得外脆內軟，咖喱醬濃郁得來有微微甜味，唔會太辣，配上炸得金黃的軟殼蟹，肉質鮮嫩，一咬落去滿口香，食完真想再 encore！泰式皮蛋炸蝦餅同樣好掂，蝦餅炸得脆卜卜，內裡蝦肉彈牙，混雜皮蛋的鹹香，味道好有層次。點上酸甜醬，開胃到停唔下來，份量仲好夠誠意！泰式蠔仔鐵板煎蛋一上枱就聽到滋滋聲，夠晒吸引！蠔仔新鮮又多汁，煎蛋滑溜溜，兩者一齊食好有泰國街邊小食的 feel，簡單但好有風味。新鮮菠蘿海鮮炒飯就係清爽之選，菠蘿的酸甜味中和炒飯的油膩，蝦同魷魚好彈牙，夠晒新鮮，飯粒炒得粒粒分明，份量多到食唔晒！泰太廚房的菜式好有泰國地道風味，服務又親切！如果想搵間好味泰國菜餐廳，泰太廚房真是一個好選擇，無論同朋友定家人來都啱晒，推！…查看更多

DAYS IN THE SUN是一家帶歐洲簡約風的Cafe，白色牆身配木質傢俬，天花大窗透陽光，環境清新，試咗 All Day Breakfast 同豬肉餃子，食物真心無乜亮點。All Day Breakfast 份量OK，黑松露炒蛋滑溜，煙三文魚蘑菇粟米班戟肉腸搭配簡單沙律，過得去，味道好普通，中規中矩，無乜特別。豬肉餃子皮薄算 juicy。Cafe 應該主打咖啡香同精緻小食，但呢度嘅 menu 好似無方向，咖啡選擇平平無奇，無自家特色，餃子味又搶晒風頭，可能呢度就係佢特色...環境同服務都OK，都適合 hea 一 hea，但要搵正宗 Cafe 嘅咖啡體驗，呢度真係爭啲，或需改善！而且佢啲餐係冇包嘢飲，所以其實都偏貴。…查看更多

夜貓。燒 喺元朗俊賢坊真是一個宵夜寶地，又算方便，氣氛超 chill，啱晒同朋友夜晚 hea 吓食串燒。主打各式串燒，食物質素高、種類豐富，服務又貼心，雖然略貴但完全接受得來。燒茄子烤得外焦內嫩，茄肉軟滑吸滿醬汁，微甜帶炭香，食落好開胃，簡直係暖場神器！花甲麻辣鮮香，汁料濃郁，每隻花甲都新鮮彈牙，啜到停唔下來，辣得過癮。焦糖燒菠蘿甜酸清新，烤出焦糖香，解膩一流，係意想不到嘅驚喜！燒牛舌厚切 juicy，咬落彈牙，炭火香氣突出，牛味濃郁，食完好滿足。燒䱽魚大大條，肉質結實，外皮脆口，點少少醬油好鮮甜，少骨超方便，絕對係海魚控心頭好。五花腩肉串肥瘦均勻，油香四溢，烤得啱啱好，入口即化；燒雞脾皮脆肉嫩，微辣調味好惹味，食到舔手指；燒韭菜烤得香口，韭菜清香，簡單但好有風味。燒豆卜外脆內軟，吸晒醬汁，平民小食但味道出眾。大大隻燒生蠔真是一個字——正！蠔肉肥美多汁，蒜蓉同炭烤味夾到無得頂，每一口都係享受。燒乾魷魚香口味濃，但似現成加工補燒加熱，爭D！服務好貼心，店員親切。串燒種類多到眼花撩亂，除咗雞牛豬羊，仲有海鮮同創意菜樣樣都想試！上菜時間，串燒麻，只要好食而佢唔趕客嘅話，我等得^^夜貓。燒嘅串燒味道正、選擇多，氣氛同服務一流，係元朗宵夜嘅絕佳選擇。整體體驗好有滿足感，推！…查看更多

話說我哋十個朋友最近去咗馬鞍山西沙路西澳村嘅 Golden Cafe，包咗室內場試咗佢哋嘅 Omakase，真是一個字：正！呢間餐廳平時做日式同西式咖啡廳輕食，但今次 Omakase 完全唔跟餐牌，廚師為我哋度身訂做咗一場海鮮同燒物嘅美食盛宴，仲有超舒適嘅環境，食完真心覺得值回票價！Golden Cafe 藏身喺西澳村，遠離市區嘅嘈雜，室內裝潢走簡約日式風，木傢俬加柔和燈光，感覺好溫馨好 Chill。包場嘅私密感仲要令我哋覺得好似 VIP 咁，十個人喺度吹水影相，氣氛一流。餐廳離西沙 GO PARK 得五分鐘車程，想搵個假日好去處，呢度真是一個好選擇。今次 Omakase 真是一個驚喜接一個驚喜！頭盤係燒響螺，一上枱就聞到陣陣炭燒香，螺肉嫩滑多汁，配啲微酸醬，食落好開胃。跟住嘅立鱗燒更加出彩，魚皮烤到脆卜卜，魚肉又嫩又鮮甜，簡直係海嘅味道！燒雞翼都唔輸，皮脆肉嫩，調味啱啱好，食完真想再 Encore。重頭戲係刺身盛，有三文魚、油甘魚、甜蝦、鱲魚同帆立貝，切得啱啱好，入口即化！三文魚肥美、油甘魚香甜、甜蝦彈牙、鱲魚清爽、帆立貝鮮甜，全部都新鮮到爆，刀工又靚，食得出廚師嘅功力。之後上嘅磯煮鮑魚蘿蔔真是一個大驚喜，鮑魚煮得軟腍彈牙，底層嘅蘿蔔索晒鮑魚嘅精華，甜到不得了，食落好似融化咁，絕對係今晚嘅 MVP！壓軸嘅日式蟹粥好似一個溫暖嘅 Hug，米粒吸滿蟹肉鮮味，湯底濃郁，暖笠笠咁好滿足，完美收尾。服務方面，老闆真心 Nice，逐道菜都同我哋講解得清清楚楚，上菜節奏又啱晒我哋，仲好貼心咁同我哋傾計。包場嘅空間令我哋可以好放鬆咁吹水影相，完全無壓力。唯一小問題係餐廳位置偏咗少少，要搭的士或者自駕先方便，但呢份隱世感反而令體驗更加特別。總之，Golden Cafe 真係好掂，食材新鮮，菜式有心思，環境又舒適，我哋十個人都食到好開心好滿足！想搵個地方同朋友食好嘢又 Chill 吓，呢度絕對係首選。…查看更多

今日去開觀塘宏利MFC，望到正對面有間舖好似好光猛咁，咁就行過去食Lunch，見到門口都有人排隊嘅，不過就成一點鐘，都好快可以入座，等左5分鐘左右就入得，等緊果陣時見到炸髀餐已經都唔諗喇，仲要好得意咁佢可以配生果，果然係開花結果😂所以一座低就即刻落單，我叫左個炸髀配生果，點知我睇漏，原來可以配兩樣，咁就另外配左炸煙肉西芹薯仔沙律，加杯凍央，我同事都叫炸髀配炸煙肉西芹薯仔沙律，另配菠蘿粟米沙律。即叫即炸，上左杯野飲先，杯凍央都好大杯，幾香嘅唔差唔淡，等左大概10分鐘左右，有得食，黎到淨係食D薯仔沙律都有D飽🤣不過隻炸髀都好熱未食得落口同幾大隻冇位切，所以食晒薯仔沙律先，好切D，炸髀D皮好脆，腌得幾好唔會太鹹之餘仲有雞味又冇雪味，不過有少少乾，畢竟午飯時間都有D忙，可能爭少少吧，食晒隻炸髀就食埋D生果，西瓜密瓜哈密瓜木瓜菠蘿火龍果，要汁有汁，要甜有甜，要纖維有纖維，隻隻都甜好好味，食完炸野食生果真係好舒服，可能有菠蘿酸酸地可以消消滯。食左個好健康嘅炸髀午餐，食完好滿足唔會太滯，不過今個星期就食左炸野，又要下星期先再食熱氣野喇。…查看更多

原本諗住同 BB 去中山紀念公園玩，但時間就得唔好，啱啱中午，個太陽太曬，就不如去食個午飯先，中山公園泊好車，行到去德輔道西，東邊街交界，唔知食乜問 BB，BB 就指我哋入去皇后大道，行入去見到條街都幾多嘢食，滷水店好多，又有燒味，又有日式料理拉麵咁，兜咗個圈，發現呢間肥仔記個門口飄咗一陣蝦子味，好香，同埋佢有一種我以前喺澳門珠記水餃嘅回憶，所以就入咗去啦。唔知間舖本身係唔係食肥牛嘅呢？佢好似有好多牛嘅菜單，但入咗去就唔諗，叫咗個水餃雲吞麵，我老婆見到有魚肉春卷就嗌咗個春卷墨丸米，茶水唔講啦，其實呢啲舖頭都冇乜特別㗎喇，街坊生意舖頭仔你想佢鑲金咩？咁就講吓啲水餃雲吞，水餃嘅大小唔錯，都夠大隻嘅，每粒都包住差唔多要爆出嚟嘅餡，入邊有木耳、蝦同豬肉，豬肉好味，蝦新鮮，木耳爽口，個麵係鹼水麵，不過就冇乜鹼水味啦，鹼水味我麻麻，反而覺得幾好，個湯好香有好濃郁蝦子味，但冇蝦子喎，真係唔知佢點整，飲咗兩三啖都唔覺口乾應該冇味精。而佢啲雲吞都好大粒嘅，不過水餃同雲吞除咗個皮有分別同埋冇咗木耳之外，就真係唔知有咩分別。我嗌雙拼嘅，有兩粒水餃三粒雲吞，份量都幾好又啱價。而我老婆嗰碗春卷墨丸米，係鯪魚春卷，塊皮好味，包住嘅鯪魚完全冇草腥味，又冇碎骨，好味，墨丸好彈牙，咬落口就知唔多粉，又有粒粒墨魚肉，足料。腐乳通菜就真係好一般，係可惜在腐乳應該係來貨唔係自己溝，通菜都係就咁淥一淥，但，菜，清清地已經好食。唔知呢間係咪連鎖嘅呢？好似都有好多分店，不過呢啲舖頭我都幾鍾意去嘅，裝修唔係話好舊式，坐落又幾舒服，啲木枱又幾靚，兩個雙拼面，加個通菜再加兩杯凍飲，一舊水都唔使，又食得飽，質素又唔差，夠啦!…查看更多

位於元朗的「囍串」， 有好多唔同嘅菜式，其實見佢餐牌就好多串燒嘅，不過我都係中午飯，又見佢有炸髀，所以就試吓個咖喱雞髀飯，估唔到喎，個咖喱雞髀飯真係勁大份，隻雞髀大個隻手咁滯呀，咁大隻攞去炸絕對係有難度嘅，又要控制佢唔好炸得太燶啦，又唔可以唔夠熟喎，所以睇間餐廳如果有炸髀嘅話，我一定會試吓佢得唔得。令人驚喜的分量，勁大碗飯加上足夠分量的咖喱汁和雞腗，絕對能填飽挑剔的胃口。咖哩醬料香濃，既不會過於稀薄也不會過於濃稠，佢唔算日式，有少少甜，但又唔係好印度果款太多香料嘅辛辣，幾特別，恰到好處，淋在一碗香噴噴嘅白飯上，實在是百吃不厭。雞腗本身炸得好好，外皮酥脆而內裏卻保持了肉質的鮮嫩多汁，與咖哩汁的融合， 真係豐富滿足。而我老婆婆就嗌咗一道麻辣蠔仔粉絲，這道四川風格的麻辣蠔仔粉絲，湯底濃郁，散發出撲鼻的麻辣香氣，粉絲細滑Q彈，與飽滿滑嫩多汁的蠔仔完美融合，交織出層次豐富的口感。入口時，麻辣味先從舌尖竄升，刺激味蕾，隨即湧現出蠔仔鮮甜的海鮮風味，與粉絲軟滑的口感形成強烈對比，令人欲罷不能。豆卜則增添了整體層次，在麻辣湯汁的浸泡下，充分吸收了辣椒和花椒的錯綜複雜的味道，口感層次豐富，香氣四溢。我老婆嗌左杯人蔘烏龍茶，烏龍茶配以人參，一種獨特而和諧的味道，帶有烏龍茶清香，入口滋潤舒適回甘，讓人身心都得到放鬆，烏龍茶本身也含有豐富的茶多酚，能夠清熱解毒，食完辣嘢都好啱飲。總括嚟講，「囍串」細細間舖，環境有幾乾淨，啲嘢又唔錯，又幾多嘢食，咖哩雞腗飯真心推介，行過路過，唔好錯過。…查看更多

一入去就已經勁油煙，但係都算啦，畢竟都係燒烤，抽風系統做得爭少少就會係咁，除非用料同設計都好靚，不過將價就貨啦。我都未試過訂咗位都仲要咁谷氣囉，安排緊個座位已經發覺有問題，出聲話俾佢聽我訂9個人，佢分咗兩張枱開，一張4人枱一張6人枱，佢同我地講話因為驚兩張黐住嘅4人枱太過迫，所以安排咗角落頭兩個卡位俾我地，我地開頭都算係冇問題，只係我訂枱嘅目的就係為咗一班人可以同一張枱食飯一齊傾吓偈，如果你唔能夠安排到同一張枱俾我嘅話，係唔係訂枱時都應該要同我講一講聲，講咗話俾我聽係咁樣安排，而我地都 OK 嘅話，我就真係覺得冇問題。不過當時冇位，就唔再爭論，但係我哋都多口問一句，如果有兩張黐住嘅4人枱嘅話，可唔可以轉俾我哋？咁個女職員都好好禮貌好 Nice 話有枱嘅話係可以轉畀我哋，而咁啱就有兩張黐住嘅4人枱埋單，咁我哋即刻都問個姐姐可唔可以轉枱，個姐姐都話冇問題可以轉幫我哋處理，咁其實我哋都已經等緊佢幫手轉枱㗎啦，我哋都覺得都好呀唔錯幾好禮貌喎，點知無啦啦有個戴眼鏡稍為豐滿嘅男職員走埋嚟，同我哋講話咁樣 唔OK ，因為咁樣嘅話會有機會阻到其他客人，同埋人哋都訂咗位一早安排咗，所以唔可以咁樣轉，我哋都即刻問，我哋都訂咗位，我哋訂咗9位，只不過係想轉個8人枱，我哋唔介意坐迫啲，問個戴眼鏡稍為豐滿嘅男職員有咩問題，佢話唔可以咁樣，因為已經 set 好枱，但係個姨姨都係只不過執緊枱啫，我哋都話唔介意迫少少，係想同一班人坐埋一齊食啫，點知個戴眼鏡稍為豐滿嘅男職員話，"如果你覺得我哋安排有問題嘅話，你可以令作選擇!!! " 嘩!! 我哋即刻火都嚟，你係咪可以去到咁好生意到咁揀客啊？仲可以踢我哋走? 我哋話你唔休做趕我哋走，咁我哋走啦!!! 佢就話佢冇咁講過，話只不過係安排問題，因為人哋訂咗位，我哋再重申多次我哋都係訂咗位，人哋兩枱都係訂咗4人枱，我哋讓出一張4人枱一張6人枱俾嗰兩台4個人，我真係想問有咩嘢問題??? 而我哋坐迫啲都唔介意，只係想一齊坐啫，如果唔係想一齊坐有乜嘢需要特登去訂枱先？有咩需要特登喺呢啲地方食，如果9個人可以分開嘅咁我不如去大記麥記嗰啲地方食就算啦!! 又或者如果我九個人可以分得開嘅話，咁我分九個人訂枱，一人一張枱一個爐啦，咁又得唔得先??? 使乜特登訂枱訂九位呢?? 各位我想問問: 你訂9位，佢安排3張分開晒嘅4人枱畀你地又得唔得先?? 而隨即有一位着制服嘅姨姨走埋嚟問我地咩事，話唔好意思我哋幫你地轉，但係個戴眼鏡稍為豐滿嘅男職員話咁樣唔得，唔可以坐兩張黐住嘅4人枱，人哋兩個4人枱 booking 就係坐兩張黐住嘅4人枱，人哋兩個4人枱 booking 唔可以咁樣坐一張4人枱一張6人枱，我哋 set 咗枱唔可以咁樣轉。 再話"如果你覺得我哋安排有問題嘅話，你可以令作選擇!!! " 真係從來都未試過未食就一肚氣!!!  只係去開隔離峰哥食飯，見你地新開張想試吓。 我哋冇轉枱就走左，都係過番去隔離峰哥，你好唔好食我都唔會再嚟，學特首話齋: 你好生意呀~…查看更多

過親嚟屯門買野都想入去㗎啦，適逢今次老婆去完台灣出trip未食夠，所以就衝入去，估唔到又有驚喜喎，款式唔少啦雞豬牛又好味，選擇又多，熟食都好好味，個餐入邊都包咗幾款小食嘅，而牛爽腩、台南烏雞肉卷、牛骨髓、水魷同埋脆鯇片就要自己掃 QR code 落 order ，呢度呢，就有樣好，佢所有嘅餸菜全部都係逐件逐件叫，就唔係一份咁叫，所以就變咗你可以好少少少少咁試好多唔同嘅嘢食，又唔怕嘥咗啲嘢食啦。而湯底呢，呢度都有八隻選擇嘅，想試吓豚骨湯又想試吓台灣養生藥膳雞湯喎，個個都好似好好味咁，牡丹美人鍋喺台灣之前有試過，望到山見青花椒麻辣湯又可以食鴨血好似唔錯咁，不過驚食辣嘢會肚痛，而又想補補氣最尾就叫咗滋補人蔘雞湯，服務員就好細心，上個雞湯個湯底嗰陣時呢就幫你落埋個雞，話大概六多10分鐘左右到就可以飲咗個湯先，然之後食埋啲雞再慢慢打邊爐。夠鐘開蓋，畢起兩碗湯，就出去攞啲嘢食順便攤凍，返嚟飲就啱啱好，嘩~! 好好味，個湯好甜，人蔘好多條，啲藥材浸味出晒嚟，成碗湯好香好好味! 雞真係好味㗎喎，咁又佢講個時間話俾你聽你真係啱啱熟多少少，唔會話見紅，而個雞肉又好滑，食得出唔係雪藏雞，有人蔘味啦，仲有少少藥材味囉，好香口。我哋個餐呢就包咗幾種肉嘅有兩種牛兩種豬，牛呢一個叫嫩堅美肌肉啦一個就牛爽腩，豬方面就有豚五花同埋梅花肉，嫩堅美肌肉呢就比較韌少少嘅，但係就肉味會香啲濃啲，牛爽腩呢就比較腍少少，冇咁濃味。豬五花呢就薄切，擺落去兩下就基本上食得咁滯，咬落口嘅話就比較多層次，而另外個梅花肉呢都好香好有豬甜味。跟住望吓啲熟食，出邊有台式燉牛尾同埋有個台式嘅牛雜等等，我試呢幾隻啦今日幾隻都幾好味咁，唔同香港啲牛雜味，味道比較濃。有個好特別嘅，台式蚵仔煎，你估唔到佢啲蛋咁香，同埋佢嗰啲蛋花煎得好脆邊，好好味!好少地方見到嘅花生芽菜啊，大大條好爽口嘅咁，又有豬皮啦可以索味啦，有好得意嘅企鵝墨魚丸、台式貢丸咁，菜方面都唔少選擇個喎，有油麥菜、生菜、娃娃菜、西洋菜、皇帝菜啦，茼蒿都有喎，最特別就一定係水蓮啦。咁嘢飲都有好多選擇嘅，有罐裝茶飲啦、汽水啦，啤酒都有兩隻嘅。咁去得食台灣嘢，佢既然有台啤，咁就梗係叫台啤啦，收錢我都俾呀。呢度仲可以叫台式飲品嘅，有珍珠奶茶、愛玉綠茶咁啦!甜品呢度好精緻啊，細細碗咁，又可以試多幾隻，我哋就叫咗個豆花同埋仙草椰果，咁都正常發揮啦，又唔會太死甜，黑糖又好好味，我唔食糖水嘅都嗌多左幾碗! 最尾就試咗個雪糕啦，好得意嘅冬瓜茶味，冬瓜茶就成日都飲，冬瓜茶味嘅雪糕呢就真係第一次食，佢都好清甜好好味! 平時其實之前嚟睇都好似好多人嘅，咁啱今次早食飯所以就入到嚟囉，對於好鍾意台灣嘅人呢嚟呢度都可以係一個幾唔錯嘅選擇，呢間火鍋都可以值得試嘅，咁正唔正宗我又唔係好知，但係好味攞，都好啱香港人食嘅，食材都新鮮㗎，環境又唔差好舒適乾淨，所以都推薦大家，不過佢呢度啲嘢食咁多，我地個餐個時間就真係唔係好夠喇! 嚟開嘅話都可以去呢度打爐，…查看更多

今日悶悶地同老婆 BB 去東涌東薈城 outlet 睇吓有冇啲咩買，行行吓都夜啦，又有啲肚餓咁就入咗去六小館食嘢，餐廳環境寬敞明亮，裝修雅致，都唔錯都幾靚，梳化啊凳啊都幾舒服，慢慢坐都 OK，畀人一種舒適放鬆的感覺。侍應態度親切友善，笑容滿面地迎接客人，對於食物的介紹都非常熱心，去果陣時都唔算多人，可能真係聖誕新年長假期，好多人已經離開香港去咗旅行玩呀，咁變咗留喺香港消費啲人少咗，食飯都唔使點等位。睇吓個繽紛聖誕二人套餐個 Menu 真係嚇鬼死你，法式牛油烘焙軟殼蟹伴蔥油墨魚汁麵，吓前菜 ?? 不過奇怪在佢上咗乳鴿先，紅燒開邊石岐乳鴿，呢個真係唔錯喎，食得出係即燒即上皮脆肉嫩多汁好味。到前菜，食完都已經飽到想嘔咁滯，可惜冇軟殼蟹，變咗做炸魷魚鬚，不過前菜唔係牛油焗就會好啲囉。跟住個法式拆蟹鉗肉龍蝦湯，個龍蝦湯都幾濃味嘅唔錯，龍蝦鉗肉幾鮮甜，食落都爽口，個湯幾醬口嘅唔錯。再嚟巴蜀燒紐西蘭頂級羊鞍架，燒羊架都幾好味唔錯，羊肉冇羶味，不過巴蜀香料就好似擺埋落去燒就會好啲囉，跟住到鑊仔金盞紫羅和牛肉，炒牛肉都幾甜唔錯，係有少許輕微韌，配菜啲三色椒子薑菠蘿酸酸甜甜都幾好味嘅。迷迭香金湯煮龍躉斑球，咁呢個就基本上係等於高湯煮魚囉，魚味反而真係唔係好出，個高湯又冇乜味，但係都幾大嚿幾抵食嘅。咁個餐都有個菜食吓，金銀蒜魚仔咁樣蒸嘅娃娃菜，幾香口幾甜唔錯嘅，到個主食就係香煎帶子黑松露炒飯，不過黑松露味唔係好出，我唔食黑松露都唔覺得佢有黑松露味咁，個帶子可能未解晒凍就去煎咁變咗冇乜味，但係個炒飯就炒得幾乾身又唔濕嘅，最後個甜品，應該係藍莓汁爆珠芒果汁奶凍，咁好似啲好大粒嘅魚子咁樣樣爆珠，好香好甜。最尾埋單都唔係話好貴，埋一加埋茶錢唔過千，咁多野食，價格相對合理，用餐環境舒適，適合同家人朋友一齊黎，放BB車都方便。總結來說。如果您在東涌附近，不妨去六小館一試。…查看更多

今日我來介紹一家本身位於長沙灣，現已搬到現址的串燒店，萍姐我地都大大話話都食左差唔多十四年喇，食過附近其他串燒，唔係燒定有人叫就翻燒，就係醃得唔入味，或者係入貨整定果隻垃圾串燒，而家黎到新舖，我就梗係繼續撐啦。萍姐呢度入左舖，光猛晒，有冷氣又坐得唔迫，間房應該都可以坐十個人左右。萍姐呢度d野食醃得入味，冇雪味，全部自己人手串，而調味經過咁耐時間既意見洗禮已經冇起初咁鹹，明爐燒串燒燒得剛剛好，一般唔會太燶唔會生。呢度有各式串燒、韮菜、娃娃菜呢D係做串燒既基本啦，燒起唔會乾仲好多汁。海鮮如果新鮮，實在係冇理由出事，燒生蠔係啱啱好熟，唔會乾晒水，隻蠔多汁又飽滿又Creamy，但老闆好有心機燒，冇一次黎食係唔掂嘅。串燒安格斯牛柳粒係呢度皇牌雙雄之一、咁厚肉已經喺串燒界黎講係甚少有，厚肉多汁牛味濃更加係難能可貴，黎得絕對要食。雞皮除非太燶，如果唔係唔會唔得。我個人黎講鍾意細中翼多d，冇咁大隻可以食多d其他野，雞翼皮脆香口，正!還有值得一提既係，另一皇牌雙雄呀，今次唔記得影燒，出黎皮脆肉嫩多汁香口，自己一個宵夜可以叫老闆免剪，肉汁鎖得仲好，又係另一種享受，而剪開亦方便一口口慢慢食，都係點都要叫。combo set 係雞髀皇扒加串燒安格斯牛柳，搭串燒娃娃菜消消滯，再用條藍妹作結下下火。今次記得點，原條原汁原味，葱蒜比例唔會太搶味，有燒香亦有汁甜。燒秋刀唔腥，有調味，不過我本身唔太好，所以麻麻，但對比起多卵魚，我會比較推薦，不過我自己會比較鍾意燒鮮魚多d燒豆卜，燒吊片，食完主力多水多汁，就係時候吹吓水，食吓呢d佐酒小食，豆卜真係會食落卜卜聲，仲有好強烈烤豆味。燒吊片就吹水飲酒絕對唔可以冇既野今次就食左呢d，因為餐牌都多左野食，冇叫晒新加既，今次食住咁多先啦!新搬黎可能未有咁多人識，同埋廚房唔同左，冇咁大煙，反而搞到萍姐佢地冇左最有效既宣傳方法，希望行過既人唔知係咩都上一上OPENRICE呢度，望一望食評睇睇， 咁就知冇幾正喇。…查看更多

今日我來介紹一家位於長沙灣的串燒店，食萍姐已經係我同一班同學畢業啱啱出黎做野就食到而家既串燒，大大話話都食左差唔多十四年喇，食過附近其他串燒，唔係燒定有人叫就翻燒，就係醃得唔入味，或者係入貨整定果隻垃圾串燒。而萍姐呢度醃得入味，冇雪味，全部自己人手串，而調味經過咁耐時間既意見洗禮已經冇起初咁鹹，明爐燒串燒燒得剛剛好，一般唔會太燶唔會生。呢度有各式串燒、韮菜、娃娃菜呢D係做串燒既基本啦，燒起唔會乾仲好多汁。海鮮如果新鮮，實在係冇理由出事，燒生蠔係啱啱好熟，唔會乾晒水，隻蠔多汁又飽滿又Creamy，扇貝用黎燒最易出事就係燒到韌，但老闆真係好有心機燒，冇一次黎食係唔掂嘅。燒羊架唔騷多汁啱啱好，仲冇乜羊騷味串燒安格斯牛柳粒係呢度皇牌雙雄之一、咁厚肉已經喺串燒界黎講係甚少有，厚肉多汁牛味濃更加係難能可貴，黎得絕對要食。還有值得一提既係雞髀皇扒，另一皇牌雙雄呀，燒出黎皮脆肉嫩多汁香口，自己一個宵夜可以叫老闆免剪，肉汁鎖得仲好，又係另一種享受，而剪開亦方便一口口慢慢食，都係點都要叫。combo set 係雞髀皇扒加串燒安格斯牛柳，搭串燒娃娃菜消消滯，再用條藍妹作結下下火。一人套餐就係咁推介😆多人開餐唔該你任哎😎撇除環境既評分，10分 我會畀  9分。老闆又唔會趕你走，話知你任坐，我地以前幾個朋友未結婚，黎親都喪叫串燒，飲吓啤酒吹吓水食住干燒魷魚，坐坐吓吹吹吓就三四點， 環境上冇要求地踎大排檔類 ( 淄博燒烤咁 )，唔使話要好舒適，旦求食物衛生乾淨，至少咁耐以黎冇試過食完肚痛。而且價格也相當合(以人手即叫即燒黎講)，唔好同我講成本唔使咁多自己整一定唔使咁貴乜乜物物，講成本唔該你收聲😡，唔該你諗諗如果夜晚突然想食吓串燒呢D野食，你買唔買到食材先，有冇材料醃先？有冇工具燒先？又有冇燒得好食既工夫先？多人即慶又可唔可以即刻搞先？最後你又願唔願意事後清潔先？是旦一樣你冇既，唔該唔好侮辱出面餐廳既每一個工作崗位。如果夜晚十點幾十一點，我送串生牛畀你，你返屋企都即時燒唔出啦，係咪？萍姐呢度我食左十四年，點解而家先寫？一來之前未開始寫，二來因為佢地做街邊檔，始終都會影響到其他居民，尤其是串燒呢D咁大煙，又可以飲啤酒既地方，附近街坊的確係會影響甚深，被人投訴就真係意料之內，但近年來因為投訴罰款太金，所以最後呢度唔做喇 (畀人投訴唔通買凶殺人咩😏）呢個舖完成歷史任務喇😝，所以咪而家先寫攞。不過佢地搬喇，佢地搬去 大角咀中匯街9號 ，坐位入舖喇，搬大左，又有房，到時食幾耐傾到幾嘈都得啦😎…查看更多

今日經過之前媒體報導過嘅士多冰室，終於唔使點排隊之餘門口又有位泊車🥸，可以試吓傳說中嘅大大大髀香蔥碳水化合物🥳，點左餐大概十分鐘左右就到，畢竟要炸，時間上都尚算快，上到檯時堅係嚇一跳😳，隻髀大過我隻手，睇落可能食唔晒🤣炸髀表面相對有一定的酥脆感，皮都幾脆，但食落有些微油膩，不過唔太影響味道。味道就略鹹，點埋個蔥油其實真係過鹹，可能咁大隻，要醃得入味唔過龍會有少許難度，或者醃少小小時間加少許淮鹽會好D，不過咁大隻炸起上黎都冇過火就實在難能可貴，冇燶冇生血，亦保留到雞肉香味，整體上唔差嘅。飯相對就較為平淡，白飯攞，不過佢都粒粒分明，去貨都算快，所以冇千年白飯咁淋晒，另外有多隻蛋食吓都幾唔錯。而飯餐價格在該區域算是抵食的，相對於品質和口感，好啱價，畢竟佢個份量同質素係對得個價錢，我地入去果陣見到有著住D工業裝備既叔叔都食緊呢隻炸髀，見佢地埋單果陣都係食唔晒，所以性價比絕對合格啦。而整體不過不失既，佢都係一間茶記黎既啫，唔係咩特色餐廳，住附近過黎食餐便飯就梗係冇所謂啦，但外區就真係唔好特別黎潮聖，呢頭馬路窄，車位少，驚你地黎到冇位泊車，泊好都仲要排一大輪隊先有得食。咁啱經過又唔趕時間咪入黎食野攞，佢個咖哩都唔錯既。…查看更多

又去鋒哥廚房，之前試了他們的麻辣雞煲，感覺不錯。今次多D人去，可以試埋椰子雞煲以及烤魚。首先講番麻辣雞煲，雞肉很新鮮，口感嫩滑，我地食BB辣，麻香微辛，唔會太刺激，配料都好足，洋蔥指天椒九層塔芫茜一定唔少得，層次感更豐富。BB辣唔會吃到一半的時候，越來越辣，適合唔係好食得辣但又想有少少辣的朋友。接下來是椰子雞煲，成隻雞另上，唔似得有D舖畀隻脾加隻翼尖過你充數咁老土，而用椰子肉加椰子水烹製，咁做法可以令椰子的香氣更加突出，同時保留了雞肉的鮮美口感，雞肉依然很新鮮，而且食得耐仲可以添椰子水，唔怕越食越淡。最後是烤魚，魚肉非常美味，有烤得香脆的外皮和嫩滑的肉質，搭配上麻辣的調料和豆皮、木耳等配料，口感更豐富。因為烤得外皮香脆魚肉入味，對魚腥味較敏感的朋友都可好好品嘗。另外海鮮方面呢度仲有貴妃蚌, 鮑魚, 九肚魚, 帶子, 蟶子, 生蠔, 奄仔蟹可以任攞。呢度仲有好多唔同嘅配料配菜可以任攞嘅，例如豆腐豆皮之類索汁嘅食物呢就最多啦，咁同埋呢有好多唔同嘅蔬菜啦萵筍呀蘿蔔呀或者係新鮮淮山等等啦都可以任攞嘅但講到呢一間舖最值得去嘅原因就係因為呢度嘅生啤係自助任斟任飲嘅，仲要唔係checp checp啤酒喎，係1664,  Premium, Paulaner, Erdinger, Yebisu 呢D喎，記得唔好揸車黎喇同埋呢度嘅 Movenpick 雪糕係任食嘅 所以講到呢度呢兩樣嘢先至係鋒哥嘅精華所在總體而言，鋒哥廚房的三個煲都很值得一試，價格也很實惠，整個用餐體驗非常愉快。建議喜歡辣的朋友可以選擇麻辣雞煲，而非椰子雞煲。如果喜歡烤魚，也可以試一下他們家的烤魚，真的非常美味。但係我知道呢，其實鋒哥喺秋冬時分呢，其實都會做羊腩煲嘅，嗰陣時啲羊腩仲係任食任添嫁，如果到時有興趣嘅朋友就可以呢鋒哥呢度食羊腩煲喇。…查看更多

店內裝潢獨具特色，融合了北京老街的風格，讓人彷彿置身於火鍋的發源地。走進店內，可以看到裝飾別致、格調高雅。店內採用暖光設計，配合紅磚、花磚牆面和木質桌椅，營造出古香古色的氛圍，讓人感到舒適怡人。在食物質素方面，九龍坎麻辣火鍋的湯底以成都口味為主打，味道香辣可口，濃郁味美。店內所提供的食材也非常豐富，各式肉類、海鮮、蔬菜、豆腐等應有盡有。其中特別推薦嘗試牛運亨通，這裡的牛肉質素十分出色，肉質鮮美、嚼勁十足，口感極佳。此外，店內的鴨血也非常值得推薦，口感鮮甜，搭配湯汁更是美味。店員的服務也十分周到，他們對菜品非常熟悉，會熱情地為客人介紹各種菜式及湯底，以滿足客人的口味需求。店員熱情周到，讓客人在用餐時感受到溫馨的服務。綜合來看，九龍坎麻辣火鍋是一家非常優秀的火鍋店。店內環境宜人，食物質素高，服務熱情周到。如果你想品嚐成都口味，這裡絕對是你不容錯過的好去處，無論是跟家人、朋友一起，都可以享受到火鍋帶來的美妙滋味。…查看更多