wifi.tszching.chui的个人专页

琴日同班friend去深水埗覓食，俾我哋撞正一間新開嘅川菜店「麻辣香鍋」，佢係旺角都有分店, 咁岩我地又想食辣, 所以入去食。🐟【烤加州鱸魚】條魚都幾大條厚肉！魚身有炸過，魚肉都算嫩滑唔多骨，最正係個鍋底有齊薯粉、蓮藕、大豆芽、青瓜同金針菇，吸盡麻辣精華。同埋食烤魚會有爐跟埋, 所以唔會變凍, 仲有好多配料可以加錢叫, 當邊爐打都得. 我哋只係簡單加多份芋頭（+$26），切左片炸香幾香口, 不過如果可以切厚身D就更加有口感！🍤【黃金蝦球】足足有8粒大蝦球，咸蛋黃多到漏，每啖都係咔嚓脆嘅幸福。我不嬲都好中意食咸蛋黃既炸物, 所以呢個好岩我口味～🥬【大盤花菜】咸豬肉片煎到焦香，同爽脆花菜係絕配，而且呢種鑊氣係屋企煮唔到既味道, 又係送飯之選。🍯【炸饅頭】6大件金黃饅頭，外脆內軟唔油膩，點埋煉奶簡直係完美句號。當主食/ 甜品食都得。我地叫完野食, 見周圍檯都食緊好似套餐咁既配搭時先知原來宜家佢地新開張, 所以午市套餐變左全日供應, 變相比起叫主餐牌抵食好多. 例如午市套餐$69有3餸香鍋+白飯, +$3仲有飲品, 比起叫一個大香鍋性價比高好多, 下次一定會試!…查看更多

今日同屋企人澳門落船回港，係咗中港城海月宴會廳食晚飯飲茶，呢度係煌府婚宴集團旗下，裝修夠晒氣派，樓底高空間大，坐得舒服，個場明顯Setup係for擺酒飲宴。叫咗幾款小菜，整體水準唔錯。鮑魚北菇滑雞煲，一上枱已經聞到好香，個汁濃郁得嚟唔會太鹹，好岩配飯，仲有兩大隻鮑魚切粒，咬落去彈牙入味，雞既分量亦都算多。燒鵝例牌，我地好好彩，俾咗下脾位我哋。皮脆肉嫩，肥瘦適中，點埋酸梅醬真係無得頂。最後仲叫咗個銀芽肉絲煎脆麵，上枱時仲吱吱聲，個麵底煎得金黃香脆，配料有銀芽、紅蘿蔔絲、芹菜、肉絲同冬菇絲，撈勻嚟食口感豐富，屋企人都話正。呢度環境舒服，食物有水準，價錢合理，可以一試！…查看更多

前幾晚同朋友去咗Isquare 嘅港滙軒，酒樓景色好開揚，一坐低就望到成個維港靚景，夜晚維港兩岸啲燈飾閃閃吓，同朋友一路食飯一路吹水，真係夠晒寫意。晚市優惠試咗金銀蒜開邊蒸本灣龍蝦，$38半隻，性價比高。龍蝦蒸得剛剛好，蒜蓉嘅香味同龍蝦嘅鮮味完美結合，肉質爽彈又鮮甜，食落好滿足。主菜叫咗個深海龍躉兩味組合（$468），一次過試到兩種煮法。兩款嘅龍躉肉都結實鮮嫩，食得出係新鮮貨。翡翠炒大龍躉球嘅龍躉球炒得啱啱好，魚肉又起哂骨啖啖肉，配埋蜜糖豆一齊炒，口感豐富；黃椒醬蒸龍躉頭腩就用咗黃椒醬蒸，頭腩部位肥美嫩滑，配埋木耳一齊蒸，簡單就是美味。龍躉兩味都做得唔錯，鍾意食魚嘅朋友可以一試。另外叫左兩個小菜。咕嚕肉酸甜適中，外皮脆口，肉質軟嫩，菠蘿用左新鮮菠蘿所以好夠甜之餘甜度好自然，兩者夾住食，味道更加豐富。三蝦乾撈粉絲煲味道就不過不失。宜家市道咁差，但酒樓當晚平日夜晚都全場爆滿，佢另外有做緊個$628/位，限時2小時嘅大閘蟹放題，眼見都唔小人食，都叫做可以有唔錯質素嘅食物配下美景，算係同朋友聚餐或者家庭聚會嘅好選擇！…查看更多

今晚同班friend去咗砵蘭街「老川皇」食川菜，其實呢間野係幾條街之隔已經有幾間分店，好耐之前試過佢其他分店嘅出品，今次黎食整體都仲keep到水準！必點個金湯酸菜海鱸魚，原條魚，魚身肉起曬骨啖啖肉，魚肉滑溜，另外仲有整個魚頭，份量十足，酸菜湯底夠酸辣，個底仲有薯粉！幹鍋花菜鑊氣夠，仲有個蠟燭仔熱住個鍋，keep住暖笠笠。涼拌腐竹清爽帶微辣，但如果凍啲令到腐皮更加有咬口就再好啲。串燒方面，串燒部分比較似炸物，但雞全翼、雞腎、五花肉、豬頸肉同雞軟骨都香口，送啤酒一流。金菇就索曬啲孜然粉味啱曬我口味，但如果鍾意真正燒烤風味可能略嫌不足。講開啤酒，宜家呢度做緊優惠$32枝大青島，買二送一，所以隔離枱成枱都係酒樽！呢餐整體價錢合理亦滿意食物，會再encore！…查看更多

今日同朋友撐枱腳打邊爐，嚟到尖沙咀呢間「九五至尊火鍋」，個名夠霸氣，原來價錢比想像中親民！而家做緊好多優惠，例如$168以下湯底免費，其他半價，我哋二話不說揀咗招牌麻辣鴨血鍋+蕃茄薯仔鴛鴦鍋（原價$148），折完$0抵到爛！而且蕃茄薯仔鴛鴦鍋超濃鬱，必試！另外而家仲全日免費任添鴨血/蜂巢豆腐，所以配埋佢個麻辣鍋就啱曬。🔥其他優惠：▫️晚上10點前：Sapporo生啤500ml$88/杯 買一送一▫️晚上10點後：全單八折（唔包飲品）兩個人打邊爐最怕眼闊肚窄，呢度都貼心，大部分火鍋料可以叫半份，我哋試勻：🥩安格斯三角肥牛（半份）｜上盤時有乾冰非常有睇頭，牛肉油花唔錯，淥10秒食得🐷黑豚肉片（半份）｜肉質爽嫩🐙手打墨魚丸（4粒）｜真係食到墨魚粒，而且好夠彈牙！🥟自家製韭菜餃菜肉比例好；魚皮餃夠彈牙。🍢炸支竹吸湯一流；炸午餐肉食落仲脆脆哋。🥬西洋菜｜清新解膩。混醬區係自助形式，仲有凍水任斟，慳返唔少飲品錢。另外加咗壺龍眼蜜，好滋潤！埋單每人$300左右，食到捧住個肚走。而且呢度嘅座位都幾舒適，都幾適合一大班人嚟吹水打邊爐。…查看更多

今日放工同朋友搵食，嚟到太子呢間門面低調嘅The Stekhaus，餐廳環境都唔錯，主打幾款牛扒，但亦有豬/雞/羊或者意粉等主食可以選擇，食完覺得整個用餐體驗都幾唔錯。前菜同主食：首先講吓個安格斯Prime有骨肉眼 (15oz)，呢度嘅牛扒冇得揀生熟程度，但嚟到切開牛扒見到粉紅色肉心，亦夠肉汁，食落軟嫰美味。伴碟仲有黑醋沙律菜清清地，正好平衡返油膩感。朋友嗰份安格斯Prime牛肩胛扒 (7oz) 都唔弱，雖然係100蚊有找，但係牛扒同樣帶粉紅又有肉汁，仲有啲油脂夾雜係中間，食落好滿足。伴碟仲有原隻烤大蒜，蒜香配牛扒，味道層次再豐富咗。另外牛扒可以加錢又唔同嘅小食。我哋加咗$78試試佢個香辣芝士龍蝦 (半隻)！龍蝦新鮮焗起，面頭鋪滿芝士，肉質食落都算爽彈鮮甜帶點海水味，$78當然唔會要求係新鮮龍蝦咁超爽超彈，但佢嘅味道絕對已經對得起佢嘅價錢。小食同飲品：黑松露和帕瑪森起司炸薯條即叫即炸，熱辣辣上枱，芝士碎鹹香惹味，再點d松露沙律醬食係邪惡而停唔到口嘅組合。飲品叫咗荔枝接骨木梳打，清甜解渴，正好中和返牛扒同芝士嘅濃味。甜品：最後以傳統Tiramisu作結，咖啡同酒香平衡，口感軟滑，而且唔會過甜，食得出係心機自家製嘅味道，為呢餐畫上完美句號。真心覺得呢個甜品值得一試！…查看更多

今日同朋友去咗佐敦呢間「不倒翁中日火鍋料理」打邊爐。餐廳位置幾方便，就喺新寶廣場2樓，地鐵出口轉個彎就到，裝修光猛整潔，我地被安排坐卡位，坐得幾舒服。我哋叫咗個極上火鍋二人餐。首先揀鍋底，有八款選擇，我哋揀咗秘制沙嗲鍋，湯底濃郁得嚟唔會太鹹，撈底仲有啲花生粒。食火鍋料之前有個日式魚生刺身拼盤，當日有希靈魚、吞拿魚同八爪魚。之後其中一個主角海鮮拼盤可以有龍躉片、海蝦、鮑魚、桶蠔、聖子王同鮮元貝之中任揀三款，我哋揀咗龍躉片、鮑魚同鮮元貝。龍躉片切得厚身有咬口，無骨啖啖肉，魚樣帶膠質；鮑魚仔彈牙又冇雪藏味，都幾大隻；鮮元貝唔算大粒，但好鮮甜。肉類有頂級雪花肥牛肉（細），雖然係細份，但份量都唔少，油脂分布平均，淥完之後入口即化，牛味濃，同沙嗲湯底超夾！鎮店水餃皇絕對係驚喜！每隻都有3隻原隻蝦同木耳，皮薄餡多，蝦肉爽彈，木耳增加口感，推介！手打四寶丸有牛丸、蝦丸、墨魚丸同鯪魚丸，每款都真係手打，食到粒粒口感，尤其蝦丸，鮮味突出。韭菜餃韭菜香濃，餡料飽滿；唐生菜新鮮爽脆；生麵吸晒湯底精華，食到尾聲淥個麵，完美收官！飲品包咗每人一杯竹蔗水或酸梅湯。最後餐廳仲送咗甜品椰汁糕同桂花糕，為呢餐畫上完美句號。…查看更多

同朋友係海港城血拼之後，喺附近搵食。呢間餐廳似係新開，裝修幾雅致，坐得好舒服，幾適合同三五知己慢慢食、慢慢傾👍。🔸精選滬式涼菜拼盤原拼盤有五個冷盤，皮蛋豆腐、醉嘉美雞、鎮江水晶餚肉、蒜蓉拍黃瓜、四喜烤麩，但當日可能無四喜烤麩，店員幫我哋轉咗做老醋拌海蜇頭！皮蛋豆腐非常嫩滑，仲配埋有啲口感嘅肉鬆；醉雞味道啱啱好，我哋嗰個仲係雞髀位啖啖肉添；水晶餚肉凍香Q；拍黃瓜夠蒜爽口好清新；海蜇頭爽脆到啪啪聲，醋香酸度啱啱好仲整到啫哩形狀可以細細粒咁食，係個開胃小食！🔸招牌炒飯必叫，足料，由蝦仁、蟹肉、帶子粒同蟹子拌炒，炒得乾身又夠鑊氣，米飯粒粒分明，又唔會太油膩！🔸豆沙鍋餅 我哋叫咗個甜品收尾。呢度嘅豆沙鍋餅同方間真正上海舖食嘅有少少唔同，呢度嘅係餅面面頭會鋪滿芝麻煎，豆沙餡唔算多，但唔會太甜，食落都幾香口。…查看更多

今日去咗尖沙咀海旁散步，晚上入去K11 Musea B2樓嘅Foodcourt搵食。其中試咗拉麵店——「次郎拉麵」嘅招牌三色拉麵。??Signature招牌三色拉麵 一碗拉麵有齊雞肉、牛肉、豚肉三款肉，仲有原隻溏心蛋！雞肉嫩滑，牛肉係比較高質嘅肥牛，豚肉肥瘦適中，湯底本身係豚骨湯，但我加咗$10轉咗「香濃海老湯」，真係冇改錯名！湯頭超濃郁，拉麵就係鍾意呢種重口味。😋 雖然本身拉麵已經跟咗木耳絲同埋少量嘅荀，但我都另外再加$12要多咗荀，爽脆清甜，同濃湯好夾！??靜岡綠茶（+$20） 食濃湯拉麵點可以冇嘢飲？單買左枝日本靜岡茶。另外呢度其實有個$148套餐可以包一碗拉麵一份炸雞同一支嘢飲，不過我驚自己食唔曬咁多肉就冇叫喇，但其實套餐抵食好多。…查看更多

今日去咗尖沙咀K11 Musea行街，順便試吓B2樓Food Playground入面嘅「YumMee」。我地已經係其他餐廳買左主食，所以係呢到純粹叫左個岩食嘅雜錦小食拼盤，一款拼盤有齊6款小食，啱晒我哋呢啲咩都想試吓嘅人！拼盤包括：🍗 香茅單骨雞翼 – 帶點香茅味，炸得啱啱好，外脆內嫩，仲係單骨食起上嚟更方便！🌯 春捲 – 脆卜卜，入面係蔬菜餡料，唔會太油膩。🐟 魚糕 – 食落有啲似台灣甜不辣，有點彈牙煙韌口感。🍢 魚餅 – 味道香口，點埋佢哋嘅甜辣醬更惹味！🍖 沙爹雞肉串 – 沙爹醬濃郁，細細串，啖啖雞肉！🥟 炸雲吞 – 薄皮超脆，入面有少少肉餡，好香口。環境方面，YumMee位於K11 Musea嘅Food Playground美食廣場入面，雖然係開放式空間，但座位都算寬敞，我地仲坐到卡位，燈光柔和，坐得幾舒服。成個環境乾淨企理，加上K11 Musea本身設計感十足，食完嘢行吓商場都係一種享受。…查看更多

今日去咗K11 Musea地庫「牛爸」鋸扒。呢到專賣鐵板牛扒，有T骨扒、肉眼扒同埋西冷扒等等嘅選擇，雖然坐落喺高級商場裏面，但價錢親民。🌟鐵板肉眼一上桌就聽到「滋滋聲」，鐵板熱辣辣，視聽嗅覺全部滿足！肉眼牛扒肉質軟嫩，黑椒汁香濃微辣，淋上牛扒同薯條度簡直絕配！粗身薯條炸得外脆內軟，蘸滿黑椒汁之後更加惹味，邪惡度爆燈！伴碟有三色豆同西蘭花，平衡返罪惡感（笑）～➕$18羅宋湯加配！羅宋湯酸酸地幾開胃，有滿滿蔬菜同牛肉香～簡簡單單又一餐，如果去開海旁又想搵啲親民選擇的話，K11 Musea呢個food playground會係一個好選擇。…查看更多

今日去咗Kerry Hotel個Food Court食晚餐，中意佢環境坐得舒服得嚟又有live band。見到呢間新開嘅海南雞店，叫咗個二人套餐，200蚊鬆啲有齊湯、小食、海南雞、元蹄、飯同埋小甜品。湯可以揀無味精靚湯或者肉骨茶，我哋每款叫咗一個試下。王牌無味精靚湯-當日係南瓜紅蘿蔔粟米豬骨湯，非常好飲，好夠味，我連湯渣都食埋。呢個質素似出面賣幾十蚊一碗嘅老火靚湯。肉骨茶，上檯已經問到藥材味，都算正宗。香麻辣鳳爪，已經起咗骨，口感爽彈，食落酸酸辣辣好開胃。極品海南雞半隻，已經起曬骨，雞皮金黃透亮，入口爽脆唔油膩；雞肉嫩滑有肉汁。另外配埋3款海南雞醬料，黑豉油鹹甜適中，薑蓉辛香提味，仲有隻酸酸甜甜汁。鹵水元蹄，鹵得入味，骨膠原十足。時菜當日係灼生菜配蠔油。飯可以揀雞油飯或者白飯，我哋又係揀咗各一試下。雞油飯平時屋企唔會煮，所以食海南雞一定要嗌。最後仲有兩粒蒟蒻做個小甜品。…查看更多

今日同朋友去咗旺角雅蘭中心嘅「意粉狂熱」食晚飯，餐廳位置方便，地鐵站行兩步就到。我哋叫咗兩個小食同兩個主食。🌟焗薯皮拼盤薯皮新鮮焗起，個鐵烹仲熱辣辣，拼盤有三種口味，肉醬/咖哩/厚煙肉，面頭再有一層芝士！薯皮焗得外脆內軟，三款口味各有特色： - 肉醬味：似迷你肉醬意粉舖喺薯皮上，酸酸甜甜好開胃。- 咖哩味：日本咖哩味，再有少少紅蘿蔔粒。- 煙肉：經典配搭，厚切煙肉碎加芝士，我個人最鍾意呢隻味。建議3-4人分享，因為兩個人食會幾飽！ 🍗香烤雞翼（檸檬蜜糖）(4隻)雞翼控必點！皮脆肉嫩，蜜糖甜味中和咗檸檬嘅微酸，4隻食完唔夠喉！ 🍝香煎鮭魚配味噌忌廉鮮製意粉三文魚肉質滑溜，意粉用咗扁意粉，掛滿味噌忌廉汁，鹹香得嚟唔膩，仲有啲蘑菇，口感豐富。 🍤精選海鮮蒜香蕃茄意粉海鮮有一大隻開邊蝦、幾隻青口同魷魚圈！蕃茄醬酸酸甜甜好濃鬱，圓意粉煮得啱啱好有咬口，最欣賞係醬汁收得夠乾身，唔會水汪汪。如果唔想煩呢度都有套餐選擇，$298up有好幾款2人餐，有齊餐湯/沙律/主菜/甜品/嘢飲～ …查看更多

今次同朋友去咗旺角砵蘭街嘅「明記潮館」食潮州菜，環境乾淨企理，而家仲做緊滿$300可以用$8加配鹵水雜錦拼盤/韭菜豬紅嘅優惠。我哋揀咗鹵水雜錦拼盤，都有返咁上下份量，滷得入味，抵食！ 另外叫咗幾個小菜。風沙豬手炸得外皮酥脆鹹香，食落惹味，但食得多會覺得油膩，建議多人share。 蠔仔肉碎粥（細）雖然叫咗細份量，但都可以分到四五碗。蠔仔鮮甜無沙，鍾意食潮州粥有一粒粒米嘅口感，加埋肉碎同芫荽，暖胃又滿足。 涼瓜炆龍躉頭腩龍躉頭腩膠質豐富，涼瓜係爽脆啱曬我口味，唔會炆到太軟淋，保持到口感。 蒜蓉粉絲蒸蟶子王蟶子唔算特別大隻，但蒸得剛好，蒜蓉同粉絲吸收晒鮮味，好香好惹味。 總括來講，明記潮館水準穩定，價錢合理，尤其海鮮同滷味出色，適合一班人聚餐！ …查看更多

今日專登去咗尖沙咀加拿芬廣場地下嘅Milkfill，試吓佢哋嘅招牌拿破崙泡芙！鋪頭唔算大，但裝修幾精緻，仲聞到陣陣牛油香，未食已經流晒口水。叫咗三款味道 - 原味、杏仁、開心果味拿破崙泡芙。店員即場唧吉士醬入去，睇住佢唧到滿晒，真係好治癒！個泡芙外型同傳統好唔同，係扁身嘅拿破崙酥皮，咬落去「咔嚓」一聲，脆到不得了！酥皮有濃郁牛油香，仲有層次分明嘅千層口感，但食落又唔油膩，正！入面嘅吉士醬凍凍哋，質地夠滑又唔會太甜。原味吉士醬見到有啲雲呢拿籽，面頭加左少少吉士醬輕輕燒香過，食落好似creme brulee、杏仁泡芙面頭有一塊塊烤脆咗嘅杏仁；開心果味帶有淡淡嘅堅果香，面頭仲有少少開心果碎，增添口感。整體來講，呢個泡芙創意同傳統兼備，味道同口感都好出色，對得住佢個價錢，經過尖沙咀絕對值得試吓！…查看更多