海月宴會廳

今日同屋企人澳門落船回港，係咗中港城海月宴會廳食晚飯飲茶，呢度係煌府婚宴集團旗下，裝修夠晒氣派，樓底高空間大，坐得舒服，個場明顯Setup係for擺酒飲宴。

叫咗幾款小菜，整體水準唔錯。

鮑魚北菇滑雞煲，一上枱已經聞到好香，個汁濃郁得嚟唔會太鹹，好岩配飯，仲有兩大隻鮑魚切粒，咬落去彈牙入味，雞既分量亦都算多。

燒鵝例牌，我地好好彩，俾咗下脾位我哋。皮脆肉嫩，肥瘦適中，點埋酸梅醬真係無得頂。

最後仲叫咗個銀芽肉絲煎脆麵，上枱時仲吱吱聲，個麵底煎得金黃香脆，配料有銀芽、紅蘿蔔絲、芹菜、肉絲同冬菇絲，撈勻嚟食口感豐富，屋企人都話正。

呢度環境舒服，食物有水準，價錢合理，可以一試！