lotam的个人专页

最近都被社會上的爭議搞到心情欠佳，但食好西幾時都係改善心情嘅最佳方法。記得之前去深水埗果間倫哥火鍋，食物新鮮，服務周到，咁啱見到觀塘呢邊原來又有一間倫哥火鍋，於是放工約埋朋友一齊去打個邊爐食下雞煲。倫哥喺創業街萬泰利廣場地下，我喺觀塘返工，行過黎好快就到。朋友就話搭地鐵，喺牛頭角站一出行美亞果條隧道轉右就係，非常方便。今日我地就食呢個嚐鮮12式海鮮火鍋，有刺身、鮑魚、有雞煲、有海鮮、有牛頸脊.....以而家物價計$323位一啲都唔貴呀。首先上檯就係刺身拼盤，雖然唔係自選，但有我最愛嘅三文魚、老婆最愛北寄貝同帶子，朋友愛吃嘅刺身蝦，全部都係我地嘅至愛，根本同自選無分別。跟住仲有花膠拼鮑魚，老婆話要保充骨膠源，我就讓左花膠比佢食，我就負責食鮑魚，爽口彈牙，正呀。蒜蓉粉絲蒸蟶子，建議先食鮮味十足嘅蟶子，再食蒜味香濃嘅粉絲，完美嘅配搭。食雞煲歎火鍋點少得任飲呢個環節，多款汽水、荔枝茶、芒果茶及韓式飲品，任君選擇。食完頭盤，馬上送上雞煲。店員貼心提醒我地，先蓋上煲蓋，每兩分鐘打開炒一炒，總共4次，8分鐘就食得啦。我地揀左BB辣，香味濃郁，食落仲有麻辣感覺，認真惹味。而且食完係可以加雞架，啱晒嗜好食雞煲嘅朋友。食完雞煲，火鍋湯底我地揀左由冬瓜同鮮雞組成嘅溫泉雞鍋，味道清甜。大力推介呢個無與倫比牛頸脊，牛嘅紋理非常分明，只需淥一淥，即放入口，牛味出晒黎。可惜佢唔係任食部分，追加就另外收費，(其實有一刻衝動想加錢再叫，最後都係忍一忍口，因為後面仲有好多野食)除左牛頸脊吸引之外，另一重點當然係呢個環游海鮮盤啦，有花蟹半隻、龍躉片、貴妃蚌、蟶子、鑽石蜆、海蝦等等。海鮮盤沒有劃一的，全部都係送上當天最時令嘅6-9款，保証新鮮。其他美食仲有秘制手打墨魚滑、鮮蝦滑、阿媽雲吞水餃、低鹽少油響鈴魚皮、田園有機時蔬等等。我最欣賞阿媽雲吞水餃，大大隻份量十足，鮮蝦做餡絕無欺場。而且呢部分食物都係任叫任食，大胃王一於食盡佢。食完雞煲火鍋怕熱氣？放心，倫哥呢度好貼心，最後仲每位送碗燕窩糖水你歎，夠晒滋潤。…查看更多

忙完聖誕節，又要為農曆新年做準備，而且屋企嘅老人家最重視農曆新年，所以我地決定早少少帶佢地出黎食番餐等佢地開心下啦。今次揀左沙田偉華中心富臨薈，裝潢有別一般中式酒家，不用地顫、不用檯布，佈置簡約時尚，感覺舒服。佢地提早推出多款賀年菜式，好似發財大桔、年年慶有餘、招財進寶等等，認真好意頭....打頭陣就黎個豬年包撈起，係由煙三文魚、櫻桃蘿白、鮑魚、甘荀及沙律菜等等組成，色彩鮮艷奪目，而且健康又有益。店員更貼心為我地將這道菜一邊攪拌一邊叫撈起，喻意新一年繼續豐足美滿，稱心如意。咁有意頭嘅菜式，大家都毫不客氣落力去撈起了。農曆新年個個都應該笑口常開架啦，叫呢味嘻哈大笑就啱晒，用上陳年佳釀去浸蝦，酒味相當濃烈，但又不失蝦嘅鮮味，啱晒好酒嘅老豆。將柚子磨蓉再搓成蝦餃皮，配上鮮蝦，就變成幾可亂真嘅發財大桔啦。花膠煮得夠彈牙爽口，配上蝦杍及香濃醬汁去撈麵，食落口感非常有層次。特別推介呢個黃金堆滿屋，除左名字有意頭外，佢用上咸蛋黃去做蘿蔔糕外皮去炸，咸蛋黃嘅咸香味配上蘿蔔糕，無論創意同味道以及份量都攞滿分，值得一讚。這個玩味十足嘅甜蜜愛侶係兩隻小刺蝟，餡料係用南瓜及椰絲，味道出奇地夾喎。而唯一嘅缺點就係佢地呢個造型太可愛，令到大家都唔忍心將佢地放入口食左佢>_<最後呢個招財進寶，其實係紅豆咸水角，外皮金黃軟熟，內裡擠滿紅豆，口感一流。…查看更多

之前食過一次Made in HK，就係朗豪坊分店開張優惠，果時主菜半價非常抵，而且味道都唔錯。所以趁呢幾日有假期，帶埋外父外母黎鋸個靚扒，迎接新嘅一年。由於外父外母住九龍東，所以今次揀左APM呢間分店，地鐵站一出轉右上扶手梯就到，非常方便。地方夠大，檯與檯有足夠空間，唔會同隔離檯太近，感覺舒服。晚餐都有幾多選擇，鍾意鋸扒可以揀各款唔同扒類，仲有海鮮飯、咖哩雞飯、是日鮮魚等，各式各樣都有，適合唔同口味嘅人。我地揀左4款晚餐，先黎餐湯餐包。是日餐湯係蘑菇湯，蘑菇味夠濃。餐包同湯都夠熱，喺呢個天氣啱晒。香濃蕃茄及芝士汁鋪滿整個飯面，牛舌夠厚又有咬口，加上用鐵獲盛載，可以KEEP住飯個溫度，整體相當唔錯。肉眼扒肉味香濃，大蝦上碟已經開邊可以方便進食。另外薯條分開上唔會比扒汁浸腍，值得一讚。羊架份量比平日都大件，而且有3件咁多，加上肉質鮮嫰，食得津津有味。肉眼扒份量十足，咬落啖啖肉，而且肉汁夠多夠濃。另外，用鐵板上嘅肉眼扒喺添上黑淑汁時果種「咋咋」聲，係你用碟上嘅時候體會唔到架。所以，食牛扒我始終都堅持食用鐵板上嘅。…查看更多

為了避開冬至人潮，我地每年都會提做一點做冬，加上呢幾日天氣寒冷，今日就帶埋阿爸阿媽黎到尖沙咀禾牛薈火鍋館做節啦。之前跟朋友喺九龍城食過一次，就係因為用料新鮮，對食品質素要求高，所以印象非常深刻。知道佢地喺尖沙咀開左樓高兩層分店，梗要黎會一會佢啦。除左招牌牛肉出名外，呢度嘅湯底絕對係頂級。其中御膳宮庭海中寶及魚與熊掌(鮑魚、牛蹄)更係期間限定，而且呢啲高質食材供應有限，每天只會出2-3鍋，所以必須預約，好彩我BOOK檯時ORDER定魚與熊掌湯底先有咋。湯底未上之前，我地叫左兩款熟食。呢個老友鬼鬼(油炸鬼+蝦滑)炸得金黃鬆脆，加上嫰滑蝦滑，香口又彈牙。另外，仲有脆炸蜆蚧鯪魚球，熱辣辣嘅鯪魚球，再醮一下鹹香味的蜆蚧醬，簡值係絕佳嘅配搭。呢個魚與熊掌鍋，用上八頭鮑魚，加上新鮮牛蹄2隻及牛骨燉足10小時(你話唔預約點預備比你呀)。牛味夠濃但又唔油膩，店員仲幫我地將新鮮牛蹄剪碎再用大火煮滾，真係啖啖都係精華，大家都品嚐完靚湯，先開始打邊爐。叫左個靚湯底，梗係要叫番碟靚牛黎食啦。呢個特級手切肥牛，紋理分明，色澤紅潤，而且食落口感嫰滑，牛味十足。花枝片及魚皮餃都係我的最愛，花枝片夠鮮味，而魚皮餃就啖啖肉，口感滿足。外面火鍋店比較少有得叫豬肺食，呢度有而且洗得夠乾淨。從色澤、彈性、口感各方面都睇得出絕對係新鮮豬肺。黑椒牛筋丸食落辣辣地，相當惹味，而且牛味夠濃，絕不是其他混了豬肉的牛丸可比美。食火鍋又點可以無脆炸響鈴卷，佢炸得夠香夠脆，放落湯浸3秒，全晚精華盡吸，非常滋味。食埋個甜品，牛奶布甸及椰子大菜糕，夠晒滿足。…查看更多

近年，隨著自由行嘅興旺，拖著喼的，拿著相機的，尖沙咀到處都堆滿遊客。但其實只要到處走走，原來尖沙咀都有閒靜一角的餐廳，可以讓大家抖抖氣的。餐廳名字叫一起果醬，店鋪不大，但非常別緻，而門口放了部分手工果醬，如有與趣更可向店家購買。細看一下餐牌，你會發現大部份菜式都混有不同味道果醬，例如丁香香橙果醬、士多啤梨醬燒豬肋骨等等。飲品也有果醬系列，而甜品就更加以果醬為主，配上多士、鬆餅、雪糕、窩夫餅等。ORDER了一客DINNER SET，田園沙律配上熱情果油醋汁，酸酸甜甜，非常醒胃，用作前菜最適合不過了。是日餐湯係什菜湯，湯料份量十足，飲完個胃都填滿了不小。單點這個單骨雞翼最啱就係我地呢啲又鍾意食雞翼但又懶嘅人，唔駛落手都食到。雞肉有淡淡玫瑰清香，加上蘋果醬，味道滿分。軟殼蟹炸得金黃鬆脆，蟹肉則鮮味十足，而且份量不少，而意粉亦煮得夠彈牙。慢煮羊架，加上特別調配嘅芒果芥末汁，肉質鮮嫰卻又完全吃不到羶味，廚師應記一功。點選餐飲時，老婆發現竟然有黑糖薑母奶茶，立即揀左佢。話晒呢期大熱，加上天氣凍，佢又容易手腳冰冷，呢杯啱晒佢。我就揀左真.紅豆冰，配上鮮忌廉，夠晒CREAMY，而且紅豆大大粒，可惜唔係配粗飲管，即要用匙羹先食到，可能係咁所以叫真.紅豆冰。呢度嘅SIGNATURE---果醬九宮格多士，每格放上不同口味果醬，店員表示每款都是手工製作，不假外求，而且成份天然，健康又美味。芝士味非常濃厚，配上紅霉醬，加上士多啤梨，簡直係完美配搭。…查看更多

今日黎到油塘大本型，一個非常大嘅領展商場，行到腳仔軟，又係時候搵食啦。去到FOOD COURT諗住睇下有乜食，點知見到最入果檔竟然係一間涮涮鍋，牛肉癮即時發作，即刻同老婆講「我諗到食乜啦」。八幡屋涮涮鍋就喺FOOD COURT最盡頭，雖然招牌夠光猛，但都不易察覺。呢度係除左食火鍋仲有日式料理供應。而價錢方面，主要以入座時間及牛肉質素去分級。我地揀左最貴嘅澳洲和牛，另外，選擇左骨膠原豬骨湯底。日式料理種類繁多，刺身當然少不了，另外，壽司、肉類、燒物、天婦羅、各式海鮮火鍋配料等等都可以用ORDER型式下單，任點任食。刺身一定有我至愛嘅三文魚，仲有鮑魚片、甜蝦、赤貝、希靈魚等，款款都咁新鮮。我地揀左最貴嘅澳洲和牛，當然可以食埋價錢平一點嘅特選美國牛肉啦。澳洲和牛肉味較濃而且口感嫩滑，而特選美國牛肉味道較溫和，但帶有口感一些，各有特色。生蠔份量唔算大隻，但食落夠肥美，可惜美中不足係叫第二轉時已經沽清了，早知第一轉叫多幾隻啦。除左高質牛肉及生蠔之外，仲有蟶子、東風螺等其他食肆比較少有嘅海鮮，而蜆都清洗乾淨，無沙而且鮮味十足。火鍋料除左可以ORDER外，有部分係放喺凍櫃以自助形式去攞，各式菜類、丸類、芝士腸、生根、烏冬等等。仲有每次火鍋都必點炸響鈴，留到最後淥黎食，可以讓響鈴吸盡整晚火鍋精華，味覺爆燈。自助區仲有一個凍櫃，除了汽水及果汁等飲品外，仲有青擰啫喱及芒果布甸，特別推介青檸啫喱，有清新青檸味，有點似細個食嘅四方果啫喱，好懷念啊。甜品仲有雪糕同雪條，食完火鍋熱熱地整番杯凍冰冰嘅甜品，份外滿足。…查看更多

呢期一田大減價成個沙田新城市廣場都逼滿人，我地掃完貨之後又攰又餓，想搵地方坐下食下野，但係因為實在太多人，所以要先離開新城市廣場，最後過左隔離偉華中心。過到黎就見到呢間富臨薈，見唔駛等位，我地決定即時入座。一坐低就有驚喜，12月都未到，就有聖誕大餐食啦。2人餐只售$498，4人餐都係$988，以現時物價計算，唔駛$300一位有聖誕大餐食，相當超值。我地一行四人，梗係叫番個4人餐試下啦。先黎4杯聖誕沙冰，用火龍果溝香蕉，味道清甜，顏色鮮艷，加上每杯都有個水泡仔墊住，造型夠晒可愛吸引。聖誕大餐當然離唔開聖誕節造型嘅菜式--冰鎮鮑魚聖誕樹。用上西蘭花去堆砌一棵聖誕樹，鮑魚就就好似掛在樹上嘅聖誕鐘一樣咁奪目。味道方面，鮑魚味濃而且有咬口，西蘭花又夠爽口。前菜除左聖誕樹之外，仲有呢個香草三色丸。有墨魚丸、龍蝦丸及蟹籽丸，款款都咁彈牙，配上香草汁更添美味。之後送上每位一盅佛跳牆，內有鮑片、冬菇、雞肉、排骨等等，份量十足。而且熱辣辣送上檯，啖啖都係精華，用黎暖胃最好。聖誕節一定要食火雞？NO，我地有聖誕燒春雞。侍應為每位都預備左手套、較剪等工具，讓大家鍾意手撕食又得，鍾意剪開食都得，而且原隻雞上，霸氣十足。呢味繽紛芥蘭炒帶子，芥蘭夠青嫰，帶子則鲜甜爽口，簡單得黎又夠健康。秋葵含有藥效的成分，對關節保健特別有功效，而且營養價值極高，啱晒有關節痛嘅我。而牛柳粒肉質鮮嫰，牛味香濃，老婆就最鍾意啦。菜式比較多蔬菜類，好在最後都有個珍珠雞，啱晒要有飯到肚嘅友人。用荷葉去包裹，荷香撲鼻而來，啖啖都咁好味。食飽之際，差點忘記仲有個甜品，呢個忌廉咖啡凍，細細件易入口，食落有陣淡淡嘅咖啡香味，感覺滿足。…查看更多

之前食過深水埗倫哥火鍋，價錢合理，味道一流。今次友人提議試埋佢地太子分店嘅海鮮鍋。店鋪喺太子柏樹街，太子站行過黎都係話3-5分鐘，非常方便。呢個海鮮鍋唔係打邊爐，係蒸氣海鮮鍋，價錢$238一位，最近做緊優惠，晚上8點前結帳或10點後入座都有7折，價錢相當吸引，所以友人今次預約左，一黎就可以入座，連店員都讚佢醒目呀。共有8款海鮮供應，每款仲比你選擇用咩配料去蒸，加薑蔥、加虫草花、加蒜蓉、加果皮.....等等而且檯邊仲貼左張紙列明每款海鮮蒸煮時間，但最重要係其實有專人幫你去蒸架，唔怕掛住同朋友吹水唔記得蒸左幾耐，服侍週到，值得一讚。先黎每位一個燉湯，今日係猴頭菇燉雞，熱辣辣咁上檯，而且足料好味。跟住再黎每位一份嘅蠔皇花膠扣鮑魚，花膠質感煙韌爽口，點埋鮑汁就更爽。另外，鮑魚雖不算大隻，但有濃郁鮑魚香氣，質感腍滑。簡簡單單用虫草花去蒸，健康又夠清香，貴妃蚌肉厚而且鮮味十足。店員一早先將海蝦開邊，加入蒜蓉只需蒸兩分鐘就搞掂，快熟又容易剝殼。一打開蓋，蒜蓉味撲鼻而黎。龍蝦我地選擇清蒸，咁先做到佢嘅鮮味嘛，6分鐘時間剛剛好，既可蒸熟龍蝦，又能保留蝦肉本身水分唔好太乾，肉質味美。用薑蔥蒸可去除胜味，而生蠔雖然身形嬌小，但食落都相當肥美，口感滿足。蟹肉夠豐滿，而且爽滑鮮甜，蟹膏雖然不多，但味道甘香得黎又唔太膩，滿口油香。只食海鮮怕唔夠飽？放心吧，店家在最後兩道菜已經預備左飽肚食物。腸粉夠滑溜，加上魷魚新鮮爽口，配上甜醬更覺美味。除左腸粉，仲有呢個十足十二串足料蒸飯，聽個名就已經覺得夠霸氣，配料有雞肉、臘腸、蝦干、粟米、翠肉瓜、南瓜、蝦腩片、芋頭、蒿筍、蒜蓉排骨等，份量十足，保証你撐住個肚叫飽呀。最後送上甜品，呢個黑糖冰涼粉睇落好似食緊冰，其實係透明涼粉，黑糖只有微甜，相當健康美味。P.S 在店家官方社交網站比個LIKE，每位送一罐飲品架。…查看更多

本身想去新蒲崗MIKIKI一田買野，順便食埋飯，但入停車場條隊太長了，於是放棄泊商場，唯有轉入內街搵位泊啦。去到衍慶街，泊低架車，就見到呢間燒皇燒烤雞煲專門店，老婆突然話想食雞煲，我話都好喎，橫掂好耐都無食過了。雞煲有麻辣、酸菜、藥膳，仲有養生推介嘅椰子雞，半隻$168、全隻$228，剛巧隔壁檯就係食緊椰子雞煲，比佢個椰香吸引住，於是就決定叫呢個椰子雞煲。除左雞煲，呢度仲有各式各樣嘅串燒，海鮮類、肉類、素食類等等最平$12已經有一串，價錢合理，人多可以叫多幾款添。ORDER完串燒，雞煲就黎啦，原隻雞夠晒肥美，店員將雞倒入窩內，話等12分鐘係最佳時間。轉頭一打開蓋，椰香撲鼻。再黎每位一碗椰子雞湯先，味道清甜，夠晒滋潤。炒蜆夠辣夠惹味，最重要係無沙，唔會食到「嗉嗉聲」，而且都幾大隻，份量又多，成碟滿滿咁上檯。蟶子王同大扇貝同樣份量十足，而且都做緊優惠，每隻$45，叫兩隻都只係$80，慳番啲錢又可以叫多幾串串燒啦。呢條大烏頭因為分左邊，燒得夠香又唔會太乾身，而且啖啖肉，非常吸引。串燒到啦，有燒牛舌、燒雞腎、燒雞軟骨、燒牛柳粒等，全部都燒得夠香口惹味，老婆就最鍾意牛舌，而我就鍾意佢個牛柳粒，啲調味料入晒味，正呀。食完雞煲，個湯底點可以浪費佢，梗係用埋黎打邊爐啦，我地ORDER左魚腐、花枝丸、自家雲舌、響鈴等，配合椰子雞湯底，味道一流。又雞煲又串燒又打邊爐，最好就整番佢椰青水滋潤下，解喝又有益。…查看更多

今日同老婆出尖沙咀買嘢，行到美麗華商場見到莆田，就被門口嘅紅菇擺設吸引左埋去。莆田係少數獲得米芝蓮一星殊榮嘅餐廳，再望望個餐牌，其實價錢都唔貴吖，於是就決定今晚喺度開餐了。呢度嘅招牌菜多不勝數，除左「紅菇燉土雞」、仲有莆田10醉，每款都別出心裁，用心製作。前菜先黎一碟黑醋木耳，老婆話木耳好爽口但醋味較重，而我就覺得啱啱好，可能我比較重口味吧。蝦苗拌頭水紫菜--紫菜經醋煮過後味道酸甜，認真開胃，而且紫菜營養豐富，好味又有益。作為莆田主食銷量冠軍，呢個莆田滷麵配料非常豐富，鮮蝦、海蜆、肉絲、雜菜等，而且份量十足，一窩足可3-4人食用，呢個莆田獨創嘅百秒黃花魚，魚肉鮮甜，骨少肉多。聞說是以明火燜100 秒後即上碟，就可體現黃花魚嘅鮮味。故以「百秒黃花魚」而命名。酥炒芋芯用上優質「檳榔芋」，炒得外酥內軟，夠晒香口，絕對讓你可以食過不停。最後就上呢個當季推薦嘅紅菇燉土雞，用文火慢煲黑腳土雞4小時，再加入紅菇燜煮多15分鐘，讓紅菇嘅香味同顏色慢慢滲入湯裡面，個湯夠晒鮮甜美味，而紅菇更係營養價值相當高，有養血、滋補、解毒等功效。米芝蓮一星餐廳果然無介紹錯，我同老婆決定下次叫埋阿爸阿媽黎試下，相信佢地一定會鍾意。…查看更多

香港地做食肆認真唔簡單，記得上次黎同一地點嘅時候，仲係做緊日式放題，相隔幾個月就變左做養生火鍋，不過唔緊要，最重要係有好嘢食吖嘛。呢間牛膳養生牛肉火鍋，晚市分4種牛肉火鍋，當然價錢越高，牛肉質素就越靚啦，而時間就各款都有120分鐘，夠晒時間慢慢歎，其實慢食都係養生嘅其中一種方式黎嘅。可能平日關係，加上我地比較早黎，仲有卡位坐呀，座位都尚算闊落。一坐低除左揀食邊款嘅牛肉之外，仲有4款花茶你揀，分別係洛神瑰麗花茶、桂圓紅棗杞子茶、桂花桂圓甘露同蜂蜜檸檬薄荷茶，最後我地揀左桂圓紅棗杞子茶，枸杞子有明目、滋補肝腎功效，紅棗補氣養血，好味又有益，確係又一養生之選。揀完花茶，又到揀湯底嘅時間，最後決定揀人參雞湯，其實烏雞我都想試，但唯有下次先啦。除左湯底，仲有特選配料都係order叫嘅，好似脆肉鲩、廣島蠔、海蝦、雞子等等。搞掂晒啲花茶、湯底，就出去攞飲品，有可樂、忌廉、C+、冬瓜茶，原來仲有清酒添呀。仲有其他火鍋配料以自助方式比大家選擇，真係包羅萬有。一返到位就見到刺身拼盤到了，有我最愛嘅三文魚，仲有帶子、魷魚、甜蝦等等。我地揀左$398呢款嚴選澳洲和牛，色澤紅潤，紋理分明，食落充滿牛味，絕對係上等靚牛。海鮮類有白蜆、海蝦、水魷魚、廣島蠔、烏賊等，一定可以滿足到好海鮮嘅朋友。呢度係用煙囪形嘅火鍋器具，每次見到總係覺得用呢款先真係似打邊爐，有氣氛啲，食落都覺得好味啲架。最後食飽火鍋都記得試下呢度個芝麻糊，啖啖芝麻香，加上甜度適中，比起坊間好多糖水舖都做得好，真係好味又有益。…查看更多

呢幾日翻風，開始感覺到秋天俏俏地來了，不期然又勾起食火鍋嘅念頭。今次揀左旺角嘅牛陣，喺砵蘭街朗豪坊對面文華商場3樓，位置非常方便。我地入座時間尚早，人流不多，加上餐廳地方夠闊落，難得喺旺角食飯都無擠逼嘅感覺。坊間以牛肉為主題嘅火鍋店成行成市，要突圍而出自然就要搞下新意思。今期牛陣推出呢個名為「冬蔭美鍋」，只要你惠顧$219或以上嘅放題套餐，就可以選擇呢個期間限定嘅「冬蔭美鍋」，除左牛肉同海鮮同泰國象啤任飲任食之外，放題時間仲會自動升級至100分鐘，認真超值。而呢個「冬蔭美鍋」最特別之處就係以DIY方式去整，佢有個指引跟住做整可以了，連平時唔入廚房嘅我都搞得掂，加上店員都會主動過黎協助，咁就唔駛擔心啦。先放和牛脂肪逼晒佢啲油出黎先，再放各款調味材料同埋鮮蝦魷魚炒30秒。將一早預備好嘅冬蔭湯底慢慢倒入鍋內，轉大火煮滾，咁就完成啦剛剛整完個湯底，轉個頭澳洲上級長期穀飼牛、豚肉、牛舌，加上生蠔及魷魚已火速送到。其他食物以自助形式任揀，一般火鍋材料好似生菜、豆卜、炸響鈴、芝士腸都有，連比較少有嘅秋葵、羽衣甘藍、虫草花都有，相當吸引。唔飲象啤的話，仲有各式汽水同檸茶都係無限供應。食完火鍋，梗係要幫襯下甜品區啦，佢有4款哈根大師雪糕，老婆就當然唔會放過佢個朱古力味啦。最後就係送上每位幫襯呢個「冬蔭美鍋」先有嘅「ISEE ISEE芒果糯米飯味手工雪糕一枝」去專門店食要$48/枝架，食落真係有芒果糯米飯，味道唔錯。總括黎講，呢個「冬蔭美鍋」絕對值得一試，就算你係唔食得辣嘅，只要加調味料時唔放辣椒就可以。淨係免費升級100分鐘放題同最後「ISEE ISEE芒果糯米飯味手工雪糕」已經值回票價。…查看更多

而家荃灣真係幾時都咁多人，今日約左朋友去荃灣廣場買野，到左晚飯時間，間間食肆都大排長龍，幸好友人係街坊，佢地話外區客通常都喺商場食飯，但佢地街坊就鍾意街邊食肆，通常比較人少，而且人情味多一點。友人就帶左我黎呢間COSSI西餐廳，就喺荃灣廣場隔離大壩街，走出商場，即時無左人逼人嘅感覺。餐廳分左上下兩層，樓下有BAR檯，旁邊亦有幾張餐檯，食飯飲酒任君選擇。而侍應就安排左樓上雅座比我地。樓上可自成一角，傾計都可盡情一點。主菜有多款選擇，有意大利飯又有各式扒類，有咸豬手、肉眼扒、牛肩扒、羊膝等，咁啱我地幾個都係食肉獸，啱晒我地呀。另外，所有主菜或飯類加$38就可轉套餐，包沙律、餐湯、咖啡或茶，夠晒豐富。由於我地坐樓上，但侍應都要招呼上下層客人，所以佢地設置左呢個按鈴比上層每一檯客人，當有需要時，按一按鈴，馬上就有侍應來，好貼心嘅服務呀。我地個個都加$38轉套餐，今日餐湯係南瓜湯，色澤較淺，味道較淡，但最緊要係個湯夠熱，都ok啦。套餐仲有沙律菜及麵包。沙律菜配有醬料，酸酸地夠醒胃，做前菜最合適不過了。咸豬手烤得唔錯，外皮夠脆而裡面嘅肉又唔會太乾，而且又拌有少量黑椒汁，加上用鐵板上，可保持豬手嘅溫度，唔會咁快變凍，因為豬手一凍就唔好食架啦。炭燒美國極黑安格斯牛肉眼扒，牛扒份量算大，食落仲有陣陣炭燒味夠香夠濃，友人讚不住口。而呢個炭燒美國牛肩扒5成熟唔會太乾身，切起上黎好輕鬆，放入口仲有濃厚肉汁，牛味十足。幾個朋友食下傾下計，坐左成晚，餐廳又唔會催你埋單，下次傾計食飯又有一個好地方選擇啦。…查看更多

父母總係鍾意上茶樓食中菜，但係屋企樓下果間屋村酒樓又食得太多，開始覺得悶。橫掂呢排天氣幾好唔熱又無落雨，我就提議去屋企附近富臨酒家食飯，我仲記得細個間中阿媽都有帶我黎飲下茶架。富臨呢度嘅選擇比起屋企酒樓多好多，又有冬瓜盅、各款燉湯、最強海鮮推介等等，真係睇到餐牌都已經覺得好肚餓了。另外，仲有晚飯3寶推介，加上一系列精選特價小菜，樣樣都咁好味，既然係咁，我地決定唔叫飯，只叫餸。由細養成嘅習慣，就係開飯前先飲湯，呢個金銀菜燉白肺，可以潤肺止咳，而且阿媽話洗豬肺好麻煩，而家出街食唔洗自己洗又有得飲，特別好味喎。限量每位只可叫1份嘅蠔皇八頭鮑魚扣金錢，特價只需$26.8一位，冬菇大大隻，鮑魚就炆得夠腍。真係估唔到，有冬菇、鮑魚食$30都唔駛，去邊度搵呀。老婆最鍾意食泰式炒通菜，加上新鮮爽口嘅蝦球，所以就叫左呢個泰皇蝦球炒通菜。有阿媽鍾意嘅豬肺湯，又有老婆鍾意嘅炒通菜，咁又點少得老爸至愛嘅火腩大鱔煲呢。半肥瘦嘅火腩肉，混入呢個惹味十足大鱔，食得老爸津津有味。脆皮豬手份量夠大，而且外皮煮得非常香口，但略嫌比較乾身，但整體黎講尚算不錯。雖然話今晚唔叫飯食，但為免老爸半夜要起身煮麵食，最後都叫個生煎菜肉包比佢，生煎包最重要係夠熱，底部煎得夠燶夠香，我都忍唔住食左兩個呀，哈哈。…查看更多

近中秋了，果日問老豆及老媽子想去邊度食飯，老豆話想食火鍋，老媽子話想食大閘蟹。兩樣野雖然風馬牛不相及，但好彩我平日出街食飯多，好快就搵到個地方滿足晒兩位老人家。今次就帶佢地黎太子呢間四季文昌啦，喺荔枝角道維景酒店對面。港鐵太子站行過黎都係5分鐘，非常方便。呢期做緊期間限定，日本大閘蟹，每隻只係$38，認真吸引。上完樓梯就見到呢個佈置，好有中秋氣氛呀，最啱同朋友影相/打咭之用。餐廳佔地全層，地方夠大，所以4個人都可以比張大圓檯你，可以坐得舒舒服服。呢度主打海南文昌雞，又名蔡氏雞，是廣東八大優良雞種之一。文昌雞出名肉質鮮嫰，雞味濃郁，用黎火鍋簡直一流。我地用海南文昌雞放入椰子水裡煮7分鐘，雞肉滲入淡淡椰子香味，健康又美味。而且雞肉又唔會「鞋」口，7分鐘應該係經過精心計算過嘅。呢個四季牛肉拼盤有--A4和牛肉眼、黑安格斯牛小排、手切安格斯牛頸脊、牛舌粒、牛柳粒。全部都係頂級牛，而且紋理分明，食落更係肉味香濃，口感十足。平日火鍋都會叫啲零吞或者水餃之類，但喺呢度我地ORDER左呢份蟹粉鮮蝦水餃，每隻都十分巨大。咬落除左鮮蝦嘅味道之外，仲有濃濃蟹粉味。新鮮墨魚滑沾滿粒粒蟹籽，夠晒彈牙，旁邊的白色蟹仔則盡顯廚師刀功之利害。期間限定嘅大閘蟹，共有4款口味，分別係紫蘇葉、龍井、薰衣草及菊花，蟹膏及蟹黃都相當美味，食完感覺非常滿足。飲品方面，我地揀左鮮搾西瓜汁、菠蘿沙冰仲有椰青，全部都夠晒冰凍，一邊火鍋，一啖凍飲，爽呀最後黎埋呢個海膽蟹粉煲仔飯，一上檯店員就溫馨提示我地焗一焗個飯先。幾分鐘後再打開，嘩啲香味撲鼻而來，然後將海膽同蟹粉撈一撈，令到每粒飯都沾有海膽蟹粉，更覺美味。…查看更多