running12的个人专页

又係趕開會，又係中環，今次去到中遠大廈。N年前，呢度隔離新紀元最出名梗係大家樂，執咗九世；其實仲有間快靚正，就係華御結，求其買個飯糰咬兩啖又飽，點知執埋，成個新紀元啲舖成日轉，連1樓間酒樓都冇埋，但原來有間舖屹立不倒，偏偏係消費能力幾高嘅地區，最做得住係車仔麵。其實呢間嘢開咗冇幾耐就試咗一次，不過不失啦，但做到今時今日都仲健在，正常估計都優勝過同區執咗嗰啲舖頭，原來又真係。今次試新嘢食，食佢哋個小窩米線，好多人當麻辣火窩咁食，其實肺炎之後，已好少打邊爐，麻辣火窩更加好耐冇食，一於頂下癮。點咗自選麻辣小窩，餸係午餐肉、芝士腸同墨魚丸。墨魚丸唔係最cheap食到成口粉嗰啲，夠彈牙，索咗個麻辣味堅正；午餐肉先驚喜，我食嗰塊啱啱煎起，香口到爆，索埋個汁，好似真係食緊麻辣火窩咁。其實都未講個汁，正常辣度之餘，最緊要夠麻，麻真係好重要，得個辣字係冇用。整體好回味。如果下次再試，會試豆卜、雞翼同水餸更索味嘅配料。…查看更多

去中環開會，想食個快，點知見到新開嘅Aussie Grill By Outback，一於試試。Outback一向唔差，兩個人點咗美國和牛切片西冷同烤挪威三文魚扒，份量精致，個牛扒腍得嚟有牛味，水準之作，驚喜係個魚扒，微翠又唔會過火。由於佢有埋畀酒牌，所以叫咗杯啤，仲嗌咗杯Mocha，酒配扒正呀，杯啡就麻麻。整體堅OK，係唔夠飽啫。會翻食。順帶一提，間舖好開揭，夠醒神，感覺好好。娛樂行個位又夠方便，易搵位，落單快上菜快，速食好選擇。…查看更多

一向係食肉獸，中環近排冇啖好食，威靈頓街翠華都執埋，Lunch恐慌性冇嘢食，咪周圍尋下寶咯。行咗去和安里，之前食過間越南河，原來變咗拉麵舖，仲係齋嘅拉麵，即係叉燒都冇塊，見佢乾乾淨淨，咪好又一餐唔好又一餐咯。兩個侍應姐姐斯斯文文，成間嘢個feel幾正，舒服。點咗蕃茄湯底、牛蒡丸、秋葵、餃，嘩，原來齋都好好味。牛蒡丸好好味，彈牙又香，唔會好似其他食素嗰啲有陣假肉、膠味，秋葵就正常水準啦，隻餃就犀利啦，一食就知舖頭自己包，啲菜味噴晒出嚟，好似成個田園食入口咁，新鮮有質感，清新舒𣈱。靈魂係個湯，蕃茄甘筍，唔會草青唔會澀唔會太甜。個麵雖細細，但都夠飽，唔使食咁多肉，爽呀。…查看更多

之前喺中環咸靈頓街附近食台灣嘢，一係茶木，一係就鐵牛，今次膽粗粗試新開嘅「大呷台灣」，因為有朋友之前話間嘢麻麻，所以叫做「勇闖」。我發覺，我啲朋友真係冇味覺，食慣大集團嘢，完全唔知小店先正。今晚四個人去，食咗牛肉麵、水煮牛肉、蕃茄麵配雞、同埋小食拼盤、仲有三杯雞。先嚟個拼盤，個醉雞入味到癲，滑得嚟又唔太油；個豆腐仲正，仲滑，配埋XO醬真係惹味；木耳同雪耳好爽，微微酸，好開胃；茄子個秘製汁好好味，得個四舊，好快食晒先碟底。第二快嚟係個牛肉麵，最正係個湯，熬咗好耐，濃得嚟唔似其他台灣菜咁開味精水，飲到冇湯，侍應哥哥就幫我主動加，勁nice。牛肉就正常水準，牛筋就勁出色，又淋又入味，可惜又係得兩條，唔夠喉咯。水煮牛肉就全晚最驚喜，唔係用吉野家嗰啲垃圾合成肥牛，用牛小排，好鬼揼本，肉質好正，而佢個麻辣係正宗台灣style，如果可以配個白飯，就真係perfect池。仲有個三杯雞，嘩精緻到呢，叫都係因為見到隔離枱叫先叫，成煲上啫啫聲又飄啲香味嚟，點忍呀！啲雞又味又嫩，重點係唔會過咸，恰到好處！呢個真係勁驚喜！下次都會再叫。比較遜息係個蕃茄麵，帶甜，女仔應該會鍾意啲，配嗰個炸雞外脆內軟。…查看更多

之前成日想食呢間，但因為自己收工夜，成日去到都已經last order or 已打烊，今晚終於試到。今晚落雨條街又靜英英，但間嘢竟然要排隊，搞到我勁期待。店員已派定餐紙，畀客人點定食乜，幾好呀。我揀咗咖喱豚肉+日式漢堡蛋包飯，其實同碟頭飯分別唔大，不過呢，個蛋好好味，又嫩又香，個漢堡扒好食到喊，勁嫩又Juicy。佢畀嘅汁又夠多，唔太咸，撈飯一流，而且每個餐都兩款味，唔會太單調。Cat Eye重點係招呼幾好，啲店員好友善，一啲都唔hea，唔似得其他受歡迎食店咁，成日對啲客呼呼喝喝。而且Cat Eye啲員工畀你感受到好真心…查看更多

夜晚中環真係冇乜好食，好耐冇食過全宇宙最冇益嘅乾炒牛河，去咗翠華買外賣嚟食。落單時，揭咗好耐menu都搵唔到，可能呢味菜式已經太old school，又冇益，食嘅人已經唔多。終於揭到啦，$72唔連嘢飲，正常合理價啦，中環喎，同埋上咗市喎。落單時，個阿姐好多外賣電話接，又IFC、環球、怡和，證明中環夜晚真係一個食物沙漠。落單到有嘢食拎，只係等咗5分鐘左右，算快，合理時間咯。拎到返Office，佢個外賣包裝真係有讚有彈，第一係袋厚，好穩陣，但唔環保；第二，筷子套裝太靚，堅唔環保；第三，個盒蓋得好穩，如果係食物有湯汁都會好安全，有誠意。到個牛河，驚喜喎，雖然落重油炒，但肉好腍，舊舊都食到，又唔燶冇過火，不過唔知係人炒定機炒嘅呢？…查看更多

見佢新開冇幾耐，又乾乾淨淨咁，$45所以買嚟試咯。先講個紙盒，幾骨子，唔用膠環保啲，食都食得安心，冇咁罪惡感。不過個飯呢，落咗好多蒜喺面，因為本身唔好，而且轉頭要見客，所以「不」走晒。啲🐔呢，幾好味，應有嘅味佢有，佢唔應該有嘅味就冇，口感質感都正常，重要係唔會太肥，食到個口油淋淋。其實中規中矩已好OK，$45喺中環食個泰式海南🐓，想食咗人隻車咩。佢個舖名叫水門，但同泰國曼谷水門嗰間爭好遠，風味都唔同，可能調教過口味啦，但都好食。不過店員有禮貌，舖頭又乾乾淨淨，喺呢區嚟講幾正㗎啦，又多一個食嘢選擇。…查看更多

一支公，尖沙咀唔知食乜，去咗棉登徑豚王。好耐冇嚟，原來裝咗修，以前感覺warm啲，現在以黑為主，就好有型。以前去豚王，多數食「豚王」，因為唔使諗，又好味。今次見佢出咗個海老王，求其點咗，點知出事。個麵好細，唔緊要，我唔mind，98蚊一碗拉麵，唔飽就預咗㗎啦，邊個話過食拉麵一定要飽㗎。但可能我心急，海老王原來冇蝦㗎，頂，我本來想食隻蝦咋。自己又衰，睇字唔睇圖，真係冇蝦㗎。我要蝦呀。所謂「海老王」原來只係加啲蝦味味精，成堆粉咁上，擺明係咪精，但又幾好味。喂大佬，上市咁有錢，畀隻蝦都得掛，海老王要隻蝦啫，點解唔畀我喎。除咗冇蝦，其實整體又ok，又乾淨上菜又快，希望下來再嚟食，海老王會有蝦啦。…查看更多

夜麻麻，入將軍澳探朋友，走人時冇嘢食，去咗元朗正記食嘢，間嘢喺將軍澳，唔喺元朗嘅。睇Openrice，嘩勁劣評，唔知乜事。以前佢有隻舊宵夜，豉椒排骨蒸河粉，勁好食，又惹味田，成日食，50蚊左右有凍飲，抵到爆。今次夜麻麻，成點，突然想食西多，再飲個兒童鴦鴛，阿華田加好立克。個西多，冇大家樂咁工業，好味喎，夜麻麻有新鮮炸嘅西多食，好感動。兒童鴛鴦，幾好味，有奶嘢機會。如果再入將軍澳，夜嘛嘛，一定食元朗正記，因為得佢有開。…查看更多

星期五晚，做到好辛苦好辛苦，喺擺花街附近，好多鬼佬飲嘢，嘈冤巴閉，同朋友搵食之時，無意中搵到嘉咸街呢間Green Waffle。同行友人話，間嘢好好食，以前食嗰時。入到去，嘩佢老闆，附近靜英英，對面間泰國嘢又冇乜人，Green Waffle坐滿人，心諗，老友真係冇介紹錯。我哋點咗一個牛扒粒薯仔鑊仔，幾香口，仲有得溫泉蛋，好味有營養又夠飽。另外仲點咗個牛肉三文治，啲牛肉好足料，仲配埋薯條。後尾多個friend嚟，佢嗌多咗杯類似smoothy嘅物體，加多個肉碎薯條。成枱都係薯仔，好彩三個都鍾意食。之不過，同行友人話，以前好食啲，唔知咪係咪換咗廚嘅關係，不過我就覺得偏咸。但咸得有道理，不過不失，400蚊左右落樓，OK啦。…查看更多

同班舊朋友約飲酒，貪就腳，佢哋朗廷酒店食完飯，去北京道一Aqua Spirit飲嘢，正路丫。搭𨋢上29樓，行上30樓，well，門口齋企，冇人理我哋，企咗5分鐘，自己一行五人搵位坐，「家一樣的感覺」，自己招呼自己，幾好丫。成班人咁耐冇見，梗係狂吹水，邊吹水邊叫waiter同「服務員」（普通話），用齊好雙語，一樣冇人。自問飲嘢都唔少，飲酒地方用Starbucks式招呼，真係第一次見。一行5人，嗌咗枝白酒，2000零蚊落樓，好朋友好酒好景，如果改做自助報務就仲吸引。…查看更多

今日真係做到好辛苦，喺中環放工，一支公唔知食乜，天口涼涼地，想自製「小確幸」，梗係打邊爐。唔係特登想食大餐家樂，但夜晚嘅中環，真係冇乜好食，要食平民嘢，快餐店真係一個幾好嘢選擇。大家樂有幾好食？心照啦，都唔明點解咁多人寫食評，咪又係工場整出嚟，畀分店翻熱之嘛，平民價錢，唔通好食到識飛咩？大家樂打單先搞笑，我嗌個X3餐，美國榖飼牛窩，轉個烏冬，加個檸樂，八十大元。坐定定等攞餸，佢個系統係食物還食物，飲品還飲品，亂到七彩，有個客坐低先翻轉頭，同水吧阿姐講畀漏兩杯嘢，仲俾阿姐鬧，都幾好笑，但食大家樂，預咗㗎喎，你估五星級酒店呀？相反，點火個阿姐好細心，雖然其實都係真係資深嬸嬸，搭地鐵都就快可以兩蚊。佢醒目嘅程度係一個眼神就知個客要點火，點火出手快，快得嚟又唔粗魯，唔粗魯之餘仲要好禮貌，令我對呢間大家樂完全加分，忘記出品部嗰種粗聲粗氣。食物方面，冇乜特別，味精水浸熟啲食物。唯一值得提，係粒唔知咩雲吞，細粒過魚旦，如果人手包嘅話，都幾嘥工夫，細粒到如畀一個正常男人，食五十隻以上先有機會飽。…查看更多

嗰日本來想食大家樂，但見到呢間新嘢，反正都係食晏，咪試下咯。車仔麵一般印象真係好似《食神》咁講，張櫈有咁窄得咁窄，碗嘢有咁細得咁細，但呢間嘢啱啱相反，唔用圓櫈兼有椅背，好舒服，最正係咩，可能因為舒服濶落乾淨，當日Lunch坐低嘅，大部份都係OL，場面都幾養眼，但怕亂影被人誤會，冇影到、唔敢影環境相。價錢方面，三餸連熱飲$55，中環區都差唔多，加上靚環境又係商場舖，計埋條數都算係唔錯。食物方面，估唔到有驚喜。首先係杯嘢飲，我點咗咖啡，佢竟然係即磨嘅，車仔麵玩到咁大真係少見，可能中環人要求高，唔畀靚少少都唔得，反正消費得起。至於個麵，主要試咗佢餐紙推介個黑松露餃同埋牛肋條，個松露餃又幾特別，唔錯。由落單到上菜，啲店員都幾有禮貌，中環金融區，果然唔同啲。…查看更多

嗰日開完會，路過灣仔道，發現呢間新雪糕舖。好多味道都好有誠意，但個人行到熱辣辣，淨想食啲fresh啲冇咁creamy嘅，揀咗檸檬味，好清新，食完個口唔會有酸味，可能係全天然嘢，果然係唔同。後尾未夠喉，食多個伯爵茶味，呢個先係一試難忘，個味濃到令你覺得食過任何嘅綠茶雪糕，都係唔夠味，食完都會心思思再食。如果要舉個例子有幾好味，就係好似特濃朱古力雪糕，啖啖都好似食緊朱古力，而呢個伯爵茶Gelato就好似特濃伯爵茶，女士們小心食完會夜晚瞓唔到。個男人店主幾好傾，睇得出佢對整雪糕好有熱誠，小店嚟講，真係唔錯。…查看更多

全城最貴海南雞，有啲人彈到一文不值，有啲人讚到上天，其實食落口又唔差，但由於太期待，爬咗啖飯先記得影，比較肉酸，新手第一次，請見諒。300蚊一個飯，六星級酒店，其實一啲都唔算貴，翠華食都成舊水，酒店食有環境有service，仲想點。雞肉好嫩，完全冇下欄嘢，絕對可以食到見到成隻碟底； 個油飯都好好味，之前黃秋生呢個飯冇海南雞飯風味，九唔搭八，佢覺得冇風味既原因可能係酒店環境太靚，完全唔同feel，等如你喺酒店食碗雲吞麵，同喺街邊食去比，一定係地踎先啱feel ga wor. 同埋，香港好多海南雞飯都求鬼其，普通人邊識真正海南雞風味喎，係咪先。so far 同朋友相聚幾好，酒店嗌完嘢食任坐，慢慢傾，唔想食西餐，又唔想食廣東菜時 ，呢個雞飯唔使諗食乜，又有一定水準，唔怪得咁多人慕名而來，因為方便唔使諗，鍾意嘅打埋卡，正宗一雞兩味（有得食有得影）。…查看更多