大家樂 (華懋大廈)

营业中

休息中

今日真係做到好辛苦，喺中環放工，一支公唔知食乜，天口涼涼地，想自製「小確幸」，梗係打邊爐。唔係特登想食大餐家樂，但夜晚嘅中環，真係冇乜好食，要食平民嘢，快餐店真係一個幾好嘢選擇。大家樂有幾好食？心照啦，都唔明點解咁多人寫食評，咪又係工場整出嚟，畀分店翻熱之嘛，平民價錢，唔通好食到識飛咩？大家樂打單先搞笑，我嗌個X3餐，美國榖飼牛窩，轉個烏冬，加個檸樂，八十大元。坐定定等攞餸，佢個系統係食物還食物，飲品還飲品，亂到七彩，有個客坐低先翻轉頭，同水吧阿姐講畀漏兩杯嘢，仲俾阿姐鬧，都幾好笑，但食大家樂，預咗㗎喎，你估五星級酒店呀？相反，點火個阿姐好細心，雖然其實都係真係資深嬸嬸，搭地鐵都就快可以兩蚊。佢醒目嘅程度係一個眼神就知個客要點火，點火出手快，快得嚟又唔粗魯，唔粗魯之餘仲要好禮貌，令我對呢間大家樂完全加分，忘記出品部嗰種粗聲粗氣。食物方面，冇乜特別，味精水浸熟啲食物。唯一值得提，係粒唔知咩雲吞，細粒過魚旦，如果人手包嘅話，都幾嘥工夫，細粒到如畀一個正常男人，食五十隻以上先有機會飽。