mavis3456的個人專頁

月頭去完馬來西亞🇲🇾返嚟，呢一日又突然間好想食馬拉嘢。咁啱前幾日喺IG得知深水埗有間新開張嚟自吉隆坡嘅食肆，於是放工就同埋老公去食～本身見到餐廳名已經覺得好特別，然後去到見到啲裝修同餐牌，就知餐廳走玩味新潮路線，成間餐廳俾客人一個輕鬆氛圍。叫咗4樣嘢，當中包括一杯飲料同後上嘅甜品～好卵！緊張咖喱麵 ($58)呢度嘅咖喱麵共有五款口味，主要係配料有分別，有花膠、咖喱雞、龍蝦、鮑魚同軟殼蟹等，而我點嘅就係入門款：好卵！緊張咖喱麵。配料包括流心蛋、魚蛋、怡保炸腐竹、豆卜、芽菜同豆角，湯底湯頭夠曬濃，咖喱不太辣，濃郁色香味俱全。麵條用咗油麵同米粉，增加咗口感～最印象深刻嘅係炸腐竹，好大嚿，又香脆，好想多幾嚿😋😋😋百早咖喱雞乾撈 ($88)乾撈麵嘅咖喱汁比湯麵嘅比較稠，配料大同小異，不過多過隻雞腿～雖然味道有濃一點，而麵條亦掛汁，初時吃覺得挺惹味，之後就覺得有點稍膩了～我們二人都較喜歡湯麵版 蜜都混桔-谷氣 冷 ($33)我哋點呢杯其實係桔仔混酸梅混柚子蜜，然後再配上一枝梳打水。熱辣辣嘅天氣飲好正，真係消暑又解渴！斑蘭巴斯克蛋糕 ($48)餐廳嚟自馬拉，既然有斑蘭甜品，又點可以錯過呢～果然無估錯，呢個真係必食推介！斑蘭巴斯克芝士蛋糕嘅斑蘭味好香，好突出，甚至覺得有啲霸道，咁多年嚟都但無試過咁強烈嘅斑蘭味，蛋糕中間口感質地軟滑，係軟心非唔熟嘅流心狀，恰到好處剛剛好。餐廳整體食物質素都唔錯，當日嘅店員主動，充滿熱誠，服務態度好～餐廳仲有其他小食，下次去再試吓😛…查看更多

小店長期排長龍，之前見過超過20多人在排，大熱天時，好辛苦。前幾日打風前夕，見到人唔多，咁岩又有啲口渴，老公主動話排隊買嚟試下。前面大概5,6人，等咗唔係好耐就到我哋買了～因為雪糕同其他小食分2條隊，所以我哋今次只試雪糕。特濃「黑芝麻」軟雪糕一個$28，我哋揀筒形。好香好濃芝麻香氣，面頭又啲芝麻醬，雪糕有啲沙沙口感，食得出係真材實料黑芝麻，又唔會好甜，唔怪得咁多人排隊買嚟食，黑芝麻控絕對愛上。不過我自己一般般鞋嘅雪糕，試下就夠～…查看更多

好似唔係好多人講呢間福崗開嚟嘅麵包店～除咗開張個陣多啲人講，過年之後好似少咗人講～不過我自己都係前日先第一次去食😆之前怕多人～結論係有心唔怕遲，同埋呢間真係幾好食～首先係個蜜瓜包～睇住佢逐個整嘅過程，好療癒～呢個香港🇭🇰限定嘅 tiramisu軟心蜜瓜包我一直都想試 果然無令我失望❤️中間淡黃個軟心好正 口感好似布甸🍮咁滑而且甜度適中 唔夠膩本身對蜜瓜包無乜好感 但呢個外脆內鬆軟🤤可可味濃而中間仲有啲咖啡☕️味 好有層次食到最後 個包嘅外皮仲係脆嘅 今次真係肥都滿足🤤包控表示：月巴都值了另外，有人推介個熱狗🌭咁啱見到最後一個就衝因為想即刻食 所以麻煩店員翻熱✌🏻一咬，嘩🤯皮脆到爆汁 多到差啲噴到自己～焗熱嘅包體🥖脆得嚟又有啲咬口！成個包最驚艷嘅位係個汁！調得好yummy，加埋焦香嘅芝士🧀真係色香味俱全食食吓發現仲有粒粒薯蓉，無嘢挑剔！👍🏻👍🏻我都買咗嗰個得獎🏆麵包，啱曬鍾意食果乾嘅我～個包放咗3日再食，翻熱之後再放涼食，口感無減，非常鬆軟，但又實在，絕對唔係空氣包～加上超多爆汁嘅提子乾，加埋面頭嘅果醬，超好食！好似食緊panettone咁～愛爆了❤️❣️…查看更多

之前放假無咩做，就去咗愉景灣閒逛加食嘢。星期六嘅愉景灣人流唔多，等車搭車都好輕鬆舒服。之前試過星期日入去，人超多～今次試咗間土耳其餐廳，網上睇相，被佢手臂咁長嘅PIZZA吸引咗，另外見到有自家製的土耳其雪糕，所以就決定食。環境方面，最吸睛的餐廳設有二人心形座位，啱晒情侶打卡。餐廳有室內及室外用餐區，環境舒適，空間感充足，週末假期朋友或家人嚟呢度都唔錯，我哋當日都有一班外籍人士聚餐呢。談回食物，MENU上面選擇多，只係PIZZA我哋都有3款想試，奈何空間同QUOTA都有限，根本無可以試晒，最後就揀咗其中一款。Hallomi Salad香烤乳酪蔬菜沙律　$88呢款沙律好特別，上面有３大塊烤過嘅芝士。佢嘅口感就類似豆乾，但係多少少咬口，同埋濕潤啲。食落同埋有淡淡芝士嘅味道，鹹鹹地咁個人幾鍾意。配上新鮮嘅沙律菜好開胃又健康。Sac Tava土耳其燉牛肉鐵鍋　$158呢個燉牛肉鐵鍋份量只係一人份，但真係超多，一個人有咩可能食得晒。因為用用鐵鍋整，嚟到嗰陣，香氣四溢，牛肉香、芝士香、蕃茄香同飯香，未食已經流晒口水！牛肉用咗唔同香料、加埋洋蔥、青椒、蕃茄等配料，零舍惹味，超好送飯。Mevlana Pide 土耳其披薩 $138土耳其特色薄餅形狀好似船咁，好特別，長過我手臂，打卡一流。我哋呢個薄餅揀咗羊肉，所以船身盡是羊肉碎同芝士。餅底薄身，外皮似焗熱嘅歐包咁酥脆。雖然薄，但口感都保持有咬口。你睇，中間嘅氣孔～～羊肉加芝士，不乏羶味🐑，但可接受。羊嘅油脂配上不突兀嘅芝士，互相融合產生嘅化學效果，真係令人食完一塊又一塊～呢款土耳其經典船型Pizza，真係值得一試！！Turkish Coffee $68嚟之前有上網見過土耳其咖啡沖煮嘅方式好特別，首先將咖啡粉放入銅壺，然後放銅壺喺沙堆上面遊走加熱。當咖啡煮沸時，店員就把湧上來的咖啡倒出，然後繼續加熱，反覆沖煮而萃取出精華。第一次見到咁樣沖咖啡，感覺好新奇～Baklava with ice cream果仁蜜餅跟開心果雪糕 $88呢度嘅甜品幾特別，坊間少有。因為最近開心果大熱，所以我都叫返個開心果甜品～果仁蜜餅嚟到時仲係暖嘅，口感又鬆又脆，上面淋有少許蜜糖同開心果碎，好有層次感。配埋個雲呢拿味雪糕一齊食，有種冰火冷熱交融嘅感覺，完全係多重口感同味蕾享受。本來係開心果味雪糕，但最初畀錯咗，所以事後店員送返一球開心果雪糕畀我哋，好開心！土耳其雪糕同平時雪糕口感唔同，感覺好似比較重身同埋濃稠，我哋仲發現佢原來可以微拉絲XD好有趣～之後GOOGLE返先知道，原來傳統土耳其雪糕會加入蘭莖粉，從而增加黏稠度，令到小販拉長雪糕時不易斷開，今次長知識！…查看更多

之前生日，同事送咗張焦糖燉蛋兌換券俾我今日終於有時間嚟換～其實好耐之前都食過嗰陣時覺得好好食，又凍又熱咁樣～冰火交融咁之後就勁耐冇食，今次再食感覺無第一次食嘅驚艷🫢🫢一樣有好多雲呢拿籽喺底但感覺香味唔太突出😅個燉蛋如果凍啲，冷熱交融嘅感覺突出返啲嘅話會更加好食，同埋令人更加難忘，今次體驗一般。男友覺得偏甜咗啲:(無乜特別佢送埋嗰隻碗，成本都係度，賣$50又唔可以話佢貴，不過佢話唔係鍾意嘅嘢，唔會再買嚟食囉～…查看更多

星期日嘅傍晚到訪，人不太多，坐得幾舒服。飲咗開心果奶昔同點咗薯條🍟～薯條係波浪紋款嘅，無乜特別，應該係叫貨，收呢個價錢食嘅話，真心overpriced>.<對比起five guys，薯條真係相差幾萬呎遠～話說我係會特登俾錢去食five guys 嘅薯條的！😋😋😋開心果奶昔，真係幾正～攪勻嚟飲，每口都係開心果味～佢個底應該滿滿都係開心味醬，好瘋狂😝😝一個人飲嘅話，飲完都飽咗，有人share會開心啲～不過太多太大杯，飲多幾啖會覺得有少少甜。但係，又咁講，美式餐廳，偏甜係正常嘅。…查看更多

之前天氣凍嗰陣，朋友介紹之下，就去咗試呢間火鍋店。我平時好少食火鍋放題，一嚟自己食得唔多，二嚟食物質素參差，所以咁耐以嚟食火鍋放題嘅次數真係1隻手掌數得曬。今次係朋友介紹，加上LUNCH TIME食，又唔限時，感覺無咁大壓力，可以慢慢食；食飽咗之後都仲有時間消化，唔會好似晚餐咁，食到好飽就去瞓覺，勁辛苦。聽講呢間火鍋店食物質素唔錯，店員服務都好，甚具人氣。佢有唔同價錢嘅火鍋套餐，由每位$247-$487不等，主要係牛肉等級唔一樣。我哋揀咗$408 養生涮涮鍋，除咗其他任食食材之外，仲有極級Prime Grade美國安格斯牛頸脊、西班牙伊比利亞黑毛豬、Prime Grade美國安格斯牛肉同西班牙無激素豬肉片都可以任食唔嬲！入座之後，揀好咗湯底，店員喺廚房準備之際，就送上免費嘅前菜小食！嘩，竟然係 shake shake蕃薯條！我勁鍾意，仲要附送唔同口味嘅調味粉——包括麻辣、甘梅粉、蕃茄粉同紫菜。我哋全部味都拆嚟試，覺得最鍾意紫菜粉同梅粉，食完一條又一條，可惜無得REFILL～醬汁同好多任食火鍋店一樣係自己出去醬料吧自由調配，而飲品選擇都唔少，除咗包裝好嘅飲品，仲有一啲特別飲品，如店家自製嘅黑糖冬瓜檸檬茶、愛文芒茉莉花茶同冷泡桂花烏龍茶等。湯底超多選擇，一共有12款咁多數，有養生醉雞、田園蕃茄雞、藥膳姬松茸雞、古早牛肉養生蟲草、日本壽喜燒野菌、芫茜豆腐、麻辣鴨血等……我哋就揀咗養生蟲茸花桃膠雞湯底。湯底清得嚟又勁足料，見到唔少蟲草花同桃膠，啲雞肉又勁滑，感覺好滋補。湯底好夠味，加水滾到最尾都唔會淡晒。因為任食嘅關係，所以套餐裡面嘅食物都可以揀，總數接近60幾款咁多，前菜亦可以無限追加，除咗蕃薯條。而為免造成浪費，客人需要自己用店家提供嘅ipad menu選擇食物同數量。食物種類超多，睇到我哋眼花繚亂。我哋將想試嘅都叫咗小量，試過覺得好食之後再追加，所以一共點咗3輪。值得一提嘅係，店家每一次都上齊，每漏上任何一樣食物，呢樣絕對要表揚！食物種類實在太多，篇幅亦有限，我重點分享一啲推介items：套餐包嘅靚肉一定要食！好似Prime Grade安格斯牛頸脊同Prime Grade 美國安格斯牛肉，脂肪分佈平均，口好重牛脂香氣，齒頰留香；肉質柔軟又有口感，厚薄適中，要encore。而西班牙伊比利亞黑毛豬同西班牙無激素雞豬肉片，我哋覺得肉質都唔錯，味道香甜，絕對係比一般優質肉類高質，鍾意豬肉同雞肉嘅人一定要ENCORE !蔬菜及菌類蔬菌類選擇都多，樣樣都好新鮮！最難得係有羽衣甘藍揀，一定要試！海鮮海蝦肉質新鮮爽彈；手工黑松露墨魚滑同手工墨魚丸😍口感超彈牙，黑松露味好突出，質素都唔錯。超長蟹柳棒鮮甜，肉質細嫩。仲有試咗鱔片同帆立貝，前者爽滑，好食！手工丸及手工餃試咗手工三寶丸同其他幾款丸同餃子，當中以醬爆濃芝牛丸最令人難忘，牛味同芝士都好出色，肉嘅味道夠濃，口感彈牙！自家製手工餃，皮薄而軟滑，餡料新鮮。飲料好特別，我哋最欣賞就係有台式飲品，唔係一般嘅汽水；我哋最鍾意芒果茶，酸酸甜甜，好開胃，又夠fresh！甜品雪糕唔係任食，所以我哋心大心細唔知揀咩好，有HäagenDazs、Movenpick、Dryers同KitKat等唔同牌子嘅雪糕雪條，我哋最後都係揀咗Movenpick！嘻嘻～餐廳夠光猛，環境又乾淨，空間夠寬敞，坐得好舒服。店員服務都好，親切友善，會不停主動加湯同收碟，好細心。餐廳又唔會催人埋單，所以今次真係食得幾爽，當日真係飽到夜晚飯都唔使食XDDD …查看更多

聽人話呢間工廈裡面嘅泰國菜幾抵食，平日放工之後都唔少人特登去食，所以今次我都拉咗個FD去試下。黃咖哩海鮮 $85 （蒜蓉包 加$15）咖哩海鮮咁惹味，梗係要配蒜蓉包食啦～黃咖哩香氣濃厚，帶微微辛辣感；海鮮有青口、蝦同魷魚，份量足又夠豐富。而蒜蓉包好香，但食落一啲都唔油，沾咖哩真係無得彈～加$15就有4塊，真係幾抵。手工泰式春卷4件 $58春卷一份有4條，即叫即炸，上枱時熱辣辣。外皮薄而脆，內餡有肉碎、粉絲、蘿蔔、黑木耳絲等，口感豐富，蘸埋泰式辣醬仲惹味！泰醬酸辣黑豚肉 $128呢個係新出品，所以叫嚟試試～黑豚肉肥瘦相間，脂肪特別爽口，有食豬頸肉嘅感覺。特調嘅泰醬，食落同冬蔭公味有啲似，但問過餐廳，話唔一樣；呢個醬酸辣味濃，可以伴沙律菜食。不過我哋嫌太鹹，有啲偏重口味。椰汁珍多冰 $18　　金鑽鮮菠蘿冰 $20飲品揀咗椰汁珍多冰同菠蘿冰，朋友杯珍多冰好香椰味，入面有綠色嘅珍多粉氣，食落口感爽滑，味道清甜。聽講飯後果最好食菠蘿，所以我就揀咗菠蘿冰，大大嚿新鮮菠蘿，新鮮又香甜多汁！椰皇3重奏 $42呢個甜品最有驚喜～本身係3重奏，我哋呢個有埋原個椰皇上陣，所以應該叫「四重奏」。除咗椰皇之外，入面有果凍、椰奶凍和炸香嘅椰絲，超豐富～果凍同奶凍口感好正，椰香十足，香甜清新，我哋２個搶住食！…查看更多

平日放工約個好耐無見嘅同事見面，所以搵咗呢間方便就腳，坐得舒服，又傾到計嘅餐廳食個晚餐～蕃茄醬菠菜芝士意大利雲吞 $88賣相唔係好吸引，唔知味道係點呢？其實食嗰陣都怕伏，不過食落又無咩嘢。　一共有8粒，外面有好多蕃茄醬，雲吞入面就係菠菜芝士餡，配搭都幾夾，肉醬意粉咁，正正常常，不過皮有啲硬，如果口感軟返啲，有咬口啲就好～芝士牛肉漢堡配薯條　$108本身係想叫一大份薯條，有醬個種，但係當日又唔係咁餓，驚薯條太大份會食唔晒，結果無再另外點薯條，只係點咗呢個餐。牛肉好厚，啖啖肉，牛肉味都重；食落burger嘅包體有烘過，所以特別香口惹味。不得不讚嘅就係啲薯條🍟，真係炸得幾好，下次我嚟嘅話，一定單點薯條。聽講呢度咖啡係用本地Urban Coffee Roaster炒嘅豆，而咖啡師仲親自開班教手沖同拉花班☕️，所以平時唔飲咖啡嘅我，今次都試試！同朋友分別點咗薄荷Mocha同黑芝麻Latte，兩杯飲品嘅拉花都好有心思。黑芝麻Latte $42黑芝麻拿鐵拉花久久唔走樣，好細緻，黑芝麻同鮮奶配搭分量剛好，唔會互搶風頭。芝麻味濃，味道有點像芝麻糊；飲到杯底，更加發現有黑芝麻沉澱咗，證明真係真材實料！薄荷Mocha $ 42薄荷Mocha雖然相對無咁多咖啡味，但係薄荷同朱古力嘅味都無蓋過咖啡嘅香氣，飲完之後，會感覺到咖啡嘅after taste 。…查看更多

未嚟之前，完全無諗過呢度有間東南亞嘢食嘅餐廳。同朋友好耐無見，所以今次搵間無入座時限嘅餐廳，可以坐耐啲，傾耐啲。鍾意食喇沙嘅我，梗係會點有關喇沙嘅嘢食。除咗一般嘅喇沙湯麵之外，呢度仲有自家招牌整嘅喇沙烤雞，貪新鮮嘅我梗係會試埋，朋友亦唔怕伏，陪我齊齊試。另外，我哋仲要咗甜品～無錯，呢度有埋甜品食，所以可以坐好耐～惹味肥牛堆喇沙湯麵 $122海鮮喇沙食得多，所以見到有肥牛喇沙就試吓。個湯底係馬來西亞咖喱喇沙，同平時食開嘅新加坡喇沙唔太一樣，椰奶味無咁重，但湯底都幾濃郁，有香料味，但相對平時，呢個無咁重口味。麵底係傳統摻摻，油麵拼米粉，搭配一堆肥牛，其實覺得唔係好夾，因為啲肥牛只係似烚熟放喺面，索唔到湯底嘅味，有啲失色，下次都係配返海鮮。配料仲有大量芽菜、蛋同豆卜，芽菜無草青味，食苫有種鮮甜味，值得一讚。招牌喇沙烤雞 $258喇沙湯麵食得多，喇沙烤雞真係第一次，而且是招牌菜，一定係必食啦。餐廳將傳統馬來西亞喇沙醬搭配烤雞，風味特別，味道上好難形容，因為同以往食嘅喇沙味好唔一樣，有少少似乾炒咖喱？雞肉入味多汁，食前可以自己唧啲青檸汁，味道層次更加豐富，又可解膩。心太軟配雜莓拖肥醬 $68好耐無食心太軟，外層食落有啲脆皮嘅口感，中間就係流心朱古力醬，加埋頂面嘅拖肥醬食，真係超邪惡！但令我意外嘅係，唔會好甜呢～可能因為心太軟嘅朱古力味夠濃之後，所以同拖肥醬融合得好好～餐廳入口都幾隱閉，大家要去嘅話，一定要望住地圖同埋路面嘅指示牌行，咁樣可以避免行過咗～…查看更多

呢間café 開張到宜家，一直收藏喺我嘅to eat list。幾年前打算去食，但最後都係無食到。疫情過去，我終於食到喇！更難得嘅係，今次亦係約咗差唔多2年無見嘅朋友見面，呢餐飯真係好圓滿咁。餐牌上，食物選擇有好多，前菜小食、麵食薄餅漢堡樣樣齊，我哋2個都鍾意窩夫，所以一定會試窩夫。同時，因為想試埋Tiramisu，所以我哋揀咗鹹版窩夫。結果，我哋揀咗：-芥末洋蔥醬炸雞窩夫 -慢煮加拿大豬鞍架配酸梅蛋黃醬-凍二世祖特濃朱古力-牛油果奶昔-提拉米祖🌟 自家製芥末洋蔥醬炸雞窩夫 $148炸雞窩夫呢個鹹甜組合幾吸引，造型吸睛同打到卡。大大隻太陽蛋舖咗係炸雞同窩夫上面，再加埋食用玫瑰花🌹，呃到唔少菲林。一切開，雞蛋蛋汁就流出嚟～我唔好生蛋，所以蛋黃交畀我朋友～隻蛋煎得幾好，係有脆燶邊嘅，所以我有食到蛋白，好正！炸雞炸到外脆內嫩，食落幾滑，唔乾，配上芥末洋蔥醬一齊食，幾夾；另外周圍都灑滿咗好多花生碎，窩夫外脆內軟，唔甜，按喜好加埋楓糖漿一齊食，鹹甜鹹甜咁，幾特別，令人食完一啖又一啖。♡慢煮加拿大豬鞍架配酸梅蛋黃醬 $198 見到好多人都食呢個，同埋賣相擺盤都唔錯，所以就試。豬鞍勁大塊，又厚切，你可能會擔心會柴，但係呢個係慢煮之後再煎，所有嘢都啱啱好，口感同肉質都好好，食落軟稔多汁，上面嘅酸梅蛋黃醬酸酸甜甜，好醒胃又減膩，配埋絕對有畫龍點睛之效，大推！最底層仲有薯蓉，好滑，不過食到加咗唔少cream，食肥仔嘢XD💛凍二世祖特濃🍫朱古力🍫 $48呢個係佢signature飲品，而且只限堂食，所以我哋一定試。佢用樽入好，一樽可以倒出四至五細杯，多啲人分會好啲朱古力濃度望落幾高，飲之前我就搖勻咗先，防止可可粉沉底。未飲已經聞到朱古力味，飲落有細個似朱古力奶嘅回憶，質地厚身又香滑，但甜度唔會好高，有濃濃朱古力味，好啱口味。如果你係朱古力愛好者，又對呢間餐廳有興趣，就一定要點嚟試吓。聽講要熱朱會有靚拉花，下次去可以一試！🍰 提拉米祖 $108 提拉米祖只限晚市供應，所以都成為咗我哋嘅必食item！份量超足，用大大隻玻璃碗裝住，4個人share都無難度。蛋糕註明用上無菌蛋，大家可以食得安心。外面睇到，有兩層手指餅乾，同mascarpone芝士交疊住，最頂層就係可可粉。手指餅沾上咖啡酒，有咖啡香，唔過濃，層次厚度都岩岩好；Mascarpone芝士比較厚重，打入無菌蛋，口感更加綿密，輕盈軟滑，但不失濃郁口感，所以我哋2個食咗幾啖已經覺得「漏」，不過好滿足～💛💛牛油果🥑🍌奶昔 $52牛油果奶昔大大杯，喝起來creamy，但卻畀人一種清新fresh的感覺，同埋牛油果本身都叫做健康，個心飲完都冇咩罪惡感～推！總括嚟講，食物方面係唔錯，賣相都睇得出花咗心思，令到客人可以影打卡。不過，我同朋友都覺得有些方面存在改善空間。例如，店員的說話措辭和服務態度：雖然餐廳只係有90分鐘用餐時間，當日是星期4，我們未吃完甜品，店員就已經提醒我們時間快到，要先結帳。當時接近9時，而餐廳還有空桌，外面亦沒有客人在等候，店員這樣做感覺令人有點「趕客」。事後上網看其他人的食評，發現這不是個別例子呢，其他客人都有遇上類似的情況，我想店家要注意吓呢。…查看更多

聽說有家以彩虹作主題裝潢嘅ｃａｆｅ，鍾意彩虹嘅我梗係要去啦～同為食朋友平日放工後去，餐廳離朗屏站不算遠，只是５分鐘內嘅步行距離。不過餐廳位於工廠區，晚上人流不多，所以這樣反而適合聚會聊天。餐廳環境闊落，檯與檯之間唔會太近，空間感足；同時係pet-friendly，我哋見到門口有客人帶埋狗仔一齊去食嘢。餐廳有手沖咖啡同特色飲品，前者聽講係由比賽咖啡師即場沖製，不過我唔飲咖啡，試咗紫薯latte～食物價錢唔貴，而且免加一；不過客人要去前台先落單畀錢，然後店員會送餐。餐廳選擇都多，好似酸種麵包、全日早餐、漢堡、意粉、烤肉同小食。本身想食法式可麗餅，可惜暫時唔供應，要等之後更新menu先有得食。我哋唔算好餓，所以叫咗-煙三文魚班尼迪蛋酸種麵包 ($88)-特色烤牛肉 ($188)-蕃薯條配是拉差沙律醬 ($48)-Mocha ($48)-紫薯latte (熱) ($45)蕃薯條配是拉差沙律醬 $48蕃薯條嚟到已經feel到一股「熱氣」，賣相金黃好吸引，份量亦唔少。蕃薯條食落香脆可口，有天然香甜嘅蕃薯味。平時食蕃薯條好少配有醬汁，估唔到原來配是拉差沙律醬食，味道又幾夾呢～煙三文魚班尼迪蛋酸種麵包 $88)本身想試紅菜頭腌三文魚酸種麵包，但係已經賣晒，唯有轉食呢款。不過呢個煙三文魚班尼迪蛋酸種麵包都呃到Like，佢個班尼迪蛋處理得好好，賣相唔只吸引，仲好有內涵～外面嘅荷蘭醬濃稠滑溜，水波蛋一切，蛋汁瞬即湧出，令人口水直流。酸種包口感好好，煙韌有咬口，但又唔會過酸，同蛋汁、荷蘭醬、煙三文魚同ceamy薯蓉一齊食，勁滋味滿足。特色烤牛肉 $188配菜方面，有法邊豆、炒蘑菇同薯蓉。法邊豆入口爽脆，薯蓉好滑好香（應該好肥仔），炒蘑菇有黑椒嘅微辣吊味，好食。牛肉份量多達８安，2個人share都足夠，然而，朋友覺得，唔知個特色係邊，相對酸種包嚟講，略為普通，不過醬汁調味都不錯。紫薯latte $45顏色夢幻，拉花靚，賣相加分；飲落有驚喜，好香滑，而且啖啖都有紫薯粒，甜度又啱啱好，打卡必點！Mocha $48杯咖啡個拉花都幾靚，朋友話飲落幾滑，不過好似好快好多泡，要快啲飲，味道就偏苦。如果去開嗰邊，又有返可麗餅嘅話，都可以再去chill下嘅～…查看更多

搵食點：梅窩麻糬王代價：原味@$5, $25/半打；其他口味$7 @, $35/半打前日同follower交收手作吐司嘅時候，竟然收到麻薯波波餵食，真係十級開心！因為我勁鍾意食，不過自己好懶整，因為整一次好辛苦，自此之後都係覺得買嚟食最開心！佢介紹話係炮台山新開嘅麻薯波波專門店，成間舖就只賣麻薯波波，講到咁神，真係搞到我即時喺地鐵入面啪一個。返到屋企，無加熱，即時食一個！雖然外面有啲硬咗，但真係煙韌，中間唔係空心，尤其係朱古力味，係有啲半溶嘅朱古力喺入面，真係好癲，食到我即時眼都突，好有驚喜！啲朱古力味唔甜又唔假，好正，係大人版口味，覺得熱食應該好正！上網見到原來仲有芝士味同埋紫菜肉鬆味，於是噚日LUNCH就專登由金鐘去到炮台山朝聖，打算買齊啲味試晒佢！去到間舖，唔係講笑，已經有一條人龍～～～我排1X個～附近返工嘅朋友咁岩食完飯，陪我一齊排，可以買多啲，目前每人限買1打～我買齊2款，因為新鮮山爐，個袋都封唔到口，拎到返公司仲係暖架，超正！每個都脤卜卜，圓碌碌，咬入去外脆內軟，個朱古力味真係十級正，熱食啲朱古力真係好似溶漿咁，想用濕潤嚟形容，但又好似好奇怪～對唔住，開始詞窮，但真係推介大家去買嚟試～噚日仲成功荼毒咗減肥話要忍口嘅朋友。見到啲人食完呢間之後，都話好食過銅鑼灣個間好多！！ 噚日去到都只係得原味同朱古力味出爐，諗住問下有無出爐時間表方便大家之後去買，點知估計係老闆嘅叔叔話，佢都唔知，因為係廚房嘅師傅話事，佢哋整咩就賣咩～～～另外我發現原來係有5個口味，不過個MENU遮住咗一款，唔知隱藏咗個咩味呢？有無人之前見過可以分享下？…查看更多

金鐘午餐選擇唔多，今次難得約到同事食飯，就揀咗呢間泰菜餐廳，因為Apinara連續多年獲選為泰國曼谷最佳食府，應該好食同埋夠穩陣，加上地點方便大家，就揀咗。餐廳大，橫跨幾個鋪位，裝修時尚有格調，感覺闊落。泰式炒金邊粉 $128賣相好吸引，有別於平時食的炒金邊粉，呢個喺金邊粉外用蛋網籠罩住，令人食指大動。金邊粉炒得炒得乾身，麵質煙韌彈性，同平時食開嘅唔同口感，相信係餐廳特選嘅泰國材。炒過嘅金邊粉食落一啲都唔油膩，仲有蝦仁、花生碎、豆腐乾等等，仲伴埋辣椒粉，夠晒惹味！咖喱雞飯配冬蔭功  $180套餐除咗有主菜同湯，仲有精選沙律及小食，一個似係炸雲吞，一個係泰式肉碎，前者食落有啲似春卷，好香脆可口；而後者，我就撈落啲飯度一齊食，哈哈！泰式咖喱一向有特色，而黃咖喱雞飯係店家嘅推介菜式，點可以唔試？黃咖喱好香，唔係好辣，幾啱我，撈埋啲飯食最正。雞肉沾滿咖喱汁，香濃惹味；雞肉夠嫩滑，一啖飯，一啖雞肉，好滋味。餐湯就揀咗冬陰功，睇顏色就好對辦，味道好濃，辣度溫和，少少香料味，微酸，飲落幾開胃，不過我自己覺得鹹咗啲，食慣重口味嘅同事就覺得可以。沙嗲豬肉串 (3條) $38沙嗲豬有泰式風味，豬肉腍軟厚實有咬口，沙嗲味偏甜不辣，有花生味。椰青 $38食泰國菜最鍾意飲椰青，解辣解鹹最正，而且又清甜解渴，唔會肥~…查看更多

星期5同朋友7點幾嚟到餐廳，FULL HOUSE，不過咁岩有位，我哋等咗幾分鐘就入座了。餐廳好大，裝修好有度假FEEL，有啲後悔掛住食，冇影到環境相，唔係就可以同你哋分享。我哋住2人檯，檯與檯之間都唔會好近。睇餐牌個時發現餐廳原來同泰國知名泰式甜品品牌Mango Mania合作，所以有啲特別嘅款芒果飲品同甜品可以揀，我哋都有揀嚟食。餐廳仲有每日$1推介精選，不過我哋食唔落。焗大頭蝦粉絲煲 $159焗大蝦粉絲煲嚟到香氣四溢，一嚟到就聞到好濃烈嘅花椒八角香料味，仲有蒜頭、香蔥、南薑呢啲。粉絲份量勁多，寶物沉歸底，我同朋友幾經辛苦先經2隻大大隻嘅開邊大頭蝦夾上嚟放喺粉絲上面影相。蝦肉扎實，仲有蝦膏，不過唔算好彈牙。粉絲好正，因為粉絲將蝦同香料嘅精華吸收晒，超香口又惹味。碳燒豬頸肉 $86我哋望到隔離檯嘅豬頸肉好吸引，份量不少，所以都叫咗碟。唔知點解，我自己成日都覺得，食泰國菜就一定要燒豬頸肉。呢個豬頸肉，一嚟到，未放低已到係勁香，勁濃嘅碳燒風味。肉嘅邊位焦脆，食落爽滑Juicy有肉汁，配埋酸酸甜甜既醬汁，零舍開胃。芒果冰磚 $75呢個冰磚打卡必點，聽講係每日新鮮用泰國呂宋芒果🥭整嘅。芒果肉鮮甜多汁，面頭嘅芒果雪糕淋咗鮮芒果醬同餐廳自己調製嘅煉奶，好濃芒果味～底層嘅棉花冰吸咗芒果醬嘅味，食落超滿足🥰。隔離仲有芒果配埋加咗椰漿同脆米嘅糯米飯，一次過嘆2個甜品，大滿足！飲品我地點咗芒果乳酪同埋椰青特選椰青 $42我好鍾意飲椰耳～啲人話係招牌，就一定要試。招牌椰入口夠清甜可口又多汁，無酸味～最後仲食到好多椰肉，正！芒果乳酪 $38呢杯係朋友飲嘅，佢話芒果打成蓉，再整咗乳酪，所以飲落甜甜哋又酸酸哋，有種透心涼的感覺～…查看更多