黃咖哩海鮮 $85 （蒜蓉包 加$15）
1
咖哩海鮮咁惹味，梗係要配蒜蓉包食啦～黃咖哩香氣濃厚，帶微微辛辣感；海鮮有青口、蝦同魷魚，份量足又夠豐富。而蒜蓉包好香，但食落一啲都唔油，沾咖哩真係無得彈～加$15就有4塊，真係幾抵。
手工泰式春卷4件 $58
春卷一份有4條，即叫即炸，上枱時熱辣辣。外皮薄而脆，內餡有肉碎、粉絲、蘿蔔、黑木耳絲等，口感豐富，蘸埋泰式辣醬仲惹味！
泰醬酸辣黑豚肉 $128
呢個係新出品，所以叫嚟試試～黑豚肉肥瘦相間，脂肪特別爽口，有食豬頸肉嘅感覺。特調嘅泰醬，食落同冬蔭公味有啲似，但問過餐廳，話唔一樣；呢個醬酸辣味濃，可以伴沙律菜食。不過我哋嫌太鹹，有啲偏重口味。
椰汁珍多冰 $18 金鑽鮮菠蘿冰 $20
飲品揀咗椰汁珍多冰同菠蘿冰，朋友杯珍多冰好香椰味，入面有綠色嘅珍多粉氣，食落口感爽滑，味道清甜。
聽講飯後果最好食菠蘿，所以我就揀咗菠蘿冰，大大嚿新鮮菠蘿，新鮮又香甜多汁！
椰皇3重奏 $42
呢個甜品最有驚喜～本身係3重奏，我哋呢個有埋原個椰皇上陣，所以應該叫「四重奏」。
除咗椰皇之外，入面有果凍、椰奶凍和炸香嘅椰絲，超豐富～果凍同奶凍口感好正，椰香十足，香甜清新，我哋２個搶住食！
