FeivouriteFood的个人专页

之前介紹過呢間港式邊爐，湯底同配料都充滿東南亞元素，依家仲推出咗新套餐非常抵食。起鍋係一間喺灣仔嘅新派火鍋店，主打東南亞風既湯底、醬料同埋配料同主打提供無添加食材，加上東南亞風嘅格調裝潢，加上星期六日駐場嘅DJ表演，非常有氣氛。每款湯底仲會配搭特調雞尾酒，啱晒一大班人邊打邊爐邊飲酒。除咗特色湯底，餐廳仲主打直送本地有機蔬菜同本地騸牯牛，取貨至牛皇莫，每日凌晨新鮮屠宰，每日只有5-6隻供應，非常罕有，供應六款唔同嘅部位。店舖嘅裝修都充滿東南亞同港式風味，一出電梯就感受到，門口掛住七彩色燈籠，加上一啲舊信箱同塗鴉。入到去餐廳，係比較80年代嘅香港設計，好似有綠葉窗、霓虹燈，連餐具同埋鍋爐都係用萬壽無疆圖案碗具，餐廳裡裡外外都係打卡位。店舖會播住7、80年代嘅流行曲，星期六10:30pm 後仲會有DJ駐場。-🐮 起鍋二人套餐 💰368 pp呢個係四月新推出嘅套餐，逢星期一至星期四提供，分別有兩人套餐同四人套餐。-🌶️ 絕世混醬 💰40pp（👅: 8/10）呢度嘅其中一個特色，就係佢哋嘅自助醬料區，20幾款選擇，入邊有好多東南亞香料，好似魚露、金不換、泰式辣醬、蝦醬、檸檬葉、青檸、香茅、南薑等，非常有特色，不過價錢偏貴。-1️⃣ 熱浪響鈴午餐肉（👅: 8.25/10）餐前小食係用響鈴包住午餐肉咬落去脆卜卜，食落去非常惹味，不過就無咩熱浪味。-2️⃣ 原條沙巴酸菜魚湯 ＋💰150（👅: 8.5/10）原本湯底係麻辣豆腐卜湯、芫荽皮蛋湯、蕃茄薯仔豬骨湯三揀一，不過二人套餐可以加錢轉其他湯底。酸菜魚用新鮮沙巴魚熬製，可以見到成條沙巴魚，比起一般酸菜魚，魚味比較突出，而唔係平時飲到嘅辣味酸味，酸味唔算好勁，反而辣味比較突出。沙巴魚無骨，入口就唔算好滑好厚，食落啖啖肉。另外呢度既鹹酸菜係師傅自家醃製嘅，食落去仲有酸味。-3️⃣ 潮汕牛拼盤潮汕牛對唔同部位都有唔同嘅稱呼。🥩 吊龍（👅: 8.25/10）吊龍係肉眼嘅一部份，咬落有少少筋位，食落肉味較突出。🥩 匙柄（👅: 8.25/10）匙柄係匙仁下方，肋骨之下，咬落比匙仁彈嫩，食落去肉味最濃郁。🥩 匙仁（👅: 8.5/10）匙仁係連著肋骨，肉中間有細筋，咬落去係咁多款最軟腍，有肉味有小小油脂。🥩 雪花（👅: 8.5/10）雪花應該係頸部位，雖然有小小根，係食落去係咁多款最肥，油脂爆發。-4️⃣ 海鮮拼盤（👅: 8.25/10）紐西蘭蟶子王夠大隻，咬落爽口彈牙，食落去鮮甜。蝦同蠔份量都算大隻，食落去就正常新鮮。-5️⃣ 任選即叫即包餃 (六粒) 三款🥟 香葉肉碎餃（👅: 8.5/10）呢度嘅餃子都好有東南亞風味，香葉肉碎餃餃皮薄身滑身，好似雲吞皮，入口彈牙帶煙韌，入面有肉汁，食落入面有唔小香葉，帶豬肉味，非常惹味特別，值得一試。-🥟 黃芽白大頭菜豬肉餃 （👅: 8.75/10）大頭菜黃芽白豬肉餃餡料飽滿，食落比較清淡，菜既鮮味較突出，有啲似灌湯餃嘅感覺。-🥟 韭菜豬肉餃（👅: 8.5/10）豬肉同韭菜嘅比例啱啱好，韭菜非常之多。-6️⃣ 任選自家手打新鮮丸 (六粒) 三款🍢 梅菜豬肉手打丸（👅: 8.25/10）梅菜豬肉手打丸咬落去相比其他冇咁彈牙，不過有肉汁，食落有梅菜味不過唔會太突出，主要突出豬肉味嘅鮮味。-🍢 手打彈彈牙魚蛋（👅: 8.75/10）手打魚蛋咬落非常彈牙，而且入邊比起一般嘅都鬆軟，食落有魚味。-🍢 九層塔蝦丸（👅: 8.5/10）蝦丸咬落去彈牙，入邊足料，好似食緊蝦滑咁，蝦味比較突出，有小小九層塔味。-7️⃣ 本地有機農場推介當日精選菜拼盤 （👅: 8/10）呢度嘅蔬菜都係來自元朗錦上路嘅濼田農莊，入邊有生菜、皇帝菜、油麥菜、菜心等，蔬菜入口爽口，食落夠新鮮，吸收酸菜湯湯非常適合。-8️⃣ 水雲面 （👅: 8.5/10）水雲面係用日本海藻同小麥搓揉製成，啱晒健康人士，麵質幼細，入口爽口彈牙，掛滿湯汁好食。-🌟整體我覺得呢度最出色嘅係湯底，其次係手工餃丸、牛肉，如果同我其他愛店比較，如果係單點既話，牛肉價錢偏貴，不過呢個套餐有依個牛肉份量，非常抵食。至於湯底唔係好濃個隻，而係比較適合飲個種。手工餃丸最出色我覺得係手打魚蛋同黃芽白大頭菜豬肉餃。新嘅套餐性價比高，如果係正常食量，二人套餐絕對夠飽，多人嘅話，通常會四人套餐再單點嘢食。呢度店員、老細用心介紹，同埋喺度慶祝店員會插播生日歌，而且會大鑼大鼓，呢方面係幾有驚喜，如果係慶祝生日，呢度幾適合。比起一般嘅火鍋餐廳，佢唔係一般酒樓嘅格局，除咗裝修好有舊時香港風味，全晚都會播住廣東歌，星期六10:30pm 後仲會有DJ駐場，不過音量有時會偏高，唔太適合傾計，如果唔鍾意可以同店員講較返細啲。-👅味道: 8.75/10🍴環境: 8/10💰消費: $550-800pp (服務費: 10%)…查看更多

如果鍾意食手工意粉，大家一定有食過呢一間，因為佢除咗係連鎖店之外，佢嘅意粉高質，性價比仲好高。Pici係本地飲食集團Pirata Group旗下既餐廳，主打手工意粉，賣點係高性價比，唔駛大家比過千蚊，可能300蚊就可以享受到性價比較高既服務同食物質素。店舖有製麵嘅區域，可以睇到師傅現場製作麵條，每日都會供應新鮮手製嘅意大利麵。Pici喺香港有好多分店，遍布香港九龍新界，今次幫襯嘅係將軍澳分店，算係最新嘅分店之一。餐廳裝修簡約，同其他分店一樣，一樣係好有情調同埋氣氛，夜晚更加似一間外國嘅小餐館，喺度用餐格外chill。-🍝 Tasting Menu💰290pp呢度嘅Tasting Menu，兩人可以自選2款前菜、3款意粉同2款甜品。-🍞 Bread 💰0-Starters1️⃣ Homemade Meatballs（👅: 8.25/10）咁多個Starters個人覺得最出色就係呢個肉丸，肉丸大細好慷慨，一啖係食唔晒，咬落去唔會話過於鬆散或者太實，係軟熟，食落去係肉味澎湃，佢係一個將豬肉同牛肉混合嘅肉丸，有油香但唔會有羶味，再加上帕馬森芝士同鮮茄醬，同好香既黑椒味，芝士味濃，鮮茄酸酸嘅味道食落更加開胃。-2️⃣ Truffle Beef Carpaccio（👅: 8/10）松露生牛肉片，牛肉切得薄身，上面唔小松露，加上松露芝士醬，牛肉入口鮮嫩，唔駛點咀嚼，主要係松露芝士醬最突出，加上沙律。-Pasta1️⃣ Tagliolini Truffle 💰＋20（👅: 8.75/10）Tagliolini係餐廳嘅招牌，係一個鮮刨黑松露細扁麵。Tagliolini麵條係細扁麵，普遍係2-3mm寬，同Spaghetti差唔多長，呢度既Tagliolini都係新鮮手製既手工麵，咬落非常之煙韌彈牙。意粉上面有新鮮刨嘅一片片黑松露片，實際食落松露既味道都係靠醬汁，黑松露片係提香。而醬汁係由白松露打成嘅白汁，重松露油香味，麵條同個醬汁配搭得非常好，麵條掛汁得來又唔會話食落去太鹹或者味道太稀，醬汁唔算多但足夠。-2️⃣ Lasagna Classica 👅: 8.5/10）係經典嘅牛肉千層麵，上枱嗰時熱辣辣，肉醬份量夠多，麵唔會一夾就爛，咬落偏煙韌，平面既醬汁焗完咬落脆，芝士唔夠拉絲，不過夠香，食落唔會太鹹，夠入味。-3️⃣ Chitarra King Crab（👅: 8.25/10）皇帝蟹吉他麵算係新嘅意粉，呢款吉他麵咬落去硬身煙韌，都算掛汁，加上啖啖蟹肉同蟹肉絲，咬落爽彈，食落有鮮味，麵條會沾滿蟹肉，加上濃郁帶少少辣味嘅蕃茄醬，非常惹味。-Dessert1️⃣ Tiramisu 💰60（👅: 8.25/10）Tiramisu上層嘅咖啡粉同砂糖都落得幾多下，所以如果唔小心第一啖好大啖咁食，食完應該會即刻濁親咁咳。Mascarpone cheese食落係好creamy好幼滑，custard食落係有蛋香味，而下面嘅蛋糕部份唔會話太重咖啡味，因為我個人唔係好鍾意重咖啡味，成杯食落味道偏甜，但唔會話太Heavy，因為下面嘅咖啡蛋糕帶少少苦味中和一下，Tiramisu一定要有咖啡苦味但唔可以太多，而呢個既芝士會重過expresso，ladyfinger夠濕潤，不過份量小啲。整體味道未係香港食過最好食，但係入門級滿意嘅Tiramisu，適合鍾意多CREAM、唔多咖啡味酒味既人。-🌟價錢方面晚餐我覺得係中價嘅意大利菜，如果突然好想食黑松露意粉、意大利雲吞可以一食，但呢個價錢食到呢個質素絕對係滿意，人均300食到手工意粉嘅口感，應該算係香港性價比最高嘅手工意粉同埋意大利菜。用餐體驗都好好，上餐速度算快，食完pasta之後會收晒啲嘢，俾啲新嘅碟同餐具再上甜品。環境都幾好，將軍澳分店好似其他分店咁，有半室外嘅位置，邊食邊望住條街，感覺自身喺外國咁，而且仲可以帶毛孩，不過半室外位置會同間離枱相連。Lunch同埋brunch比起夜晚更加平，人均百幾到二百幾就可以食到前菜意粉甜品，整體係我經常回訪嘅手工意粉。-👅味道: 8.5/10🍴環境: 7.5/10💰消費: $150-300pp (服務費: 10%)…查看更多

冬天繼續打邊爐！之前介紹過唔同火鍋，今次介紹嘅呢間喺酒店入邊，咁啱佢又秋冬限定嘅火鍋花膠系列。canton pot係精品酒店lodgewood入面嘅火鍋店，而lodgewood係ninagroup旗下既精品酒店，已經喺旺角駐足幾年。餐廳搜羅多種火鍋材料，加上滋味湯底、自製醬料同有機飲料，提供否一樣嘅火鍋。餐廳除左主用餐區，仲有好多貴賓室，所以非常適合大班人，人均$500左右就可以用貴賓室，私隱度高，非常適合慶祝。餐廳呢排推出秋冬系列嘅特色火鍋湯底同埋配料，以花膠為主題。-🌶️ 12款固定配料及醬料 💰28pp（👅: 8/10）未落單就會有呢12款嘅醬料，醬料唔馬虎，尤其瘳孖記腐乳王、自家製麻辣醬、自家製沙嗲醬幾高質，麻辣醬食落有麻香，擺低之後想幾時添加都得。-限時精選🐮 花膠花雕醉雞湯 💰338（👅: 8.25/10）今次就試咗呢個限定既花膠花雕醉雞湯，湯底用上新鮮當歸煲製，會首先落醉雞同藥材，煲到咁上下就會再落花膠。湯滾起後，店員會裝好一杯湯俾我地飲，湯底飲落去藥材味突出，醉雞味就唔算好出，不過整體都係清甜，夠晒滋潤，係可以繼續飲嘅湯底。雞入面有唔同嘅部位，建議煲一陣就攞上嚟食。花膠淥一陣就食得，咬落去爽口，係唔錯嘅花膠。-1️⃣ 牛一快樂 火鍋蛋糕 💰668（👅: 8.25/10）呢度可以用火鍋嘅配料切成蛋糕形狀，上面再插一塊生日牌，非常適合慶祝生日，蛋糕有三款，其中一款係牛嘅火鍋蛋糕，由上到下有三款肉，分別係A5鹿兒島薩摩和牛、本地新鮮牛頸脊同美國牛頸脊。A5鹿兒島薩摩和牛薄切，不過好大片，入口軟腍，差唔多入口即溶，食落脂香四溢。本地新鮮牛頸脊比較厚切，咬落去就比較有嚼勁，食落去牛味出。至於美國牛頸脊比本地薄切，入口較腍，一樣食到牛肉味。整體份量如果兩個人食係比較多，如果叫埋其他肉類可能會食唔晒。-2️⃣ 如豬如寶 火鍋蛋糕 💰258（👅: 8.25/10）另一個火鍋蛋糕就係呢個豬肉，用上西班牙橡果黑豚，咬落夠柔嫩，唔韌、唔柴，食落去有肉香，唔會太肥。-3️⃣ 純素的愛 火鍋蛋糕 💰98（👅: 8/10）最後一個火鍋蛋糕係用蔬菜為主，啱晒唔食肉嘅人，用南瓜裝住新鮮蔬菜，中間有粗壯既花生芽、金菇、生菜等。店員會幫手切開啲南瓜再上枱，南瓜淥一陣就食得，如果唔係就會融晒落個湯底入邊。最鍾意係入邊嘅花生芽，夠粗身，咬落比平時嘅芽菜爽口，頂端食落真係有花生香味。-火鍋料1️⃣ 四寶丸 💰108/12（👅: 8/10）四寶丸分別有鮮蝦丸、鮮墨魚丸、蘆筍冬同金華火腿丸，全部都係手打，整體咬落彈牙，比較鍾意鮮蝦丸，咬落好似食緊幾隻蝦咁，非常爽口，有淡淡蝦味。-2️⃣ 響鈴卷 💰68（👅: 8.5/10）響鈴卷係自家製，用上樹記腐皮製作，即叫即炸，咬落去鬆脆，食落去有豆香味，醬汁食落去唔會太酸，幾開胃，點醬汁食好過點呢個湯底食。-3️⃣ 京蔥羊肉餃 💰59/6（👅: 8.25/10）羊肉我覺得羶味先係佢嘅精華，而且呢排係時令，呢度嘅京蔥羊肉餃用上雲吞皮，夠薄身，入口夠滑，食落肉味鮮甜，真係有羊嘅羶香，又唔會過重，食落暖胃。-4️⃣ 花膠陳皮紅棗糖水 💰78（👅: 8/10）最後以花膠系列嘅糖水作結，夠足料，有幾塊花膠，食落清甜滋潤又唔太甜。-Drinks🍻 紫貝天癸 💰88（👅: 8/10）飲落去有少少酸味同埋甜味，比較似冇咁酸嘅酸梅湯，解渴解膩一流。-🌟整體我覺得呢度嘅食物質素唔錯，當中最鍾意嘅係響鈴，肉類都有好多款。環境方面比較適合大班人包廂，無論係一家人、公司、定係幫人慶祝生日都好適合，當日去到都有好幾班人係包廂房，而且佢嘅火鍋蛋糕都好精緻。服務方面值得一讚，店員會定時過嚟幫我哋撇走火鍋面頭嘅油，而且會好細心講解食材。呢排嘅秋冬季節限定系列，用上花膠、滋潤嘅食材，非常特別，食厭咗一般火鍋湯底同配料可以一試。-👅味道: 8.25/10🍴環境: 7.5/10💰消費: $500-1000pp (服務費: 10%)…查看更多

介紹過唔少嘅西班牙菜餐廳，今次介紹嘅係一間地中海菜，不過佢有唔少西班牙菜既菜式，而且佢可以望到維港海景。The Bayside喺一間上年七月開業嘅餐廳，係中環Quiero Más 既姊妹店，位置喺九龍海逸君綽酒店地下、黃埔嘅海旁附近，佔地約6000呎，裝修時尚摩登、寬敞舒適，室外可飽覽維港無敵大海景。餐廳主打地中海菜，包括各款由西班牙華倫西亞到義大利威尼斯既地中海美食，由西班牙廚師主理，供應多款嘅前菜、Tapas、pizza、海鮮、肉類主菜、甜品等，星期六日仲會有brunch Menu。餐廳一入去，首先係室外嘅位置，環境寬敞，包攬維港嘅海景，夜晚喺度飲酒仲會開着火爐，唔使驚凍。室內嘅位置一樣係好寬敞，入邊主要行簡約西式裝潢。入邊仲有開放式廚房、酒吧區。-1️⃣ Steak Tartare 💰168（👅: 8/10）牛肉他他配香脆吐司，生牛肉用上牛肋肉，加上鵪鶉蛋同墨西哥辣椒，份量足夠，咬落會有小小牛筋，加上蛋漿入口算香滑，食落去芥末味比較重，比起肉味重，芥末味有小小辣度。多士咬落香脆，整體算惹味，如果其他調味再重啲更好。-2️⃣ The Bayside Bisque💰148（👅: 8.25/10）濃厚波士頓龍蝦湯入口creamy，飲落去都算濃郁，上面有龍蝦肉加上麵包薄脆，食落去龍蝦有調味，甜甜味，雖然唔係脆，不過同時食到麵包嘅甜味，加左乾邑仲有淡淡既酒香。-3️⃣ Fish Taco (2pcs)  💰78（👅: 8.5/10）香脆魚柳墨西哥夾餅咬落爽脆，帶小小煙靭，有啲似餃子皮，炸魚咬落鬆脆，入邊嘅魚肉算嫩滑，加上千島醬、牛油果醬、墨西哥辣醬，同埋微酸嘅洋蔥、紫椰菜，酸辣層次豐富，整體食落去非常開胃。-4️⃣ Lobster Roll (2pcs)  💰238（👅: 8/10）龍蝦堡係人氣菜式，叫左兩份，麵包咬落鬆軟，外層烘到有小小焦脆，龍蝦碎肉喺上面鋪滿左，咬落去小小彈牙，加上醬汁食落去少少辣，整體食落去包嘅甜味更加突出，如果係大大嚿龍蝦肉，口感應該更加豐富。-5️⃣ Dry Aged-The Wagyu Bavette (150g) 💰258（👅: 8/10）和牛配黑松露醬及有機蘿蔔叫左medium rare，和牛係自家製乾式熟成，厚切，適合切到一塊塊咁食，咬落去都算軟嫩，帶韌勁，生熟程度啱啱好，入邊有肉汁，食落去有肉味，醬汁調味唔算好重，黑松露醬味就冇咩，所以冇蓋過牛味。伴碟有用迷迭香烤過嘅薯菜，仲有有機蘿蔔、烤過既西蘭花，伴碟嘅蔬菜都出色。-6️⃣ Basque Burnt Cheesecake with Raspberry Sorbet 💰108（👅: 7.5/10）巴斯克芝士蛋糕配紅莓雪葩，店員建議先食雪葩清一清味蕾，雪葩食落去酸酸甜甜，幾開胃清新。芝士蛋糕入口紮實，食落去芝士味都算濃郁，有啲似食緊芝士麵包，不過係蛋糕口感，-🍹Spring Garden💰98（👅: 7.5/10）揀左兩個都係mocktails，不過佢哋有Cocktail版本，呢一杯顏色漸變效果幾靚，其實係薰衣草配搭蝶豆花，加上提子同埋梳打水，入口薰衣草味唔算太重，帶有小小果香，整體唔甜。-🍹Virgin Sangria💰68（👅: 8.25/10）呢個係mocktails版既西班牙水果酒，用上提子汁，加西瓜、橙等水果調味，飲落去提子汁果味突出，味道清新，唔算太甜。-🌟整體依度嘅菜式都冇令人失望，個人最鍾意係佢嘅fish taco，食完令人有想去食Taco嘅衝動，龍蝦湯入邊嘅配料調味得幾好。餐廳位置好，包攬維港海景，夜晚過嚟就算唔食嘢，飲酒都特別chill，唔使怕會太凍，因為餐廳會開室外嘅暖爐，如果咁啱喺酒店staycation，或者喺附近返工或者住，都值得一試。-👅味道: 8/10🍴環境: 7.5/10💰消費: $400-600pp (服務費:10%)…查看更多

呢間餐廳想食好耐，因為之前女朋友介紹佢入邊嘅日本酒，好啱我口味，今次終於有機會去佢哋新嘅銅鑼灣分店，而且佢哋尖沙咀都一樣開咗新嘅旗艦店。權八居酒屋係一間來自日本嘅居酒屋，以傳統江戶時代居酒屋風味聞名，喺一間連前日本首相小泉純一郎都鍾意嘅日本居酒屋。主打串燒、蕎麥麵、新鮮刺身同壽司等傳統日式料理，以日本備長炭燒烤，加上時令季節食物，打造精緻巧手既日本料理。銅鑼灣分店喺2013年進駐，喺今年二月搬到去新嘅利園二期店舖。餐廳入邊有燒烤賞酒亭、天婦羅吧，係特大玻璃窗既蕎麥麵製作室可以欣賞廚師製作蕎麥麵既過程。銅鑼灣新店入到去首先係日式庭園嘅設計，用上竹林、砂石、小盆栽等元素，夜晚客人仲可以喺度happy hour，餐廳佔7000平方尺，有240個座位。入邊裝修古樸雅緻，用上天然木材同埋磚瓦，加上朱紅同埋深啡色嘅木材，令人有置身喺舊江戶時代嘅感覺，雅座夠晒和風。餐廳入邊仲有私隱度比較高嘅榻榻米座區，另外一邊係西式餐桌。-刺身 1️⃣ 精選刺身拼盤 (5種)  💰568（👅: 8/10）當日嘅刺身有帆立貝、牡丹蝦、金目鯛、油甘魚、拖羅。帆立貝厚切，咬落爽口，食落清爽；牡丹蝦食落鮮甜；金目鯛魚味濃郁；油甘魚入口腍中帶爽，食落魚味甘濃，帶魚油；拖羅入口綿滑，油花滿滿。-前菜 1️⃣ 炭燒雞泡魚乾 💰98（👅: 8.25/10）雞泡魚乾夠薄身，咬落鬆化，係佐酒小食。-2️⃣ 酸汁伴牛筋 💰68（👅: 8.25/10）牛筋係呢度嘅熱門菜式之一，沿用總店嘅方式製作，入口軟嫩腍身，黏身因為滿滿膠質，食落入味，加上酸汁無咁油膩，食落開胃。-3️⃣ 權八和風薄餅 💰98（👅: 8/10）招牌菜式之一，用餃子皮做餅底，餅底夠薄，咬落去外脆內煙韌，入邊係免治雞肉軟骨同埋菇菌，菇夠爽口，食落去有雞肉味同埋芝士味，兩者幾夾，加上辣油食更加惹味。-4️⃣ 野菜沙律伴大閘蟹膏醬 💰198（👅: 7.5/10）招牌菜之一，檜木木箱入邊係多款蔬菜，好似有羅馬生菜、日本紅心蘿蔔、紫椰菜、甜椒、車厘茄等，配上上海大閘蟹同日本松葉蟹混合嘅蟹膏醬，食落去香味極濃郁，同新鮮嘅蔬菜形成強烈對比。-5️⃣ 炸鮮蟹肉餅 💰138（👅: 8.25/10）都係招牌菜之一，用上鮮拆蟹肉，混合左碎牛肉同埋洋蔥粒，外酥脆，內幼滑、creamy，入邊係一絲絲蟹肉，食落係鮮味，不油膩，上面嘅福岡青椒有解膩作用。-壽司1️⃣ 極上三色卷 💰438（👅: 8.25/10）係權八嘅全新菜式，三色卷入邊係北海道馬糞海膽、拖羅腩蓉、三文魚子，上面係金箔同魚子醬，非常足料同高級。海膽creamy，三文魚子帶鹹香味，吞拿魚腩入口滑有魚脂，入邊仲有爽口嘅蔬菜，整體食落去油脂豐盈帶鹹香，非常滿足。-炭燒 1️⃣ 蔥鹽牛舌 💰78（👅: 9/10）因為日本牛舌唔可以出口，呢度用上美國牛舌，牛舌算係厚切，有小小厚度，入口juicy，咬落厚實彈牙，加上特調蔥鹽醬汁，食落去香濃惹味，齒頰留香，係近排食過最好食嘅牛舌。-2️⃣ 蘆筍豚肉卷 💰68（👅: 8.25/10）豚肉片夠薄，咬落juicy爽嫩，食落豚肉味較突出，加上蘆荀既鮮嫩。-3️⃣ 杏鮑菇 💰48（👅: 8.25/10）杏鮑菇咬落juciy，質地厚實，食落有焦香。-4️⃣ 炭燒大蔥吞拿魚腦天（👅: 8/10）腦天入口軟嫩，食落魚味濃郁，大葱食落清甜。-5️⃣ 雞翼 💰48（👅: 8/10）雞翼用上本地三黃雞，入口肉嫩，食落鹽味突出帶焦香。-6️⃣ 免治雞肉軟骨棒 💰78（👅: 8.5/10）雞肉棒用上雞髀肉、雞胸肉同埋雞軟骨，入口有好多軟骨，口感爽脆，雞肉小小軟嫩，食落有炭香，加上宮崎生蛋汁，入口更滑，食落更加香甜。-鍋物  1️⃣ A5 和牛壽喜燒 💰498（👅: 8.25/10）壽喜燒用上A5和牛，望落色澤粉嫩，入口軟嫩，用秘製壽喜燒醬油烹煮，鹹甜有致，食落油脂豐腴，加上蛋黃入口更滑溜，蛋黃同醬汁結合後更甘甜。配料仲有豆腐、冬菇、金菇、京蔥、葛粉，索左湯汁後更入味。-食事 1️⃣ 權八手打冷蕎麥麵 💰118（👅: 8.25/10）蕎麥麵可以話係呢度嘅主打，因為可以睇到師傅每日製作嘅過程，秘製醬汁用上厚鰹魚、鰹魚花、青魚乾調製。麵條用上北海道石狩沼田頂級蕎麥打磨成粉，入口幼滑，咬落彈牙，加上大蔥同青芥末、秘製醬汁一齊食，食落有蕎麥香。-甘味1️⃣ 十勝紅豆綠茶雪糕最中餅 💰88（👅: 8.25/10）甜品以最中餅作結，紅豆同綠茶不嬲都係絕配，呢度用自家若竹綠茶製成雪糕，加上慢煮嘅十勝紅豆，最中餅咬落薄脆，綠茶香醇不澀，紅豆軟而香甜，整體食落去唔甜。-🥂 十四代 角新 中取 無濾過 生酒 特別純米 1.8L 💰2988 （👅: 9.25/10）14代應該係平民版清酒嘅天花板，之前我嘅日本酒第一朝日鷹係出自同一個酒廠，所以14代一定比朝日鷹更加好飲。呢支可以話係14代嘅入門版，開瓶後會聞到有哈密瓜香味，入口微微甘口帶酸感，果香十足，尾韻帶有小小花果香。配日本料理非常適合。非常易入口，唔鍾意日本酒嘅人都應該飲到。-🥂 Fuji Mountain 💰108（👅: 8.5/10）Cocktail用上日本酒、vodka、富士蘋果汁同百香果汁，飲落去酒味同埋果味一樣突出，夠平衡，易入口。-🌟整體係一間飲酒一流嘅居酒屋，因為餐廳提供嘅日本酒夠高質，如果鍾意日本酒嘅絕對值得一試，今次試咗店舖好多招牌同埋熱門菜式，最鍾意嘅係牛舌，算啦有香港食過最好食之一，蕎麥麵貴為餐廳主打，喺香港都算係出色之作。因為餐廳慶祝新店搬遷，所以3月31日之前部份菜式仲可以有半價享用嘅優惠，好似炸蟹餅、串燒拼盤等，鍾意居酒屋嘅你可以趁機一試。-👅味道: 9/10🍴環境: 7.5/10💰消費: $400-800pp (服務費: 10%)…查看更多

之前都介紹過幾間芝士蛋糕，呢一間都係有人介紹俾我，因為佢係一間人氣嘅芝士蛋糕網店，而且仲開咗Popup Store。Soulgood Bakery喺一間主打巴斯克焦香芝士蛋糕既網店，而且加入創意元素，推出好多特別嘅口味。小店仲喺尖沙咀K11 MUSEA 開設期間限定店，提供好多創新口味嘅蛋糕。呢排仲有好多聖誕嘅特別口味。Soulgood Bakery係尖沙咀K11 Musea 既Popup Store，以粉色為主調，蛋糕櫃一排過，一目了然。-🍰 Crème Brûlée Taro Basque Burnt Cheesecake 💰560（👅:8/10）呢個蛋糕係Soulgood慶祝新店開張而推出既炙燒奶蓋芋泥味的巴斯克芝士蛋糕。去到店舖攞蛋糕嗰時，店員會攞個蛋糕出嚟，即場加上焦糖喺蛋糕表面，再用火槍炙燒出好似焦糖燉蛋既表面，先放返蛋糕入盒。店員建議最好喺半個鐘內食，唔得嘅就兩個鐘內擺喺雪櫃，如果解凍，攞出嚟三四個字就食得。芝士蛋糕睇落去好多層次，解凍後攞出嚟食，外層無好似一般焦糖燉蛋個種脆既口感，不過上層本身係奶蓋，所以比起芋泥同芝士蛋糕入口更加Creamy，而芋泥夠綿密，入口都算香滑，總會有一啲芋頭粒，巴斯克芝士蛋糕層未到好流心個種，偏實在。食落去表層有小小焦香，芝士味未到超濃，反而感受到芋泥自然嘅甜味加上奶蓋同小小芝士味，整體唔算好甜，不過加左芋泥，所以會比較飽肚。-🌟 整體我覺得呢度既芝士蛋糕口味夠晒特別，食咗佢會唔會覺得好甜。期間限定嘅apple crumble、之前推出嘅芒果糯米飯同埋南瓜芝士蛋糕都好吸引，下次都會想嘗試吓。預訂只要48小時之前就得，如果突然間想食芝士蛋糕，都係唔錯嘅選擇。-👅味道: 8/10💰消費: $560 (服務費: NA)…查看更多

燒肉停不了！秋天冬天就係要不斷燒肉同埋打邊爐！今次介紹嘅係人氣燒肉店嘅外賣套餐，啱晒大家可以邊睇世界盃邊燒肉！和牛燒肉一郎係一間主打日本和牛嘅燒肉店，香港有四間分店，算係其中一間香港日本和牛最大取貨量嘅餐廳，每月用十頭或以上既日本和牛，因為係成隻和牛入口，所以可以食到肉眼、牛柳、西冷等部位，仲可以品嘗香港少有既夏多布里昂。 每一隻和牛都有獨立嘅出生證明，可以喺店舖搵到和牛識別番號，就可以check到入口既和牛出生地、出生日期同性別等資訊。-🥩 和牛&特選牛燒肉套餐 (2 - 3人)餐 💰658原價 548優惠價呢排和牛燒肉一郎有最新嘅外賣套餐，都係主打日本直送既和牛，我今次就喺KKday買，所以有優惠價。呢一個套餐係二至三人份量，入邊有一個A4和牛燒肉拼盤、特選牛燒肉拼盤、涼拌小食盛合、雜錦蔬菜、雜菇拼盤、生菜。仲會有獨立包裝餐具同保溫袋。-1️⃣ 特選牛燒肉拼盤（👅: 7.5/10）拼盤入邊有牛肋肉、牛里脊肉、牛肉角切 (一口牛) 、牛外橫膈膜、薄切上等牛舌芯。整體呢個燒肉拼盤都係肉味較重，個人覺得牛肋肉牛肉味最重，牛里脊係牛肉味第二重，而牛肉角切比起一般一口牛唔同，食落唔係得牛脂而係肉味帶小小牛脂，而牛外橫膈膜比較小食到，咬落去比其他部位有彈性有嚼勁，食落去都係牛肉嘅鮮味較突出，而薄切上等牛舌芯咬落都算爽口夠煙韌，食落有小小牛肉味。-2️⃣ A4和牛燒肉拼盤（👅: 8/10）A4和牛燒肉拼盤，雪花紋理好靚，油脂分佈平均，入面有和牛牛肋肉同和牛里脊肉，兩種望落都係油脂分佈平均，雪花紋理夠靚，我最鍾意係和牛牛肋肉，食落去油脂最突出，怕肥可以用佢既燒肉中和一下，而和牛里脊肉食落去係肉味突出，但比起特選牛燒肉入口更加腍。-3️⃣ 涼拌小食盛合（👅: 7.5/10）啱晒燒肉嗰時有小食可以食住先。-4️⃣ 雜錦蔬菜（👅: 7.5/10）5️⃣ 雜菇拼盤（👅: 7.5/10）6️⃣ 生菜 (包肉用)（👅: 7.5/10）套餐好貼心，唔止有肉，仲有蔬菜可以解膩，份量都足夠兩人食。-🌟整體我覺得呢個價錢來講，肉嘅份量都算多，啱晒可以留喺屋企咁燒肉，份量夠兩個人食，如果細食嘅三個人都得。而且有四間分店，遍佈鋪港九新界，佢仲有四至六人份量，所以開party都好適合。-👅味道: 8/10💰消費: $548 (服務費: NA)…查看更多

香港可以無限時，又可以任食嘅火鍋唔算多，之前介紹過兩間，呢一間之前都有介紹過，主打好多火鍋套餐，有啲仲係無限時，啱晒想傾好耐計呀大家。淥鼎記係一間養生火鍋店，主打無限時任食雞煲、酸菜魚、火鍋，仲會送牛小排、活魚刺身、海鮮拼盤同甜品等，有唔同套餐，分別有唔同嘢食同埋唔同野送，豐儉由人，依家就嚟秋天，就好適合去打邊爐。除咗火鍋佢哋晏晝仲會主打精緻點心、中式小菜，酸菜魚可以話係店舖嘅招牌菜之一。店舖環境唔錯，我哋四個人，不過坐咗張六人嘅位，都算鬆動。入邊冷氣足夠。出邊仲有自助區，可以攞自助醬料、飲料、菜、火鍋配料等。亦都可以手機自助下單 好方便。-🥘 鰲拜套餐 💰488/位（4位起）呢個套餐要早一日預訂，餐廳會WhatsApp confirm，套餐除咗有無限時火鍋放題食材，仲有好多海鮮、刺身、牛肉、雞煲/酸菜魚送。最早可以17:30入座任食至22:30。-🐟 黃金炸魚皮 （👅: 8.5/10）第一道前菜係黃金炸魚皮，新鮮炸起，咬落去魚皮好脆，食落去鹹蛋黃味道突出，而且有起沙感。-🦢 椒絲炒鵝腸 （👅: 8/10）鵝腸都算大碟，咬落去都算爽口，食落去冇內臟嘅羶味，不過豉椒味就唔算好入味，我搶已經清走左鵝油，所以食落去唔會覺得膩。-🐚 時令刺身 （👅: 8/10）當日嘅刺身係象拔蚌刺身，加上冰鎮效果，咬落去爽脆，食落去都算鮮甜，唔會有海水味。-🦞 生腌時令刺身級海鮮 （👅: 8.5/10）當日嘅海鮮係西澳龍蝦、天使蝦同埋南非鮑魚。龍蝦用咗蒜頭檸檬去醃，咬落去肉質細嫩軟熟彈，食落去係酸酸地辣辣地，好似泰式既醃法，幾開胃。食完龍蝦啲肉之後，個龍蝦可以比店員切開陣間打邊爐。天使蝦同埋鮑魚咬落去都係爽彈，加上蒜頭同埋泰式辣汁，食落去都係好開胃。-主菜🐟 老壇酸菜魚 （👅: 8/10）主菜可以喺酸菜魚、重慶雞煲、香辣烤魚、水煮牛肉、辣子雞、椰子雞煲揀一樣，我就揀咗酸菜魚，酸菜魚睇落份量都幾多，不過魚就唔算好多，如果以四個人嚟食嘅份量來講。鱸魚入口都算滑，冇咩骨，中辣食落去唔算好辣，反而係酸味比較突出，味道溫和𠸝唔搶喉，不過就少啲層次。其他配料仲有萵筍、金菇、蓮藕、寬粉，吸收晒湯底，食落去小小入味。不過酸菜就唔算好多。-火鍋（湯底6選1） 🥘 花膠美人鍋 （👅: 7.5/10）火鍋湯底可以係芫茜皮蛋、豬骨鍋、麻辣湯底、海皇海鮮鍋、老壇酸菜鍋、花膠美人鍋入邊揀一個，我就揀咗花膠美人鍋。入邊大約有六塊花膠，仲有啲杞子、紅棗，飲落去係比較清甜，味道唔算濃郁，都唔會起膠。花膠咬落就正常爽滑，都算厚身。-一次性送：1️⃣ 現切牛拼盤（👅: 8.5/10）呢個牛拼盤入邊有和牛、小牛排、牛柳粒同牛舌，份量都真係四個人。和牛咬落去軟腍，食落去有油脂香帶小小肉味。牛小排食落去牛味濃郁。牛柳粒咬落夠腍，食落牛味濃。牛舌薄身，不過就咬落唔算好爽口個種。-2️⃣ 現切沙巴躉（👅: 7.5/10）食完酸菜魚，又有一個沙巴躉，覺得有啲重複，而且份量都幾多，四個人嚟講會食唔晒。食落去覺得酸菜魚嘅鱸魚比較少骨，而沙巴就比較多啲，再加上食完酸菜魚先上呢一個，變咗就咁食魚嘅原味，同花膠美人鍋唔算夾，可能要叫酸菜鍋或者麻辣鍋先夾啲。-3️⃣ 胸口油牛丸 （👅: 8/10）牛丸咬落爽彈，有少少肉汁，食落去牛肉味都算突出。-3️⃣ 手工紫菜響鈴 （👅: 7.5/10）響鈴入邊有紫菜，不過比較輕薄，單吃鬆脆，不過浸湯1秒佢就腍晒。-3️⃣ 精選菜籃 （👅: 7.5/10）菜籃入邊有好多菜，好似有冬菇、南瓜、娃娃菜、日本直送白粟米、台灣心裡美蘿蔔、台灣水蓮菜、紫羽衣甘藍。白粟米咬落爽口，食落清甜。水蓮菜一樣係爽口。-任點：1️⃣ 任點火鍋材料 （👅: 7.5/10）另外佢仲有QR code 落單既火鍋肉類海鮮，好似有安格斯極佳級精修肥牛、安格斯牛板翼同牛板腱、伊比利亞黑毛豬、梅頭、紐西蘭羊肉片、鮮雞件、廣島蠔 、海蝦、沙白蜆、手工丸等。除咗落單嘅任食配料，出邊都有自助區，有唔少既丸、芝士腸、公仔麵、響鈴、蔬菜、鴨血、鵝腸、魷魚等，有50幾款火鍋配料，不過食完前邊嘅前菜同埋送嘅火鍋配料已經夠飽。-🥤 飲品 （👅: 7.5/10）飲品方便可以喺自助區度攞，有啲自家嘅涼茶好似竹蔗茅根水，都有大眾啲嘅汽水、菊花茶、樽裝水、纖解茶、解茶等。-2️⃣ 雪糕（👅: 8/10）食完最後每人可以有一杯雪糕或者珍寶熊仔檸檬茶，雪糕方面可以揀Haagen-daz或者熊本熊。-🌟整體我覺得呢度好適合一大班人邊食邊傾偈，因為有啲套餐係冇限時。呢個套餐來講，雖然價錢偏貴少少，不過佢嘅前菜同火鍋配料水準唔錯，食完已經夠飽，唔使再去自助區或者落QR code。不過之前介紹嘅小寶或者爵爺套餐，我覺得都好足夠。-👅味道: 8/10🍴環境: 7/10💰消費: $488pp (服務費: 10%)…查看更多

西環區不嬲都有好多西餐或者意大利菜嘅小店，咁啱有朋友住喺附近，所以成日搵嘢食，今次介紹嘅呢一間小店，基本上係零負評，個個都好推介佢哋嘅漢堡同埋意粉。好漢係一間喺西環主打意粉同埋漢堡嘅西餐小店，餐廳喺上年五月開業，由兩位年青專業廚師開設，聽講係米芝蓮餐廳出身。餐廳會按時令食材，有唔同嘅食物同埋醬汁配搭，好似有自家製香茅味蛋黃醬、蘋果、山楂、青瓜算。除咗佢哋配搭嘅醬汁比較特別，佢哋嘅漢堡都係用竹炭麵包，而且入邊加上薯仔製作，誠意十足，所以每日限量賣40個漢堡。餐廳近香港大學站，行大概幾分鐘就到，門面係墨綠色。餐廳唔大一眼望晒，大概得五張兩人高枱高櫈，餐廳以綠色配水泥風做主調，店員提醒可以將啲袋掛喺牆上既勾，紙巾同水都係自助。店員介紹嘢食都好用心，見我第一次嚟所以介紹唔同嘢食，仲有一塊黑板有其他小食同埋飲品。菜式主要有意粉、漢堡包、小食、同埋有Daily Special 。-1️⃣ Cheesy Jalapeno Fritter 💰58/3（👅: 8/10）呢個係一個好送菜嘅小食，會喺一啲酒吧度見到，係一個炸咗嘅紅椒加芝士，咬落去外層炸得夠脆，比起青椒，紅椒食落去冇咁辣，而且入邊嘅芝士份量唔少，食落去係酸酸地，帶少少辣，係幾開胃嘅小食，隔離仲有有蕃茄粒同埋洋蔥粒嘅橄欖油。-2️⃣ 多汁牛堡 💰106（👅: 8.5/10）呢度嘅漢堡都係用黑色嘅竹炭麵包取代一般嘅牛油麵包，麵包加入咗薯仔製造，咬落去首先夠脆身，因為麵包有烘過，麵包咬落去係鬆軟，食落去係甜甜地，店主解釋係因為加咗薯仔，而且會令到個包唔會好似平時嗰啲咁濕，比較乾身，乾身嘅麵包加上呢種甜味，幾有驚喜，因為我好鍾意乾身嘅漢堡包，市面好多漢堡包因為太多醬汁或者加咗蕃茄，所以太過濕。至於入邊嘅牛聽聞用上意大利牛肉，咬落去唔韌無筋，都算有肉汁，不過食落去牛肉味就唔算好重，唔知係因為得一塊，定係因為比醬汁蓋過咗，可能下次要試吓加雙層牛肉先知道，不過睇其他人嘅食評，大家對炸雞同埋魚柳包嘅評價會高啲，不過嗰刻想食牛係因為平時漢堡都會食牛肉漢堡想比較下。醬汁方面有得揀香茅同埋BBQ，我就揀咗前者，因為覺得後者味道會好重，一定會蓋過牛肉味，醬汁份量唔算好多，啱啱好唔會整濕個包，香茅味醬汁其實味道唔會太重，反而食落去係有少少辣味，有啲似越式香料醃製豬扒嘅味道，令到個包味道層次多一啲，幾開胃。除咗牛肉入邊仲有煙肉、芝士、酸青瓜、洋蔥、仲有一隻叫苦苣嘅蔬菜，煙肉帶小小脆，整體食落去完全唔覺得膩，反而入邊嘅醬汁令到佢更加開胃。麵包睇落去好似唔算大個，不過食落去都幾飽肚，可能我唔算大食，或者因為有叫到芝士通粉。隔離仲有個番薯薯條，比較幼身，咬落去都算脆身，食落去我覺得某一啲夠甜，某一啲唔夠甜，可能係用咗兩個唔同嘅番薯。-3️⃣ 芝士青蔥粗管通粉 💰106 （👅: 8.25/10）煙肉＋💰16之後係人氣之選嘅芝士通粉，入邊用咗水牛芝士、車打芝士、巴馬臣芝士三重芝士，通粉非常掛汁，夠大粒，咬落去都算煙煙韌韌，因為炙燒過，有少少煙燻香味，食落去芝士質地算小小濃稠，夠creamy，應該加咗忌廉，所以唔係拉絲嗰種，食落去芝士鹹香味突出，同時因為加咗檸檬汁，令到食落去係有少少酸味，所以比起一般嘅芝士冇咁膩，係非常聰明嘅做法。加入咗煙肉，令到口感更加脆脆地，食落更加香口惹味，不過成個芝士通粉食落去都幾飽滯，建議都係同朋友share。-4️⃣ 自家製焦糖脆面芝士蛋糕 💰58（👅: 8/10）佢哋得一款甜品，就係呢一個焦糖面嘅芝士蛋糕，上面嘅焦糖脆面，咬落去都幾脆，食落有焦香，唔會太苦，蛋糕嘅質地唔係好流心個種，似new york cheesecake，係比較綿密，至於餅底係消化餅，不過就唔算好鬆化好脆個種。食落去有少少芝士味道，唔算好濃，蛋糕都唔會太甜，餅底食落去有少少牛油香，味道主要係食到焦糖味多過芝士味。店主個方向係唔想整好滯嘅芝士蛋糕，因為食完漢堡包同埋芝士意粉，應該係要有一啲比較清新嘅甜品，所以喺上面加上沙糖桔醬，而且有小小桔皮保留小小苦味，而且係芝士蛋糕上撒上一啲檸檬皮，雖然檸檬皮唔算多，不過作用好大，食落去有少少嘅檸檬香，完全可以中和芝士蛋糕嘅膩，如果你唔鍾意食芝士味好濃或者好膩嘅芝士蛋糕，呢一款好啱你。-🍸 Osmanthus Mojito 💰38（👅: 8/10）呢個係桂花既Mojito，係冇酒精嘅飲品，飲落去薄荷嘅味道比較突出，飲到後期先會有少少桂花香味。-🍸 Pine Gin Tonic 💰68（👅: 8.5/10）呢個係特別版嘅gin，係用聖誕樹釀製既gin tonic，飲落去聖誕樹嘅香味同gin配合得好好，冇一般gin咁難入口，反而係好清新，係幾高質嘅 gin tonic。-🌟 整體我覺得呢度嘅漢堡包幾高質，店主好有想法，將竹炭麵包加入薯仔，令到佢乾身之餘食落有甜味，同我最鍾意嘅香港漢堡包honbo一樣好有想法，都係諗方法令到個包唔會好似出邊嗰啲咁濕，比起牛肉，下次可能會想試吓魚柳包或者炸雞包，可能更加有驚喜。至於芝士意粉食落去比起想像中無咁膩，店主加入檸檬汁呢個想法又係好細心，絕對係迎合香港人嘅口味，因為如果係外國人嘅話，應該會加上好多sour cream令到佢更加重口味。飲品方面呢度嘅gin幾高質，至於芝士蛋糕我比較鍾意流心質地同埋芝士味都突出嘅芝士蛋糕。價錢方面，呢個質素我覺得都算合理，因為出邊要食好食嘅漢堡包，$100係走唔甩，好似honbo個啲要百幾蚊，加埋薯條可能$200，而我另一間愛店cool cousins對比下係比較抵食，因為$100就有埋套餐，同埋要挑剔嘅可能係環境，地方唔算大，而且係高台高櫈，好易滿座。不過呢一間餐廳嘅用心、加上店主嘅熱誠同埋講解，係一間值得我回訪嘅良心餐廳。-👅味道: 8.5/10🍴環境: 7/10💰消費: $150-250pp (服務費: NA)…查看更多

間中就會想飲下茶，之前有介紹過名店，有介紹過凌晨三四點就開既小店，亦都有介紹過米芝蓮推介嘅酒樓，今次介紹嘅係營業到凌晨、可以飲夜茶嘅小店。得閒飲茶係一間主打傳統同創意點心既茶餐廳小店，分店分別有元朗同埋太子，全部點三都係即叫即蒸，價錢平民，所以吸引到好多街坊。當中佢嘅創意點心唔少得動物造型嘅包、甜品等，其他就好似有春風得意腸千島醬脆皮蘿蔔糕，傳統嘅點心蝦餃更加攞過獎。呢度嘅老細曾經係酒樓點心總廚，有30幾年經驗，曾經喺2011年攞過美食大賞、甜品創意大獎、蝦餃之王美譽。環境方面比較似舊式茶居，卡位都算坐得舒服，整體環境乾淨。夜晚嚟食都有唔少人，我七點幾食到九點幾，九點幾都仲有人入嚟食，不過當然某啲點心已經賣晒。-茶芥 💰5/1（👅: 7.5/10）-1️⃣ 得獎蝦餃之王 💰34（👅: 8/10）呢度嘅蝦餃係得獎點心，蝦餃大大粒，蝦餃皮比較厚少少，唔夠晶瑩剔透，不過咬落去係煙靭、黏彈，唔會一咬就爛，入邊嘅蝦肉咬落去爽口，尖荀令到佢更加爽口，偏濕潤，食落都新鮮清甜，蝦肉都有幾多，啖啖肉。-2️⃣ 懷舊香菇燒賣 💰30（👅: 8/10）燒賣入邊嘅餡料係豬肉加香菇，上面嘅係蟹籽，餡料都算飽滿，咬落去豬肉夠爽口，偏軟腍，食落去入邊嘅豬肉唔會太肥，燒賣會食到香菇嘅香味，而且香菇會令到燒賣口感更加豐富。-3️⃣ 春風得意腸 💰38（👅: 8.5/10）呢一個係比較創意嘅腸粉，其實有好多酒樓都有類似嘅版本，而呢一個就係外層係腸粉，入邊包住嘅係好薄嘅脆米網，再入邊嘅係蝦肉、椰菜、粟米、青瓜。腸粉皮夠薄，入口算滑，咬落去好似食緊炸兩，但係比起炸兩更加脆身，好似春卷咁薄嘅炸衣，入邊嘅蝦肉夠彈牙，蔬菜都係好爽口，上面仲會有蟹籽，味道豐富，食落去比較甜，因為有蝦肉同埋粟米。整體食落香口，但又唔會好似平時炸兩咁熱氣或者咁油膩。-4️⃣ 紫薯流沙煎堆仔 💰31（👅: 8.5/10）之後都係一個創意點心，煎堆嘅外層係炸脆左既米粒，咬落去好酥脆，偏厚小小，食落去甜甜地，入邊除咗有紫薯餡，仲有流沙嘅奶黃餡，唔會撈埋一齊，紫薯餡入口軟糯綿密，食落去有淡淡的紫薯味，味道自然唔算甜，奶黃餡夠多，流沙程度澎湃，所以奶黃嘅味道好濃郁，兩種味道不斷衝擊。-5️⃣ 龍蝦湯鮮竹卷 💰31（👅: 7.5/10）呢一款係創業板嘅鮮竹卷，係鮮竹卷上面再加龍蝦湯，不過食落去龍蝦湯味道唔似龍蝦湯，只係鹹味比較突出、質地比較稠身嘅湯，而且湯同埋鮮竹卷冇好匹配，鮮竹卷食落去冇湯嘅味道，因為佢唔係同湯一齊煮，只係後加上去，個湯要就咁飲先有味道。-6️⃣ 豆沙qq小白鼠 💰29（👅: 7.5/10）呢個係一個小白鼠造型嘅豆沙糯米糍，糯米糍外邊嘅係一啲椰絲，糯米皮咬落都算煙韌，不過偏厚小小，食落去入邊係紅豆沙餡，入口算綿滑，味道唔會太甜，不過整體味道比較單調。-7️⃣ 3.6牛乳太陽蛋 💰26（👅: 8.5/10）最後係一個甜品，係一個太陽蛋做造嘅牛乳布甸，布甸入口滑溜，食落去牛乳味非常濃郁，而上面嘅太陽蛋其實係啫喱，整體唔算太甜，係一個好高質嘅牛乳布甸，冇諗過可以喺茶餐廳或者食點心嘅地方食到。-🌟整體我覺得呢度嘅點心幾高質，部份點心有創意之餘，味道都係中上水平，最有驚喜嘅係紫薯流沙煎堆仔，因為喺其他點心店冇食過，春風得意腸就係有食過過，不過呢度水平都唔錯，最後就係有驚喜嘅牛乳布甸甜品。價錢方面都夠平民，而且冇收+1，如果細食嘅人，應該人均唔使100就可以賣單，大食嘅人可能100多少少，因為如果係街坊或者成日食嘅人，夜晚應該會叫蒸飯，因為我想主力試佢啲創意點心所以就冇叫。整體我覺得住太子或者元朗嘅人都可以一試，尤其佢開到12點，真係可以得閒飲茶。-👅味道: 8/10🍴環境: 7/10💰消費: $90-150人均 (服務費: NA)…查看更多

呢排終於感受到秋天嘅感覺，所以係時候係打邊爐嘅季節，今次介紹咗呢一間係新加坡嘅過江龍，除咗招牌嘅美人湯，佢哋嘅粉紅色裝修都係大家到訪過啲原因。美滋鍋係一間喺旺角家樂坊嘅火鍋店，喺新加坡嘅過江龍，喺新加坡樂天餐飲集團旗下，係新加坡非常人氣，喺19年插旗香港，火鍋店以粉紅色為主題，湯底集多國特色，好似有日式Shabu-shabu、四川麻辣、台灣藥膳等。餐廳叫美滋鍋，係因為想打邊爐都可以食得健康，尤其係佢個招牌湯底係膠原蛋白養顏美容鍋，飲落去清甜養生。餐廳最吸引人，就係佢嘅粉紅色裝修，入到門口就見到一隻巨型粉紅色嘅啤啤熊，入邊都係以粉紅色為主，好啱打卡。餐廳空間感十足，枱同枱之間距離都闊落，環境夠乾淨，燈光夠明亮。枱底仲有叉電，櫃桶仲有紙巾，而火鍋爐都有抽風功能，吸走油煙。而且入邊仲有室內兒童遊樂場，啱晒一家大小。餐廳係用平板落單，圖文並茂，非常方便，隔離仲有沙漏俾大家計時。-1️⃣ 醬料 💰20pp（👅: 8.5/10）1️⃣ 小食 （👅: 7.5/10）呢度出邊會有自助區，分別會有醬料同埋小食，醬料種類有廿幾款，而且牆上面會有一啲推介嘅配搭，非常類似海底撈。我自己覺得花生味碟係幾好，另外依度有海底撈，我最鍾意嘅菇醬，所以成日會就咁匀來食。小食方面除咗有生果好似橙、火龍果、西瓜、哈密瓜，仲會有餐前小食，好似花生、雲耳、冬菇、涼拌青瓜，全部都係無限添食。-1️⃣ 膠原蛋白養顏美容鍋(鴛鴦鍋) 💰128（👅: 8.5/10）酸菜魚鍋(鴛鴦鍋) 💰98（👅: 8/10）湯底方面，佢可以揀一個鍋、鴛鴦鍋或者四格，所以同海底撈好相似。我就揀咗鴛鴦鍋，一邊係佢招牌嘅膠原蛋白養顏美容鍋。店員建議煲滾左可以匀湯嚟飲先，湯底係奶白色，睇落去濃稠，可以見到紅棗、杞子、豆腐、香菇、松茸，入邊其實係花膠豬骨湯做底，仲用咗瑤柱、雞肉、雞腳、豬骨、豬手等多種食材熬製，飲落去好鮮甜，係鮮甜嘅雞湯味，帶少少藥材味，煲耐左膠質更加明顯，而且加水都係加返呢個湯，而唔係加水。啱晒女士滋補，又可以補充骨膠原，飲幾碗都唔會覺得口渴。而配料方面，豆腐入口非常滑。至於酸菜魚鍋係佢之前新推出嘅，湯底用四川酸菜、指天椒、紅花椒、青花椒等材料長時間熬製，叫咗中辣，飲落去我覺得係譚仔嘅二小辣到小辣，所以唔食得辣嘅人應該要叫小辣，飲落去係酸味同埋辣味同時突出，唔係後勁嗰種辣，麻味就要飲多幾啖先會有後勁，唔好以為加水就冇咁辣，佢其實會越煲越辣，花椒味會更加出。入邊嘅酸菜份量都幾多，而且食起上嚟都夠酸。另外佢嘅生魚會分開上，店員建議淥15秒就得，魚肉比較厚身，入口偏實小小，不過算小小滑溜，無骨，浸15秒已經好入味。而呢個鍋非常入味，無論係淥肉類定係其他食材，都可以食到酸菜魚湯嘅味道。-2️⃣ 精選牛肉拼盤 💰288（👅: 8/10）牛肉拼盤分別有五款牛肉，有安格斯牛小排、安格斯封門柳、美國牛板健、巴西牛舌、美國牛丁，店員仲會倒水入去乾冰，打卡一流。除左美國牛丁建議淥40秒，其他淥8秒就可以。牛肉全部都夠新鮮，當中最鐘意係安格斯牛小排，油花分佈平均，入口係最軟嫩，食落油脂甘香，帶小小牛味，齒頰留香。至於封門柳咬落係有嚼勁個種，肉味係最濃一款。牛板腱算係牛味同油脂平均，比封門柳嫩腍小小，帶嚼勁。巴西牛舌夠薄身，咬落爽彈，食落小小肉味。️肥牛丁好似骰仔牛，係有咬口個種，部份會有筋，食落油脂好突出，我自己略嫌油脂太勁。-3️⃣ 餃子綜合盤 💰98（👅: 9/10）餃子綜合盤有自家製鮮蝦水餃、韭菜餃、蝦卷、豬卷，每隻餃好飽滿好足料。當中最鍾意係韭菜豬肉餃，呢度既皮都算薄，似雲吞皮，入口嫩滑，食薄去韭菜味突出，入面既豬肉好似醃過咁，非常入味，係我食過數一數二好食既韭菜豬肉餃。珍寶鮮蝦水餃內餡一樣紮實豐滿，入面有粒粒蝦肉，咬落夠彈牙，食落鮮味十足。蝦卷同豬肉卷係長條形餃子，入面既餡料一樣係好飽滿。食完覺得佢係比火鍋耽誤既餃子店。-4️⃣ 丸子綜合盤 💰98（👅: 8.5/10）丸子綜合盤入面有蝦丸、牛肉丸、墨魚丸、豬軟骨爽肉丸，全部都係手打。最鍾意係墨魚丸，真係咬到一粒粒墨魚，非常彈牙，食落鮮甜，如果係芝士版應該更加好食。蝦丸同墨魚丸一樣咁彈牙，有蝦肉本身既鮮甜味。軟骨爽肉丸係豬肉丸，滑身得黎有軟骨爽口既口感，食落豬肉味香，調味得宜。-5️⃣ 炸響鈴(半份) 💰25（👅: 8/10）炸響鈴夠大條，咬落都算酥脆，擺落呢兩個湯都好入味，唔會太油膩。-6️⃣ 鮮准山(半份) 💰19（👅: 8/10）鮮准山夠新鮮，入口爽口，而且都算入味。-7️⃣ 自制水果紅茶 💰25（👅: 8/10）飲品有三款，女朋友叫左水果茶，可以無限添飲，茶壺幾靚，飲落幾香，有水果味但又唔會太甜。-8️⃣ 竹蔗茅根 💰25（👅: 8/10）我就叫左竹蔗茅根，可以無限refill，飲落去清甜解渴，唔會太甜，店員都好主動refill，真係好抵飲。-🌟整體我覺得呢度嘅模式好似海底撈，無論係醬油定係湯底方面，不過食物質素比起海底撈都要高質，無論牛肉、餃子、丸方面都係比海底撈好食，當然佢個價錢都會比海底撈貴，偏中高價既火鍋。另外餐廳粉紅色為主題，好打卡，而店員服務方面幾好，今日會主動refill飲品，亦都會主動加湯。而且餐廳開到12點，我係平日夜晚去，唔算滿座，有人10點幾入嚟Walk in食都得。我7:30食到差唔多10點，都冇俾人趕走，所以係可以慢慢食嘅一間火鍋店，可能假期會多人啲就有時間限制。同埋聽講佢有好多唔同嘅優惠，例如喺OpenRice 定位有六折到八五折嘅優惠，聽講分享同女性朋友用餐嘅相去FB/IG 會有免費特上牛魔皇拼盤，同埋逢星期一到訪美滋鍋，女士可獨家獲得Moon lady特飲同綠野仙蹤蔬菜拚盤1份，計埋優惠，係好值得到訪嘅一間火鍋店。-👅味道: 8/10🍴環境: 8/10💰消費: $300-400 (服務費: 10%)…查看更多

大家平時食Omakase通常都係食壽司，但大家有冇食過雞、豬、牛、甚至係蟹嘅Omakase？今次介紹嘅呢間新餐廳，就係用新鮮食材，為大家提供唔同主題嘅Omakase。山喺銅鑼灣一間新開嘅日本菜餐廳，主打唔同主題嘅Omakase，主題按食材劃分左六個，分別有雞、黑豚、和牛、海之幸、魚同蟹，當中以蟹為最受歡迎嘅套餐。而餐廳係以日本山林為主題，裝修用上柔和嘅淺色木系，令人感覺舒適，而且係餐具、擺盤、石燈、玻璃都係同用色配搭一致和諧，一入到去就感受到喺日本餐廳嘅氛圍。-🦀 蟹 Omakase 💰1388pp今次叫咗佢就係最高人氣嘅蟹 Omakase，套餐係用咗特選毛蟹、松葉蟹、鱈場蟹、大閘蟹等時令靚蟹，用唔同嘅炮製方式，烹調唔同嘅蟹料理，總共有9道菜。-1️⃣ 先付け - 毛蟹柚子啫喱 （👅: 8/10）第一道前菜係人手將北海道毛蟹拆肉，上面再鋪上用魚膠粉同埋蟹醋做嘅柚子啫喱，蟹肉咬落去有少少肉汁，食落去鮮甜，加上柚子啫喱，食落去酸甜，幾開胃。-2️⃣ 前菜 - 雲丹明太子白海老 （👅: 8/10）之後係用明太子伴白海老做下層，上面再加上明太子同埋鱘魚子，白蝦用咗富山灣產白蝦，咬落去比較腍，帶黏口同膠質，海膽食落去唔算醒，加上千島湖鱘魚子同北海道明太子既鹹香味同小小辛香，鮮味十足。-3️⃣ 吸い物 - 蟹岀汁 （👅: 7.5/10）之後嘅湯汁係用利尻昆布同磨成粉既蟹殼淆成，再加入蓮藕粉、木棉花、松葉蟹肉，飲落去係清甜，好暖胃，蟹肉份量算慷慨，令到口感更加豐富。-4️⃣ お造リ- 季節刺身三味 （👅: 7.5/10）之後既係季節刺身，分別係牡丹蝦、深海池魚、帆立貝，攞上枱嗰時仲有乾冰煙霧效果，非常打卡。帆立貝夠厚身大粒，咬落爽口，食落清甜。深海池魚入口軟稔，食落魚味算濃。牡丹蝦一樣夠大隻，入口帶膠質。-5️⃣ 揚げ物 - 釀上海蟹蓋 （👅: 8.5/10）之後係一個炸物，用上大閘蟹同松葉蟹兩款蟹肉，入邊再加洋蔥，甘荀，冬菇做調味，上邊嘅係蟹醬，夠熱辣辣，咬落去係啖啖蟹肉，外酥內軟，而且加上冬菇、洋蔥碎、甘筍碎，鹹甜得宜，口感同味道層次豐富。-6️⃣ 箸休め - 季節雪葩 （👅: 7.5/10）之後係一個間場既柚子雪葩，加上少少檸檬皮，香氣濃郁，食落去酸酸甜甜，清爽唔會太甜，清新一下味蕾。-7️⃣ 燒き物 - 燒鱈場蟹拌雲丹鱘魚子  （👅: 8/10）之後係一個燒物，上枱嗰時店員會攞上陶器甖，打開嗰時可以見到係一個用藁草煙燻既菜式，打開個時聞到好香嘅藁草味，入邊分係一個，北海道鱈場蟹腳同加上海膽燒製嘅蟹腳，一邊可以食到原味蟹腳嘅鮮味同濃郁既煙燻味，另一邊加上火炙海膽同鱘魚子醬，加上熟悉既鹹香味，味道層次感增添唔少。-8️⃣ 食事 - 蟹粉拌烏冬 （👅: 8.5/10）最後嘅食事係一個用松葉蟹芡既稻庭烏冬，另外上一個大閘蟹煮成既蟹粉，蟹膏份量唔少。倒入去烏冬再攪勻，烏冬非常掛汁，咬落煙韌彈牙，每一啖烏冬都掛滿左蟹醬，食落去係啖啖蟹粉香味，鹹香味突出，再加上蟹肉絲，鍾意蟹粉嘅你一定會鍾意。-9️⃣ 甘味 - 無花果椰子雪糕拿破崙 （👅: 8/10）最後以一個甜品做作結，由前五星酒店既甜品大師製造，係一個入邊係椰子雪糕忌廉、上邊係無花果嘅拿破崙，拿破崙咬落去算酥化，配上輕而不膩嘅忌廉，食落有淡淡既椰子味，唔會太甜，兩者一齊食，忌廉融化係酥皮，非常滋味。-🌟整體以蟹做主題嘅Omakase，呈現方式幾新鮮，食物菜式整體都夠新鮮，當中比較有驚喜嘅係釀上海蟹蓋同蟹粉拌烏冬，不過如果大食嘅人，可能呢個套餐會有啲唔夠。每一道菜店員都會好細心介紹，環境上都坐得幾舒服，喺銅鑼灣嘅鬧市入面，如果可以坐到吧枱，就可以欣賞到師傅既烹調過程，同埋可以同師傅有更多嘅交流，不過吧枱嘅位置偏小。下次可能會想試吓黑豚或者魚、蝦。-👅味道: 8/10🍴環境: 7.5/10💰消費: $1388 pp (服務費:10%)…查看更多

從來都冇寫過一篇負評，因為出食評就係諗住介紹我覺得好嘅餐廳，平時食到覺得唔好食嘅餐廳會直接唔介紹，因為唔想可能係自己口味唔同既原因，令到餐廳連平反、進步、改善嘅機會都冇。不過對於服務唔好嘅餐廳，我冇咩容忍度，因為唔想大家入到去中伏，幾好食嘅餐廳，冇服務嘅話，都係唔值得回訪。話說今年諗住買月餅，其實我本身都買咗五、六間，女朋友諗住買月餅俾我屋企人，最尾就揀咗呢一間，因為呢間中菜點心本身都有啲想食，而且有見過Hailey介紹。同埋見到佢嘅口味去陳皮豆沙，幾特別嘅月餅口味，同埋估計我屋企人應該會鍾意呢種傳統月餅，所以最後就揀咗呢間。於是我哋就喺8月26號星期五夜晚去攞月餅，因為見到佢喺IG 8月3號出嘅post係寫11點至7點可以攞月餅，佢email上寫嘅都係一樣時間，咁我哋就諗住七點前攞完月餅就可以攞俾屋企人，不過我哋18:30去到餐廳嗰時見到嘅係相中情況。餐廳一個人都冇，而且熄咗燈，因為餐廳冇門口，只係用一個帶圍住，心諗email唔係寫七點？點解會閂咗門？跟住睇到OpenRice話餐廳係收六點，就一頭霧水。於是我哋即刻打佢IG同埋email上面嘅熱線，但係冇人聽，當刻覺得好似被愚弄，如果你餐廳收六點，點解你IG同email上面係寫七點，但一個人都冇，而且又冇人聽電話，呃咗一個特登嚟攞月餅、諗住即日送俾屋企人嘅人黎中環。我當刻好嬲，所以就喺IG出咗Story tag餐廳，不過餐廳冇回應過，而我女朋友都有喺佢哋嘅IG post問，而且有出email問究竟餐廳係開幾多點。餐廳當晚就回覆咗我女朋友，不過餐廳第一次回覆我哋只係道歉同埋地四個人提供一個tea tasting event，其實我唔想受佢哋恩惠，因為我只係想來攞月餅，如果接受咗佢哋嘅tasting，咁我係咪應該再出story同埋食評去反映真實情況。不過餐廳始終冇正面回覆我哋究竟幾多點可以攞月餅，所以之後我哋回覆我哋唔得閒去tasting，重新再問一次係咪當時OpenRice上寫嘅營業時間(10-6)先係攞月餅嘅時間。(因為發覺佢哋係呢件事之後，喺OpenRice上寫嘅營業時間偷偷地改咗做10-7。)之後餐廳回覆我哋嘅係，營業時間係10點到7點，6點係last order。雖然我仲好嬲點解餐廳冇解釋點解七點前去到係冇人，亦都冇解釋點解電話冇人聽，但我女朋友選擇再相信佢一次。所以喺9月1號我再次嘗試去攞月餅，當日我6:40去到餐廳，但我見到嘅情況係一樣:餐廳一個人都冇，而且都係比條帶圍住，分別只係入邊啲燈仲開緊(其實我冇留意到究竟燈有冇熄，只係睇返相先至第一次有熄，第二次無熄。而喺佢哋門口場上寫嘅營業時間一樣係10點至6點。我再次感到俾人玩弄，嘗試打電話去熱線，都係冇人聽，餐廳已經喺電郵回覆咗係可以七點前攞月餅，咁點解今次又係一個人都冇？我見到條帶下邊有一盒月餅，唔知係display定係就係我嗰盒月餅，但我當然唔敢入去攞，因為佢已經用條帶圍住，我入去會俾人誤會我去偷嘢。攞唔到月餅，我當然好嬲好失望，女朋友當刻都唔想再俾機會，出咗個email俾餐廳，想取消訂單同要求餐廳退款，直接買另一間月餅。之後當晚我女朋友就收到電話，係餐廳嘅經理打嚟，佢話睇相見到燈未熄，係其實入邊仲有人，只係喺入邊埋緊數，又話其實都有顧客同我哋一樣，嚟到餐廳見到燈未熄，就行入去，結果就搵到埋緊數嘅佢哋，就可以攞到月餅。所以佢叫我哋下次攞月餅可以出email通知佢哋先，咁佢會安排一個人喺餐廳，或者直接打佢呢個經理嘅電話。我女朋友當刻被說服左，所以心諗就算，唔再退款，但我真係冇辦法忍受。最後我喺星期六嘅晏晝去攞月餅，結果我要三顧草廬先可以攞到一盒月餅，對於餐廳嘅回應同做法好失望。第一，我點樣判斷餐廳係收咗定係仲開緊？淨係靠有冇熄燈？但你已經用條帶圍住間餐廳，咁我理論上係唔應該入嚟，其他顧客夠膽入嚟，但我唔夠膽，咁點解你唔解開條帶，俾多啲訊息大家餐廳係未關門？見到呢條帶，同埋一眼望晒餐廳一個人都冇，我正常嘅理解就係餐廳已經關門。第二，你都識講有其他顧客都係同樣情況，咁點解你唔直接安排一個人坐喺counter坐到七點？即使你唔安排一個人喺出邊安排交收月餅，咁點解你個熱線喺六點到七點係冇人聽？咁個熱線作用係咩？埋緊數就可以唔聽電話？如果個電話六點到七點係冇人聽，點解你唔喺email或者IG post度寫清楚？第三，我哋第二次寫email要求退款，你先直接打電話回應，咁點解唔係第一次就回覆我哋，話可以直接行入嚟餐廳入邊搵埋緊數嘅你哋，即使餐廳嘅門口俾條帶圍住，又或者係第一次就俾經理嘅電話我哋？第四，我喺出呢一篇食評嗰時，見到OpenRice嘅營業時間偷偷地改咗去七點，係因為心虛？想我死無對證？但我一早影咗相，喺餐廳嘅門口係寫營業到六點。其實我唔係要求有咩補償，我只係想餐廳第一次就正面回應我，同埋喺交收月餅嘅過程做得好啲，email同埋IG嘅指引清楚啲。如果IG post或者email寫六點餐廳就關門冇月餅交收，咁我就唔會平日特登過嚟。即使個月餅幾好食都好，我都已經對呢一間餐廳完全失望。…查看更多

大家可能認識Gordon Ramsay，不過大家又知唔知佢嘅師傅Joël Robuchon？佢係全世界攞得最多米芝蓮星星嘅主廚，被稱為法國料理之神，而今日介紹嘅就係佢旗下、喺每個國家都差唔多攞到米芝蓮星嘅連鎖法國菜餐廳。L’Atelier de Joel Robuchon喺一間喺香港連續攞咗11年米芝蓮三星嘅法國菜餐廳，由2012年去到今年，亦都曾經係亞洲50最佳餐廳，可以話係香港最具代表性嘅高級 fine dining 法國菜。被稱為法國料理之神既主廚Joël Robuchon，曾坐擁35顆米芝蓮星星，佢曾經教過Gordon Ramsay。主廚其實喺13歲嗰時係立志成為一位神父，所以之前喺修道院幫啲修女煮餸，佢覺得依個係神嘅召喚，所以係15歲嗰時就立志想成為一個廚師，喺佢38歲就打破咗最年輕攞米芝蓮三星嘅紀錄。雖然主廚過咗身幾年，但佢呢個傳說都係一直延續，餐廳採用食材搭配優秀，服務頂級，提供一個一流嘅FineDining體驗。餐廳可以透過電話預約，依家亦都可以喺網上預約，基本上如果係星期六日，要兩三個月前預約，平日可能可以執到一個月嘅booking，訂位個時就要比訂金，每人500。餐廳喺置地廣場，可以喺置地廣場3樓上4樓，喺地下其實都有專屬嘅升降機去到。餐廳有分L'ATELIER同LE JARDIN，前者喺法文係解工作室，後者係解花園，前者其實係坐喺一個Bar Counter，有大概30至40個位圍住個開放式廚房，後者就好似正規 Dining Table，大概有8至10張枱，真係可以望住平台花園嘅座位。我自己鍾意前者，因為佢可以望到廚師嘅製作過程，氣氛比較親切但又不失高雅，而且可以叫到一份特別嘅Menu後者就比較有空間感，枱與枱之間距離充足，隱私度十足。餐廳同平時嘅米芝蓮餐廳好唔同，一入到去就可以見到招牌嘅紅色同黑色做主調，時尚簡約但有格調，配上幽暗嘅燈光，突顯光猛嘅開放式廚房，雖然冇好似香港其他樓底好高、空間感好大嘅華麗法式格局，冇好浮誇嘅水晶燈、銀器，但佢就係帶有時尚感，平實又摩登，就連防疫嘅隔板都係用紅黑色。呢度嘅廚師都係着返黑色，襯返呢一個環境，呢一點非常之細心。如果你係慶祝生日或者特別節日，可以要求預約一個蛋糕。-1️⃣ Lunch Menu 💰690/790/990呢度嘅餐牌有兩款，如果你係坐吧枱就會有第一頁，佢係一個Special Tasting Menu，將佢10幾道嘅招牌菜用small portion呈獻，價錢方面都會平啲，大約二百幾至三百幾。至於其他Menu就坐邊度都有，Set Lunch Menu有3個價位供選擇，個分別就係一個係揀前菜或者湯，一個係一個前菜一個湯，最後一個係有兩個主菜，全部都會包甜品加咖啡。另外會有A La Carte Menu、signature tasting menu、dessert menu 同drink menu。今次我介紹嘅係Set Lunch Menu同Special Tasting Menu，Set Lunch Menu入邊嘅前菜同主菜會成日換，如果食唔到想食嘅招牌菜可以喺Special Tasting Menu度揀，基本上呢兩個Menu可以試到八、九成嘅招牌菜。-1️⃣ Bread basket （👅: 8.5/10）呢度嘅麵包籃可以話係咁多間餐廳份量同種類最誇張，因為佢有接近10款麵包，例如有brioches、法包、croissants、sourdough、咸火腿麵包棒、果仁包、comté cheese bread、baguettes等，見到令人心花怒放。麵包每個比較迷你，食落去麥味唔算突出，係有少少鹹香味加上豐富嘅牛油香，略嫌油膩左點。咁多款最鍾意迷你牛角酥、芥末煙肉包同芝士包，牛角酥算鬆化，牛油味重，咸火腿麵包棒咬去脆口，食落有鹹香味，芝士包一樣食落有鹹香味。呢度嘅牛油係室溫，食落去有鹹味，係我最鍾意嘅牛油，因為佢會令到麵包嘅味道昇華，不過呢種牛油最出色嘅係喺petrus。記住唔好食晒呢度個麵包，因為要留肚食之後嘅嘢，麵包可以打包，店員喺你走嗰時打包俾你。-1️⃣ Amuse Bouche （👅: 8/10）七月份嘅Amuse bouche係西班牙凍湯配日本日本士多啤梨，會將茅屋芝士雪凍成一粒粒好似雪糕咁嘅形狀，上枱個時有煙霧離漫嘅效果，真正嘅入口即化，舌頭嘅溫度令到芝士溶化係個口入邊，加上士多啤梨凍湯，食落去酸酸甜甜，非常開胃，真係啱晒夏天。-Appetizers1️⃣ Le Caviar Imperial +💰280 （👅: 9/10）前菜首先介紹佢哋嘅招牌，係經典蟹肉魚子醬配上龍蝦湯啫喱，呢一款間中會係lunch Menu見到，不過就一定會喺speical tasting Menu見到，店員介紹佢會有三種嘅呈現方式，我好好彩第一次就食到佢最經典嘅呈現方式，就係係一隻大嘅白碟，另一個係用一個透明杯，最後一個係會用一個魚子醬小盒，上面就會鋪滿魚子醬。菜式底層係龍蝦湯啫喱，中間挖空放入阿拉斯加蟹肉，鋪上魚子醬後加金箔點綴，之後再加上椰菜花忌廉同香草蛋黃醬，一入口質地細膩， 單品嚐魚子醬鹹鮮味重，龍蝦啫喱咬落爽滑，食落係香鮮，阿拉斯加蟹肉入口軟嫩，食落鮮甜，配角椰菜花忌廉帶小小清甜，不過當三層一齊食，層次分明，三重口感，味道層次豐富。一般食魚子醬嗰時會覺得魚子醬個味道會蓋過一切，不過呢度係用阿拉斯加蟹肉加上龍蝦湯啫喱，啫喱會稍微中和左魚子醬嘅味道，所以食起上嚟冇咁鹹，蟹肉會吸收魚子醬嘅味道，各種食材配搭起嚟，配合得天衣無縫，唔會相互搶大家風頭，味道非常之順口，會一啖接一啖，齒頰留香，真係會想將隻碟舔乾淨。如果要挑剔就係魚子醬菜式無提供貝殼湯匙，而係用金屬湯匙，因為用普通材質匙羹可能會破壞魚子醬嘅味道。-2️⃣ Le Foie Gras （👅: 8.5/10）呢一個前菜喺Special tasting Menu都有，唔係用Foie Gras Terrine呈現，而係以Chicken Galantine 嘅方式上菜，雞肉同鴨肝經過慢煮，入口係偏硬身，食落去本身有少少油膩，配上黑松露醬同埋沙律，可以中和一下鴨肝既油膩感。-Hot Soups1️⃣ Les Crustaces +💰120 （👅: 9.5/10）呢一度可以話係全間餐廳我最鍾意嘅菜式，喺Special tasting Menu都有。呢個法式馬賽魚湯係用上日本松葉蟹、龍蝦同海鮮餚成，旁邊伴以脆米蝦球同墨西哥辣醬。龍蝦湯飲落去鮮甜，又帶龍蝦嘅鹹香味，濃烈到非常衝擊，如果唔鍾意重口味嘅人可能會覺得太鹹，但我就會忍唔到一口接一口咁飲。入邊仲有唔少嘅龍蝦肉粒，咬落去結實，入面嫩滑，不過龍蝦湯嘅味道比起龍蝦更加重，濃到好似係用十幾隻龍蝦餚成，係我香港飲過最濃嘅龍蝦湯。隔離嘅炸蝦球咬落香脆，不過對比起龍蝦湯就比較普通啲。-Mains1️⃣ Les Spaghettis +💰150 （👅: 8/10）第一道主菜係呢度嘅招牌龍蝦意粉，呢度招牌菜反而係用最簡單直接嘅方法去表達。意粉幼身，煮到Al dente，咬落去彈牙，不過可惜唔係手工意粉，龍蝦汁用黃酒、蝦膏去煮，質地比較輕身因為冇用忌廉，食落去有龍蝦鮮味，意粉唔算掛滿龍蝦汁，因為醬汁質地比較稀，加上魚子醬，層次豐富左，不過我覺得龍蝦湯個味會再濃啲，重口味嘅我覺得醬汁味道比較淡啲，而龍蝦肉用咗一隻波士頓龍蝦，夠厚身大嚿，咬落去彈牙，生熟程度啱啱好，食落鮮甜，我覺得龍蝦肉做得比龍蝦汁出色。-2️⃣ La Caille +💰100（👅: 9/10）呢一樣招牌菜係世界各地好多robuchon嘅分店都有，係一道鵝肝釀走地鵪鶉，份量唔少，有三塊鵪鶉胸肉同一隻鵪鶉腿。鵪鶉腿既外皮夠薄身，咬落夠脆，入邊嘅肉夠粉嫩，咬落去係偏紮實帶爽口，夠juicy，肉汁鎖左係肉入面，因為係free range鵪鶉，每日有段時間可以走地，肉帶小小羶味，不過醬汁食落去偏甜，同鵪鶉非常之夾。但呢度菜好食在於廚師將鵪鶉胸去骨，釀入鵝肝mousse，慢煮之後再煎香外層，絕對係心機之作，加咗鵝肝嘅鵪鶉胸，鵝肝夠肥美，煎得外層香脆，咬落柔軟，因為鵪鶉胸肉偏瘦，一肥一瘦，兩者相輔相成，味道非常之夾，口感更豐富，唔細心啲食根本分唔出入邊係有兩種食材，係兩者平衡得非常好嘅一道菜色，因為法國菜最主要嘅精髓就係平衡。-3️⃣ Le Porc Iberique （👅: 9/10）呢個係用西班牙黑毛豬，用鐵板煎到半生熟，店員話呢一種係最高級嘅黑毛豬，因為佢係食食橡果，因為佢係medium rare，咬落去好嫩滑，而且肉汁夠多，食落去豬肉味道突出，油脂唔會話太重，好食嘅程度絕對唔會輸比牛扒，即使係隔離嘅蘑菇，都比預期中好食，尤其係下便嘅粟米粥，第一次食非常有驚喜，有啲似芝士但係係粟米嘅味道。-🥔 Mashed Potato （👅: 9.5/10）主菜都會配Robuchon最出名即招牌薯蓉，大廚研發呢一個薯蓉係試咗廿幾款薯仔，最後決定用一款喺法國北部出產嘅La Ratte薯仔，直到宜家都係用呢一種薯仔，因為佢口感絲滑，帶好似栗子嘅香味。入口非常幼滑，完全唔會見到任何粒粒，入口都係無顆粒感，係食過最綿密既薯蓉，好似食緊mousse咁，但又保持適當嘅濕潤度，牛油味道非常濃，每食一啖好似食緊幾盒牛油咁，但食落去又唔會覺得膩，反而係想一啖一啖食晒佢，但佢嘅薯香同埋奶香係平衡得完美，無論食幾多次都係覺得好有驚喜，雖然佢嘅食譜已經大為廣傳，用四種材料同50分鐘就做到，但佢嘅技術就唔係個個都做到，絕對係人生食過最好食既薯蓉。-Special Tasting Menu1️⃣ Le burger 💰340（👅: 8.5/10）呢一份係一個鵝肝牛肉漢堡，牛肉用上鹿兒島和牛，漢堡大細恰到好處，一人一件啱啱好。未食已經聞到鵝肝嘅香味，睇落去冇咩特別之處，一咬落去非常香口，麵包有烘過，軟硬適中，鵝肝夠肥美，咬落去係軟嫩無筋，而且多汁牛肉係非常粉嫩，咬落去juicy唔乾身，食落去肉味重，整體係好juicy，因為份量唔多話所以食起嚟唔算好膩。薯條係將薯仔手切成比較細條，配合返迷你漢堡，不過食落去就比較普通，因為唔夠脆身，可能因為薯蓉太出色，配搭薯條嘅係薑味茄汁，不過食起上嚟都冇咩驚喜。-Dessert1️⃣ Le Chocolat （👅: 9/10）第一款甜品係榛子醬朱古力慕斯配伯爵茶雪糕，第二次先食到，不過幾有驚喜。甜品嘅外型好似玻璃球盤景，打碎上面嘅朱古力就可以食。朱古力慕斯入口即化，夠creamy，食落味道濃郁，朱古力味道一直停留喺口腔，久久揮之不去，加上焦糖化左既榛子醬、朱古力脆脆同埋附近嘅果仁，口感非常豐富，最有驚喜係個雪糕食落去伯爵茶味突出，可以中和一下朱古力嘅濃郁。整體所有組合都好夾，層次豐富，鍾意朱古力既人絕對推介，不過如果一個人食晒就會覺得有啲甜，適合同人share。-2️⃣ La Pomme （👅: 9/10）Lunch Menu上面嘅甜品，我最鍾意嘅一款，係燴蘋果配雲呢拿雪糕同蘋果酒雪葩。Apple Tatin絕對係一個好考技術既甜品，因為需要將蘋果切到一片片非常薄身，蘋果咬落去非常軟身，食落去蘋果味道濃郁，酸甜交集，蘋果肉食落清甜，蘋果白蘭地酒雪葩絕對將蘋果嘅香味倍添層次，加上雲呢拿雪糕，整體唔會太甜，平衡得非常之好，如果要挑剔就係餅底偏硬少少。-3️⃣ La Framboise （👅: 8.5/10）呢個甜品係開心果慕絲配紅桑莓雪葩同脆脆，翠綠色嘅開心果慕絲呈半圓形，上面放咗紅色嘅紅桑莓，隔離仲有紅桑莓雪葩，顏色分明，賣相唔錯。開心果慕絲咬落厚身，入口香滑，不過食落開心果味道唔算突出，反而杏仁味比較突出，上面嘅紅桑子食落去比較酸，幾適合中和一下主菜嘅濃味。紅桑子雪葩酸味都幾突出，唔係個個可以接受，不過如果唔鍾意食甜嘅甜品，咁呢個就會好適合。-4️⃣ Petite four （👅: 7.5/10）七月嘅Petite four係馬卡龍同咖啡朱古力，我覺得兩者都比較甜，朱古力嘅咖啡味幾重，不過馬卡龍比起朱古力更加甜。-La Carte Des Desserts 1️⃣ Le Soufflé 💰220 （👅: 9.5/10）跟住就揀咗喺La Carte既甜品，全部都係$220一份，我就叫咗呢度嘅招牌Soufflé，即叫即焗所以要等20分鐘。Soufflé整到好完美，熱辣辣要趁熱食，外表夠滑溜，冇任何裂紋，夠高身，外層咬落去脆，入面入口即化，非常軟綿蓬鬆，擺係口腔會溶化，極輕身輕盈，空氣感十足，入邊係夠濕潤，但又唔會過分嘅濕潤，口感拿捏得啱啱好，食落朱古力味道濃郁醇厚，同時蛋香味重，朱古力唔會過甜，都唔會死甜，亦都唔會話有好重苦澀味，係絕對可以接受嘅苦澀味，隔離嘅朱古力sorbet可以中和一下多餘嘅甜味，整體係我食過最好食嘅梳乎厘，香港可以同佢匹敵嘅應該只有petrus同somm，如果鍾意朱古力嘅人絕對要試。-2️⃣ Le Chocolat Sensation 💰220 （👅: 8.5/10）上面嘅係一層好似紙咁薄嘅朱古力薄片加上朱古力粉，下邊嘅係朱古力雪糕，再加上cream同朱古力脆脆，又係另一款朱古力嘅甜品，朱古力唔算太甜亦都唔會太苦，因為朱古力味道會同入邊嘅cream中和。-Drinks1️⃣ Cappuccino （👅: 9/10）呢度既咖啡會有餐廳個名嘅拉花，非常適合打卡，咖啡上面有啲泡，入口厚身幼滑，夠creamy，飲落去咖啡味道夠香，帶有少少甘甜，苦澀味唔重，唔算好苦澀，如果覺得苦，可以加上另外嘅自家製焦糖醬，咁落去別有一番風味，或者可以同Petite four一齊品嚐，互相中和。-2️⃣ Chocolate （👅: 8.5/10）唔可以睇小呢度嘅朱古力，因為佢係用66% Valrhona 製成，望落去色澤比較淺，奶嘅比例比較多，質地唔算好濃稠，都唔會掛杯，入口一開始有泡狀嘅口感，飲落去飲到可可味，帶有少少甜味，不過同時有果酸味，唔會太苦有回甘，雖然唔重，朱古力有奶香味不過唔會太甜，唔會話甜到好涸喉，係水準之上嘅熱朱古力。-🌟 Robuchon 係四月換新主廚，係澳門天巢Robuchon分店既主廚Chef Julien Tongourian 黎香港坐鎮。所以呢兩次用餐食物質素出品穩定，保持水準。前菜方面最有驚喜係龍蝦湯，因為佢係我香港飲過最濃郁，可以同佢匹敵既只有文華扒房，而佢個招牌菜魚子醬前菜將三者平衡得非常之好，令人拋開有魚子醬一定好鹹嘅概念。主菜方面龍蝦意粉我覺得意粉如果變做手工口感更佳，同埋飲完龍蝦湯有對比，醬汁唔夠龍蝦湯濃郁，至於招牌既鵪鶉就可以食到佢同鵝肝嘅完美融合，無論味道上定係口感上，配菜嘅薯蓉更加唔使講，robuchon甚至令到佢可以成為主角。而甜品最鍾意當然係佢嘅招牌soufflé，因為佢係一樣好難做到完美嘅甜品，香港做得唔錯嘅就只有robuchon 、petrus同somm，三間同為香港嘅高級法國餐廳，不過佢嘅lunch Menu嘅甜品都有驚喜，尤其係朱古力同埋蘋果塔，每一樣菜式或者甜品都會有一個元素令你有驚喜。食過兩次嚟講，佢嘅招牌菜出品好穩定，絕對受得住米芝蓮嘅榮耀。飲品方面，如果你係叫Special Menu嘅話，咖啡同茶要另外加錢，大約都係60幾蚊一杯，但我會覺得好值得，因為佢哋嘅咖啡同朱古力質素，唔會比出邊嘅Cafe差，連飲品都咁講究，絕對符合米芝蓮三星餐廳嘅質素。Lunch set menu，以米芝蓮三星嘅餐廳黎講，性價比好高，因為如果唔加錢嘅話，$1000唔使就食到，兩次都加咗錢食招牌菜嘅我，就差唔多人均1000，晏晝已經可以試到招牌tasting menu嘅大部份招牌菜。雖然lunch Menu會不時更改，不過special tasting menu同A La Carte menu就可以四季都食到。四個月內食左兩次，我諗我要休息吓，因為等緊佢秋冬季嘅Menu，最想試嘅係佢秋冬季先有嘅栗子湯。每一年嘅Menu可能都會有微微嘅調整，不過主要嘅招牌菜式都會保留，彩色都係偏向法國菜糅合左少少日本元素。Robuchon行既係係平平實實嘅法國菜，就好似佢既裝修風格一樣，食物方面都係化繁為簡，每一道菜色唔會話太過複雜，都係用少少配角去襯托一個主角，唔會有好花巧嘅擺盤同埋好創新嘅呈現方式，你係食得出自己食緊啲咩嘅食材同味道，唔會好似食緊分子料理咁，喺係細節盡顯功架嘅路線，由佢嘅多款麵包，到每一道菜色，都可以睇到廚師花好多心思，令到你喺每一道菜色都會有一啲記憶，因為法國菜就係講求唔同食材之間嘅平衡，唔會話互相爭做主角，係你聯想唔到兩樣有關係嘅食材，擺落口竟然係同一件事，個樣就係法國菜嘅精髓。當然如果要挑剔robuchon，就係佢擺盤上嘅精緻度同埋菜式創新個方面。同caprice比較，大家都係好着重玩層次，從中搵出平衡，不過caprice可能會比較創新小小，好似將現代健康嘅哲學擺落去法國菜，即使用上海膽、魚子醬呢一啲嘅食材，食落去唔會好似一般法國菜咁「重口味」。至於PETRUS都係喺傳統上但有少少創新，喺法國菜融合少少日本菜元素，提供客人驚喜嘅海鮮菜式，但又無法國菜嘅油膩感。而robuchon相對係比較傳統、穩陣啲，主打嘅係一致同穩定，但其實喺唔同季節下、唔同嘅主廚、唔同食材下都可以保持風格一致，絕對係佢呢一個連鎖餐廳去到邊個國家都可以攞米芝蓮認證嘅關鍵，每一間法國菜各有風格，各有所好，因為每個人嘅接受範圍都唔同，所以好難定奪邊一間係香港之首。服務方面，店員好詳盡講解每一道菜色，無論係每一道菜式嘅食材、佢嘅食法、菜式用嘅食材等，值得加分嘅係我女朋友第二次去嗰時係有啲趕時間，因為食法國菜閑閑哋可以食三個鐘，佢唔知可唔可以提出上菜快啲嘅要求，不過佢就喺Special tasting menu個到見到話”If you have a time constraint, please let your waiter know when you place your order”，所以佢就同職員講，結果真係上菜速度比我同其他朋友快，無論係主菜定係甜品都比我哋快上，所以最尾可以趕上食完甜品就走，唔知其他法國菜餐廳可唔可以咁做，不過呢一間米芝蓮三星嘅餐廳就做到，唔止係食物出色，服務都係點對點。而且店員會留意客人嘅用餐進度，會調整上餐速度，但又保留適當嘅空間，唔會好似某啲餐廳咁長期有職員望住我哋食飯咁。而基本嘅細節都做到，好似菜式同菜式之間都會換一次餐具。另外每次服務員都會幫客人打包麵包，但佢留意到我同女朋友去食同一籃，而我朋友同佢媽媽係食另一籃，佢識得主動將兩籃麵包分開打包，係非常細心嘅舉動。聽講餐廳嘅sommelier非常專業，對於wine List同pairing非常熟悉，不過呢兩次都係食晏晝，同埋唔係特別日子，所以就冇試到酒，下次可能係好機會。另外如果慶祝生日，可以訂枱個時預留佢哋嘅招牌朱古力榛子蛋糕，而且店員會主動幫你影相。環境方面，L'Atelier行時尚型格吧枱嘅路線，雖然佢冇好似petrus嘅海景，佢都唔係五星級酒店嘅餐廳，不過我係坐吧枱位，所以唔需要好注重禮儀，可以好似平時喺酒吧咁邊食邊傾偈，亦都可以同店員交流，而且可以觀看到上餐同埋廚師料理嘅過程。而餐廳嘅廚房抽風做得非常之好，因為喺吧枱位，但完全問唔到廚房傳出嚟嘅香味。另外我覺得吧枱呢度影相唔錯，因為每張枱都有獨立嘅射燈，因為有好多法國菜餐廳可能注重氣氛，所以燈光就唔算充足。總結呢兩次嘅用餐體驗都唔錯，可以喺休閒嘅氣氛下品嚐到米芝蓮三星嘅法國料理，出品穩定，喺一場味覺同埋視覺嘅享受、一餐色香味俱全既法國盛宴。雖然主廚Robuchon已不在人世，但佢嘅精神同埋創造菜式都會廣為流傳、流芳百世。-👅味道: 9/10🍴環境: 8/10💰消費: $780-1000pp (服務費: 10%)…查看更多

唔知大家鍾唔鍾意食壽喜燒，之前介紹過香港最難book嗰間壽喜燒，原來依家都有網店專賣壽喜燒嘅外賣，如果唔想成日食白果，買返去屋企壽喜燒都係唔錯嘅選擇。厚福和牛屋係一間日本牛匠岩手牛壽喜燒專門店，用上用優質豐盛嘅食材，食材來自日本岩手縣既黑毛和牛，而且有岩手縣農場授權證書。店家用嘅係岩手縣和牛，而且係新品牌和牛，牛匠岩手牛其實係岩手縣最歷史悠久嘅和牛牧場，用五年時間研發嘅和牛，因為係東北部有豐富食材同埋優質嘅水質，而且牛匠岩手牛規定要用岩手縣生產既粟米、岩手米、酒粕、澱粉粕等日本傳統食材做飼料，唔係用外國進口既黃豆、粟米、小麥等，再肥育長達32個月，所以呢度出產嘅牛肉夠出名，曾連續四屆係日本肉品大賽榮獲綜合肉品冠軍優勝殊榮，係最頂級的黑毛和牛和種，牛匠·岩手牛好適合用嚟壽喜燒。店家所有套餐都係用牛匠·岩手牛，不過價錢不變。客人仲可以選購日式壽喜燒不粘鍋。黑毛和牛仲係A5威士忌黑毛和牛片，因為日本東北部盛產威士忌，牧場喺日常飼料會加入威士忌粕，令和牛油脂更濃郁香味，而且牛匠岩手牛好罕有，每年只生產1000隻，每月只生產約80隻。以前只作日本內銷，香港由2020年尾先開始引進。如果訂購個時，係12點前落單，就可以即日送貨，消費滿HKD1000可享一般地區免費送貨，大概係三至六點就收到。-1️⃣ 竹 套餐 日本A5 牛匠•岩手 黑毛和牛壽喜燒套餐 二人前 💰999呢個套餐入邊有A5牛匠·岩手黑毛和牛片8塊、和牛油脂、野菜盛盒、自家制壽喜燒汁1枝同日本無菌蛋2隻，另外仲有一個烏冬。套餐會用兩個木盒，分別裝住野菜盛盒同黑毛和牛，每片都係獨立包裝。如果係當晚食用，放入冷藏雪櫃直到用餐時取出即可。-1️⃣ A5牛匠·岩手黑毛和牛片（👅: 8.5/10）2️⃣ 自家制壽喜燒汁（👅: 8/10）3️⃣ 日本無菌蛋（👅: 8/10）店家有提供教學片教你點整，方法係關西風既壽喜燒整法，最大分別係呢度無落砂糖。預熱個爐之後放入和牛脂肪，再落京蔥爆香到金黃色，之後就可以放和牛同倒入少量壽喜燒汁，煮到自己鍾意既生熟程度就可以點已經搞均左既生蛋汁，之後可以靠剩低既壽喜燒汁去煮野菜同和牛，唔夠汁個時再加。和牛顏色夠粉嫩，油花分佈均勻，入口軟腍，唔會有筋咬落韌，食落有牛味，油脂唔小，油脂比牛味重啲，不過食幾塊唔覺得膩。壽喜燒汁鹹甜適中，淡淡嘅甜味，唔會話蓋過牛味，加上橙黃色既蛋汁，令到牛肉滑入喉嚨，食落有蛋香味，都可以中和一下和牛既油脂。-4️⃣ 野菜盛盒（👅: 8/10）野菜盛盒入面有京蔥、豆苗或皇帝苗、大白菜、冬菇、日式燒豆腐、芝士竹輪、蒟蒻結、油揚 ，係2人份。所有蔬菜都洗得好乾淨，而且排得好整齊，食落去新鮮，當中最鍾意芝士竹輪、油揚、日式燒豆腐，蒟蒻結、油揚同大白菜就非常入味，吸盡壽喜燒醬汁。-5️⃣ 烏冬（👅: 8/10）另外仲有讚岐烏冬一份，又係非常入味，咬落去煙韌，唔會話太腍。-🌟整體我覺得係屋企壽喜燒唔錯嘅外賣選擇，因為牛肉質素唔錯，人均500就已經食到好飽，如果唔想排隊，又或者係屋企慢慢燒嚟食，絕對係唔錯嘅選擇。-👅味道: 8/10💰消費: $999 (服務費: NA)…查看更多