La Moo Moo' s Steak and Fries (已改名) 查看

好耐冇幫襯灣仔嘅la moo moo’s，原來已經搖身一變，成為The Prime House！一踏入餐廳，環境靚，又有大玻璃窗。燈光柔和，氣氛親切優雅，坐低即刻覺得放鬆。晚市套餐$388，有齊湯、沙律同超香嘅百里香蒜蓉牛油包。蘑菇菇湯非常香濃，嗰個牛油包一咬落去，蒜香同香草味突出，暖笠笠嘅口感真係叫人忍唔住一啖接一啖。主菜有10款選擇，我哋揀咗230g嘅美國平鐵牛扒同挪威三文魚腩配奶油大蒜醬。牛扒煎得啱啱好，肉質嫩滑又多汁，切開仲有陣陣肉香，配埋薯條入口超滿足！三文魚腩更加係驚喜，厚身肥美得來入口即化，奶油大蒜醬濃而不膩，仲有薯蓉襯到絕。飲品我哋叫咗熱檸檬茶，清新嘅檸檬味同主菜好夾，飲完仲有種舒爽感。最讚嘅係服務！經理好親切咁了解我哋口味，推介咗幾款菜，態度真誠。又好細心，成晚笑臉迎人，仲會主動問客人食物滿唔滿意，感覺好似同朋友食飯咁自然。整體黎講，The Prime House無論環境、食物定服務都滿分，下次一定會再去試其他主菜！