魚一丁刺身居酒屋 (已結業)

最梗要連食物都差...沙拉出水的，魚生一般，板前和民都好食過佢，但係價錢係人地的兩至三陪。價錢唔平~!!服務勁差，無人加水無人應不得止，入面大把位都要d人係出面等，野食要等，加水要等，埋單都要等...

一丁拉麵沙律跟麻醬- 極力推薦！份量大，麵質好，喜歡吃冷麵的，必定喜愛，麻醬醒胃。海鮮魚生飯- 魚生尚算新鮮，但飯太冷和硬，嫌太多蛋(玉子)和日式魚蛋等平價物料。芝士焗帆立貝- 一般沒有選擇刺身和壽司，因價錢較貴，不值得在這地方一試。二人，共二百二十五元

昨天去試lunch set, 雖然價錢偏貴但lunch上菜速度奇快! 值得一讚!人手依然有短缺, 但已經進步了, 而且waiter變得有禮貌了

18 April 2007 (Wed) - Birthday Lunch (4)香港人大部份人都喜愛食日本菜，想話食好啲又平啲，都確實唔容易！呢間係友人既選擇，我都覺得可以！我叫咗個海鮮魚生飯（其實同雜錦魚生飯都差唔多，只係再多條饅魚），友人就叫咗個葱吞拿魚及網燒牛肉飯！我得我個set係幾唔錯，雖然通常食呢類飯，佢都只係將啲餸頭餸尾切粒再放入碗中，但係我都覺得OK，唔會唔新鮮既又，但係啲吞拿魚粒顏色就麻麻，好似唔太靚！而友人個set佢覺得啲牛肉好正，但係我真係覺得太乾身&硬，人人口味唔同啫；反而佢又覺得個飯有啲蛋白喺入面好似怪怪的，但我又幾鍾意喎，哈哈！喺咁既情況下，每個人口味不同，所以食評呢樣嘢真係好主觀既，最好都係自己親自去試下啦！兩個set都係$88/set，total 係$194，lunch黎講都真係唔平！

此分店在平日食滿每$200 送$100 coupon, 不過限平日用, 及有限一個月.雖然麻煩d, 但真係好抵.

三月sashimi –有牡丹蝦, 三文魚, 章紅, 意式帶子caparcio, 海膽墨魚, 松葉蟹, 蝦好正, 海膽墨魚好正.牛筋烏冬–湯底清但甜, 牛筋爽韌, 唔錯!

今午點了個三色飯套餐，加一約100元，食物的用料及味道不錯，只是價錢貴了點。三色飯的材料多用不同的魚生和燒鰻魚，配合魚籽在白飯面，好吃而不膩，份量而且頗大。配菜有醃過的鶏肉和味噌湯，都很入味。服務很快捷，有吃快餐的感覺!偶爾與朋友聚一聚，豪一次又如何！

德福魚一丁比較易找位，電話訂位仲有飲品送，叫了拉麵沙律、壽司盛盒、鱼生飯同牛肉鍋，幾樣都有水準，最愛魚生飯同沙律，價錢合理，這是一間環境、質素有水準的食店，最好唔駛點等位，臨時臨急約女仔食飯都唔會無位同難食。

本身都幾鐘意食日本菜但都係第一次黎到魚一丁天氣開始凍所以已經立定主意叫個特選牛肉鍋($200)見佢地介紹話個鍋係三至四人份量真的有點擔心食唔哂所以都係再加多醬燒帆立貝($35)先來的兩串四粒的帆立貝真的燒得幾好起碼唔會燒得真乾而且醬燒一定比鹽燒來得好食等了一段時間終於到牛肉鍋上場了牛肉共八片幾大塊個什菜湯底味比較濃而且好大煲要花上四五個字先至滾食完有點覺唔夠喉就再加多個豚肉京烤($42)個真係一個好肥好唔健康的食物飯後甜品係自家製的雪榚有粟米同芋頭味但粟米味比較好食但細細杯要22蚊唔化算服務ok 而且重安排左四人枱俾我地兩個人坐真係估唔到因為出面重有好多人等位其實佢地可以分返開兩張二人枱俾其他人真係難得

在日本食品於香港這連所店巳是不錯*一般食品都ok!好處其他評家都講左喇,,,告誡食家緊記唔好一次過叫晒order,,因為此店出食品奇快,成台都係食品,冇晒日本風味,似中國餐多D...告誡大家15 mins 叫一次order 時間就岩岩好喇*

爸爸和弟弟都是在十月生日的, 所以通常會一齊慶祝.今年爸爸想食蟹膏刺身, 於是便決定去魚一丁食.一行六人坐着馬蹄形梳化位內, 頗舒服又覺不被干擾.叫左一細樽松竹梅凍清酒, 淡淡的.一丁拉麵沙律跟麻醬–媽媽至愛既麻醬.北海道刺身7款–有帶子, 八爪魚, 蝦, 蟹膏, 蟹脚,…, 新鮮味美.花澤蟹一隻–肉味偏淡.日本蠔野菌粥–味噌湯底, 菇偏少, 自己加蠔加蛋加葱粒, 幾鮮甜.北海道海鮮鍋–有三文魚腩同頭, 雞件, 帶子, 蟹, 紹菜, 金菇, 蠔, 湯底係紅miso, 好香濃, 附加既辣醬也超正, 三文魚滑嫩, 雞也嫩, 蟹吸收了湯汁更見鮮甜, 湯好濃好喝呀!劍魚腩照燒–肉軟滑, 有點食鵝肝既感覺.陶板特式北海道香腸–肉都算香口, ok lar.北海道魚生飯–日本魚蛋粒也算魚生??埋單唔使$1200, 超抵呀.Happy Birthday to my Dad and Brother!!!

去完kt secret house後，近近地直接係德福搵食，無乜選擇下我同best fd唯有選擇魚一丁。8款刺身-我同best fd都唔食八爪魚，可以改三文魚。刺身不算厚切，欠缺質感。劍魚腩刺身-不算太肥美，食落我覺得有陣雪味。一丁拉麵沙侓-我每次都必叫的，因為與冷麵差不多。要了麻醬汁，幾香。成吉思汗牛肉燒-其實已經飽飽地，一來到真係嚇一跳，因為幾大鍋，芽菜、椰菜及牛肉份量唔少，兩個女仔實在無法消耗。我覺得牛肉麻麻地，反而D醬汁就好好味，就其是芽菜及椰菜吸晒醬汁D精華。雖然實在太飽，但都幾不住叫個綠茶大福餅。

今日老細請食飯, 0黎0左呢度食lunch, 5 個人叫0左5 個定食share: 有豚肉西京燒, assorted 刺身, assorted 壽司+ 雜菜tempura, 蝦tempura, 仲有炒雜菜.魚生新鮮, 定食standard 0黎講款式算多, 幾好食. 壽司都係, 味道係唔錯的. 豚肉西京燒其實只係薄片照燒汁豬肉, 都唔錯, 唔會太嚡. Tempura 我就覺得d 雜菜好食過蝦, 一來脆d, 二來tempura 粉表層無咁厚, 三來無乜油膩. 不過當然唔可以同稻菊/Osaka 0個d 比啦, 其實魚一丁d tempura 算整得幾好.仲有綠茶雪糕, 一向幾唔鍾意綠茶雪糕0既我竟然食晒成個scoop! 可能因為偏重奶味, 好creamy, 所以咁好食. 另外杯熱咖啡有驚喜, 原來係「地道」的落cream 日本咖啡!環境非常好, 我0地坐0左0係一個好exclusive 0既位, 靜靜0地咁, 好舒服; service 都唔錯, 個waitress 有禮貌, 有交帶, 又efficient.幫襯開銅鑼灣世貿中心分店, 一向都對魚一丁好無好感, 不過九龍灣呢間差好

4 August 2006 (Fri) - 午飯補請返好朋友既生日飯，去咗呢度食，呢度環境同氣氛都好好，可能係早既關係，感覺上好清新！不過嘢食就稍為貴啲，啲set最平都要$88，唔係朋友生日都唔黎！我哋叫咗兩個set lunch share食，一個係刺身5款+燒魚定食，另一個係牛肉+葱吞拿魚定食，兩個都係$88，而刺身6款係包括：帆立貝，甜蝦，三文魚，八爪魚同油甘魚，每樣兩件，啲刺身雖然比較細，不過都算好味道！而個燒魚就麻麻，好硬，好難扯開，要叫佢比把刀我哋至得！另一個葱吞拿魚飯好好味～～，不過個牛肉就比較靭，所以正一係好壞參半．．．最後仲有個餐飲，真抵死，可能係lunch既關係，平時真係好少會食日本嘢飲凍/熱檸水．．．

昨晚一行六人去魚一丁食晚飯, 枱唔算難book.吃了三文魚壽司,成吉思汗窩,炒烏冬,牛肉飯,煎池魚,北海道腸仔,刺身雜錦,三文魚沙律每人一客甜品服務還算不錯.一千一百元有找.