阿一豬扒酸辣米綫

营业中

休息中

講開阿一既份量，我永遠都食唔晒！次次都要叫少飯或少米線先食得晒… 所以好抵食咖！今晚食想食清清地， 就叫咗個番茄什菌泡飯！潮州粥底，加埋番茄，酸酸甜甜咁，幾開胃！加埋杯凍檸茶都只係$３９晚餐嚟講真係抵食到呢！！！

每次加班，即使自己做了便當帶去公司，只要同事點阿一外賣，我都會放棄便當轉叫外賣。因為阿一的酸辣豬扒米線真的很好吃！最近似乎加價1元，到33元了，哈哈豬扒炸得很好，也夠入味，酸辣湯的味道剛剛好，酸菜最提味，這就是為什麼就算我明明不會吃啦，也每次必吃酸辣湯底，而不要清湯。不過辣度的掌握就見仁見智，有時小辣正好，有時能把人辣哭。

7月3日, 呀菲出月後第一餐街外飯~ 今日終於有機會出街!! 因為B豬滿一個月要帶佢返健康院打針, 順便可以比呀菲食下蒸肉片同三文魚飯呢d清淡坐月餐以外嘅外食! 午飯時間, 雖然剛好唔洗等位, 但全店都人頭湧湧~::: 豬扒米線 ::: $30一場嚟到阿一豬扒梗係要試下呢度嘅招牌啦! 豬扒嘅賣相確實唔錯~ 炸得香騷惹味~ 雖然湯底揀咗清湯, 但配上惹味豬扒就剛剛好. 米線都幾爽滑, 雪一聲已啜晒入口! 其他配料如花生, 蔥花等都有助吊味~::: 酸辣韮菜餃米線 + 凍檸茶 ::: $30 + $2份量十足, 韮菜餃都幾多, 配菜都唔少~ 酸辣味略嫌唔夠香口, 以辣油加酸菜形成嘅湯底唔算好味. 好彩韮菜餃唔錯, 大大隻啖啖肉, 加上酸菜都入味~ 米線幾爽口唔會淋pat pat, 又唔會太散~凍檸茶夠晒凍, 喺大熱天時一杯透心涼, 檸茶亦都十分開胃解渴, 正!可能呀菲過去一個月食得太清淡, 所以覺得個豬扒米線好好味! 而價錢黎講亦算係相當實惠~ 只不過係地方都係平民街坊裝潢, 有電視睇不過坐嘅係圓凳咁解. 不過不失啦!

在鰂魚涌ot完都在想去筲箕灣果間定e間。北角港鐵出口對面就係.唔洗行咁遠。入到去想都無想，就叫豬排紅薯粉。好快就到。豬排一樣好味!紅薯粉就林左小小 一樣都咁好生意，勁。

今日天氣轉涼，Lunch就吃點熱辣辣的米線，讓身體暖笠笠酸菜酸辣豬扒米線 ， 米線粗身彈牙！湯底辛辣感唔算好勁！快來快走，豬扒香口又唔硬身～酸菜更是米線湯內靈魂人物，幫助清除油膩感，亦讓湯底味道更好！

好耐之前去過呢間舖食豬扒酸辣米綫，覺得非常好味，仲寫場食評讚賞，所以今天專程再光顧，order左個豬扒酸辣米綫下午茶套餐要求多花生，32元包紅豆冰一杯，覺得咁既價錢超抵食啦，點知碗麵上檯時竟然一粒花生都無，於是同待應講，佢馬上用碗裝左幾粒花生比我，咁叫就做多花生喎，不過好彩唔多，因為花生炸得過左火有d苦味，滿心歡喜享用呢碗心頭好，點知超級失望，食第一口麵線時感覺d湯超多味精，令我的舌頭有(那) 既感覺，成碗麵、豬扒及酸菜都咸到不得了，唯有叫待應給我一杯茶，我每食一啖就用茶洗一洗先食，但仍覺得好咸，我諗我以後都唔會再幫襯囉！

之前食過一次覺得幾好，難得今日阿爸得閒，就黎呢度食啦。八點零鐘，時間尚早，所以大把位。唸住人少少應該好快有得食，點知...除左飲品之外，足足等左差唔多半個鐘先有野食！不過想食好野係要等嘅，無所謂啦！大約25分鐘後，終於有得食，點知...煎蠔仔餅，同上一次差好遠！成塊餅奶白色，究竟有無煎過？於是向侍應反映，換來只有一句：「係咁㗎！」最鐘意食蠔仔嘅阿爸只係食左一啖蠔仔粥，蠔仔好大隻，個粥入味OK豬扒米線，落單果陣好清楚講明「微辣」，但係成碗紅色，勁多辣油！點食？！唯有麻煩侍應幫我換過一碗。個侍應拎起碗面邊行邊講：「唔食得辣就叫清湯啦！」咩態度！凍柚子蜜，無味！心唸：未搞暈啫！但係杯底嘅柚子搞極都唔暈！想點？凍檸樂，罐裝飲品，實無問題啦！食餐飯，難食又受氣，為乜？真係好失望！

下班後，一個人，想吃個美味，不太貴而又點菜後食物來得快的晚飯，便想阿一酸辣米線了。晚上9：20，店內仍然坐滿七、八成人眼見有空位，二話不說坐了上去，亦二話不說點了個「阿一酸辣豬扒上海麵『小辣』加凍奶茶小冰」。先上凍奶茶。飲過幾次這裏的奶茶，茶和奶的味道剛好。而今次似乎奶味太重，茶太澀了，失色了。5分鐘後麵也隨隨上了。先吃一口豬扒，水準依然—豬扒不太厚不太薄，吃下去是極輕軟，吃得出肉汁也不會太油膩，帶骨的邊位還有小小脆的口感，屬「靚豬扒」。可是，吃一口麵，便知中伏—明明叫了小辣，卻來了極辣，吃一口便要飲水或者奶茶。上海粗麵本身淡無味，但配上這太辣的湯而變得有味反而更難入口。而整碗麵似乎辣得來也太「麻」—越吃舌頭越麻痹，結果麵吃了3分之2，舌頭便要休息了。話雖如此，收錢時，一位女服務員（似是老閭娘）發覺我吃得太辛苦，便笑着告訴我「師父重手左啲，叫我換過佢呀嘛」就因為佢這句，我決定下一次再來，當然不會再瘧待我的舌頭的了。下次吧，或者吃點其他未曾嘗過的。

一向有食開佢哋嘅泡飯，算唔錯。今日唔係好舒服，試試叫燉湯套餐，燉湯配白飯及浸時菜，選了節瓜章魚豬骨湯。點知打開見到賣相已感驚訝，見湯不見料，仔細再睇，節瓜係「節瓜碎」，另有三數片像毫子般薄；豬骨係骨，只有兩件有肉，其餘啲骨仲要係似質素好差的餐廳先會出現嘅「例湯骨」，即係煲到變晒色、脆弱，兼好唔新鮮；至於章魚，完全冇影！都算，諗住湯咁深色，可能味道都可以，點知，完全冇味，冇鹹味，似冇落鹽，但亦冇材料味，即係冇章魚味冇節瓜味，連豬骨，僅餘兩舊肉，連肉味都冇！飲緊係有顏色嘅冇味水！好離譜！用「燉湯」之名去包裝「例湯」，稍為燉過湯煲過湯嘅人都知道哩碗根本冇可能係燉湯，就算係例湯都好啲，但佢連例湯都不如！肯定已經擺咗好多好多日，而且，我唔係用十蚊買你一個例湯，係用接近50蚊，你俾咩食客呢？骨頭廚餘？總結，冇料、冇味、唔飽、唔值，令我以後連泡飯都唔想再幫襯。價錢貴，如果你俾到質素可接受，但你咁樣完全貨不對版，我去其他餐廳買個例湯都唔會咁差！如果係做唔到燉湯，請餐牌唔好再有哩個燉湯套餐。

甫坐下便被餐牌上的眾多款式搞亂了，起初店舖的名字令我以為這裏的主打是豬扒米線，可是吃這款式的客人又似乎不多，加上這裏的菜式五花八門，竟還有蠔仔粥和炒飯，令人有點摸不著頭腦。最後各人都選了自己喜愛的食物，可惜結論是沒有一款能稱得上是最出色的，包括酸辣豬扒米線。豬扒算軟滑，但就不夠香脆。清湯什錦紅薯粉適合想嚐不同餸款的客人，有肥牛、豬扒、飽片、魚肉雲吞等。至於蕃茄湯要另加三元，可惜味道不夠濃，只是多了點蕃茄，跟清湯的分別不大，餸和薯粉也吸收不到蕃茄味，令人失望。整體來說是平平無奇，即使款式多也難做出名堂。個人認為店舖如能把其中一、兩款主打食品做得出色，反而更能吸引顧客。

上次食完撈米線,覺得要比多次機會佢看到川芎杞子燉魚頭米線,就試一試$48,但係呢味野好女性化,叫完覺得有點霸氣湯分開上,好認真,顏色好黑飲落去覺得藥材味不夠重,只屬新手LEVEL,而且淡了一點,唔覺得好食魚頭份量很少,但相信燉了不短的時間,因為骨頭也入口即溶這是香麻海蜇$32(大)味道幾麻辣,很香,份量不少,不失為一道幾開胃既小食但今次既主角也是麻麻,看來不再值試多次

次次行過都好想試,今日涼涼地,整個豬扒撈水晶粉$36,加個炸韭菜餃回家食$26個水晶粉係彈牙帶點爽身,唔錯,但係原來係勁少汁,完全撈唔到野,而且個汁只係死咸加點麻,完全唔掂,早知叫湯粉啦.豬扒雖不太JUICY但算係鬆化,但調味也比較單調.但總比上環那間豬扒飯的豬扒好附送既湯係胡椒豬肚湯的味道,唔錯炸韭菜餃就幾出色,一來夠脆,二來皮薄,三來內裡既肉和菜調味味道不會太濃,食出原材料的味道,8隻很快食清光下次來還是買有湯的好,撈呢個真係唔掂全靠韭菜餃,如果唔係真係要比個喊

今日想食辣野，但又唔想專登坐車去Causeway Bay食雲桂咁遠，經過呢頭見到有間酸辣米線好似OK，就入去試下...自制韮菜餃痲酸撈水晶粉$30(無飲品無加一)我要小辣有撈既應該同雲桂差唔多掛，等咗8分鐘，有得食喇!尼到個賣相唔錯，仲有個湯另上比你，材料有...酸菜、花生、莞茜、蔥花、韮菜餃...撈水晶粉(細薯粉)睇落唔錯，點知一食，哇勁痳辣(我唔係要咗小辣架咩)，酸菜啲味都無哂，食食下個口都痳痺哂!要浸湯食!好在個韮菜餃OK，食得出係自制，而且有6、7隻比你，$30算係咁，水晶粉係彈牙既，不過太辣喇，所以唔好食，下次我都係零願坐車去Causeway Bay食喇!

大約兩年幾前，仲記得第一次食阿一豬扒米線時，叫咗個中辣，明明話係酸辣，但竟然麻到成個咀痺哂，冇哂感覺，超辣呀！好似大大辣咁，最終要中途放棄。由於先食咗塊豬扒，覺得好正，所以後來只叫小辣，味道啱啱好！ 不知不覺，阿一嘅小辣後來又變得好似唔辣咁，所以又要食番中辣，但都冇初次食時嘅五份一辣度。 每次必食嘅豬扒米線，豬扒由最初每碗有4塊變咗3塊，但依然好香好淋好滑，米線少少煙韌，依然好好味！友人叫豬扒上海粗麵蕃茄湯底，夠大碗，好味！*其次，雞肝雲吞亦係阿一水準之作，但每日數量唔多，好快賣完。以前食過佢嘅豬手，但唔掂，豬手有味兼太硬冇肉... ~~自從知道阿一有下午茶特價餐後，而家每次嚟都會喺2:30pm後，除咗假期都有下午茶餐，碗米線/麵都係一樣大碗，仲平好多架！ 下午茶：只要order一杯正價飲品+$16購任何米線/麵一碗。** 碗米線等於半價！ 下次會去試吓阿一筲箕灣分店，睇睇味道有冇分別先！

北角食晏, 而近公司, 不用排隊, 平靚正的的選擇不多. 去得多譚仔, 海皇, KFC, 老麥, 南記等都會悶, 今次去試試這一間米線.剛入去, 不用排隊, 已有位. 第一次食, 可以選套餐或散叫. 想食米線, 麵食, 決定食米線. 始終招牌都寫明 "阿一豬扒酸辣米綫".本來想食雞肝雲吞米線, 但侍應話今日無 決定食阿一豬扒酸辣米綫.等了十分鐘, 一碗熱騰騰的阿一豬扒酸辣米綫上枱. 第一口, 都幾夠辣, 好香. 而米綫的軟硬適中, 好爽口, 唔淋. 米綫一淋便不好吃, 這個是爽口的, 正!再食豬扒, 好香口, 好嫩, 浸湯後可能會淋, 但這個浸完剛剛好, 正! 不過餐廳坐就唔係好好坐, 感覺張枱好似唔係咁乾淨. 下次食晏可以試試其他, 同事食豬扒飯, 賣相都好似幾OKAY.