金潮小廚

营业中

休息中

好彩有朋友住過葵芳所以發掘到依間超好食嘅餐廳，完全無令我失望呢黃金蝦超好食🤤識食一定係連殻食～好多人可能唔習慣食埋個蝦殻...但係點可以唔食埋啲鹹蛋黃架？😭😭😭依間嘅黃金蝦唔送飯食都唔會覺得太咸😆剩係為左依碟黃金蝦我都會再專登黎食😋

一班人有時諗唔到食乜，通常最後都會揀依度開餐。今次生日飯，兩個細佬都異口同聲話：食依間啦！唔使煩！依間人龍店重有得訂枱，真係算係咁，雖然去到都要等一陣~我地一行五丁人，三兄弟都算擦得下之人，總共叫左八樣野食，諗返起都幾飽~涼拌魚皮基本上係必點，爽口Q彈，配上辣辣醬汁，連唔食淡水魚既老婆都愛死~南乳豬手肉都唔算多架喇，但勝在香口，份量也算多~豉油王炒墨魚咀，好有驚喜，墨魚咀入晒味，但主角我覺得係洋蔥，最後俾我清晒~通常十個有八個都會叫佢個黃金蝦，但今次我地就試左沙律明蝦。真心好食，啖啖蝦肉，又開胃~雖然無叫黃金蝦，但就整左碟黃金鮮魷。個人覺得，鮮魷都係椒鹽既好，太厚粉了~咁多肉點都要叫返碟菜balance返，魚湯竹笙浸西蘭花係一個唔錯既選擇~另一招牌冰梅骨係我至愛，酸酸甜甜，食慾再增，搞到我叫多碟飯食~單尾就係招牌荷葉飯，查實係老媽子至愛，不過有時水準都幾參次，今次係水準之上。點解咁講？因為太多人叫，基本上會整定好多，如果個turnover好快就無問題啦，萬一撞正無乜人叫，會焗到D飯淋哂~埋單八百唔駛，經濟好味，值得推薦~ 最後願兩個細佬子康、子聰生日快樂！最緊要一家人開開心心，身體健康

其實本身都不想來這裏，但老媽子叫到，唯有去這裏食飯。好唔容易先入到去，俾咗個非常擠迫嘅位我。一入去本身想叫福建炒飯，但係沒有。所以叫咗個荷葉飯和大蜆湯。入到去，其實係折磨嘅開始。首先，聽到職員不斷大勝呼叫，兩位有位，三位有位。我心諗，其實你可以行出門口先講，本身酒樓都已經好嘈，佢哋又不斷喺度呼叫位置，聽到都頭痛。之後，其實佢地方座位嘅位置係放到密密麻麻，完全沒有一絲空間留給食客。叫咗唔夠5分鐘，荷葉飯就已經送到枱上，好明顯佢個飯係預先整定，一開個荷葉，個飯都唔係熱，CP 值十分低。味道一般。跟住嚟咗個大蜆湯，佢入邊都幾辣，蓋過左本身個湯的鮮味。最陰公係，食緊嘢嘅時候，最少比職員和食客裝裝我手臂超過七次以上。將來可以嘅日子，都唔希望會再嚟。

既然同班朋友諗唔到食咩，就不如食返啲地道野，嗌小菜啦！金潮啲食物份量算多，最緊要好味嘛。叫咗三個餸: 豉油王墨魚咀、豉汁蒸大鱔、拔絲黑豚肉。 三樣都果然好味好香，嗌小菜當然要配白飯啦，真係一流呀！不過每次嚟到都好多人等緊位，不過咁好味，等都值嘅！

同朋友約咗係葵芳食飯，聽朋友講呢間餐廳平日好多人排隊，於是約咗朋友星期五晚去咗食。魚腩煲好好味，魚腩大大塊又煲仔上好有獲氣。個炒飯就麻麻地。金沙南瓜同大蝦都好好食，大蝦食落彈牙出面有裹咗層咸蛋皮，送飯一流。冰梅骨酸酸甜甜好開胃。

金潮小廚音速餐 @ 葵芳如果去澳牛食既係光速餐，呢度我用音速餐都不足為過… 首先目測好多人等位…645pm到要人齊先安排入座。人齊後大約705pm坐低…715pm落完單…食物就好快陸續上檯。850pm我地都食到尾聲…所以放慢手腳…D姐姐就開始不停車輪戰話…“食飽啦…？”，“野食要唔要幫你包起佢…？”，“呢碟食完我幫你收起d碟先…？”，最後一個應該話得事既…“你地食完呵…？”，我地唯有講“埋單啦…唔該”知你地好好生意…我地入座前你都話最多1.5個鐘…冇問題。食飯咪還檯，都想你做多轉…不過我地又未食完…抖下氣都唔俾😅😅…咁不如你話得45分鐘食啦…食物其實都可以…不過又未好味到要返兜…個飯同椒鹽沙鑽唔錯。其他唔特別…價錢都合理…多人都有原因。不過咁趕客…好難有下次了

同事成日話有間位於葵芳的小菜好好食, 讚到天上有地下無咁, 今日中午約埋七個同事一行八人, 即管去試試係咪真係咁正, 12點30分左右到, 雖然門口暫時無人等位, 但店舖入面已經坐滿八九成人, 入座無耐就已經全場爆滿, 枱與枱之間就比較窄, 中午時段有午市套餐, 但一場黎到就一定係試佢的小菜啦, 同事推介話一定要試胡椒蜆湯, 胡椒味剛剛好, 海鮮味夠, 飲完一碗忍唔住要同事留多碗比我, 招牌黃金蝦香脆彈牙又唔油, 薑葱魚皮好爽又唔腥, 唔多喜歡食魚的我, 都食左3片, 鍾意食肥豬肉的一定要試蝦醬脆腩片, 平時少食蝦醬, 估唔到可以咁match, 其他仲有小炒皇, 魚香茄子煲, 蝦干雜菜煲同鎮店荷葉飯, 總括每樣都值得下次再試, 最後每人order返支樽裝可樂, perfect! 

每次到這裡晚飯都要有打仗般的心態，首先拎飛仔等叫位，你以為是順號碼叫？那你就錯了！一不留神，有吉枱空出，如被其他客人快你一步出聲，吉枱就會被其他客人霸佔～臨近母親節這裡未夠7pm已爆滿，一打開menu, 已看到 加價告示，每碟餸額外加價$5元！座位迫迫夾夾，但家人喜歡來這裡，惟有就範～鹹魚雞粒豆腐煲遠遠已傳來陣陣香味，砂煲上枱時仍然熱辣辣，吱吱作響！雞粒嫩滑入味，鹹魚不會死鹹，而是鹹香惹味。開胃好吃，絕對適合配白飯同吃！蒸魚需時較長，如大家有意點蒸魚，記得早一點下單！蒸倉魚配豉椒欖角，味道不錯，肉質嫩滑。小炒王有韭菜花、魷魚、豆腐乾、蝦乾、鮮蝦等炒成一碟。餸菜較為油膩，但鑊氣十足。老爸說韭菜花味辛性溫，有補腎作用。這裏小菜的味道與價錢是不錯的！但當你把餸菜吃完，店員立即就急急腳替你收碟、清潔，換一批新浄碗筷放在你面前，令你不好意思再作逗留！惟有快快趣打仗般撒退吧！！

先前在FB提過已經有好幾年未去葵芳站附近恆景花園嘅人氣小炒名店「金潮小廚」，今晚趁孩子到附近參加南華青年軍訓練之便，拉隊去「金潮」一聚。小店人氣依然鼎盛，菜單上列出廿多三十道撚手鑊氣小炒，我們所點嘅都食得大家胃口大盛，道道小菜都夠鑊氣，火喉十足。價錢維持街坊價經濟實惠，白頭佬老闆亦甚為好傾，呢一餐絕對係開心滿意！

次次黎金潮都總係會好滿足咁返屋企金瑤扒西蘭花金係金菇 瑤係瑤柱 既取瑤柱既香濃味道 又有金菇既爽脆口感 淨係個汁都可以扒兩三碗飯 西蘭花大大棵又新鮮 令人食個不停 好飽好飽胡椒蜆煲個胡椒湯真係不得了 唔會太過攻鼻 但又好有胡椒既勁度 飲完一啖又一啖 蜆大部分都好鮮甜同無沙 係有一兩隻開唔到 有泥 但總體都係勁多蜆又足料 壓軸登場係我最愛既蒜蓉粉絲蒸扇貝 扇貝大大隻但唔係我目標 佢地既蒜蓉粉絲真係無一度咁好味架 又香濃又爽口既粉絲 配埋蒜蓉同埋扇貝既汁倒落碗飯 食十碗都唔夠 講起都想再食哈哈

金潮係我中學附近，以前成日放學泥呢度食晚飯，食物一向有水準，記得好多年前唔係好多地方有黃金蝦，金潮嘅黃金__同金沙__系列一直都係水準之作。n年後再泥食，起初好怕食物差左，但今次都令我好滿意金沙南瓜: 滿滿鹹蛋黃包住南瓜，超香口，南瓜好清甜，唔算好膩，推介！沙拉蝦球: 又一金潮招牌之作，蝦球大大隻啖啖肉，酸酸甜甜食到停唔到口😝xo醬炒時蔬: 果晚的時蔬係蓮藕，xo醬好惹味😝好有鑊氣！拔絲豚肉: 全睌最一般的一道菜，味道甜甜的，一般般啦，熱果陣拉到絲哈哈。

經朋友介紹之下，與兩位知己昨晚到了葵芳的金潮小廚一試。一間小小的店鋪，裝修不是十分特別。內裏大大小小十多張枱，常客似雲來，聽聞這裏是以有鑊氣見稱。我們點了炒通菜，炸豬手，黃金蝦和污糟雞。炸豬手的炸得恰到好處，外皮小小脆，感覺頗新鮮。豬肉仍有肉汁，肉嫰，咬落去還有金香味，唔錯!相反，個污糟雞，本人認為略咸了些，雞肉一般，比起炸豬手，稍為遜色。而個黃金蝦是我最欣賞的。外形賣相已相當吸引，香噴噴，外層炸得金香 卜卜脆，好入味。而蝦肉好新鮮，彈牙可口，令我引不住，一隻接一隻。這裏，若是在周六周日來，一定要等位，可見它的美食有其吸引之處。

久違了的金潮，成大半年冇去過，前幾日同班friend去食dinner，依然鑊氣十足，冇退步油浸筍殼魚，外脆內軟，加埋蔥油汁，絶配。荷葉飯，必食之選，足料魚皮，洗得乾淨，爽口，配辣椒豉油，不過，依間金潮，唔訂位唔好去食，因為大排長龍，等好耐

想食好耐，今日終於齊腳。可惜胡椒蜆湯售罄，只好點其他。豉油皇墨魚嘴，炒得爽口鮮味，豉油香味撲鼻，咸道適中，勿忘記要食埋配菜「洋蔥」，甜香夠鑊氣。啫啫通菜煲熱騰騰，如果乾身少少會更香口。炸筍殼魚，魚骨炸得鬆脆，魚肉嫩滑。豬潤上湯浸時菜，豬潤無異味又爽滑。豬手多數係燜，而這裡的南乳炸豬手一定要試，香口柔軟，沾上南乳汁更惹味。小炒皇係朋友食小菜必點，雖然材料簡單，但勝在炒得乾身夠鑊氣，餸飯一流。期待下一次再來

家庭朋友聚會常到的小炒皇，食物質量開始走下坡，可能是味精重手，食完飯就非常口喝；等候入座安排和員工服務還有待改善；之前最喜愛小店的親切感，已經慢慢退色。。。。。