通達食店

营业中

休息中

$9一串的通達魚蛋每次收工經過通達，我都會走去買串辣魚蛋，而家街外好多魚蛋店既辣魚蛋唔夠味，唔夠辣。哩間既魚蛋細細粒，實肉既（好有以前街邊魚蛋檔既風味。不想站在門外吃？可以入鋪頭坐低慢慢食，我除左點辣魚蛋和還會叫腸粉，燒賣。又方便，又平，又能飽肚既香港小食

行過油麻地，緊係要去通達吉返串魚蛋！魚蛋彈牙，唔會浸到腍哂。醬汁依舊好味，多年不變！叫左小辣的味道，甜甜辣辣咁，非常好吃。唯獨略嫌不夠入味，若果更入味，滿足度會更高！

朝早同朋友去睇醫生，因為朋友未食早餐，經過呢間成日都好多人既小食店，買左兩份魚旦食。我呢啲慳妹平時食開$6兩串魚旦既，呢到賣$9 有6粒，如果唔係因為友人推介都唔會去試啊~ 佢有分辣同唔辣，今次試既係唔辣，一食唔係話好熱辣辣果隻，可能都煮左係到一段時間，魚旦唔算大粒，係平時四海魚旦既大少再細少少，咬落去，咦真係同平時既魚旦唔同，平時食平果啲會好粉既感覺，呢到就食落好有咬口，但又唔係好彈牙果隻，偏向實果種口感~我個人會覺得彈牙返啲會仲正。至於個汁都係重點，雖然無辣味，但佢個汁甜甜地又咸咸地咁好得意，重點係佢煮到好稠身，所以每一粒魚旦都可以痴到啲汁，食每一粒都唔會覺得淡口，神奇既地方係佢個汁既濃味並無蓋過佢本身魚旦既魚鮮味，各方面都做得好我平時唔特別中意食魚旦都覺得正呀，一分錢一分貨，難怪咁多人會買啦~~

今天工作實在太忙已至未曾吃午飯，行經油麻地碧街，便想起有腸粉可醫肚。此店到放工時間非常多人，中下午時段比較少。因要趕時間，我只點了一碟腸粉便坐下順道休息，一碟膠腸粉$13，但店只告訴我有最低消費要$14，基於心理問題，我再點了一杯豆漿，共$21。豆漿味道甜味適中，有豆味夠足料。腸粉是即叫即蒸似的，因為要等啊! 腸粉夠熱辣辣，而且非常嫩滑，相信定是加入了豬油，腸粉質地實淨夠咬口，又有口感，而醬油豉油甜醬等適當配合，ok。

如果要選代表香港既食品，除左魚蛋粉，應該就係車仔麵，又以往用木製車仔推出黎賣到而家入哂舖頭，從我6歲小學每次等阿媽接放學既5毫子一餸到而家8蚊今日行經油麻地，一出地鐵站聞到非常熟悉既咖哩魚蛋既味道，肚仔又立即响警號，唯有醫左佢再算舖頭一邊係對牆既位，中間係一排長長既枱兩邊坐人，大概可以容納40人左右有一疊點車仔麵既紙，餸既種類唔算多，特色既餸都欠奉。每款餸同麵都係8蚊一款，最少兩餸一麵。好彩有3種汁選擇，立即填上咖哩汁，因為呢種味係我既小學回憶嘛豬大腸 蘿蔔 魚皮餃 粗麵（咖哩汁）份量唔算大碗。記得細個食車仔麵麵餅係有兩個，但而家已經唔會啦，除非加8蚊揀多個，一個麵餅既麵只可以當下午茶食。蘿蔔有3大舊，佢最主要作用係索哂啲湯，咁就可以真正試到個湯既味道。豬大腸有4至5舊，算多，車仔麵必叫既餸啦，腸係剪開左，唔再係圓筒形，所以洗得特別乾淨，咬口幾爽。魚皮餃除左打邊爐，已經好少機會食到，本身有好濃既魚味，有4隻咖哩湯有好少既辣，黃色果種，味道好香好惹味，配埋索哂湯既蘿蔔係非常好味，蘿蔔好juicy。粗麵麵條幾爽口，淥得剛好總括，份量偏細，咖哩湯味道幾好少少辣，其他既餸味道不過不失，不過32

黎到油麻地, 銀包有散紙都一定會去通達吉串魚蛋, 平時真係好少o係街度食辣魚蛋, 因為以前成日都中伏, 食到D咖哩味唔夠, 又淋又鬆散的魚蛋, 不過通達的辣魚蛋我覺得係全港頭3名好食, 今次見天氣凍叫多少少入去堂食唔駛同人迫。辣魚蛋 ($10) 係貴左少少 不過魚蛋好彈牙, 一D都唔粉, 加上香味特別的咖哩汁, 入口帶有少少甜味, 辣味食到中段先會出黎, 個種辣唔單止停留表面, 真係好過癮!而旁邊的腸粉都好滑, 連埋少少辣汁一齊食又有另一番風味。最後加多左個魚肉翅, 魚肉係一粒粒的, 彈牙, 而且份量都幾多, 不過豌翅有少少咸, 但勝在多料, 有好多肉絲同雲耳! 好正呀, 香港的小食真係冇得輸!

放工勁肚餓但之後又約咗人食飯，結果就去咗通達輕食魚蛋。 腸粉拼蠔油魚蛋：腸粉熱辣辣，雖然唔係話特別好味但都叫嫩滑不過不失。而蠔油魚蛋，都叫爽口彈牙，而食完亦滿足我嘅要求飽肚。

「太過份了！每次一出油麻地地鐵站都嗅到辣魚蛋的味道，擺明要挑戰犬犬的味覺，好，我就食俾你睇！」事關這間店正正位於油麻地地鐵站A2出口，每次從這出口往地面就會嗅到陣陣香噴噴的辣魚蛋香味，可是以往只是索取過香味就路經而去，由於天氣寒冷容易產生飢餓感，終於這次真真正正被吸引上前，買了兩串香辣魚蛋。目睹冒出熱煙的爐裡，浸淫一粒粒浮現的魚蛋，同時夾雜一些紅辣椒仔，單單看著也覺得很辣，同時也覺得很美味的感覺。魚蛋粒粒大大粒，好足份量，咬落爽口彈牙，充滿口感。辣味適宜，味道濃郁，香辣易入口。$9一串比其他的店會昂貴了些少，但物有所值，魚蛋夠大粒，香辣美味，下次再食過！

今天約妹妹去油麻地食lunch,正在步出油麻地港鐵站時，已經有陣陣的咖哩魚蛋香，天氣溫度正在得8度，個身子感到好凍，而且都好肚餓，面對吸引的咖哩魚蛋，我也上前買了兩串，每串是9元，大大燈金黃色澤的魚蛋，好新鮮又彈牙，咖哩味濃郁而且辣味得宜，蘸上甜醬更有辣中又有香甜的味道，滋味非常，值得推介。

上次光顧通達食店，已是兩年多前的事了。今日路過，驚見小店面積擴充了一倍。然，食物卻不進反退。魚肉翅兩溝$21，碗仔翅質感稀稀的，材料不過是粉絲、木耳絲、蛋絲和瘦肉等，與其他店子售賣的碗仔翅分別不大。吃一碗，既填飽了自己的肚子，也滿足了吃碗懷舊碗仔翅的霎時衝動。魚肉，切成粒狀的，份量頗多，一看就知溝了很多麵粉。吃一粒，口感煙韌彈牙，魚味卻欠奉。燒賣$9/5粒，以鮮黃色薄皮包裹蒸成，咬下，只感粉味，魚味被消失了!此外，燒賣蒸到得十分粉腍，入口即糊，十分失望!

那天路過覺肚餓，就走入去「就手」醫肚啦！見店舖裡多人幫襯到水洩不通咁，想搵個位都幾難！好彩當日只是一個人逛街，容易攝位。最實際是食車仔麵，而這間店馳名係咖哩汁，咁我就點了兩種配咖哩汁最夾的牛筋腩和豆卜，與咖哩汁油麵的一碗車仔麵。盛惠港幣20元。很快麵來了，基本上是清湯加上用來浸辣魚蛋的咖哩辣汁，另外再放牛筋腩和豆卜在油麵上。所以食之前要撈一撈勻這些食材。辣度因為被清湯溝淡了所以變成微微辣，牛筋腩尚可但當然不如專做清湯牛腩的麵店般，它的肉質略為少韌。最敗筆是豆卜，心想豆卜可以吸收湯汁，該是最好味的，可是那幾塊豆卜…一咬落去，中心是凍的！！！即使將豆卜放在湯底擠壓幾下，等熱湯可以滲入豆卜中心，但都是徒勞無功所以呢…有時貪「就手」的話，很容易中伏！

店名:通達食店地址：油麻地碧街48號地下好味指數:7.7/10價錢:$9咖喱魚蛋魚蛋一串有六粒，質感爽口彈牙。味道香濃，有辣味或不辣選擇，識食一定揀辣味，香味直撲出來，辣味不是很辣，但咖喱汁本身夠惹味，略嫌魚蛋有一點腥味。

如果世上只有一樣食物，我會選擇合益泰腸粉!!!但又唔可以次次行街都去深水埗，腸粉癮發作，唯有通達頂一頂。12蚊4條，貴合益泰一倍有多，只可以話個汁稀杰度接近，與葵涌廣場地下輕鬆一下相約，止癮之用，但還是本尊好味。環保關係洗少隻碟所以我順應老細要求魚旦腸粉放埋一齊，但咖喱汁真係同腸粉唔friend, 下次死都要堅持分開上。魚旦已加到9蚊一串6粒，其實我覺得呢間魚旦唔錯，或多或少喺因為個古早味甜醬。細個阿爸阿媽無買街邊嘢我食，到小學朋友帶偷雞喺石籬屋村叫咗串魚旦，魚旦係細粒嗰款，最記得佢用個大面盤裝住兜咖哩汁，然後一大班顧客各自手攞住一串魚旦圍住個面盤，將串魚旦好似潛水咁浸入個深不見底嘅咖喱汁內，再加甜醬，到目前為止佢都係我食過最好食嘅魚旦，但食過一次就無咗了，成為我永久嘅美好回憶。

咖哩魚蛋是香港地道小食，好味的咖哩魚蛋不一定要大粒，但一定要夠彈牙。咖哩亦好重要，單單魚蛋表面有色而內裡沒味，光有外表不足夠。這裡的咖哩魚蛋夠彈牙，在咖哩以外兼帶香辣，怪不得經常排長龍。已經一段時間沒來光顧，每次來，總要吃兩串才能滿足口腹之欲。不過今次有點失望，沒過往那樣彈牙，好像遜色了。因為太肚，除了兩串辣魚蛋，另加4條腸粉和一杯豆漿。兩樣食物水準一般，勝在腸粉夠熱夠爽口，豆漿也夠濃有豆香。

今日剪完頭髮又未夠鐘食飯，真係極需要少少野食醫下肚，行下行下就去到油麻地嘅通達，好！一於整返3串魚蛋先，呢度嘅魚蛋係少有有地彈牙，同埋佢啲辣汁係真係滲到入啲魚肉入面，唔係整係喺魚蛋嘅表面，加返一杯佢新鮮嘅豆漿，豆味幾濃，又解到辣，唔會太甜，呢個小食我相當滿意！