越萊 (廟街)

营业中

休息中

拎外賣個時覺得好貼心，配菜、湯同河粉都分開，可以因應自己需要調配。湯底同河粉都好味，牛骨湯清甜，河粉幼身有米香而且唔碎; 牛肉OK，好熟都唔韌(我太遲先去才拎); 豬軟骨麻麻哋，味道唔錯，但冇入口即融既感覺。通菜個汁似係自己調，近XO醬，都okay，但少油。欣賞個套餐可以免費加越式咖啡同柑橘蜜。叫左柑橘蜜，味道正路。外賣自取有7折，自己一個叫都正，$70有咁多嘢，而且味道唔差，性價比算好高。可以一試。

難得放假, 梗係想食餐好嘅朋友介紹呢間越南野幾抵食, 一於去試吓Lunch有set可以比大家揀 仲免費配埋柑桔蜜 亦都可以加錢要特飲 食物款式都多選擇 基本越南菜有既菜色都有 我哋叫咗一個三餸湯河 可以用優惠價加配小食 三個小食都好吸引呀 最後呢我哋就揀咗蒜蓉牛油雞翼另外再叫咗豬頸肉，馬拉盞炒通菜黎share先講吓碗三餸湯河 牛骨湯好味，配埋生牛肉就最fit啦個加配嘅雞翼啱啱炸起 熱辣辣送上黎 正!豬頸肉份量啱啱好，味道都唔錯馬拉盞通菜好惹味同朋友食到好飽 果然朋友冇介紹錯 係性價比高既一餐 另外見佢餐牌仲有越式撈檬粉同埋越南法包 下次一定會同朋友再搵日嚟試吓另外要講一講就係佢環境充滿越南feel 雖然間店細細間但係都裝修得幾靚 坐得都算舒服

越式餐廳黎講佢個裝潢都乾淨企理，環境舒服食都食得開心啲，有個open bar kitchen，用藍綠色做主色幾靚👍越式自選河粉大大碗都只係40幾蚊，有河粉同檬粉揀，我地叫左手撕雞牛腩河粉配招牌牛骨湯，餸料份量多唔在講，牛腩佢地整得超稔而且好入味，入口即溶都唔太洗咬，牛骨湯頗香，河粉吸埋湯汁一啖連肉絲好好食，仲有香葱芽菜拌埋，朋友叫左厚燒豬扒肉碎煎蛋飯，醬汁惹味，豬扒肉質一啲都唔嚡，佢都話好好食，雞肉串3串盛惠40蚊，加沙嗲醬好味，炒通菜就係我地想健康啲哈哈，但佢辣辣地都好惹味，絕對係地道越南菜既口味，性價比高所以遲啲會再返check👍

放假又去搵吓嘢食，今次嚟到佐敦，搵到呢間食越南嘢嘅Lunch 時段提供12個午市套餐選擇，大致分3大類，而每個餐+$10加配小食1) 越式湯河有4個餐2)越式凍撈檬有5個餐3)飯類有3個餐望完一輪最終點咗一份湯河兩份撈檬😂▶️牛萊了 (生牛肉，牛腩，牛筋，牛丸2粒，牛𦟌)好多料，而越南湯河最重要嘅生牛肉，入口新鮮嫩滑，其他配料味道都好好，讚👍▶️香茅牛肉撈檬，牛肉和檬粉嘅份量都夠多，味道都好唔錯▶️厚燒豬扒蝦餅撈檬，豬扒份量都好足夠，蝦餅就正正常常 另外加咗2份小食▶️越萊炸春卷，河內鮮蝦仁米紙卷，春卷細細條但都炸得好脆，米紙卷就不過不失▶️熱柑桔蜜，由於對越南咖啡興趣不大，所以就無試到了總結：整體來講午餐夠多選擇，食物質素好好，份量亦足夠，價錢算合理，唯一唔好就係舖位較細，枱與枱都排得較密，用餐時可能會有擠逼感

今次同friend去咗佐敦呢間餐廳食越南菜。餐廳裝修好靚，佢d燈光好舒服。咁岩係lunch time, 餐廳有lunch set, 真係好抵食，40幾蚊至到50幾蚊左右，就有一個湯麵set, 仲包咗飲品👍👍 我地叫咗一個lunch set自選湯粉，揀咗生牛肉、蘿蔔、唐生菜，依家冇得去旅行，唯有食下生牛肉湯河頂住檔先！個河粉好食，湯底又夾！仲有個lunch set 可以加$10 配小食，我地配咗個蒜香牛油雞翼，脆脆地又香蒜味。個lunch set 性價比高！仲叫咗其他野食，有炭燒豬頸肉、潘良帶子明蝦伴茄子、西貢馬拉盞炒通菜。上菜速度好快，好快就成枱食物。個茄子好好食，冇諗過茄子配帶子個口感唔錯！飲品就飲咗 青檸梳打，熱天飲呢個一流！

今次幫襯左一間位於廟街嘅越南餐廳，地理位置便利，喺佐敦地鐵站C出口落再行三分鐘左右就到，約朋友去聚係幾唔錯。餐廳環境唔錯，冷氣夠晒大，門面乾淨企理，光線充足。今次兩個人嚟，有張二人枱坐，坐得幾舒服。我地兩個人嗌左三樣嘢食，分別係越萊經典撈檬、照燒雞扒肉碎煎蛋飯同埋4件河內蝦仁米紙卷。三樣嘢加埋兩杯飲品都係齊頭$150，抵到爛，份量仲要夠晒食😬好，而家逐樣餸講吓。河內蝦仁米紙卷要嚟做前菜一流，皮薄，但餡料又唔會散出嚟，料亦十足，加埋啲酸醋，非常醒胃。越萊經典撈檬有好多唔同種類嘅肉做餸，食肉獸嗌呢個一流，個碗粉份量相當勁，如果係女仔食可以嗌少份量，如果唔係應該會食唔晒😂最後就係照燒雞扒肉碎煎蛋飯，我幾鐘意隻蛋嘅熟度，有足夠蛋汁俾我送飯，雞扒又醃製得剛剛好，入味，成餐飯好滿足。

一坐低就被特色吊燈同埋色彩繽紛嘅草帽裝飾所吸引，樓底高，燈光柔和，上菜速度都幾快，肚餓嘅我哋好快就有得食👍🌟牛萊了 $68叫左一個越南湯河，份量足料，有生牛肉、牛腩、牛筋、牛丸同埋牛𦟌，湯底係招牌牛骨湯，味道濃郁，幼身嘅河粉入口順滑，生牛肉夠薄身吾會鞋，牛丸都幾彈牙，最鍾意係牛筋同蘿蔔，入味又軟腍🌟越萊經典撈檬 $60撈檬嘅配菜有香茅牛肉、厚切燒豬扒同豬頸肉，燒到乾身唔油膩，香料味道濃厚，配上清新嘅撈檬，都幾適合夏天食🌟越萊串雞 3串 $40串燒帶有咖喱味道，個人嘅口味比較淡所以唔使點附上嘅沙嗲汁都覺得夠晒味🌟越萊蒜香牛油雞翼 3件$26雞翼外皮酥脆，炸粉都唔算厚身，連埋熟蒜蓉一齊食味道都幾香😋上菜嘅碟好得意好有越南特色，啱晒打卡🤣青檸梳打只係加$3👍

今日落雨落到七彩 當然會係想食番一碗熱騰騰嘅麵啦 係廟街食店林立 搵到e間小店好越南野嘅 茶餐十分抵食 一個主菜 一杯野飲 柑桔蜜 最便宜42 蚊有找 叫左一個牛萊了 啱哂貪心想食多幾款嘅我 有齊生牛肉 牛腩 牛丸 牛筋 牛𦟌 我仲加多左40 蚊轉安格斯牛小排生牛肉 生肉嫩滑得黎 又有牛味同口感 最喜歡係牛丸 爽口彈牙 冇雪味係靚牛丸 牛腩都唔錯 肥瘦分明 牛脂香重 牛肉湯底清甜 河粉滑溜 配料充足 有幾多芽菜九層塔 辣椒 十分滿足加多10蚊可以配小食 叫左手工越式春卷 好脆口 裏面有木耳絲同豬肉 仲有竹造嘅盤 好有特色 加分！配酸汁 有魚露係入面 提鮮不錯 再叫多左一客牛油雞翼 香脆可口 上面仲有d蒜粒 食落更可口 雞翼肉質嫩滑 仲有少少肉汁 反而牛油味唔係好出  不過係好味既 鋪仔細細價錢又唔貴 收貨！

明明寫10分鐘就拎得，結果搞左45分鐘😡做唔切唔緊要，唔好呃人話10分鐘搞掂失晒時間預算做其他嘢😡好失望,好生氣!唔建議大家再去食!我以後會BLACK LIS佢

小編食咗依間餐廳都已經三次，每次我都唔記得咗影返張相，今次終於記得啦，每次去食我都係好肚餓，所以一定會叫佢個撈檬，仲要係越萊經典撈檬，裏面會有香茅牛肉，豬扒同埋豬頸肉，另外我仲會加個牛油雞翼添，食完之後真係好滿足，小編最愛就係佢嘅香茅牛肉啦，豬頸肉同埋牛油雞翼，不過冇一個餐有晒依三樣😂😂😂，所以食完之後真係好飽，而且天氣太熱，都鍾意食啲酸酸地嘅嘢,撈檬就最啱啦😋P.S:如果大家都有興趣食，咁就要早啲去排隊，一間野真係好搶手，出面成日都要排隊🤦🏻‍♀️

佐敦不嬲都係一個好多美食嘅地方。咁今次就揀咗呢間CP值極高嘅越萊，午餐時間其實係相當抵食嘅！我就揀咗牛腩牛筋同埋生牛肉三款餸嘅河粉。牛腩係相當大件，同埋份量都好多，唔會話太硬身。牛筋係相當林。另外嗰粉都會跟埋一啲蘿蔔，都係相當入味。湯底相當香同清，完全唔肥膩。另外加咗$10有兩隻嘅牛油雞翼係超級好食，超級推介！因為個雞翼本身就揸得好香口，個脆皮係好好食，加埋佢嗰啲牛油味係相當邪惡，上面仲有一啲蒜粒係好夾既。

去開佐敦呢頭，同朋友行下行下黎到廟街，見到呢間越南小店，好似唔錯，價錢都相當划算，所以決定入去試試！入到去店員好有禮貌，餐廳裝修都好新穎，餐牌有午市套餐，包埋嘢飲同可以加$10叫小食。我地叫咗兩個套餐，一個越式扎肉撈檬餐，一個素食既自選三餸麵。小食叫咗米紙捲同埋春捲share。越式扎肉撈檬份量好夠，配搭魚露酸辣，好清新，適合依家咁熱既天氣！自選三餸麵我地想清清地，所以叫曬素食選擇，豆卜、冬菇、同蘿蔔。要贊贊個湯底，我地要咗雞湯，有淡淡的檸檬味，好refreshing！米紙捲同春捲各有兩份，夠我地share！ 米紙捲有蝦，加埋個醬，好開胃又健康！春捲就炸得剛剛好，好脆但唔會覺得好熱氣，裡面有D豬肉同蔬菜絲，好食！最後要介紹下杯柑桔蜜，好味之餘又潤喉！

早收工又食下午茶，之前幫襯過深水埗分店印象很好，見佐敦近返工地方有分店就再幫襯下。在門口已經看到和之前不同，推出了一些新的下午茶和全日套餐。見到有人在門口等……哇入到去咁多外賣，座位也坐了一半以上，似乎生意唔錯。即使繁忙，店員都很有禮貌會帶位、探熱同派紙仔寫資料，很盡責和勤奮。點了個全日套餐，精選火車頭，加了一份河內鮮蝦仁米紙卷和凍越南咖啡（對上一次是熱啡，天時暑熱試下凍的）。小食先來，有青瓜和蔬菜的配搭讓味道很清新，蝦仁很爽脆。表皮煙韌，中間一條條的有毛細管作用把醬汁充分吸收，酸酸甜甜很開胃。店員們在繁忙時間仍能保持速度，很快就來了主食。我一看這碗的大小，差點以為自己叫了一個火鍋。越式湯河當然要放九層塔、辣椒和青檸汁。點解話好似一個火鍋，因為配料嘅款式同份量真係有一煲火鍋咁多。款式已經有7、8款，每樣嘅份量都有3~4件，唔係好似某D車仔麵/米線鋪叫得越多款就每款越少咁樣。越式湯麵必須有嘅生牛肉，還有粉紅色，入口鮮嫩易咬。牛筋&豬軟骨，豐富嘅骨膠原❤豬軟骨好軟，全舊都冇硬骨結實而且有牛味嘅牛丸，咬開可以睇到有少少牛脂肪嘅粒粒。越南咖啡凍飲都一樣香甜。食完成碗好似打完任食邊爐咁飽。而價錢

中午去完尖沙咀睇藝術展覽後順便去附近搵食。記得附近有間越式餐廳，因剛好未夠鐘開門所以就係門口等開門。入面地方不大只有十張枱左右，因防疫規定只能坐一半人所以要等比較耐。睇左餐牌一陣最後決定點照燒雞扒豬頸肉撈檬＆厚豬扒蝦餅撈檬 2款人氣主打。照燒雞扒豬頸肉撈檬豬扒及雞扒醃得入味，份量夠大，而且配菜多。厚豬扒蝦餅撈檬豬扒夠厚份量足而且醃得入味，而蝦餅味道偏咸。撈檬汁味道不夠酸，整體是好食，加上店員的服務態度很好。但味道相對深水埗的分店始終略有點遜色。

约友人在佐敦吃飯吃飯,就看看有什麼好吃在近柯士甸的廟街有很多食店整條街都是食,我們就選了此間越南餐廳。雖然店舖不大但都坐滿了。看看餐牌价格都不貴,套餐生牛肉粉只是34元可加10元有ㄧ份小食及可自由加$加餸。另有2人套餐都好美味